Septiembre

Ginhatagan sang Dios si Jesus sang gahom nga makasolbar sang tanan nga problema sang mga tawo. Ang mga milagro nga ginhimo ni Jesus nagapakita nga masarangan niya solbaron ang tanan naton nga problema nga indi gid naton masarangan solbaron. Halimbawa, ang napanubli naton nga sala amo ang rason sang tanan nga problema sang mga tawo. Pero may gahom si Jesus para hilwayon kita sa sala kag dulaon ang tanan nga epekto sini lakip ang balatian kag kamatayon. (Mat. 9:​1-6; Roma 5:​12, 18, 19) Ginapakita man sang mga milagro ni Jesus nga masarangan niya ayuhon ang “tanan nga sahi” sang balatian kag banhawon ang mga patay. (Mat. 4:23; Juan 11:​43, 44) May gahom man sia nga kontrolon ang mabaskog nga mga unos kag hilwayon ang mga tawo sa malaut nga mga espiritu. (Mar. 4:​37-39; Luc. 8:2) Makapaumpaw gid mahibaluan nga ginhatagan ni Jehova sini nga gahom ang iya Anak. Makasalig kita nga mabaton gid naton ang mga pagpakamaayo nga ihatag sang Ginharian sang Dios. Ang mga milagro nga ginhimo ni Jesus sang ari sia sa duta sampol lang sang himuon niya sa bilog nga kalibutan bilang Hari sang Ginharian sang Dios sa langit. w23.04 3-4 ¶5-7

Kon ara ka sa daku nga kongregasyon, posible indi ka pirme matuksuan. Posible magbatyag ka nga mas maayo kon indi ka na lang magkomento. Pero padayon nga panikasugi nga magkomento. Magpreparar sang pila ka komento sa kada miting. Kay kon indi ka matuksuan sa umpisa sang pagtinuon, may tsansa ka pa nga makakomento asta matapos ang pagtinuon. Kon nagahanda ka para sa Pagtinuon sa Ang Lalantawan, pamalandungi kon paano ginapadaku sang kada parapo ang tema sang artikulo. Kon himuon mo ini, labanlaban nga may manami ka gid nga punto nga makomento. Puede mo man handaan ang mga parapo nga nagabinagbinag sang madalom nga mga kamatuoran sa Biblia. Ngaa? Kay posible nga diutay lang ang magbayaw sa sini nga mga parapo. Pero ano abi kon pagkatapos sang pila ka miting wala ka gihapon matuksuan? Ihambal sa nagadumala sang pagtinuon antes sang miting kon diin nga pamangkot ang gusto mo komentuhan. w23.04 21-22 ¶9-10

Ginatuman dayon ni Jose ang mga instruksion ni Jehova, gani maayo gid sia nga bana. Indi magnubo sa tatlo ka beses nga nakabaton sia sang instruksion halin sa Dios parte sa iya pamilya. Gintuman niya dayon ini nga mga instruksion bisan pa mabudlay ini para sa iya. (Mat. 1:20; 2:​13-15, 19-21) Bangod gintuman ni Jose ang mga instruksion sang Dios, naamligan ni Jose si Maria, naatipan niya sia, kag nahatag niya ang iya mga kinahanglanon. Bangod sang ginhimo ni Jose, sigurado nga mas ginpalangga pa gid sia kag ginrespeto ni Maria. Mga bana, paano ninyo mailog si Jose? Magpagiya kamo sa mga laygay nga nabase sa Biblia para maatipan ninyo sing maayo ang inyo pamilya. Kon iaplikar ninyo ini nga mga laygay bisan pa kinahanglan ninyo maghimo sang mga pagbag-o, mapakita ninyo sa inyo asawa nga palangga ninyo sia kag magabakod ang inyo pag-asawahay. Ang isa ka sister sa Vanuatu nga sobra 20 ka tuig na nga kasal nagsiling: “Kon ginatun-an sang akon bana ang mga instruksion ni Jehova kag ginaaplikar niya ini, mas ginarespeto ko pa gid sia. Wala ako sing dapat kabalak-an kay may salig ako sa iya mga desisyon.” w23.05 21 ¶5

Ang magabalik nga mga Judiyo halin sa Babilonia mangin ‘balaan nga katawhan’ para sa ila Dios. (Deut. 7:6) Pero indi buot silingon sini nga wala na sila sing dapat himuon nga pagbag-o para malipay sa ila si Jehova. Sa Babilonia natawo ang kalabanan nga mga Judiyo, gani posible gid nga nailog nila ang panghunahuna kag pamatasan sang mga Babilonianhon. Pagkatapos sang madamo nga tinuig sugod sang nagbalik ang mga Judiyo sa Israel, nakibot si Gobernador Nehemias sang nabal-an niya nga indi kabalo sang lenguahe sang mga Judiyo ang mga bata nga natawo sa Israel. (Deut. 6:​6, 7; Neh. 13:​23, 24) Kon indi kaintiende sang Hebreo ini nga mga bata, indi nila matun-an nga palanggaon kag simbahon si Jehova kay ginsulat sa Hebreo ang kalabanan nga libro sa Pulong sang Dios. (Esd. 10:​3, 44) Gani daku nga mga pagbag-o ang dapat himuon sini nga mga Judiyo. Pero bangod ara na sila sa Israel kag amat-amat na nga ginasimba ang Dios sa husto nga paagi sa sini nga pungsod, mas mahapos himuon ini nga mga pagbag-o.​—Neh. 8:​8, 9. w23.05 15 ¶6-7

