Tɔɣera Baabule Yelemɛŋɛrɛ La Soŋa Ge Me Tara Yelemɛŋɛrɛ

1. To wan eŋɛ la wani laɣum pa’asɛ Yehowa yizuo la poan?

TO SAN nan seke mabia to ni soke taaba yeti, “Hon eŋɛ la wani baŋɛ yelemɛŋɛrɛ la?” Sɛba ni lebese yeti ba uge bamam la “yelemɛŋɛrɛ” la poan. Ti sɛba me ni yeti dabesa aŋa wa poan ti bamam nan “zamesɛ baŋɛ yelemɛŋɛrɛ la.” Ton lebese bala la dela, yelemɛŋɛrɛ la n de Naayinɛ yelesum la pa’ali to la to wan vɔna to vom se’em. Bem zuo? Sɛla n sɔi la, to mi ti to san nɔŋɛ yelemɛŋɛrɛ la ge me tara dɛ tuna tuuma to laɣum pa’asɛ la Yehowa yizuo la poan. Bala pa’alɛ ti to itigɔ la to yetɔɣum nari ti la dɛna yelemɛŋɛrɛ.—Ym. 15:​1-3.

2. (a) Nɛreba yuun mi Yezu la wani? (b) Yelemɛŋɛrɛ la ti Yezu yuun pa’ala la yuun basɛ ti la ana nɛreba la wani?

² Yezu yuun kɔ’ɔn tɔɣera la yelemɛŋɛrɛ. La boi bim ti a dindoma la yuun ka boti eŋa n tɔɣeri sɛla la ge ba yuun sakɛ ti eŋa n tɔɣeri sɛla la dela yelemɛŋɛrɛ. (Mt. 22:16) Yezu yuun yele a podɔleba la, lan wan ana nɛreba se’em la yelemɛŋɛrɛ la ti a pa’ala la. A yeti: “Mam wa’ana te n bahɛ te dayɔa n zabera ka sɔ, te pugela me zabera la ka ma, te pɔka me zabera la ka dayaama.” (Mt. 10:35) Yezu yuun ka boti nɛreba zɛregɛ yelesum la ti eŋa la a podɔleba mɔɔla la ge a yuun mi ti basɛba wan zaɣesɛ. (Mt. 23:37) A yuun mi ti a yelesum la wan basɛ ti yelesego bɔna nɛreba tiŋasuka. Basɛba wan nɔŋɛ Baabule yelemɛŋɛrɛ la ge ti basɛba me kan bɔta.—2 Tes. 2:​9-11.

3. To wan sɔsɛ la bem zaseŋɔ wa poan?

³ Wuu Yezu la, to me tiregɛ tara la yelemɛŋɛrɛ ge me tɔɣera yelemɛŋɛrɛ saŋa woo hali nɛreba san puɣum ka bɔta bala. La boi bim ti nɛreba basɛba sunsɔa ta’an nyie la sɛla ti to tɔɣera la ge to kɔ’ɔn mɔɔla ge pa’ala Baabule yelemɛŋɛrɛ la mɛ. Bala pa’alɛ ti la ka nari ti to ni geele bisɛ to wan tɔɣɛ yelemɛŋɛrɛ la se’em? Daɣɛ bala la fii me! Zaseŋɔ wa poan, to wan nyɛ sokere wa lebesego: Bɛ ti to wan ta’an nyɛ yelemɛŋɛrɛ la? To me wan le nyɛ soke ana wa lebesego: Bem zuo ti la nara ti to tɔɣera yelemɛŋɛrɛ la ge to wan tɔɣɛ dɛ la wani? Wani ma’a ti la nara ti to tɔɣera yelemɛŋɛrɛ la? Soke ana wa lebesego wan soŋɛ tɔ ti to ta’an tɔɣera yelemɛŋɛrɛ la soŋa soŋa ge me mina guŋerɛ la sansɛka n nari ti to tɔɣɛ.

