Oktubre

May mga tion bala nga nabudlayan ka magtuman? Naeksperiensiahan ini ni Hari David, gani nangamuyo sia sa Dios: “Pukawa ang akon handum nga magtuman sa imo.” (Sal. 51:12) Palangga ni David si Jehova, pero may mga tion nga nabudlayan sia magtuman sa Iya. Nabudlayan man kita magtuman kon kaisa. Ngaa? Una, may mga tion nga nabudlayan kita magtuman bangod napanubli naton ining indi maayo nga kinaiya. Ikaduha, ginasulay kita ni Satanas nga magrebelde pareho sa ginhimo niya. (2 Cor. 11:3) Ikatlo, lapnag sa kalibutan “ang espiritu nga nagapanghikot na karon sa mga anak sang pagkadimatinumanon.” (Efe. 2:2) Gani dapat gid kita magpanikasog para mabatuan ang indi maayo nga kinaiya nga napanubli naton, ang Yawa, kag ang impluwensia sini nga kalibutan. Dapat naton himuon ang aton bug-os nga masarangan para matuman naton si Jehova kag ang mga ginhatagan niya sang awtoridad. w23.10 6 ¶1

Ano ang matun-an naton sa milagro ni Jesus sang ginhimo niya nga alak ang tubig? Dapat kita mangin mapainubuson. Wala ginpadayaw ni Jesus ang milagro nga ginhimo niya. Ang matuod, wala gid niya ginpadayaw ang iya mga ginhimo. Sa baylo, mapainubuson gid si Jesus kag pirme niya ginahatag sa iya Amay ang tanan nga pagdayaw kag dungog. (Juan 5:​19, 30; 8:28) Maayo gid kon ilugon naton ang pagkamapainubuson ni Jesus. Makabulig ini sa aton nga indi pag-ipadayaw ang aton mga hinimuan. Sa baylo, ipabugal naton ang parte sa dalayawon nga Dios nga aton ginaalagad. (Jer. 9:​23, 24) Dapat naton sia padunggan kay sia lang ang nagakabagay sini. Kay man, wala gid kita sing masarangan nga himuon kon indi kita pagbuligan ni Jehova. (1 Cor. 1:​26-31) Kon mapainubuson kita, indi naton gusto nga dayawon kita bangod sa maayo nga ginhimo naton para sa iban. Nalipay kita kay kabalo kita nga nakita ni Jehova ang aton ginahimo kag ginapabaloran niya ini. (Ipaanggid ang Mateo 6:​2-4; Heb. 13:16) Nalipay gid si Jehova kon ginailog naton ang pagkamapainubuson ni Jesus.​—1 Ped. 5:6. w23.04 4 ¶9; 5 ¶11-12

Gintuytuyan si apostol Pablo nga palig-unon ang mga Cristiano nga pangitaon ang kaayuhan sang iban. Paano naton maaplikar ini nga prinsipio sa aton mga miting? Dapat naton dumdumon nga pareho sa aton, gusto man sang iban nga magkomento. Binagbinaga ini nga sitwasyon. Kon nagaistoryahanay kamo sang imo mga abyan, gusto mo bala nga ikaw lang pirme ang nagahambal? Siempre indi. Gusto mo nga mag-istorya man sila. Amo man sini sa aton mga miting. Gusto naton nga madamo nga kauturan ang makakomento. Ang matuod, ang isa sa pinakamaayo nga paagi para mapalig-on naton ang aton mga kauturan amo ang paghatag sa ila sang tsansa nga mapabutyag ang ila pagtuo. (1 Cor. 10:24) Para madamo ang makakomento, lip-uton lang naton ang aton komento. Bisan pa malip-ot lang ang imo komento, likawi nga magkomento sang madamo nga punto. Kon ubuson mo ang tanan nga punto sa parapo, diutay na lang ang puede ikomento sang iban. w23.04 22-23 ¶11-13

Dapat naton dumdumon nga importante gid nga padayon naton nga buligan ang iban, ilabi na paagi sa aton pagbantala. Dapat kita mangin flexible sa aton pagbantala. Lainlain ang mga ginapatihan, kinaiya, kag gindak-an sang mga tawo nga aton ginabantalaan. Nangin flexible si apostol Pablo, kag makatuon kita sa iya halimbawa. Gintangdo sia ni Jesus nga mangin ‘apostol sa mga pungsod.’ (Roma 11:13) Gani ginbantalaan ni Pablo ang mga Judiyo, mga Griego, mga may tinun-an, mga ordinaryo nga mga tawo, mga opisyal sang gobierno, kag mga hari. Para malab-ot ni Pablo ang tagipusuon sining sarisari nga mga tawo, ‘nakigbagay sia sa tanan nga sahi sang tawo.’ (1 Cor. 9:​19-22) Ginhunahuna niya sing maayo kon ano ang ila kultura, gindak-an, kag ginapatihan. Bangod sini, kabalo sia kon ano nga mga topiko ang posible makapainteres sa iya maistorya. Kon mangin flexible kita kag kon panikasugan naton nga ibagay ang aton topiko sa sitwasyon sang kada tawo, mangin mas epektibo man kita sa aton pagbantala. w23.07 23 ¶11-12