Bisan pa mabaskog ang aton handum nga himuon ang aton tulumuron ukon ginapanikasugan gid naton ini, posible nga may mga hitabo nga magapabudlay sa aton. Halimbawa, bangod sa “wala ginapaabot nga hitabo,” posible nga mabuhinan ang aton oras nga para kuntani sa aton tulumuron. (Man. 9:11) Posible nga makaeksperiensia kita sang mga problema nga magapaluya sang aton buot kag kusog. (Hulu. 24:10) Bangod indi kita perpekto, makahimo kita sang sala nga posible mangin rason nga mabudlayan kita sa paghimo sa aton tulumuron. (Roma 7:23) Ukon posible nga makabatyag kita sang kakapoy. (Mat. 26:43) Ano ang makabulig sa aton kon may mga hitabo nga nagpabudlay sa aton nga mahimo ang aton tulumuron? Dumduma nga kon may mga hitabo nga nagpabudlay sa imo, indi buot silingon sini nga untatan mo na ang paghimo sa imo tulumuron. Ang Biblia nagasiling nga makaeksperiensia kita sang mga problema sing madamo nga beses. Pero, nagasiling man ini nga masarangan naton ang aton mga problema. Kon padayon mo nga panikasugan ang imo tulumuron bisan pa may mga kabudlayan, ginapakita mo kay Jehova nga gusto mo nga malipay sia. Sigurado nga nalipay gid si Jehova sa imo kon padayon ka nga nagapanikasog. w23.05 30 ¶14-15

Kon payunir ang isa ka pamatan-on nga brother, matun-an niya kon paano makigbagay sa mga tawo nga lainlain ang personalidad. Makatuon man sia kon paano badyeton ang iya kuarta. (Fil. 4:​11-13) Ang isa ka maayo nga umpisa para makaalagad ka sing full-time amo ang pag-auxiliary payunir. Makabulig ini sa imo nga mangin isa ka regular payunir. Kon payunir ka, puede ka imbitahon nga mag-alagad sing full-time bilang isa ka construction servant ukon isa ka Bethelite. Dapat panikasugan sang mga brother nga makalipikar bilang mga gulang sa kongregasyon para makaalagad sila sa ila mga kauturan. Ang Biblia nagasiling nga ang mga lalaki nga nagatinguha sa sini nga responsibilidad ‘nagahandum sang maayo nga buhat.’ (1 Tim. 3:1) Pero, dapat anay sia makalipikar bilang isa ka ministeryal nga alagad. Ginabuligan sang ministeryal nga mga alagad ang mga gulang sa madamo nga paagi. Mapainubuson nga ginabuligan sang mga gulang kag sang ministeryal nga mga alagad ang ila mga kauturan kag mapisan sila nga nagabantala. w23.12 28 ¶14-16

Tin-edyer pa lang si Hari Josias sang ginpangita niya si Jehova. Gusto niya magtuon parte kay Jehova kag himuon ang Iya kabubut-on. Pero, mabudlay gid ang sitwasyon para sa sining pamatan-on nga hari. Sadto nga tion, nagasimba sa indi matuod nga mga dios ang kalabanan nga mga tawo, gani dapat mangin maisog si Josias para masimba nila si Jehova sa husto nga paagi. Nangin maisog gid si Josias. Antes sia mag-20 anyos, ginsugdan niya ang pagdula sa butig nga pagsimba sa ila pungsod. (2 Cron. 34:​1, 2) Bisan bata ka pa lang, puede mo mailog si Josias paagi sa pagtuon parte kay Jehova kag sa Iya dalayawon nga mga kinaiya. Kon himuon mo ini, mapalig-on ka nga idedikar ang imo kaugalingon kay Jehova. Ano ang mangin epekto sini sa imo kabuhi? Binagbinaga si Luke nga nabawtismuhan sang 14 anyos sia. Amo ini ang ginsiling niya sang adlaw nga nagdedikar sia kay Jehova, “Sugod subong, si Jehova na ang unahon ko sa akon kabuhi kag panikasugan ko nga malipay sia sa akon.” (Mar. 12:30) Kon himuon mo man ini, mangin malipayon ka gid. w23.09 11 ¶12-13

