“Pagpakita sing Hustisya” sa Paglakat Upod sa Dios

1-3. (a) Ngaa may utang kita kay Jehova? (b) Ano ang ginapatuman sang aton mahigugmaon nga Manluluwas?

IMADYINA nga indi ka makagua sa isa ka barko nga amat-amat nga nagalugdang. Sang abi mo wala ka na sing paglaum, may kamot nga nagbutong sa imo kag ginsalbar ka. Nalipay ka gid samtang ginapasaka ka sa lifeboat kag ginsilingan: “Luwas ka na”! Sigurado nga nabatyagan mo nga may utang ka nga kabalaslan sa sini nga tawo. Ang matuod, utang mo gid sa iya ang imo kabuhi.

² Ginailustrar sini ang ginhimo ni Jehova para sa aton. Ang matuod may utang kita sa iya. Kay man, nag-aman sia sing gawad, gani naluwas kita sa sala kag kamatayon. Kabalo kita nga basta nagatuo kita sa sining hamili nga halad, ang aton mga sala ginapatawad, kag sigurado nga makabaton kita sang kabuhi nga wala sing katapusan. (1 Juan 1:7; 4:9) Natun-an naton sa Kapitulo 14, nga ang gawad amo ang pinakadaku nga ebidensia sang gugma kag katarungan ni Jehova. Gani, ano ang dapat naton himuon?

³ Maayo nga binagbinagon naton kon ano ang ginapatuman sang aton mahigugmaon nga Manluluwas. Si Jehova nagsiling paagi kay manalagna Miqueas: “O tawo, ginsiling niya sa imo kon ano ang maayo. Kag ano ang ginapatuman sa imo ni Jehova? Amo ang pagpakita sing hustisya, ang paghigugma sa pagkamainunungon, kag ang paglakat sing maugdang upod sa imo Dios!” (Miqueas 6:8) Talupangda nga ang isa sang mga butang nga ginapatuman sa aton ni Jehova amo ang “pagpakita sing hustisya.” Paano naton ina himuon?

Tinguhai nga Ipakita ang “Matuod nga Pagkamatarong”

4. Paano naton nahibaluan nga ginapaabot ni Jehova nga dapat naton sundon ang iya matarong nga mga talaksan?

⁴ Ginapaabot ni Jehova nga sundon naton ang iya mga talaksan sang insakto kag sala. Bangod ang iya mga talaksan matarong, ginatinguhaan naton nga mapakita ang katarungan kag pagkamatarong kon ginasunod naton ini. Ginasugo niya kita sa Isaias 1:17 nga ‘tun-an ang paghimo sing maayo, pangitaon ang katarungan.’ Ginalaygayan man kita sang Pulong sang Dios nga ‘pangitaon ang pagkamatarong.’ (Sofonias 2:3) Ginapalig-on man kita sini nga “isuklob ang bag-o nga personalidad nga gintuga suno sa kabubut-on sang Dios sa matuod nga pagkamatarong.” (Efeso 4:24) Kon ginasunod naton ang matarong nga mga talaksan ni Jehova, ginalikawan naton ang kapintas, kahigkuan, kag imoralidad kay kontra ini sa kon ano ang balaan.—Salmo 11:5; Efeso 5:3-5.

5, 6. (a) Ngaa indi mabudlay sundon ang mga talaksan ni Jehova? (b) Paano ginapakita sang Biblia nga ang pagtinguha nga ipakita ang pagkamatarong dapat sigesige nga himuon?

⁵ Mabudlay bala sundon ang matarong nga mga talaksan ni Jehova? Indi. Kon palangga naton si Jehova, wala kita ginabudlayan sa pagtuman sa iya. Bangod ginahigugma naton ang Dios kag nanamian kita sang iya mga kinaiya, gusto naton nga ang aton pagkabuhi nagapalipay sa iya. (1 Juan 5:3) Dumduma nga “ginahigugma [ni Jehova] ang matarong nga mga buhat.” (Salmo 11:7) Para masunod gid naton ang katarungan ukon ang pagkamatarong sang Dios, dapat naton higugmaon kon ano ang ginahigugma ni Jehova kag dumtan ang iya ginadumtan.—Salmo 97:10.