Ang kalulo indi isa ka kaluyahon. Ang matuod, kinahanglan naton mangin mabakod para makapabilin kita nga kalmado sa mabudlay nga mga sitwasyon. Ang kalulo isa sa “mga kinaiya nga ginapatubas sang espiritu.” (Gal. 5:​22, 23) Ang Griego nga tinaga nga gin-translate “kalulo” gingamit man para ilaragway ang ilahas nga kabayo nga naanta na. Nangin mahagop na ang kabayo, pero makusog ini gihapon. Sa aton bahin, paano naton mapakita nga malulo kita kag mabakod? Indi naton ini mahimo kon magsalig lang kita sa aton kaugalingon. Dapat kita mangamuyo sa Dios para pangayuon ang iya balaan nga espiritu kag pangabayon sia nga buligan kita nga mapakita ining dalayawon nga kinaiya. Madamo ang makapamatuod nga posible gid ini. Halimbawa, madamo sa aton mga kauturan ang nangin malulo sang ginbais sila sang mga nagapamatok sa aton. Bangod sini, nangin maayo ang impresyon sa aton sang iban.​—2 Tim. 2:​24, 25. w23.09 15 ¶3

Nakita ni apostol Juan sa isa ka dalayawon nga palanan-awon ang 24 ka gulang sa langit nga nagasimba kay Jehova. Gindayaw nila ang Dios kag nagsiling sila nga takus sia nga magbaton “sang himaya kag dungog kag gahom.” (Bug. 4:​10, 11) Madamo man sang rason ang matutom nga mga anghel para dayawon kag padunggan si Jehova. Kaupod nila sia sa langit, gani kilala gid nila sia. Nakita nila sa iya mga ginahimo ang iya mga kinaiya, kag ginadayaw nila sia. (Job 38:​4-7) Dapat man naton dayawon si Jehova sa aton mga pangamuyo. Mahimo naton ini paagi sa pagsiling sa iya kon ngaa palangga naton sia kag kon ano ang nanamian naton sa iya. Sa kada tion nga nagabasa ka kag nagatuon sang Biblia, panikasugi nga makita ang mga kinaiya ni Jehova nga nanamian mo gid. (Job 37:23; Roma 11:33) Dayon isugid kay Jehova kon ngaa nanamian ka gid sa sini nga mga kinaiya. Dayawon man naton si Jehova bangod ginabuligan niya kita kag ang tanan naton nga kauturan.​—1 Sam. 2:​1, 2. w23.05 3-4 ¶6-7

Sang 1919, nahilway ang katawhan sang Dios sa Babilonia nga Daku. Sina nga tuig, gin-umpisahan sang “matutom kag mainandamon nga ulipon” ang ila hilikuton para makalakat ang sinsero nga mga tawo sa bag-o ginbuksan nga “Dalan sang Pagkabalaan.” (Mat. 24:​45-47; Isa. 35:8) Nagapasalamat gid kita sa ginhimo sang mga naghanda sang dalan. Bangod sa ila ginhimo, nabuligan ang mga tawo nga naglakat sa sini nga dalan nga madugangan ang ila nabal-an parte kay Jehova kag sa iya mga katuyuan. (Hulu. 4:18) Nabuligan man sila kon paano nila tumanon ang mga kasuguan ni Jehova sa ila kabuhi. Wala ginapaabot ni Jehova nga himuon sang iya katawhan ang tanan nga pagbag-o sa isa lang ka tion. Sa baylo, ginabuligan niya sila nga maghimo sang amat-amat nga pagbag-o. Gusto naton nga malipay ang Dios sa tanan naton nga ginahimo, kag magaabot ang tion nga mahimo gid naton ini. Sigurado nga grabe gid ang aton kalipay kon mag-abot na ini nga tion. Importante ang regular nga pagmentinar sa mga dalan. Sugod sang 1919, regular nga ginamentinar ang “Dalan sang Pagkabalaan” para mabuligan ang mas madamo nga tawo nga makagua sa Babilonia nga Daku. w23.05 17 ¶15; 19 ¶16

Ang mga miembro mismo sang Nagadumala nga Hubon ang nagahanas sa mga kabulig sa sarisari nga mga komite sang Nagadumala nga Hubon. Subong, matutom nga ginahimo sini nga mga kabulig ang ila madamo nga responsibilidad sa organisasyon. Nahanas sila sing maayo, gani handa gid sila nga atipanon ang mga karnero sang Cristo. Kon dal-on na sa langit ang tanan nga hinaplas nga ari pa sa duta antes matapos ang dakung kapipit-an, padayon nga magasimba kay Jehova sa husto nga paagi ang iya katawhan diri sa duta. Nagapasalamat gid kita sa pagpanguna ni Jesucristo kay ginabuligan niya kita nga padayon nga mangin matutom kay Jehova. Sa tion sang dakung kapipit-an, salakayon kita sang Gog sang Magog ukon sang naghimbon nga mga pungsod. (Ezeq. 38:​18-20) Pero mapaslawan ang ila pagsalakay kay indi gid nila mapauntat sa pagsimba kay Jehova ang iya katawhan. Sigurado gid nga luwason sila ni Jehova. Sa isa ka palanan-awon, nakita ni apostol Juan ang “daku nga kadam-an” sang iban nga mga karnero sang Cristo. Ginsilingan si Juan nga “naggua halin sa dakung kapipit-an” ining “daku nga kadam-an.” (Bug. 7:​9, 14) Gani sigurado kita nga amligan sila ni Jehova. w24.02 5-6 ¶13-14