Sang ginsulatan ni apostol Pablo ang mga taga-Tesalonica, wala pa isa ka tuig nga naporma ang ila kongregasyon. Gani, posible nga indi pa eksperiensiado ang mga nagapanguna sa ila kongregasyon kag makahimo sila sang sala. Pero, dapat sila gihapon respetuhon. Samtang nagahilapit ang dakung kapipit-an, dapat naton pabakuron ang aton pagsalig sa mga instruksion nga ginahatag sang aton mga gulang. Sa tion sang dakung kapipit-an, posible nga indi makalab-ot sa aton ang mga instruksion halin sa world headquarters kag sa branch office, gani importante gid subong nga higugmaon kag respetuhon naton ang aton mga gulang. Bisan ano man ang matabo, dapat naton huptan ang aton ikasarang sa paghunahuna sing maayo. Imbes nga magpokus sa ila mga kaluyahon, dapat naton hunahunaon nga ginagamit ni Jehova ang Cristo para giyahan ining matutom nga mga lalaki. Pareho sa helmet nga nagaamlig sa ulo sang isa ka soldado, ang aton paglaum nagaamlig man sa aton hunahuna kay ginabuligan kita sini nga makapamensar sing maayo. Ginatamod naton nga wala sing pulos ang mga butang nga ginapabaloran sang kalibutan. (Fil. 3:8) Ang aton paglaum nagabulig sa aton nga mangin kalmado kag indi mag-panic. w23.06 11 ¶11-12

Ang mga nakabati sang pangagda sang “buangbuang nga babayi” kinahanglan magdesisyon kon bala batunon nila ang iya pangagda ukon indi. May maayo kita nga mga rason kon ngaa indi kita dapat maghimo sang imoral. Suno sa Biblia, ang “buangbuang nga babayi” nagsiling: “Matam-is ang kinawat nga tubig.” (Hulu. 9:17) Ano ang “kinawat nga tubig”? Ginpaanggid sang Biblia sa makaparepresko nga tubig ang pag-sex sang mag-asawa. (Hulu. 5:​15-18) Kay man, makahatag ini sang kalipay sa mag-asawa. Pero lain gid ang “kinawat nga tubig.” Posible nga nagapatuhoy ini sa imoral nga pagpakig-sex. Sa masami, ginatago sang mga tawo nga nagahimo sang imoral ang ila ginahimo. Daw pareho sila sa kawatan nga nagapanago kon mangawat sia. Daw matam-is ining “kinawat nga tubig” kay pamatyag nila wala man sing may makabalo sa ila ginahimo. Ginainto lang nila ang ila kaugalingon bangod kabalo si Jehova sang tanan nga nagakatabo. Kon sikwayon kita ni Jehova, indi gid naton masiling nga “matam-is” ini. Sa baylo, amo ini ang pinakamapait ukon pinakamalala nga matabo sa aton.​—1 Cor. 6:​9, 10. w23.06 22 ¶7-9

Ano abi kon pamatyag mo daw indi na tinagipusuon ang imo mga pangamuyo ukon daw wala ka na nanamian magbantala? Indi paghunahunaa nga wala ka na ginabuligan sang espiritu ni Jehova. Indi kita perpekto, gani nagabag-obag-o ang aton ginabatyag. Kon daw wala ka na nanamian nga himuon ang mga hilikuton sa pag-alagad kay Jehova, pamalandungi ang halimbawa ni apostol Pablo. Ginpanikasugan gid niya nga ilugon si Jesus, pero kabalo sia nga may mga tion nga wala sia sing gana nga himuon ang mga dapat niya himuon. Gusto gid ni Pablo nga tumanon ang iya ministeryo bisan pa sang iya ginabatyag. Indi mo man dapat pag-ibase sa imo ginabatyag ang imo mga desisyon. Sa baylo, himua ang husto bisan pa daw wala ka sing gana nga himuon ini. Kon pirme mo himuon ang husto, magaabot ang tion nga manamian ka na sa paghimo sini.​—1 Cor. 9:16. w24.03 11-12 ¶12-13

Mapakita man naton nga palangga naton ang aton mga kauturan paagi sa pagpakig-abyan sa ila. (2 Cor. 6:​11-13) Sarisari ang ginhalinan kag personalidad sang mga kauturan sa aton kongregasyon. Kon magpokus kita sa ila maayo nga mga kinaiya, magabakod ang aton gugma sa ila. Kon tamdon naton ang iban pareho sa pagtamod ni Jehova sa ila, ginapakita naton nga palangga naton sila. Sa tion sang dakung kapipit-an, importante gid ang aton gugma sa aton mga kauturan. Kon mag-umpisa na ini nga kapipit-an, paano kita amligan ni Jehova? Binagbinaga ang instruksion ni Jehova sa iya katawhan sang ginsalakay ang Babilonia sang una: “Maglakat kamo, katawhan ko, magsulod kamo sa inyo mga hulot, kag isira ninyo ang puertahan. Magpanago kamo sing makadali tubtob magligad ang kaakig.” (Isa. 26:20) Posible nga amo man sini ang himuon naton sa tion sang dakung kapipit-an. w23.07 6-7 ¶14-16