⁶ Mabudlay para sa indi perpekto nga mga tawo ang pagtinguha nga ipakita ang pagkamatarong. Dapat naton ubahon ang daan nga personalidad pati ang malain nga mga buhat kag isuksok ang bag-o nga personalidad. Ang Biblia nagasiling nga ang bag-o nga personalidad “ginabag-o” paagi sa sibu nga ihibalo. (Colosas 3:9, 10) Ginapakita sang tinaga nga “ginabag-o” nga ang pagsuksok sing bag-o nga personalidad dapat sigesige nga himuon. Bisan pa nagatinguha gid kita nga himuon ang insakto, may mga tion nga makahunahuna kita, makahambal, ukon makahimo sang sala bangod indi pa kita perpekto.—Roma 7:14-20; Santiago 3:2.

7. Ano dapat ang aton batyagon kon makasala kita bisan pa ginatinguhaan gid naton nga himuon ang insakto?

⁷ Ano dapat ang aton batyagon kon makasala kita bisan pa ginatinguhaan gid naton nga himuon ang insakto? Indi kita dapat magrason nga indi man serioso ang aton sala. Pero, indi man kita dapat mag-untat, ukon magbatyag nga bangod sang aton mga kakulangan, indi na kita nagakabagay sa pag-alagad kay Jehova. Ang aton mapinalanggaon nga Dios naghimo sing paagi para mapatawad ang mga sinsero nga nagahinulsol. Binagbinaga ang ginsiling ni apostol Juan: “Ginasulat ko sa inyo ining mga butang agod indi kamo makahimo sang sala.” Dayon, nagsiling pa gid sia: “Apang, kon may isa sa inyo nga makahimo sang sala [bangod indi sia perpekto], may manugbulig kita nga kaupod sang Amay, si Jesucristo.” (1 Juan 2:1) Huo, gin-aman ni Jehova ang halad-gawad ni Jesus para batunon Niya ang aton pag-alagad bisan pa indi kita perpekto. Ano ang nabatyagan naton kay mapinalanggaon gid si Jehova, kag ginapatawad niya kita? Sigurado nga gusto gid naton nga himuon ang tanan para malipay sia!

Ang Maayong Balita kag ang Katarungan sang Dios

8, 9. Paano ang pagbantala sang maayong balita nagapakita sang katarungan ni Jehova?

⁸ Mapakita naton kag masunod ang katarungan ni Jehova kon ginahimo naton ang bug-os naton nga masarangan nga ibantala pirme ang maayong balita sang Ginharian sang Dios sa iban. Ano ang koneksion sang katarungan ni Jehova kag sang maayong balita?

⁹ Indi paglaglagon ni Jehova ining malain nga sistema nga wala anay nagahatag sing paandam. Sa iya tagna parte sa kon ano ang matabo sa tion sang katapusan, si Jesus nagsiling: “Dapat anay ibantala ang maayong balita sa tanan nga pungsod.” (Marcos 13:10; Mateo 24:3) Gingamit ang tinaga nga “anay” kay may mga hitabo pa nga magasunod sa tapos mabantala ang maayong balita sa bilog nga kalibutan. Ini nga mga hitabo nagalakip sa gintagna nga dakung kapipit-an, nga magakahulugan sing kalaglagan para sa mga malain. Dayon, magaabot ang matarong nga bag-ong kalibutan. (Mateo 24:14, 21, 22) Gani, wala gid sing bisan sin-o nga makasiling nga si Jehova indi matarong sa malain nga mga tawo. Paagi sa pagpaandam, ginahatagan niya sila sing daku nga tsansa nga magbag-o para indi sila malaglag.—Jonas 3:1-10.

10, 11. Paano ang aton pagbantala sang maayong balita nagapakita sang katarungan sang Dios?

¹⁰ Paano ang aton pagbantala sang maayong balita nagapakita sang katarungan sang Dios? Una, dapat gid naton himuon ang aton masarangan nga buligan ang iban nga maluwas. Binagbinaga liwat ang ilustrasyon nga ginasalbar ka sa barko nga amat-amat nga nagalugdang. Sang ara ka na sa lifeboat kag luwas ka na sa peligro, sigurado nga gusto mo man buligan ang iban nga ara pa sa tubig. Gani, may obligasyon man kita nga buligan ang mga tawo nga nagatinguha pa nga makahalin sa “tubig” sining malain nga kalibutan. Matuod, madamo ang wala nagapamati sa aton mensahe. Pero samtang nagapakita pa sing pasensia si Jehova sa ila, obligasyon naton nga hatagan sila sing “kahigayunan nga maghinulsol” para maluwas.—2 Pedro 3:9.