Ano ang himuon naton para mabaton naton ang balaan nga espiritu? Dapat naton ini ipangamuyo, tun-an naton ang Pulong sang Dios, kag magpakigbahin kita sa mga hilikuton sang organisasyon nga ginatuytuyan sang iya espiritu. Kon himuon naton ini, makabulig ini sa aton nga mapakita “ang mga kinaiya nga ginapatubas sang espiritu.” (Gal. 5:​22, 23) Ginahatag lang sang Dios ang iya espiritu sa mga nagatinguha nga mangin matinlo pirme sa ila hunahuna kag paggawi. Kon indi naton pagdulaon ang indi maayo nga mga handum sa aton hunahuna kag kon ginahimo naton ini nga mga handum, untaton niya ang paghatag sang iya espiritu. (1 Tes. 4:​7, 8) Para padayon naton nga mabaton ang balaan nga espiritu, dapat ‘indi man naton pagtamayon ang mga tagna.’ (1 Tes. 5:20) Ang “mga tagna” amo ang mga mensahe nga ginahatag sa aton ni Jehova paagi sa iya balaan nga espiritu. Nalakip sa sini nga mensahe ang parte sa adlaw ni Jehova kag kon daw ano na lang kalip-ot sang nabilin nga tion. Wala naton ginapamensar nga indi pa matabo ang adlaw ni Jehova, ukon ang Armageddon, sa aton tion subong. Sa baylo, pirme naton ginadumdom nga malapit na lang gid ini. Gani masako kita sa paghimo sang “mga buhat sang diosnon nga debosyon” kag padayon naton nga ginatinguhaan nga himuon ang matarong nga paggawi.​—2 Ped. 3:​11, 12. w23.06 12 ¶13-14

Bilang mga Cristiano, ano ang dapat naton himuon kon gulpi lang may naggua nga imoral nga piktyur sa aton gadyet? Dapat indi gid naton ini pagtan-awon. Para mahimo naton ini, dapat naton dumdumon nga ang aton kaangtanan kay Jehova amo ang pinakaimportante sa aton. Bisan gani ang mga piktyur nga indi man imoral posible gihapon makaimpluwensia sa aton nga maghunahuna sang imoral nga mga handum. Ngaa indi naton ini dapat pagtan-awon? Bangod indi naton gusto maghimo sang bisan ano nga posible mangin rason nga maghandum kita sang imoral. (Mat. 5:​28, 29) Ang isa ka gulang sa Thailand nga si David nagsiling: “Ginapamangkot ko ang akon kaugalingon: ‘Bisan pa indi man imoral ang piktyur, malipay ayhan si Jehova kon padayon ko ini nga tan-awon?’ Nabuligan ako sini nga himuon ang husto.” Kon nahadlok kita nga masubuan si Jehova, buligan kita sini nga himuon ang husto. Ang kahadlok sa Dios “amo ang una nga tikang,” ukon pundasyon, “sa pagtigayon sing kaalam.” w23.06 23 ¶12-13

Ang “mga hulot” posible nga nagapatuhoy sa aton mga kongregasyon. Nagapromisa si Jehova nga sa tion sang dakung kapipit-an, amligan niya kita kon padayon kita nga mag-alagad sa iya kaupod sa aton mga kauturan. Gani, magluwas nga dapat naton batason ang aton mga kauturan, dapat man naton panikasugan subong nga pabakuron pa gid ang aton gugma sa ila. Nagadepende sa sini ang aton kaluwasan. Mabudlayan gid ang tanan nga tawo sa tion sang “daku nga adlaw ni Jehova.” (Sof. 1:​14, 15) Gani makaeksperiensia man sang mga kabudlayan ang katawhan ni Jehova. Pero kon maghanda kita subong, mangin kalmado kita kag makabulig kita sa iban. Mabatas naton ang bisan ano nga problema. Kon makaeksperiensia sang kabudlayan ang aton mga kauturan, buligan naton sila sa bug-os naton nga masarangan paagi sa pagpakita sang kaluoy sa ila kag paghatag sang ila mga kinahanglanon. Kag kon higugmaon naton ang aton mga kauturan subong, sigurado gid nga pakitaan man naton sila sang gugma sa palaabuton. Kon himuon naton ini, padyaan kita ni Jehova sing kabuhi nga wala sing katapusan sa isa ka kalibutan nga wala na sang mga kalamidad kag mga problema nga magahalit sa aton.​—Isa. 65:17. w23.07 7 ¶16-17