Dapat naton ipakita nga makatarunganon kita paagi sa aton mga ginahimo. Gani pamangkuta ang imo kaugalingon: ‘Ano ang pagkilala sang mga tawo sa akon? Para sa ila, makatarunganon bala ako, nagapasunaid, kag mahinangpanon? Ukon basi para sa ila, estrikto ako, wala nagapakita sang kaluoy, kag mabudlay pakigbagayan? Ginapamatian ko bala ang iban kag nagapasugot ako sa ila gusto kon posible sa isa ka sitwasyon?’ Kon pirme naton ginapakita nga makatarunganon kita, mas mailog naton si Jehova kag si Jesus. Para mapakita naton nga makatarunganon kita kon nagbag-o ang aton kahimtangan, dapat kita mangin flexible. Kon may mga pagbag-o, posible nga makaeksperiensia kita sang mga problema nga wala naton ginapaabot. Halimbawa, posible nga gulpi lang kita magmasakit sang grabe. Ukon posible nga mabudlayan gid kita sa aton pangabuhi bangod nagbag-o ang sitwasyon sa ekonomiya sa aton lugar ukon bangod sang ginamo sa pulitika. (Man. 9:11) Posible pa gani nga mabudlayan man kita kon nagbag-o ang aton asaynment sa pag-alagad kay Jehova. Masarangan naton nga mag-adjust sa bag-o nga kahimtangan kon himuon naton ining apat ka butang: (1) batuna ang sitwasyon, (2) hunahunaa ang palaabuton, (3) magpokus sa positibo, kag (4) buligi ang iban. w23.07 21-22 ¶7-8

Pamatan-on pa lang si manalagna Daniel sang gindala sia sa Babilonia halin sa Jerusalem bilang isa ka bihag. Pero, nagdayaw gid sa iya ang mga opisyal sang Babilonia. Nakita nila nga “wala [sia] sing diperensia, may maayo nga lawas,” kag miembro sia sang isa ka importante nga pamilya. (1 Sam. 16:7) Bangod sini, ginhanas nila sia para mag-alagad sa palasyo. (Dan. 1:​3, 4, 6) Palangga ni Jehova si Daniel bangod nangin mainunungon sia sa Iya. Ang matuod, sang ginsambit ni Jehova si Daniel upod kanday Noe kag Job, posible mga 20 anyos pa lang sia. Gani para kay Jehova, matarong man ang pamatan-on nga si Daniel pareho kanday Noe kag Job nga madamo nga tinuig nga nag-alagad kay Jehova sing matutom. (Gen. 5:32; 6:​9, 10; Job 42:​16, 17; Ezeq. 14:14) Malawig nga nagkabuhi si Daniel, kag padayon sia nga ginpalangga ni Jehova.​—Dan. 10:​11, 19. w23.08 2 ¶1-2

Kon gusto mo baklon ang isa ka balay, sigurado gid nga kadtuan mo ini para usisaon ang tanan nga detalye parte sa sini nga balay. Daw pareho man sa sini ang dapat naton himuon kon nagabasa kita kag nagatuon sang Biblia. Kon padali mo lang ini nga basahon, posible nga simple lang nga mga kamatuoran ang imo matun-an ukon ang ginatawag nga “nahauna nga mga butang sang sagrado nga mga kapahayagan sang Dios.” (Heb. 5:12) Gani, pareho sa himuon naton kon gusto naton baklon ang isa ka balay, dapat naton usisaon ang Biblia ukon tun-an ini sing maayo. Ang isa ka maayo gid nga paagi sa pagtuon sang Biblia amo ang paghibalo kon paano ang isa ka impormasyon konektado sa iban pa nga mga impormasyon. Panikasugi nga hangpa kon ano ang imo mga ginapatihan kag kon ngaa ginapatihan mo ini. Para mahangpan naton sing bug-os ang Pulong sang Dios, dapat naton tun-an ang madalom nga mga kamatuoran sa Biblia. Ginsilingan ni apostol Pablo ang iya mga kauturan nga dapat nila tun-an sing maayo ang Pulong sang Dios para ‘mahangpan nila sing bug-os kon ano ang kasangkaron, kalabaon, kataason, kag kadalumon sang kamatuoran.’ Kon himuon nila ini, ‘manggamot kag matukod’ ang ila pagtuo. (Efe. 3:​14-19) Dapat man naton ini himuon. w23.10 18 ¶1-3

Madamo sing halimbawa sa Biblia parte sa mga tawo nga mapinasensiahon. Puede mo ilakip sa imo personal nga pagtuon ang parte sa ila. Halimbawa, bata pa lang si David sang ginhaplasan sia para mangin masunod nga hari sang Israel, pero madamo pa nga tinuig ang iya ginhulat antes sia nangin hari. Samtang ginahulat ni Simeon kag ni Ana ang pag-abot sang ginpromisa nga Mesias, padayon sila nga nagaalagad kay Jehova sing matutom. (Luc. 2:​25, 36-38) Samtang ginatun-an mo ang mga halimbawa sa Biblia sang mga tawo nga mapinasensiahon, pangitaa ang sabat sa sini nga mga pamangkot: Ano ang nakabulig sa sini nga tawo nga mangin mapinasensiahon? Ano nga pagpakamaayo ang nabaton niya bangod mapinasensiahon sia? Paano ko sia mailog? Makabenepisyo ka man kon tun-an mo ang parte sa mga tawo nga indi mapinasensiahon. (1 Sam. 13:​8-14) Pangitaa ang sabat sa sini nga mga pamangkot: ‘Ano ang posible nga rason kon ngaa wala sila nangin mapinasensiahon? Ano ang malain nga resulta sa ila bangod wala sila nangin mapinasensiahon?’ w23.08 25 ¶15