¹¹ Paagi sa pagbantala sang maayong balita sa tanan nga aton maistorya, nagapakita kita sing katarungan sa isa pa ka importante nga paagi: Ginapakita naton nga wala kita sing ginapasulabi. Dumduma nga “ang Dios wala sing ginapasulabi, apang sa tagsa ka pungsod, nahamuot sia sa tawo nga nagakahadlok sa iya kag nagahimo sing matarong.” (Binuhatan 10:34, 35) Para masunod naton ang Iya katarungan, indi naton dapat paghukman ang mga tawo. Kundi, dapat naton isugid ang maayong balita sa iban bisan ano man ang ila rasa, bisan kilala man sila sa komunidad ukon indi, ukon bisan manggaranon man sila ukon pigado. Ginahatagan naton ang tanan sing tsansa nga makabati kag magbaton sang maayong balita.—Roma 10:11-13.

Kon Paano Naton Trataron ang Iban

12, 13. (a) Ngaa indi kita dapat magpadasudaso sa paghukom sa iban? (b) Ano ang kahulugan sang laygay ni Jesus nga “untati ninyo ang paghukom” kag “untati ninyo ang pagpakamalaut”? (Tan-awa man ang footnote.)

¹² Mapakita man naton ang katarungan paagi sa pagtratar sa iban pareho sang pagtratar ni Jehova sa aton. Mahapos lang maghukom nga ginapakalain ang mga sala sang iban kag ginaduhaduhaan ang ila motibo. Pero gusto bala naton nga duhaduhaan ni Jehova ang aton motibo kag indi sia maluoy sa aton kon makasala kita? Indi gid. Indi amo sina si Jehova. Ang salmista nagsiling: “Kon mga sala lang ang ginatan-aw mo, O Jah, O Jehova, sin-o bala ang makatindog sa atubangan mo?” (Salmo 130:3) Nagapasalamat gid kita nga si Jehova matarong kag maluluy-on kag wala sia nagapokus sa aton mga sala. (Salmo 103:8-10) Kon amo, paano naton dapat trataron ang iban?

¹³ Kon naintiendihan naton nga may katarungan kag may kaluoy ang Dios, indi kita magpadasudaso sa paghukom sa iban ilabi na kon wala kita sing labot sa natabo ukon kon indi man gid serioso ang sala. Sa iya Sermon sa Bukid, si Jesus nagpaandam: “Untati ninyo ang paghukom agod indi kamo paghukman sang Dios.” (Mateo 7:1) Sa sinulatan ni Lucas, si Jesus nagdugang pa: “Untati ninyo ang pagpakamalaut, kag indi gid kamo pagpakamalauton.”a (Lucas 6:37) Ginapakita sini nga kabalo si Jesus nga madasig maghukom ang indi perpekto nga mga tawo. Gani, kon may tagpalamati sia nga pirme nagahimo sini, dapat untatan na nila ini.

14. Ngaa dapat kita ‘mag-untat sa paghukom’ sa iban?

¹⁴ Ngaa dapat kita ‘mag-untat sa paghukom’ sa iban? Una, limitado ang aton awtoridad. Ang disipulo nga si Santiago nagapahanumdom sa aton: “May isa lamang ka Manughatag sing Kasuguan kag Hukom,” si Jehova. Gani prangka nga nagapamangkot si Santiago: “Sin-o ka nga maghukom sa imo isigkatawo?” (Santiago 4:12; Roma 14:1-4) Dugang pa, bangod indi kita perpekto, madasig kita maghukom sing indi patas. Kay man, indi naton makita kon sin-o gid sila bangod posible may batasan sila nga indi naton gusto, pamatyag naton may ginhimo sila nga malain sa aton, nahisa kita sa ila, ukon nagapensar ’ta nga mas maayo kita sangsa ila. Makapatiko ini sang aton pagtan-aw sa aton mga isigkatawo. May iban pa kita nga mga limitasyon, kag kon pensaron naton ini, indi kita magpadasudaso sa pagpangita sang sala sa iban. Indi kita makabasa sing tagipusuon kag indi man naton mahibaluan ang tanan nga personal nga sitwasyon sang iban. Gani, sin-o kita nga magduhaduha sa motibo sang aton mga kauturan ukon magpakalain sa ila mga panikasog sa pag-alagad sa Dios? Mas maayo gid nga sundon naton si Jehova paagi sa pagpokus sa maayo nga mga kinaiya sang aton mga kauturan imbes sa ila mga sala!