Sa masami, ginalaragway sang Pulong sang Dios ang matutom nga mga alagad ni Jehova bilang mabakod nga mga tawo. Pero may mga tion nga pamatyag nila indi sila mabakod. Nabatyagan ini bisan sang mga pinakamaisog kag pinakamakusog nga alagad ni Jehova. Halimbawa, may mga tion nga pamatyag ni Hari David ‘mabakod sia kaangay sang bukid,’ pero may mga tion man nga “hinadlukan” sia. (Sal. 30:7) Sa bahin naman ni Samson, makusog gid sia kay ginhatagan sia sang espiritu sang Dios sing kusog. Pero kabalo sia nga kon wala ang kusog nga ginhatag sa iya sang Dios, “magaluya [sia] nga pareho lang sang iban nga tawo.” (Huk. 14:​5, 6; 16:17) Gani nangin mabakod ining matutom nga mga alagad ni Jehova bangod ginpabakod niya sila. Kabalo si apostol Pablo nga kinahanglan man niya ang bulig ni Jehova. (2 Cor. 12:​9, 10) Halimbawa, nagbalatian si Pablo. (Gal. 4:​13, 14) May mga tion man nga nabudlayan sia nga himuon ang husto. (Roma 7:​18, 19) Kag kon kaisa, nabalaka sia kag nakulbaan. (2 Cor. 1:​8, 9) Pero, sa mga tion nga maluya si Pablo, nagbaskog sia. Paano? Ginhatagan ni Jehova si Pablo sing kusog para mabatas niya ang mga kabudlayan. w23.10 12 ¶1-2

Kon nagabatyag kita kon kaisa nga wala kita sing pulos, dumdumon naton nga si Jehova mismo ang nagbuyok sa aton. (Juan 6:44) Nakita niya ang aton maayo nga mga kinaiya nga posible wala naton nakita, kag mas kilala niya kita sangsa pagkakilala naton sa aton kaugalingon. (2 Cron. 6:30) Gani kon magsiling sia nga hamili kita sa iya, masaligan gid naton ini. (1 Juan 3:​19, 20) Posible nga ginakonsiensia gihapon ang pila sa aton bangod sa mga nahimo naton antes naton natun-an ang kamatuoran. (1 Ped. 4:3) Bisan ang matutom nga mga Cristiano padayon nga nagapakigbato sa ila mga kaluyahon. Nagabatyag ka bala kon kaisa nga indi ka mapatawad ni Jehova? Makapaumpaw mahibaluan nga nabatyagan man ini sang matutom nga mga alagad ni Jehova. Halimbawa, nahunahuna ni apostol Pablo nga makaluluoy gid sia bangod sa iya mga kaluyahon. (Roma 7:24) Siempre, ginhinulsulan ni Pablo ang iya mga sala kag nagpabawtismo sia. Pero, gintawag niya ang iya kaugalingon nga “labing kubos sa mga apostoles” kag “labing makasasala.”​—1 Cor. 15:9; 1 Tim. 1:15. w24.03 27 ¶5-6

Ari ang isa ka leksion nga matun-an naton sa indi maayo nga desisyon ni Hari Jehoas: Dapat naton pilion nga mga abyan ang mga nagapalangga kay Jehova kag ang mga nagapanikasog nga mapalipay sia. Buligan kita sini nga klase sang mga abyan nga himuon ang maayo. Puede pa gani naton mangin abyan ang mga mas magulang sa aton ukon ang mga manghod sa aton. Dumduma nga mas bata si Jehoas sangsa iya abyan nga si Jehoiada. Kon parte sa imo mga abyan, pamangkuta ang imo kaugalingon: ‘Ginabuligan bala nila ako nga magbakod ang akon pagtuo kay Jehova? Ginapalig-on bala nila ako nga tumanon ang mga kasuguan sang Dios? Ginaistoryahan bala nila ang parte kay Jehova kag ang mga kamatuoran sa Biblia? Ginatuman bala nila ang mga kasuguan sang Dios? Ginalaygayan bala nila ako kon may ginahimo ako nga indi maayo, ukon ginakunsinti lang nila ang akon ginahimo?’ (Hulu. 27:​5, 6, 17) Sa tuod lang, kon indi palangga sang imo mga abyan si Jehova, indi mo sila kinahanglan. Pero kon palangga sang imo mga abyan si Jehova, pabalori sila kay mangin maayo sila nga impluwensia sa imo.​—Hulu. 13:20. w23.09 9-10 ¶6-7