Mainunungon si apostol Pedro. Wala gid sia nag-untat sa pagsunod kay Jesus. Halimbawa, sang may ginsiling si Jesus nga wala nahangpan sang iya mga disipulo, ginpakita ni Pedro nga mainunungon sia. (Juan 6:68) Sadto nga tion, madamo ang nag-untat sa pagsunod kay Jesus. Wala na nila ginhulat nga magpaathag si Jesus. Pero mainunungon si Pedro, kag nagsiling sia nga si Jesus lang “ang may pinamulong sang kabuhi nga wala sing katapusan.” Kabalo si Jesus nga biyaan sia ni Pedro kag sang iban pa nga mga apostoles. Pero, ginsilingan ni Jesus si Pedro nga sigurado sia nga magapanumbalik si Pedro kag magapabilin sia nga matutom. (Luc. 22:​31, 32) Nahangpan ni Jesus nga “ang espiritu handa, apang ang unod maluya.” (Mar. 14:38) Gani bisan pa ginpanghiwala ni Pedro si Jesus, wala sia ginsikway ni Jesus. Pagkatapos ginbanhaw si Jesus, nagpakita sia kay Pedro sang tion nga nagaisahanon si Pedro. (Mar. 16:7; Luc. 24:34; 1 Cor. 15:5) Nasubuan gid sadto si Pedro, gani sigurado nga napalig-on gid sia sa ginhimo ni Jesus. w23.09 22 ¶9-10

Ginapatawad sang Dios ang mga sala sang mga nagatuo sa iya, ukon ginatabunan niya ini. Bug-os gid ang iya pagpatawad kay wala niya ginaisip ang ila mga sala. (Sal. 32:​1, 2) Para sa iya, wala sila sing sala kag matarong sila bangod sang ila pagtuo. Bisan pa ginkabig sang Dios nga matarong ang iya matutom nga mga alagad pareho kanday Abraham kag David, mga makasasala gihapon sila kag indi perpekto. Pero bangod sang ila pagtuo, ginkabig sila sang Dios nga wala sing sala, ilabi na kon ikumparar sila sa mga wala nagasimba sa iya. (Efe. 2:12) Sa sulat ni apostol Pablo para sa mga taga-Roma, ginpaathag niya nga kinahanglan may pagtuo kita para mangin abyan kita sang Dios. Sa bahin nanday Abraham kag David, nangin abyan sila sang Dios bangod nagtuo sila sa iya. Gani puede man kita mangin abyan sang Dios kon magtuo kita sa iya. w23.12 3 ¶6-7

Subong, may pribilehiyo ang tanan nga Cristiano nga maghalad kay Jehova paagi sa paggamit sang ila tion, kusog, kag materyal nga mga butang sa pag-alagad sa iya. Mapakita naton nga ginapabaloran naton ang aton pribilehiyo nga masimba si Jehova paagi sa paghimo sang aton pinakamaayo sa pag-alagad sa iya. Ginsambit ni apostol Pablo ang aton mga hilikuton sa pag-alagad kay Jehova nga indi gid naton dapat pagbalewalaon. (Heb. 10:​22-25) Nalakip sa sini ang pagpangamuyo kay Jehova, ang pagbantala, ang pagtipon bilang isa ka kongregasyon, kag ang pagpalig-unay sa isa kag isa ‘labi na gid samtang nakita naton nga malapit na ang adlaw ni Jehova.’ Sa libro sang Bugna, nagsiling ang anghel ni Jehova: “Simbaha ang Dios!” (Bug. 19:10; 22:9) Duha ka beses niya ini nga ginsiling para ipakita nga importante gid ini. Kabay pa nga indi gid naton pagkalimtan ining madalom nga kamatuoran parte sa daku nga espirituwal nga templo ni Jehova, pati ang aton pinasahi nga pribilehiyo nga masimba sia. w23.10 29 ¶17-18

Gusto naton tanan nga “padayon kita nga maghigugmaanay.” Pero, importante nga dumdumon naton nga ginpaandaman kita ni Jesus nga “ang gugma sang madamo nga tawo magabugnaw.” (Mat. 24:12) Indi buot silingon ni Jesus nga magauntat sa pagpakita sang gugma ang kalabanan sa iya mga disipulo. Pero, dapat kita maghalong para indi kita maimpluwensiahan sang mga tawo sa kalibutan nga wala nagapakita sang gugma. Gani, binagbinagon naton ining importante nga pamangkot: May paagi bala para mabal-an naton kon daw ano kabakod ang aton gugma sa aton mga kauturan? Ang isa ka paagi para mabal-an naton kon daw ano kabakod ang aton gugma amo ang pag-usisa sa aton reaksion sa pila ka sitwasyon sa aton kabuhi. (2 Cor. 8:8) Ginsambit ni apostol Pedro ang isa ka sitwasyon. Nagsiling sia: “Labaw sa tanan, maghigugmaanay kamo sing tudok, bangod ang gugma nagatabon sang madamo nga sala.” (1 Ped. 4:8) Gani matilawan ang aton gugma sa aton mga kauturan kon may ginhimo sila ukon ginsiling nga nagpalain sang aton buot. w23.11 10 ¶12-13