15. Ano ang indi dapat ihambal kag himuon sang mga sumilimba sang Dios sa mga miembro sang ila pamilya, kag ngaa?

¹⁵ Paano naton dapat trataron ang mga miembro sang aton pamilya? Makapasubo nga sa kalibutan subong, ang pila sa pinakamapintas nga mga paghukom nagakatabo sa sulod sang balay, bisan pa nga dapat kuntani lugar ini nga may paghidait. May mga balita parte sa mga bana, asawa, ukon mga ginikanan nga nagapaantos sa mga miembro sang ila pamilya paagi sa masakit nga mga tinaga ukon pagkastigo pa gani. Pero ang mga nagasimba kay Jehova indi dapat magpanakit ukon maghambal sing mga tinaga nga makapalain sang buot sa miembro sang ila pamilya. (Efeso 4:29, 31; 5:33; 6:4) Ang laygay ni Jesus nga “untati ninyo ang paghukom” kag “untati ninyo ang pagpakamalaut” dapat man tumanon sa sulod sang aton balay. Dumduma nga ang pagpakita sing katarungan nagakahulugan nga trataron naton ang iban pareho sang pagtratar ni Jehova sa aton. Kag wala gid kita ginapigos ukon ginapintasan sang aton Dios. Kundi, sia “mapinalanggaon gid” sa mga nagahigugma sa iya. (Santiago 5:11) Dalayawon gid sia nga halimbawa nga dapat naton sundon!

Mga Gulang nga Nagaalagad “Para sa Katarungan”

16, 17. (a) Ano ang ginapaabot ni Jehova sa mga gulang? (b) Ano ang dapat himuon kon ang nakasala indi magpakita sing matuod nga paghinulsol, kag ngaa?

¹⁶ Kita tanan may obligasyon nga magpakita sing katarungan, pero may mas daku nga obligasyon sa sini ang mga gulang sa Cristianong kongregasyon. Talupangda ang tagna nga ginsulat ni Isaias parte sa “mga prinsipe,” ukon mga gulang: “Tan-awa! Isa ka hari ang magahari para sa pagkamatarong, kag ang mga prinsipe magagahom para sa katarungan.” (Isaias 32:1) Huo, ginapaabot ni Jehova nga ang mga gulang magpakita sing katarungan sa ila pag-alagad. Paano nila ina himuon?

¹⁷ Nahibaluan gid sining kalipikado nga mga lalaki nga para mapakita ang katarungan, ukon pagkamatarong, dapat nila buligan ang kongregasyon nga mangin matinlo. Kon kaisa, obligado ang mga gulang nga maghukom sa mga kaso sang isa nga nakahimo sang mabug-at nga sala. Kon ginahimo ini, ginatandaan nila nga gusto ni Jehova nga magpakita sila sang kaluoy kon posible. Gani, ginatinguhaan nila nga buligan ang nakasala sa paghinulsol. Pero ano abi kon ang nakasala indi magpakita sing matuod nga paghinulsol bisan pa sa mga panikasog nga buligan sia? Para mapakita ang perpekto nga katarungan, ang Pulong ni Jehova nagasugo nga dapat himuon ang isa ka matigdas nga aksion: “Sikwaya ang malaut nga tawo sa tunga ninyo.” Nagakahulugan ini nga paguaon sia sa kongregasyon. (1 Corinto 5:11-13; 2 Juan 9-11) Nagakasubo ang mga gulang sa paghimo sini nga aksion, pero kabalo sila nga kinahanglan ini himuon para maamligan ang katinlo sa moral kag espirituwal sang kongregasyon. Bisan pa sini, nagalaum sila nga sa pila ka adlaw makamarasmas ang nakasala kag magabalik sa kongregasyon.—Lucas 15:17, 18.

18. Ano ang ginadumdom sang mga gulang kon nagahatag sing base sa Biblia nga laygay sa iban?

¹⁸ Nalakip man sa pag-alagad para sa katarungan ang paghatag sing laygay base sa Biblia kon kinahanglanon. Ang matuod, wala nagatinguha ang mga gulang nga pangitaon kon ano ang mga kaluyahon sang iban. Indi man nila gusto nga tadlungon dayon ang tanan nga hulag sang mga kauturan. Pero ang isa ka utod mahimo “makahimo sang sayop nga tikang antes niya matalupangdan ini.” Ang pagdumdom nga ang katarungan sang Dios indi mapintas ukon wala sing balatyagon magapahulag sa mga gulang sa pagtinguha nga “tadlungon ina nga tawo sa espiritu sang kalulo.” (Galacia 6:1) Gani, indi pag-akigan sang mga gulang ang nakasala ukon maghambal sang masakit nga mga tinaga. Kundi, mahatag sila sang mahigugmaon nga laygay nga nagapalig-on sa ginalaygayan. Bisan kinahanglan hatagan sang mga gulang sang direkta nga laygay ang isa ka utod para makita niya ang malain nga resulta sang iya sala nga tikang, ginadumdom nila nga ang utod nga nakasala isa ka karnero sa panong ni Jehova.b (Lucas 15:7) Kon ginahatag sing mahigugmaon ang laygay ukon pagsabdong, posible nga makabulig ini nga matadlong ang nakasala.