Ang alpha amo ang una nga letra sa Griego nga alpabeto, kag ang omega amo ang katapusan nga letra. Paagi sa pagsiling ni Jehova nga sia “ang Alpha kag ang Omega,” ginapahangop niya nga kon may gin-umpisahan sia nga himuon, tapuson gid niya ini. Pagkatapos gintuga ni Jehova si Adan kag si Eva, ginsilingan Niya sila: “Magpanganak kamo kag magdamo, pun-a ninyo ang duta kag dumalahan ini.” (Gen. 1:28) Sadto nga tion, daw pareho lang nga nagsiling si Jehova sing “Alpha.” Kon mapuno na ang duta sang perpekto kag matinumanon nga mga kaliwat nanday Adan kag Eva kag mangin Paraiso na ini, matuman na ang katuyuan ni Jehova. Sa sina nga tion, daw pareho lang nga magasiling si Jehova sing “Omega.” Sang matapos ni Jehova ang pagtuga ‘sa langit kag sa duta kag sa tanan nga yara sa sini,’ naghatag sia sang garantiya. Garantiya ini nga tumanon gid niya ang iya katuyuan para sa mga tawo kag sa duta, kag matuman ini sing bug-os sa katapusan sang ikapito nga adlaw.​—Gen. 2:​1-3. w23.11 5 ¶13-14

Mga apat ka bulan ang paglakat halin sa Babilonia pakadto sa Israel, kag mabudlay gid ini. Pero nagpromisa si Jehova nga kuhaon niya ang bisan ano nga problema nga posible makapugong sa ila pagbalik. Kabalo ang matutom nga mga Judiyo nga kon magbalik sila sa Israel, mas madamo ang mabaton nila nga mga pagpakamaayo sangsa himuon nila nga mga sakripisyo. Ang pinakadaku nga pagpakamaayo nga mabaton nila amo ang parte sa ila pagsimba. Wala gid sang templo ni Jehova sa Babilonia. Wala man sing halaran sa Babilonia nga puede gamiton sang mga Israelinhon. Bangod sini, indi nila mahimo ang ginapatuman sa ila sang Mosaikong Kasuguan parte sa paghalad kay Jehova, kag wala naorganisar ang mga saserdote para himuon ini nga mga paghalad. Mas madamo man ang mga tawo nga nagasimba sa indi matuod nga mga dios sangsa mga tawo nga nagapalangga kay Jehova ukon nagapabalor sa iya mga kasuguan. Gani gusto gid sang linibo ka Judiyo nga nagapalangga kay Jehova nga magbalik sa ila pungsod para masimba nila sia liwat sa husto nga paagi. w23.05 14-15 ¶3-4

Kinahanglan naton ang bulig sang balaan nga espiritu sang Dios para maggawi kita pirme “subong mga anak sang kapawa.” Ngaa? Bangod indi mahapos nga magpabilin nga matinlo sa sining imoral nga kalibutan. (1 Tes. 4:​3-5, 7, 8) Buligan kita sang balaan nga espiritu nga sikwayon ang panghunahuna sang mga tawo sa sini nga kalibutan, lakip na ang ila mga ginatudlo kag ginapatihan nga indi suno sa panghunahuna sang Dios. Buligan man kita sang balaan nga espiritu nga mapakita ang “tanan nga sahi sang kaayo [kag] pagkamatarong.” (Efe. 5:9) Ang isa ka paagi para mabaton naton ang balaan nga espiritu amo ang pangayuon ini paagi sa pagpangamuyo. Nagsiling si Jesus nga ‘ihatag ni Jehova ang balaan nga espiritu sa mga nagapangayo sa iya.’ (Luc. 11:13) Kag kon tingob naton nga ginadayaw si Jehova sa aton mga miting sang kongregasyon, mabaton man naton ang balaan nga espiritu. (Efe. 5:​19, 20) Maayo gid ang impluwensia sang balaan nga espiritu sang Dios sa aton. Buligan kita sini nga magkabuhi sa paagi nga malipay sa aton ang Dios. w24.03 23-24 ¶13-15

Gusto mo bala nga mangin mas mapinasensiahon? Puede mo ini ipangamuyo. Ang pagkamapinasensiahon isa sa mga kinaiya nga ginapatubas sang balaan nga espiritu. (Gal. 5:​22, 23) Gani puede naton ipangamuyo kay Jehova nga buligan kita nga mapakita ang mga kinaiya nga ginapatubas sang balaan nga espiritu. Kon makaeksperiensia kita sang sitwasyon nga mabudlayan kita nga mangin mapinasensiahon, dapat ‘padayon naton nga pangayuon’ ang balaan nga espiritu para buligan kita nga mangin mapinasensiahon. (Luc. 11:13) Puede man naton pangabayon si Jehova nga buligan kita nga mailog ang iya pagtamod. Pagkatapos naton pangamuyo, dapat naton panikasugan nga mangin mapinasensiahon kada adlaw. Kon padayon kita nga mangamuyo nga buligan kita nga mangin mapinasensiahon kag kon panikasugan naton nga ipakita ini nga kinaiya, buligan kita ni Jehova nga mangin mas mapinasensiahon. Makabulig man sa aton ang pagpamalandong sa mga halimbawa sa Biblia. Madamo kita sang mabasa sa Biblia parte sa mga tawo nga mapinasensiahon. Kon pamalandungan naton ini nga mga halimbawa, makatuon kita kon paano mangin mapinasensiahon. w23.08 22-23 ¶10-11

