Gɔbega: Hurricane Ian, Florida, USA, September 2022 (Sean Rayford/Getty Images); tiŋasuka: Ma la a bia n zoti lɔŋera tiŋa, Donetsk, Ukraine, July 2022 (Alex Chan Tsz Yuk/SOPA Images/LightRocket via Getty Images); vuɔ: ba tɛɛseri la nɛreba COVID bã’a la, Beijing, China, April 2022 (Kevin Frayer/Getty Images)
KƆ’ƆN PIGERA!
Yuun 2022: Baabule La Yeti Bem La Yuunɛ Wa N Kɔ’ɔn Pirɛ La Daaŋɔ Yɛla Ma’a La?
Yuun 2022 poan, to kɔ’ɔn wuna la lasebaarɛ n tɔɣeri zaberɛ, nɔŋɔ la yeledi’ima yɛla. Baabule la ma’a n wan ta’an pa’alɛ yele ana wa za’a vuurɛ.
Yelese’a n eŋɛ yuun 2022 la vuurɛ
Yelese’a n eŋɛ yuunse’ere n tole la basɛ ti to sirum baŋɛ ti to boi la dabesa se’a ti Baabule la yi’ira ‘ba’asegɔ dabesa la’ poan. (2 Timoti 3:1) Ba’asegɔ dabesa la yuun pɔsɛ la yuun 1914. Bisɛ yelese’a n eŋɛ dabesa ana wa n makɛ la Baabule la n tɔɣɛ tomam dabesa wa yele se’em:
‘Zaberɛ.’—Matu 24:6.
“Yuun 2022 Dela Yuunse’ere Ti Europe Tisi Le Nyɛ Zaberɛ N Sige.”a
Bisɛ zaseŋɔ yele la zuo n de “Russia N Isige Zabera La Ukraine.”
‘Dipɔ’ɔsegɔ.’—Matu 24:7.
“Yuun 2022: Yuunse’ere Ti Kom Biɣeliga Bɔna.”b
Bisɛ zaseŋɔ yele la zuo n de “Ukraine Zaberɛ La Basɛ Ti Dipɔ’ɔsegɔ Malum Gaŋɛ La Nu’usi Tingole Wa Zɛ’an Woo Poan.”
‘Bãyooro.’—Luke 21:11.
“Dɔɔ bã’a (polio) le bɔna mɛ, monkeypox me laŋɛ nɛreba mɛ ti COVID-19 me kelum kuura nɛreba zo’e zo’e. Yele ana wa basɛ ti to baŋɛ ti bã’asi lomeseri nɛreba mɛ ti la dɛna daaŋɔ paa bɔ’ɔra asaaleba.”c
Bisɛ zaseŋɔ yele la zuo n de “Baabule La Yeti Bem La COVID Bã’a La N Ku Nɛreba Tusatusa Ayoobe La?”
‘Yɛla n tari dabeem.’—Luke 21:11.
“Tuulega, warɛ, bugum n ni taɛ dita la kokemɔ wan dɛna la yelese’a ti nɛreba wan tɛ̃ra yuun 2022 poan. Yuun denɛ mea nɔɔ ti tinparɛ la sa’ana, nyaa basɛ ti yeledi’ima sa’am lɔɣɔrɔ zo’e zo’e, ku nɛreba tusa ti nɛreba tustusa me ka tara kɛ̃’a zɛ’an.”d
Bisɛ zaseŋɔ yele la zuo n de “Baabule La Yeti Bem La Tingole Wa Zɛ’an Woo N Tuulegeri La?”
‘Gbiregere yɛla.’—Luke 21:9.
“Ban yuun kɔ’ɔn pa’aseri lɔɣɔrɔ ligeri kalam kalam, ti leebego yɛla me ka kena soŋa yuun 2022 poan la zuo, nɛreba zo’e zo’e yuun isige mɛ giisa gɔmenadoma tisi ase’a poan.”e
Bisɛ zaseŋɔ yele la zuo n de “Baabule La Yeti Bem La Sɛla Woo N Eŋɛ Ligeri Tingole Wa Za’a Poan La?”
Bem n wan eŋɛ yuunse’ere n keni na la poan?
Nɛra kan ta’an pa’alɛ sɛla wana mɔpi n wan eŋɛ yuun 2023 poan. Ton mi sɛla dela, la kan yue, Naayinɛ Na’am la bii a saazuo gɔmɛt la wan maalɛ tingɔŋɔ wa yeledaaŋɔ la za’a. (Daniel 2:44) Gɔmena kaŋa wan yese yelese’a n ta’asɛ ti asaaleba namesa ge basɛ ti Naayinɛ puti’irɛ n de sɛla la tum tingɔŋɔ wa zuo.—Matu 6:9, 10.
To kpemese ho giila ti ho nana Yezu Krista ka’aŋɔ ge ‘kɔ’ɔn pigera’ ti ho baŋɛ yelese’a n iti tingɔŋɔ wa zuo la n basɛ ti Baabule yetɔɣebiŋ’a tuna tuuma se’em. (Mark 13:37) Soso, nyɛ tɔ ti to soŋɛ hɔ ti ho baŋɛ Baabule la n wan ta’an soŋɛ ho se’em nananawa la, la wan ta’an basɛ ti hon la ho deodoma tara beere sa’am puti’irɛ ti yɛla wan ta ana soŋa se’em.
a AP News, “2022 Was Year the Horror of War Returned to Europe,” by Jill Lawless, December 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, September 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, October 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, December 8, 2022.