Indi naton matuman ang sugo ni Jesus parte sa gugma kon pila lang ka kauturan sa kongregasyon ang pakitaan naton sang gugma. Siempre, pareho kay Jesus, posible nga mas suod kita sa pila ka kauturan. (Juan 13:23; 20:2) Pero nagsiling si apostol Pedro nga dapat naton panikasugan nga pakitaan sang ‘utudnon nga pagpalangga’ ang tanan naton nga kauturan kay pamilya naton sila. (1 Ped. 2:17) Ginapalig-on kita ni Pedro nga dapat “maghigugmaanay [kita] sing hanuot halin sa tagipusuon.” (1 Ped. 1:22) Ang “hanuot” nga gugma nagakahulugan nga dapat naton pakitaan sang gugma bisan ang mga kauturan nga daw nabudlayan kita nga higugmaon. Halimbawa, ano abi kon naglain ang aton buot sa isa ka utod bangod sa iya ginsiling ukon ginhimo? Posible nga mahunahuna naton dayon nga magbalos imbes nga magpakita sang gugma. Pero, natun-an ni Pedro kay Jesus nga wala nalipay ang Dios kon magbalos kita. (Juan 18:​10, 11) Nagsulat si Pedro: “Indi magbalos sang kahalitan sa kahalitan ukon sang insulto sa insulto. Sa baylo, magbalos kamo sing pagpakamaayo.” (1 Ped. 3:9) Kon may hanuot ka nga gugma, magapakita ka sang kaayo. w23.09 28-29 ¶9-11

Natalupangdan mo bala nga kadasig lang magdalagku sang mga bata? Nagadaku sila bisan pa daw wala sila nagapanikasog. Pero, para magdaku kita bilang isa ka Cristiano ukon para mangin hamtong kita, kinahanglan naton magpanikasog. (1 Cor. 13:11; Heb. 6:1) Para mangin hamtong kita, dapat suod gid ang aton kaangtanan kay Jehova. Kinahanglan man naton ang iya balaan nga espiritu para mapakita naton ang mga kinaiya nga nanamian niya, para makatuon kita sang mga ikasarang nga makabulig sa aton, kag para mahandaan naton ang posible mga responsibilidad naton sa palaabuton. (Hulu. 1:5) Sang gintuga ni Jehova ang mga tawo, nagtuga sia sing lalaki kag babayi. (Gen. 1:27) Indi lang sa pisikal may kinalain ang mga lalaki kag mga babayi, kundi madamo pa sila sing kinalain. Halimbawa, gintuga ni Jehova ang mga lalaki kag mga babayi para tungdan ang lainlain nga mga responsibilidad. Para mahimo nila ini nga mga responsibilidad, kinahanglan nila ang pila ka kinaiya kag mga ikasarang.​—Gen. 2:18. w23.12 18 ¶1-2

Gusto bala ni Jesus nga gamiton sang iban ang personal nga ngalan sang iya Amay? Huo. Sang panahon ni Jesus, posible nagapati ang pila ka lider sang relihion nga indi dapat pagsambiton ang ngalan sang Dios kay balaan ini katama. Pero isa ini ka tradisyon nga wala nabase sa Kasulatan, gani wala ini nakapugong kay Jesus sa pagdayaw sa ngalan sang iya Amay. Binagbinaga ang tion nga gin-ayo ni Jesus ang isa ka lalaki nga ginsudlan sang mga demonyo sa rehiyon sang mga taga-Gerasa. Hinadlukan ang mga tawo didto kag ginpangabay nila si Jesus nga maghalin sa ila lugar, gani naglakat si Jesus. (Mar. 5:​16, 17) Pero, gusto ni Jesus nga makilala sang mga tawo didto si Jehova. Gani ginsilingan niya ang lalaki nga gin-ayo niya nga isugid ini sa mga tawo. Puede kuntani nga silingan sia ni Jesus nga isugid sa mga tawo ang ginhimo niya sa iya, pero ginsilingan sia ni Jesus nga isugid niya sa mga tawo ang ginhimo sa iya ni Jehova. (Mar. 5:19) Subong, gusto man ni Jesus nga ipakilala naton ang ngalan sang iya Amay sa bilog nga kalibutan. (Mat. 24:14; 28:20) Kon himuon naton ini, malipay sa aton ang aton Hari nga si Jesus. w24.02 10 ¶10