Ginpasalig ni Jesus si apostol Pedro nga atipanon sia ni Jehova. Sang ginbanhaw si Jesus, naghimo sia liwat sang milagro. Gani nakakuha naman sang madamo nga isda si Pedro kag ang iban pa nga mga apostoles. (Juan 21:​4-6) Sigurado gid nga paagi sa sini nga milagro, nagbakod pa gid ang pagsalig ni Pedro nga masarangan ni Jehova nga hatagan sia sang iya materyal nga mga kinahanglanon. Posible nga nadumduman dayon ni Pedro ang ginsiling ni Jesus nga amanan ni Jehova ang mga padayon nga ‘nagauna sa pagpangita sa Ginharian.’ (Mat. 6:33) Nakabulig ini kay Pedro nga unahon sa iya kabuhi ang pagbantala, indi ang iya negosyo nga pagpangisda. Maisog sia nga nagbantala sang adlaw sang Pentecostes 33 C.E., kag linibo ang nagbaton sang maayong balita. (Binu. 2:​14, 37-41) Pagkatapos sini, ginbuligan niya ang mga Samaritano kag ang mga Gentil nga batunon ang Cristo. (Binu. 8:​14-17; 10:​44-48) Ginapakita sini nga gingamit ni Jehova si Pedro sa pinasahi nga paagi para buligan nga mangin Cristiano ang tanan nga sahi sang tawo. w23.09 20 ¶1; 23 ¶11

Mga duha ka tuig pagkatapos ginlaglag sang Babilonia ang Jerusalem, nagdamgo si Hari Nabocodonosor parte sa isa ka tuman kadaku nga estatwa kag nagalalain gid sia sa sini. Nagsiling sia nga pamatyon niya ang tanan nga maalamon nga mga tawo, lakip si Daniel, kon indi nila masugid sa iya kon ano ang iya damgo kag kon ano ang kahulugan sini. (Dan. 2:​3-5) Dapat may himuon gid dayon si Daniel para maluwas ang madamo nga tawo. “Gani nagkadto si Daniel sa hari kag nagpangabay nga hatagan sia sing tion agod masugid niya sa hari ang kahulugan sang iya damgo.” (Dan. 2:16) Ginapakita sini nga maisog gid si Daniel kag mabakod ang iya pagtuo. Kay man, wala sing mabasa sa Biblia nga may napaathag na si Daniel nga mga damgo antes sini nga hitabo. Ginpangabay niya ang iya mga abyan “nga magpakiluoy sa Dios sang langit nga ipahayag sa ila ini nga sekreto.” (Dan. 2:18) Ginsabat ni Jehova ang ila mga pangamuyo. Ginbuligan sang Dios si Daniel nga mapaathag kay Nabocodonosor ang kahulugan sang iya damgo. Bangod sini, naluwas si Daniel kag ang iya mga abyan. w23.08 2 ¶4

Binagbinaga ang mga benepisyo kon mapinasensiahon kita. Kon mapinasensiahon kita, mas malipayon kita kag matawhay ang aton hunahuna. Gani, mangin mas maayo ang aton mental health kag ang aton panglawas. Kon mapinasensiahon kita sa iban, mangin maayo ang aton kaangtanan sa ila. Kag mangin suod pa gid kita sa aton mga kauturan. Kon may ginhimo ang iban nga posible magpaakig sa aton, wala kita dayon nagapangakig. Gani malikawan naton nga maglala pa gid ang sitwasyon. (Sal. 37:​8, footnote; Hulu. 14:29) Pero ang pinakaimportante, ginailog naton ang aton Amay sa langit kag mangin suod pa gid kita sa iya. Kanami gid kon mapinasensiahon kita kay makabenepisyo gid kita tanan. May mga sitwasyon nga indi mahapos mangin mapinasensiahon, pero buligan kita ni Jehova nga padayon nga mapakita ini nga kinaiya. Kag samtang ginahulat naton sing mapinasensiahon ang bag-o nga kalibutan, makasalig kita nga “ang mata ni Jehova nagabantay sa mga nagakahadlok sa iya, sa mga nagasalig sa iya mainunungon nga gugma.” (Sal. 33:18) Kabay pa nga padayon kita nga mangin mapinasensiahon. w23.08 22 ¶7; 25 ¶16-17