BƐ TI TO WAN TA’AN NYƐ YELEMƐŊƐRƐ LA?

4. Beni sɔi ti to yeti yelemɛŋɛrɛ la ze’ele la Yehowa zɛ’an na?

⁴ Yelemɛŋɛrɛ la ze’ele la Yehowa zɛ’an na. Sɛla woo ti a tɔɣera dela yelemɛŋɛrɛ. Makerɛ, eŋa n pa’alɛ sɛla n de tontɔɔ la sɛla n daɣɛ tontɔɔ. (Ym. 19:9; 119:​142, 151) Sɛla woo ti a ni yeti la wan eŋɛ beere sa’am la ni sirum tum mɛ. (Isa. 55:​10, 11) A ka malum tɔɣɛ sɛla ge ti la ka tum. (Kan. 23:19) Yelemɛŋɛrɛ, Yehowa kan ta’an parum! (Heb. 6:18) To mi ti Yehowa dela “sakerɛ sera Yenɛ.”—Ym. 31:5.

5. Beni n sɔi ti la ka kpe’em ti to baŋɛ “sakerɛ sera Yenɛ” la? Tɔɣɛ pa’alɛ. (Tooma 17:27)

⁵ Nɛreba basɛba yeti la kpe’em mɛ ti ho baŋɛ Yehowa, “sakerɛ sera Yenɛ” la. Yelese’a ti to nyɛta la pa’alɛ ti Naayinɛ boi. (Arom 1:20) Paul n yuun tɔɣeri bɔ’ɔra Greek gɔnmi’ileba n boi Atens la, a yuun yeti Naayinɛ boti la to ‘ɛɛra en’ ge “[a] ka zaen la to.” (Kaalɛ Tooma 17:27.) Yelemɛŋɛrɛ, Yehowa ve’eri la sɛba n siregeri bamea ge me bɔta yelemɛŋɛrɛ la paara amea.—Yon 6:44.

6. Bem yɛla n boi Baabule la poan ge beni n sɔi ti hon puurɛ pee la yelemɛŋɛrɛ aŋa?

⁶ Sore deyima poan ti to wan ta’an baŋɛ Yehowa dela to san zamesa Baabule la. Naayinɛ dekɛ la a zilam vo’osum la soŋɛ buraasi ti ba gulesɛ Baabule la. (2 Pe. 1:​20, 21) Bala la, sɛla woo n boi Baabule la poan la dela yelemɛŋɛrɛ ge ti to me wan ta’an sakɛ bo. Makerɛ, to sakɛ ti Baabule la n tɔɣɛ saazuo la tinparɛ wa n pi’ilum se’em ti vom bɔna bim la dela yelemɛŋɛrɛ. (Pin. 1:​1, 26) To sakɛ Baabule la n pa’alɛ sɛla n sɔi ti be’em, kum la namesegɔ bɔna la. (Arom 5:12; 6:23) To tari suure lua la Baabule la n yeti Yehowa wan doose la a Dayua la poan malum maalɛ sɛla woo ti Sitaana n de “ponpɔrɔŋdoma naba” sa’am la. (Yon 8:44; Arom. 16:20) To tari sakerɛ la Baabule la n pu’ulum biŋe ti Yezu wan sa’am putɔpa, isige sɛba n ki la, malum maalɛ tinparɛ wa ge me soŋɛ tɔ ti to ta ana kasi la. (Yon 11:​25, 26; 1 Yo. 3:8) Bisɛ Yehowa n bo to yɔ’ɔ kãtɛ se’em! A pa’alɛ tɔ yelemɛŋɛrɛ la ge me bo to yɔ’ɔ ti to me pa’ala nɛreba.—Mt. 28:​19, 20.

