Hanyoyin Kyautata Yadda Muke Wa’azi—Yin Wa’azi ga Mutumin da Ke Wani Yare

Muhimmancinsa: Jehobah yana son mutanen “kowace al’umma” su ƙarfafa dangantakarsu da shi. (A. M. 10:34, 35) Shi ya sa Yesu ya ce za a yi wa’azin bishara a “iyakar duniya” da kuma “ga dukan al’ummai.” (Mat. 24:14) Zakariya ya annabta cewa mutanen “dukan harsunan al’ummai” za su ji saƙon bisharar. (Zak. 8:23) Wahayin da aka sauƙar wa manzo Yohanna ya nuna cewa waɗanda za su tsira wa babban tsanani za su ƙunshi mutane daga “cikin kowane iri, da dukan ƙabilai da al’ummai da harsuna.” (R. Yoh. 7:9, 13, 14) Saboda haka, sa’ad da muka sami wani a yankinmu da ke wani yare, zai dace mu yi ƙoƙari mu yi masa wa’azi.

Yadda Za Mu Cim ma Hakan:

Ka yi shiri sosai. Ka saka ƙasidar nan Good News for People of All Nations a jakar wa’azinka. Ka karanta umurnin nan How to Help Those Who Speak Another Language (Ku Taimaki Waɗanda Ke Wani Yare) da ke shafi na 4 na ƙasidar. Ka yi la’akari da mutane da ke harsuna dabam-dabam da wataƙila za ka haɗu da su a wa’azi, sa’an nan ka sauko da bidiyo ko kuma littattafai na yaren daga dandalin jw.org zuwa na’urarka. Za ka kuma iya yin amfani da JW Language app don ka koyi wasu furuci a yaren. Idan ikilisiyoyi da suke yaruka dabam-dabam suna wa’azi a yanki ɗaya, zai dace su riƙa ɗaukan littattafai a yaren ikilisiyarsu kaɗai sa’ad da suke wa’azi. Amma, sa’ad da kuke wa’azi a wuraren da akwai jama’a sosai, za ku iya ɗaukan littattafai na yarukan da ake yi a wurin.
Sa’ad da ka haɗu da wani da yarenku ba ɗaya ba, ka yi iya ƙoƙarinka ka gaya masa “ayyuka masu-girma na Allah” a yarensa. (A. M. 2:11) Ka nuna masa dandalinmu a yarensa don ya sami ƙarin bayani. Idan ya nuna yana son saƙonmu, ka cika fom ɗin nan Please Follow Up (S-43), bayan haka sai ka ba sakataren ikilisiyarku. Ka ci gaba da ziyartar mutumin har sai an aika wani da ya iya yarensa.

Ku Bi Shawarar Nan a Wannan Watan:

Sa’ad da kuke Ibada ta Iyalinku na gaba, ku gwada yadda za a iya yin wa’azi ga mutumin da ke wani yare.