Ginsambit ni Santiago nga posible magsiling ang isa ka Cristiano nga may pagtuo sia, pero makita sa iya ginahimo nga indi matuod ang iya pagtuo. (Sant. 2:​1-5, 9) Ginsambit man ni Santiago ang parte sa isa ka Cristiano nga wala nagbulig sa isa ka utod bisan pa nakita niya nga ‘wala sing bastante nga bayo ukon pagkaon ang utod.’ Bisan pa magsiling ini nga Cristiano nga may pagtuo sia, wala ini sing pulos kay indi ini makita sa iya ginahimo. Wala sing pulos ang iya pagtuo. (Sant. 2:​14-16) Ginsambit ni Santiago si Rahab bilang maayo nga halimbawa. Ginpamatud-an ni Rahab nga may pagtuo sia paagi sa iya ginhimo. (Sant. 2:​25, 26) Nabatian niya ang parte kay Jehova kag narealisar niya nga ginabuligan ni Jehova ang mga Israelinhon. (Jos. 2:​9-11) Ginpakita niya ang iya pagtuo paagi sa pag-amlig sa duha ka Israelinhon nga mga espiya sang ara sa peligro ang ila kabuhi. Gani pareho kay Abraham, ginkabig man nga matarong ining indi perpekto kag indi Israelinhon nga babayi. Matun-an naton kay Rahab nga importante gid nga ipakita naton ang aton pagtuo paagi sa aton mga ginahimo. w23.12 5-6 ¶12-13

Bilang mga Cristiano, indi kita kontento nga simple lang nga mga kamatuoran sa Biblia ang aton nahangpan. Paagi sa bulig sang espiritu sang Dios, gusto naton tun-an “bisan pa ang madalom nga mga butang sang Dios.” (1 Cor. 2:​9, 10) Sa imo personal nga pagtuon, puede mo tun-an sing maayo ang mga topiko nga magapasuod pa gid sa imo kay Jehova. Halimbawa, puede mo i-research kon paano niya ginpakita sa iya mga alagad sang una nga palangga niya sila. Makabulig ini para makumbinsi ka pa gid nga palangga ka man niya. Puede mo man tun-an ang parte sa paagi sang pagsimba nga ginpatuman ni Jehova sa mga Israelinhon sang una, kag dayon ikumparar mo ini sa paagi sang pagsimba nga ginapatuman niya sa aton subong. Puede mo man tun-an sing maayo kon paano natuman ang mga tagna parte kay Jesus. Sa bulig sang Giya sa Pagtuon Para sa mga Saksi ni Jehova, manamian ka gid sa pagtuon parte sa sini nga mga topiko. Kon tun-an mo sing maayo ang Biblia, magabakod ang imo pagtuo kag “makita mo ang ihibalo tuhoy sa Dios.”​—Hulu. 2:​4, 5. w23.10 18-19 ¶3-5

Ang tinaga nga gingamit ni apostol Pedro para sa “tudok” literal nga nagakahulugan sing “gin-inat.” Ginalaragway sang ikaduha nga bahin sang teksto kon ano ang mahimo sang aton tudok nga gugma. Matabunan sini ang mga sala sang aton mga kauturan. Imadyina ang isa ka lamesa nga madamo sing mantsa. Para indi lang isa ukon duha ka mantsa ang imo matabunan, dapat mo inaton ang tela nga ginatabon mo sa sini. Sing kaanggid, para indi lang isa ukon duha ka sala sang aton mga kauturan ang aton matabunan ukon mapatawad, dapat tudok ang aton gugma sa ila ukon dapat naton ini inaton. Paagi sa sini, mapatawad naton ang ila “madamo nga sala.” Dapat mabakod gid ang aton gugma sa aton mga kauturan para mapatawad naton sila sa ila mga sala bisan pa mabudlay ini himuon kon kaisa. (Col. 3:13) Kon ginapatawad naton ang iban, ginapakita naton nga mabakod ang aton gugma sa ila kag gusto naton nga malipay sa aton si Jehova. w23.11 10-12 ¶13-15

Sang 26 anyos si Hari Josias, ginpakay-o niya ang templo. Samtang ginakay-o nila ini, nakita nila ang “libro sang Kasuguan ni Jehova nga ginhatag paagi kay Moises.” Sang ginbasa sa hari ang nakasulat sa sini nga libro, napalig-on sia nga tumanon ini. (2 Cron. 34:​14, 19-21) Gusto mo bala basahon ang Biblia sing regular? Kon ginahimo mo na ini, may puede ka pa himuon para manamian ka pa gid sa pagbasa sang Biblia. Puede mo tandaan ukon isulat ang mga teksto nga posible makabulig sa imo. Sang mga 39 anyos na si Josias, nakahimo sia sang sala nga nagresulta sa iya kamatayon. Imbes nga magpagiya kay Jehova, nagsalig sia sa iya kaugalingon. (2 Cron. 35:​20-25) May matun-an kita sa sini. Ano man ang aton edad ukon bisan pa madugay na kita nga nagatuon sang Biblia, dapat padayon naton nga pangitaon si Jehova. Nalakip sa sini ang regular nga pagpangamuyo para magpagiya sa iya, pagtuon sang iya Pulong, kag pagpamati sa laygay sang hamtong nga mga Cristiano. Kon himuon naton ini, makabulig ini para indi kita makahimo sang serioso nga mga sala kag mangin malipayon kita.​—Sant. 1:25. w23.09 12 ¶15-16