BEM ZUO TI TO TƆƔERA YELEMƐŊƐRƐ LA

7-8. Sɛla n sɔi ti to tɔɣera yelemɛŋɛrɛ la yele pakɛ Yehowa mɛ. Bo makerɛ. (Mark 3:​11, 12) (Bisɛ fɔɔra la.)

⁷ Wuu to puɣum baŋɛ se’em la, la nari ti to tɔɣera yelemɛŋɛrɛ to san bɔta ti to kelum bɔna Yehowa yizuo la poan. Ge to san bɔta ti a puurɛ pee, la ka nari ti to yeen tɔɣera yelemɛŋɛrɛ ma’a. Sɛla n sɔi ti to tɔɣera yelemɛŋɛrɛ la pakɛ Yehowa mɛ. To geele bisɛ Yezu n yuun boi tinparɛ wa zuo mɔɔla la. (Kaalɛ Mark 3:​11, 12.) Yezu n yuun ta lɛm Galilee Mɔɣerɛ la mɔɔla la, nɛreba zo’e zo’e n yuun paɛ a zɛ’an. Kolekpabɛ’ɛsi n yuun doli basɛba ti ba luta Yezu nɛŋan ge kaasa ti: “Ho dela Yenɛ Dayɔa.” Beni n sɔi ti kolekpabɛ’ɛsi la yuun tɔɣɛ yelemɛŋɛrɛ ti Yezu dela Naayinɛ Dayua? Daanse’ere ba boti la ba tɔɣɛ ti nɛreba la dekɛ bamea delum ba ge nyaa pã’asɛ ba ti ba da le pu’usa Yehowa. Kolekpabɛ’ɛsi la n yuun tɔɣɛ sɛla la dela yelemɛŋɛrɛ ge ba yuun tari la putɛbe’o. Ba yuun ka pã’asɛ Yezu bii ba eŋɛ sɛla la ti a puurɛ pee. Hali, Yezu yuun yele kolekpabɛ’ɛsi la ti ba da mɔɔlɛ a yele.

⁸ To wan zamesɛ la bem yele wa poan? Sɛla zuo ti to tɔɣera yelemɛŋɛrɛ la pakɛ Yehowa mɛ. Bala la, la yele pakɛ mɛ ti to mɔɔla yelemɛŋɛrɛ la bɔ’ɔra nɛreba ge ba me san pɛ̃ɣera tɔ, to wan dekɛ pɛ̃ka la bo Yehowa!—Mt. 5:16; dekɛ makɛ Tm. 14:​12-15.

9. Bem ti la ka nara ti to ita ge bem zuo?

⁹ Geele bɔnsɛka poan ti la ka nara ti to eŋɛ sɛla ti nɛreba yeen pɛ̃ɣera tɔ. To makɛ yeti mabia n wum suɣelum yɛla nyaa tara ɛɛra tɔɣera bɔ’ɔra nɛreba. Mabiisi la ti to tɔɣɛ bo ba la san ta baŋɛ ti sɛla ti to tɔɣɛ la dela yelemɛŋɛrɛ, ba puurɛ wan pee ti ba ti’isa ti tomam mi la suɣelum yɛla zo’e zo’e. Bala wan basɛ ti ba ti’isa ti to dela nɛrezureba ge la kan basɛ ti Yehowa puurɛ pee. (Mag. 11:13) Bem zuo? La boi bim ti sɛla ti to tɔɣɛ la dela yelemɛŋɛrɛ ge la ka nari ni ti to tɔɣɛ. La me pa’alɛ ti to ka tari putɛsonɛ la sɛla ti to tɔɣɛ la.

TON WAN TƆƔERA YELEMƐŊƐRƐ LA SE’EM

10. La vuurɛ dela bem ti to basɛ ti to yetɔɣum “ana soŋa”? (Kolose 4:6)

¹⁰ Kaalɛ Kolose 4:6. Tuntuna Paul yuun tiɛ Kristakɔma n kɛ̃’ɛri Kolose ti ba basɛ ti ba yetɔɣum la “ana soŋa ge eta nɛreba suunre me nyɛlom.” Bala vuurɛ? Greek yelebire la ti ba dekɛ tum tuuma la pa’alɛ ti to yetɔɣum nari ti la soŋera nɛreba ti guŋerɛ bɔna bim ge me ana soŋa.

