BUNBILIPAALESI SOKE YETI
Baabule La Wan Ta’an Soŋɛ Mam La Wani?—Bɔberɛ 2: Basɛ Ti Ho Baabule Kaalegɔ La Tara Pupeelum
Bunbilipaalega ayima yu’urɛ n de Will yeti, “ho san ka mina hon wan kaala Baabule la se’em, ku kaalegɔ ta’an siira inya.”
Hon wan bɔta ti ho baŋɛ hon wan eŋɛ se’em ti ho Baabule kaalegɔ la tara pupeelum? Yele ana wa wan soŋɛ hɔ.
Kaalɛ Gulesegɔ la wuu ho daa boi bim me la
Dekɛ homea pa’asɛ hon kaali sɛla la poan. Ho ta’an eŋɛ yele ana wa:
Loe Baabule gulesegɔ ti ho bɔta ti ho zamesɛ. Ho ta’an loe Baabule poan yelese’ere n tabelɛ eŋɛ bii Yelesoma gɔnɔ la bii ho kaalɛ kɔ̃a Baabule kaalegɔ de’eŋo la n boi jw.org la poan.
Kaalɛ yele la. Ho ta’an kaalɛ dɛ ho ma’a bii hon la ho zɔdoma bii ho suurɔ laɣum kaalɛ dɛ. Ayima ta’an dɛna solensɔlena la ti sɛba n gee la me kaalɛ bɔba se’a n gee la.
Tiregɛ dekɛ yelese’a n boi tiŋanɔɔrɛ wa tum tuuma bisɛ:
Dɔreŋɛ fɔɔra ti la pa’alɛ yele la n ani se’em. Bii ho tigese fɔɔra biŋe ti la pa’alɛ yele la n eŋɛ doose taaba se’em nima nima. Gulesɛ foote woo yelezure n pa’alɛ sɛla.
Dɔreŋɛ fɔɔra n pa’ali yɛla. Makerɛ, ho san kaalɛ Baabule poan nɛra yele, dekɛ a hala la a tuuma la makɛ la eŋa n nyɛ kã’a se’em.
Dekɛ yele la bo lasebaarɛ. Bo lasebaarɛ ge me “soke” Baabule poan nɛra la, la sɛba n yuun nyɛ yele la ti ba pa’alɛ yɛla n yuun ani se’em.
Baabule poan nɛra la san tue mɛ, ti’isɛ bisɛ la wan ana en se’em. Makerɛ, geele Peter n yuun zaɣesɛ Yezu se’em la bisɛ. (Mark 14:66-72) Peter yuun wan eŋɛ ni la wani yele la poan?
Ho san wan ta’an eŋɛ yɛla ase’a pa’asɛ, dekɛ yele la ti ho kaalɛ la gulesɛ homea Baabule de’eŋo. Dekɛ yelese’a ti ho wan ta’an zamesɛ pa’asɛ bim.—Arom 15:4.
Ho wan ta’an kaalɛ Baabule la wuu ho daa boi bim me la!
Viisɛ baŋɛ!
Ho san viisɛ gulesegɔ la soŋa, ho wan nyɛ tuulum yelese’a n suɣɛ la. Yelemɛŋɛrɛ, saŋa ase’a yelebire bii yelebɛa ayi n pa’asɛ yele la poan la yele pakɛ mɛ.
Makerɛ, dekɛ Matu 28:7 makɛ la Mark 16:7.
Beni n sɔi ti Mark yuun yeti Yezu wan niɛ amea pa’alɛ a podɔleba la, “la Peter”?
Sɛla n wan basɛ ti ho ti’isɛ: Mark yuun ka nyɛ yele ana wa woo la a nini ge la niɛ peelum ti Peter n yele en yelese’a n yuun eŋɛ la.
Tuulum yele: Beni n sɔi ti Peter yuun nyɛ subuɣelegɔ se’em ma’a ti a wum ti Yezu boti a le nyɛ en la? (Mark 14:66-72) Yezu yuun eŋɛ la bem pa’alɛ ti Peter yuun sirum dela a zɔsonkɔ? Ho wan eŋɛ la wani tɔɣesa Yezu dɛna zɔsonkɔ bɔ’ɔra nɛreba?
Ho san kaalɛ Gulesegɔ la wuu ho daa boi bim me la ge me eŋɛ viisegɔ soŋa, ho Baabule kaalegɔ la wan tara pupeelum!