Isa gid ka pagpakamaayo nga bahin kita sang organisasyon ni Jehova sa sining mabudlay nga katapusan nga mga adlaw. Nagabudlay pa gid ang sitwasyon sa sini nga kalibutan, pero ginhatagan kita ni Jehova sang mga kauturan para buligan kita. (Sal. 133:1) Ginabuligan niya kita para mangin malipayon ang aton pamilya. (Efe. 5:33–6:1) Kag ginahatagan niya kita sang paghantop kag kaalam para masarangan naton ang mga kabalaka kag mangin malinong ang aton hunahuna. Pero, dapat kita magpanikasog para padayon naton nga maalagad sing matutom si Jehova. Ngaa? Bangod kon kaisa, posible masandad kita kon may ginsiling ukon ginhimo ang iban nga nagpalain sang aton buot. Posible magluya man ang aton buot kon makahimo kita sang mga sala, ilabi na kon sulitsulit lang ini. Dapat kita magpadayon sa pag-alagad kay Jehova (1) bisan pa nasandad kita sa isa ka utod, (2) bisan pa mabudlay ang aton sitwasyon bangod sa aton asawa ukon bana, kag (3) bisan pa nagluya ang aton buot bangod sa nahimo naton nga mga sala. w24.03 14 ¶1-2

Madamo nga kauturan ang nagdesisyon nga dugangan ang ila ginahimo sa pag-alagad kay Jehova, kag pirme kita makabati parte sa ila mga eksperiensia. Posible nga nag-eskwela sila sa School for Kingdom Evangelizers ukon nagsaylo sila sa lugar nga nagakinahanglan sang dugang nga manugbantala. Kon masarangan mo man ini himuon, kanami gid sini nga goal ukon tulumuron. Gusto gid sang katawhan ni Jehova nga dugangan ang ila ginahimo para sa iya. (Binu. 16:9) Pero, ano abi kon indi mo pa masarangan nga himuon ini subong? Indi paghunahunaa nga waaywaay ka kon ikumparar sa iban nga makasarang nga himuon ini. Ang importante, padayon ka nga nagabatas. (Mat. 10:22) Indi pagpakadiutaya ang imo ginahimo nga pag-alagad kay Jehova suno sa imo mga ikasarang kag kahimtangan. Importante ini nga paagi para padayon mo nga masunod si Jesus pagkatapos mo magpabawtismo.​—Sal. 26:1. w24.03 10 ¶11

Nagapromisa ang aton Amay sa langit nga patawaron niya kita kon maghinulsol kita. (Sal. 86:5) Gani kon sinsero ang aton paghinulsol sa nahimo naton nga mga sala, makasalig kita nga ginpatawad na kita ni Jehova kay amo ini ang iya ginpromisa. Dumdumon naton nga makatarunganon si Jehova. Wala niya kita ginasugo nga himuon naton ang indi naton masarangan. Bisan ano man ang aton ginahimo sa pag-alagad sa iya, ginapabaloran gid niya ini basta ginahimo naton ini sa bug-os naton nga masarangan. Pamalandungan man naton ang mga karakter sa Biblia nga nag-alagad kay Jehova sa bug-os nila nga tagipusuon. Binagbinaga ang halimbawa ni Pablo. Nagpangabudlay sia sa sulod sang madamo nga tinuig. Halimbawa, naglakbay sia sing linibo ka kilometro kag nagbulig sia nga maporma ang madamo nga kongregasyon. Pero sang nagbag-o ang iya sitwasyon, limitado na lang ang iya mahimo sa pagbantala. Ginapakita bala sini nga wala na nalipay sa iya si Jehova? Indi. Padayon niya nga ginhimo ang iya masarangan, kag ginpakamaayo sia ni Jehova. (Binu. 28:​30, 31) Sing kaanggid, posible magbag-o ang aton masarangan nga himuon para kay Jehova. Pero ang importante kay Jehova amo ang aton motibo sa pag-alagad sa iya. w24.03 27 ¶7, 9

Paagi sa mga pangamuyo ni Jesus kay Jehova, nagpakita sia sang maayo nga halimbawa nga dapat sundon sang iya mga disipulo. Sa tion sang pagministeryo ni Jesus, pirme sia nagapangamuyo. Bangod masako sia kag madamo nga tawo ang nagakadto sa iya, dapat sia magpain sang tion para sa pangamuyo. (Mar. 6:​31, 45, 46) Aga pa sia nagabugtaw para may tion sia nga mangamuyo nga sia lang isa. Isa ka bes, nangamuyo sia sa bilog nga gab-i antes sia naghimo sang importante nga desisyon. (Luc. 6:​12, 13) Kag sang gab-i antes napatay si Jesus, sulitsulit sia nga nangamuyo kay gusto niya tumanon ang pinakamabudlay nga bahin sang iya asaynment diri sa duta. (Mat. 26:​39, 42, 44) Ginapakita sang halimbawa ni Jesus nga bisan pa masako kita, dapat may tion gid kita para sa pangamuyo. Pareho kay Jesus, posible nga kinahanglan naton mag-iskedyul sang tion para sa sini. Para mahimo ini, puede kita magbugtaw sing aga pa. Kon gab-i naman kon inugtulog na naton, puede nga indi kita anay magtulog dayon. Kon himuon naton ini, ginapakita naton kay Jehova nga nagapasalamat gid kita sa sining espesyal nga regalo. w23.05 3 ¶4-5