19. Ano nga mga desisyon ang ginahimo sang mga gulang, kag sa diin nila dapat ibase ini nga mga desisyon?

¹⁹ Ang mga gulang masami nga nagahimo sing mga desisyon nga nagaapektar sa ila mga kauturan. Halimbawa, ginaistoryahan sang mga gulang kon bala ang iban nga mga utod nga lalaki sa kongregasyon kalipikado na nga irekomendar nga mangin mga gulang ukon mga ministeryal nga alagad. Nahibaluan sang mga gulang nga dapat wala sila sing ginapasulabi. Kon nagahimo sang mga desisyon para sa sini nga mga pagtangdo, nagapagiya sila sa Biblia kag wala nagabase sa personal lang nga mga balatyagon. Gani, nagadesisyon sila nga “wala sing ginadampigan ukon ginapasulabi.”—1 Timoteo 5:21.

20, 21. (a) Ano ang ginatinguhaan sang mga gulang, kag ngaa? (b) Ano ang mahimo sang mga gulang para mabuligan ang mga gina-depress ukon “ang mga ginapung-awan”?

²⁰ Ginapakita man sang mga gulang ang katarungan sang Dios sa iban nga mga paagi. Sa tapos nagtagna nga ang mga gulang magaalagad “para sa katarungan,” si Isaias nagpadayon: “Ang tagsa sa ila mangin kaangay sang palalipdan sa hangin, isa ka duog nga palanaguan sa unos, kaangay sang sapa nga nagailig sa desyerto, kaangay sang landong sang daku nga igang sa kigas nga duta.” (Isaias 32:1, 2) Gani, ginatinguhaan gid sang mga gulang nga himuon ang tanan nila nga masarangan para mapaumpawan kag mapalig-on ang mga kauturan.

²¹ Subong, bangod sang tanan nga mga problema nga posible makapaluya sang buot, madamo ang nagakinahanglan sing pagpalig-on. Mga gulang, ano ang inyo mahimo para mabuligan ang mga gina-depress ukon “ang mga ginapung-awan”? (1 Tesalonica 5:14) Pamatii sila sing maayo. (Santiago 1:19) Basi kinahanglan nila nga isugid ang ila mga ginakabalak-an sa isa nga ila ginasaligan. (Hulubaton 12:25) Pasaliga sila nga importante gid sila, ginapabaloran, kag ginapalangga ni Jehova kag sang ila mga kauturan. (1 Pedro 1:22; 5:6, 7) Dugang pa, makapangamuyo kamo upod sa ila kag para sa ila. Makapaumpaw gid nga mabatian ang isa ka gulang nga nagahatag sing tinagipusuon nga pangamuyo para sa ila. (Santiago 5:14, 15) Ang inyo mahigugmaon nga mga panikasog sa pagbulig sa mga gina-depress nakita gid sang Dios sang katarungan.

22. Paano naton masunod ang katarungan ni Jehova, kag ano ang resulta?

²² Matuod gid nga mas nagalapit kita kay Jehova paagi sa pagsunod sa iya katarungan! Kon ginasuportahan naton ang iya matarong nga mga talaksan, kon ginasugid naton ang makaluwas sing kabuhi nga maayong balita sa iban, kag kon nagapokus kita sa maayo nga mga kinaiya sang iban imbes sa ila mga sala, ginapakita naton ang katarungan sang Dios. Mga gulang, kon ginaamligan ninyo ang katinlo sang kongregasyon, kon nagahatag kamo sing makapalig-on nga laygay base sa Biblia, kon nagahimo kamo sing wala sing ginapasulabi nga mga desisyon, kag kon ginapalig-on ninyo ang mga gina-depress, ginapakita ninyo ang katarungan sang Dios. Nagakalipay gid ang tagipusuon ni Jehova kon magtan-aw sia halin sa langit kag makita niya ang iya katawhan nga nagahimo sang tanan nila nga masarangan sa “pagpakita sing hustisya” sa paglakat upod sa ila Dios!