11-12. Beni n sɔi ti la nara ti to dekɛ yɛm tum tuuma to san pa’ala yelemɛŋɛrɛ la? Bo makerɛ. (Bisɛ fɔɔra la.)

¹¹ La nari ti to dekɛ Paul ka’aŋɔ la tum tuuma ge basɛ ti to yetɔɣum la ana soŋa to san pa’ala nɛreba yelemɛŋɛrɛ la. Baabule la dekɛ yelemɛŋɛrɛ la makɛ la su’a n tari nɔya ayi ge dita, kɛ’ɛra paara suuren. La ta’an basɛ ti to baŋɛ ton ani se’em to suuren. (Heb. 4:12) Ge to san ka tara Baabule la pa’ala soŋa nɛreba sunsɔa ta’an nyie la tɔ. La wan eŋɛ la wani ta’an eŋɛ bala?

¹² Makɛ bisɛ ti ho boi la na’am mɔɔlegɔ poan ta seke buraa n zuseri bɔ’ɔra wɔsum lɔɣɔrɔ ge ti eŋa la a deodoma me nɔŋɛ burenya la Easter de’eŋo. Ho ta’an dekɛ Baabule la pa’alɛ buraa la ti la dela gberum tuuma la eŋa n zuseri bɔ’ɔra wɔsum lɔɣɔrɔ la. Ho me ta’an basɛ ti a baŋɛ ti burenya la Easter dela baɣa de’eŋo. (Isa. 44:​14-20; 2 Ko. 6:​14-17) To san pɔsɛ sɔsega la en ge kɔ’ɔn yele en bala, la boi bim ti sɛla ti to yele la en dela yelemɛŋɛrɛ ge to ka dekɛ Naayinɛ Yelesum la tum tuuma soŋa.

13. To wan eŋɛ la wani ta’an basɛ ti to yetɔɣum ana nyɛlum?

¹³ Paul yuun le yele a kɛleseriba la ti ba basɛ ti ba yetɔɣum la za’asum wuu dia la. Bala ka pa’alɛ ti to basera yɛla ase’a bii suɣera yelemɛŋɛrɛ la. Ge a yuun boti a yeti to basɛ ti to yetɔɣum la “eta nɛreba suunre me nyɛlom” lan wan eŋɛ se’em ti to san mɔɔla yelemɛŋɛrɛ la bɔ’ɔra nɛreba, la wan “za’asum” bo ba. (Yob 12:11) Bala ta’an kpe’em bo to. La san dɛna dimɛnka to ta’an ti’isa ti sɛla n za’asum bo tomam la me za’asum bo la nɛra woo. Bala mea nɔɔ la, to ta’an ti’isa ti ton tɔɣeri se’em la ani soŋa bɔ’ɔra la nɛra woo. Ge la daɣɛ bala. Makerɛ, buuri ase’a nɛreba san tɔɣera sɛla bɔ’ɔra nɛreba, ba ni kɔ’ɔn tɔɣɛ la sɛla n boi ba suuren, hali ba san tɔɣera bɔ’ɔra bunkureba. Ge buuri basɛba me nɛreba ta’an bisɛ ti ho san tɔɣera bala la ka nari, la dela zɛɛsi. Paul yeti la dela to mina sɛla n nari ta’an “lebehe . . . sɛla n de ma’an.” Bala pa’alɛ ti to basɛ ti to yetɔɣum ana nyɛlum bɔ’ɔra nɛreba ge daɣɛ tomam mea n boti se’em.