Sa orihinal nga lenguahe, ginapakita sini nga teksto nga daw pareho sa tubig ang gugma ni Jehova para sa mga hinaplas. Mabakod gid ang iya gugma para sa ila kay makumparar ini sa sapa nga madamo sing tubig. Ginapakita sini nga ilustrasyon nga palangga gid sila ni Jehova. Kag kabalo ang mga hinaplas nga “ginahigugma [sila] sang Dios.” (Jud. 1) Ginpabutyag ni apostol Juan ang ila ginabatyag bilang mga hinaplas. Nagsiling sia: “Hunahunaa kon daw ano kadaku ang gugma sang Amay sa aton. Gintugutan niya kita nga tawgon nga mga anak sang Dios!” (1 Juan 3:1) Pero, ang mga hinaplas lang bala ang ginahigugma ni Jehova? Indi. Ginpamatud-an ni Jehova nga ginahigugma niya kita tanan. Ano ang pinakamabakod nga pamatuod nga ginahigugma kita ni Jehova? Ang halad-gawad. Kay man, amo ini ang pinakadaku nga ekspresyon sang gugma sa bilog nga uniberso.​—Juan 3:16; Roma 5:8. w24.01 28 ¶9-10

Ginapakita sang teksto subong nga adlaw kon ano ang nakabulig kay David sang hinadlukan sia. Bisan pa ara sa peligro ang iya kabuhi, ginpamalandungan niya kon ano ang mga himuon ni Jehova para sa iya sa palaabuton. Kabalo si David nga luwason sia ni Jehova sa husto gid nga tion. Kay man, nagsiling si Jehova nga si David amo ang masunod nga hari sang Israel. (1 Sam. 16:​1, 13) Para kay David, kon may ginpromisa si Jehova, matuman gid ini. Ano ang ginpromisa ni Jehova nga himuon niya para sa imo? Wala naton ginapaabot nga amligan niya kita sa tanan nga problema. Pero tandai nga bisan ano man nga problema ang imo maeksperiensiahan sa sining daan nga kalibutan, dulaon ini ni Jehova sa bag-o nga kalibutan. (Isa. 25:​7-9) Gamhanan gid ang aton Manunuga kag masarangan niya nga banhawon ang mga patay, ayuhon ang aton mga balatian, kag dulaon ang tanan nga nagapamatok sa aton.​—1 Juan 4:4. w24.01 6 ¶12-13

Pamalandungi kon ngaa gindedikar mo ang imo kabuhi kay Jehova kag kon ngaa nagpabawtismo ka. Ginhimo mo ini kay gusto mo nga magdampig kay Jehova. Dumduma kon ano ang nagkumbinsi sa imo nga ang imo ginatun-an amo gid ang kamatuoran. Bangod natun-an mo ang sibu nga ihibalo parte kay Jehova, nagdayaw ka gid sa iya kag ginhigugma mo sia bilang imo Amay sa langit. Dayon nagbakod ang imo pagtuo kag napalig-on ka nga maghinulsol. Gin-untatan mo ang paghimo sang mga butang nga ginadumtan ni Jehova kag ginhimo mo ang mga butang nga nagapalipay sa iya. Gani nangin malinong ang imo hunahuna bangod narealisar mo nga ginpatawad ka na sang Dios. (Sal. 32:2) Nag-attend ka sa mga miting sang kongregasyon kag ginsugid mo sa iban ang dalayawon nga mga butang nga imo natun-an. Bilang isa ka dedikado kag bawtismado nga Cristiano, nagalakat ka na subong sa dalan nga nagapadulong sa kabuhi, gani himua gid ang imo bug-os nga masarangan nga magpabilin sa sini nga dalan. (Mat. 7:​13, 14) Kabay nga magpabilin ka nga malig-on, mangin matutom kay Jehova, kag magtuman pirme sa iya mga kasuguan. w23.07 17 ¶14; 19 ¶19

Kon pamalandungan mo ang imo ginpromisa kay Jehova nga himuon mo ang iya kabubut-on, mangin mabakod ka nga pamatukan ang bisan ano nga pagsulay. Halimbawa, indi ka gid mag-flirt ukon magpakiat sa asawa ukon bana sang iban. Kay man, nagpromisa ka kay Jehova nga indi mo gid ina paghimuon. Kon indi mo pagpunggan ang indi husto nga mga balatyagon, mabudlayan ka sa pagdula sini sa ulihi. Pero kon punggan mo ini dayon, malikawan mo ini nga problema kay ‘ginalikawan’ mo ang “banas sang malauton.” (Hulu. 4:​14, 15) Pamalandungi ang halimbawa ni Jesus. Gusto gid niya nga malipay sa iya ang iya Amay. Gani pareho kay Jesus, dumduma nga nagdedikar ka na kay Jehova, kag isikway dayon ang bisan ano nga makapaakig sa Iya. (Mat. 4:10; Juan 8:29) Kon makaeksperiensia ka sang mga pagtilaw kag mga pagsulay, kahigayunan ini para mapakita mo nga gusto mo gid nga padayon nga magsunod kay Jesus. Kag makasalig ka nga buligan ka ni Jehova nga mahimo ini. w24.03 9-10 ¶8-10