MINA SE’EM MA’A TI LA NARA TI HO PA’ALƐ BAABULE YƐLA ASE’A

14. Yezu n yuun boi tingɔŋɔ wa zuo la, a yuun pa’alɛ a podɔleba la sɛla woo ti a mina? Tɔɣɛ pa’alɛ.

¹⁴ Yezu yuun san tɔɣera bɔ’ɔra a podɔleba la, a ni mina la guŋerɛ ge ti a yetɔɣum me za’asum. Bala n sɔi ti a yuun ta’an pa’ala yɛla zo’e zo’e. (Mr. 6:34) Ge yɛla ase’a n yuun boi ti ba nara ti ba zamesɛ pa’asɛ. Yezu yuun ka boti a pa’alɛ ba sɛla woo ti a mina. A yuun mi la ba tɔregɔ beene. A yuun bɔkɛ ti, ba kan ta’an zamesɛ yɛla ase’a pa’asɛ sankaŋa. A yeti, ba kan ta’an bɔkɛ yele aŋa soŋa. (Yon 16:12) Bala pa’alɛ to la bem?

15. La nari ti to pa’alɛ to Baabule zamesegɔdoma sɛla woo ti to mina? Tɔɣɛ pa’alɛ. (Magaha 25:11) (Bisɛ foote la.)

¹⁵ Yezu makerɛ la pa’alɛ ti, ton mi yelemɛŋɛrɛ la ka pa’alɛ ti to pa’ala sɛla woo ti to mina. To wan tɔɣesa Yezu la wani? To nari ti to ni geele bisɛ nɛreba la bɔŋa n ani se’em. Le ti’isɛ buraa la n nɔŋɛ burenya la Easter de’eŋo yele la. To mi ti, ba dela baɣa de’eŋo ti Naayinɛ me ka bɔta.To makɛ yeti, la gee la bakwai ayi la ba di Burenya ti ho pɔsɛ zamesa buraa wa. To san pa’alɛ en Baabule la n tɔɣɛ baɣa de’eŋo yele se’em ge ɛɛra ti a basɛ Burenya dia, to yetɔɣum la wan za’asum bo en? Yelemɛŋɛrɛ, Baabule zamesegɔdoma basɛba ni eŋɛ la kalam dekɛ ban zameseri sɛla la tum tuuma. La me ni yue mɛ ti basɛba me ŋmɛresɛ bamea nyaŋɛ dekɛ ban zameseri sɛla la tum tuuma. To Baabule zamesegɔdoma la wan nyɛ nɛŋa tɔlega to san pa’alɛ ba sɛla n nari ge ti la me kan daam ba.—Kaalɛ Magaha 25:11.

16. To wan eŋɛ la wani soŋɛ to Baabule zamesegɔdoma ti ba “kelum bɔna yelemɛŋɛrɛ la poan”?

¹⁶ Yɛla ase’a n basɛ ti to tara pupeelum. Ayima dela ton soŋɛ nɛreba ti ba baŋɛ yelemɛŋɛrɛ la. To wan ta’an soŋɛ ba ti ba “kelum bɔna yelemɛŋɛrɛ la poan” to san ita yele ana wa: Ita makesonɛ bɔ’ɔra ba. (3 Yo. 3, 4) Vɔna ho vom ti la pa’alɛ ti ho tari sakerɛ Naayinɛ pu’ulumbiŋ’a la poan wuu Naayinɛ Yelesum la n pa’alɛ se’em la. Ho san tɔɣera sɛla, basɛ ti la dɛna yelemɛŋɛrɛ. Ho san pa’ala nɛreba, basɛ ti ho yetɔɣum la za’asum, tɔɣera mama, mina guŋerɛ la sansɛka n nari ti ho tɔɣɛ. Ba san pɛ̃ɣera hɔ, basɛ ti ba pɛ̃ɣɛ Yehowa. Ho san ita bala, la pa’alɛ ti ho sirum pu’useri la Yehowa, yelemɛŋɛrɛ Naayinɛ la.