Madamo sing mabasa sa Biblia parte sa halimbawa sang dalayawon nga mga babayi. Palangga nila si Jehova kag nag-alagad sila sa iya. Ginpakita nila nga ‘kahibalo sila magpugong sang ila kaugalingon’ kag ‘matutom sila sa Dios sa tanan nga butang.’ (1 Tim. 3:11) Magluwas sa sini nga mga halimbawa, madamo man nga hamtong nga mga sister sa kongregasyon ang puede ilugon sang pamatan-on nga mga sister. Gani, hunahunaa ninyo kon sin-o nga hamtong nga mga babayi nga alagad ni Jehova ang gusto ninyo ilugon. Obserbahi ang ila maayo nga mga kinaiya. Dayon hunahunaa kon paano ninyo ini mapakita. Para mangin hamtong, importante ang pagkamapainubuson. Kon mapainubuson ang isa ka babayi, mangin maayo ang iya kaangtanan kay Jehova kag sa iban. Halimbawa, kon palangga sang isa ka babayi si Jehova, mapainubuson niya nga tumanon ang 1 Corinto 11:3. Suno sa sini nga teksto, may ginhatagan si Jehova sang awtoridad nga manguna sa kongregasyon kag sa pamilya. w23.12 18-19 ¶3-5

Gusto ni Jehova nga palanggaon sang bana ang iya asawa kag siguraduhon sang bana nga mahatag niya ang pisikal, emosyonal, kag espirituwal nga mga kinahanglanon sang iya asawa. Makabulig sa imo nga mangin isa ka maayo nga bana kon ipakita mo ang ikasarang sa paghunahuna sing maayo, ang pagrespeto sa mga babayi, kag ang pagtinguha nga mapakita sa iban nga masaligan ka. Kon magpangasawa ka, posible nga mangin isa ikaw ka amay. Ano ang matun-an mo kay Jehova parte sa kon paano mangin isa ka maayo nga amay? (Efe. 6:4) Ginsilingan ni Jehova ang iya Anak nga si Jesus nga palangga niya sia kag nahamuot sia sa iya. (Mat. 3:17) Kon mangin isa na ikaw ka amay, siguraduha nga pirme mo silingan ang imo kabataan nga palangga mo sila. Dayawa sila pirme sa ila maayo nga mga ginahimo. Kon ilugon sang mga amay ang halimbawa ni Jehova, ginabuligan nila ang ila kabataan nga mangin hamtong nga mga Cristiano. Para mahandaan mo subong kon paano mangin isa ka maayo nga amay, palanggaa kag buligi ang mga miembro sang inyo pamilya kag ang mga kauturan sa inyo kongregasyon. Kag panikasugi nga isiling sa ila nga palangga mo sila kag importante sila sa imo.​—Juan 15:9. w23.12 28-29 ¶17-18

Bisan pa matutom kita nga nagaalagad kay Jehova, makaeksperiensia kita gihapon sang mga kabudlayan kag nagamasakit man kita pareho sa tanan nga tawo. Magluwas sa sini, kinahanglan man naton batason ang mga pagpamatok ukon paghingabot sang mga tawo nga akig sa katawhan sang Dios. Bisan pa ginatugutan ni Jehova nga maeksperiensiahan naton ini nga mga kabudlayan, nagpromisa sia nga buligan niya kita. (Isa. 41:10) Sa bulig ni Jehova, makapabilin kita nga malipayon, makahimo kita sang maayo nga mga desisyon, kag makapabilin kita nga matutom sa iya bisan sa pinakamabudlay nga mga sitwasyon. Nagapromisa si Jehova nga hatagan niya kita sang ginatawag sa Biblia nga “paghidait sang Dios.” (Fil. 4:​6, 7) Ini nga paghidait amo ang ginabatyag naton nga kakalma kag kalinong sa hunahuna bangod may suod kita nga kaangtanan sa iya. Ini nga paghidait “labaw sa tanan nga paghangop,” ukon mas maayo ini sangsa mahunahuna naton. Naeksperiensiahan mo na bala nga pagkatapos mo mangamuyo sing hanuot kay Jehova, nangin kalmado ka? Amo ini ang “paghidait sang Dios.” w24.01 20 ¶2; 21 ¶4

Gusto gid sang mga nagapalangga kay Jehova nga dayawon ang iya ngalan sing bug-os tagipusuon. Nahangpan ni David nga kon ginadayaw naton ang ngalan ni Jehova, si Jehova mismo ang aton ginadayaw. Kay man, kon mabatian naton ang ngalan ni Jehova, ginahunahuna naton ang iya reputasyon, ang tanan niya nga dalayawon nga mga kinaiya, kag ang tumalagsahon niya nga mga binuhatan. Para kay David, balaan ang ngalan sang iya Amay kag gusto niya ini dayawon. Nagsiling sia nga himuon niya ini sa ‘bug-os niya nga pagkatawo’ ukon sing bug-os tagipusuon. Ginpangunahan man sang mga Levinhon ang pagdayaw kay Jehova. Mapainubuson sila nga nagsiling nga indi madayaw sing bug-os sang ila mga tinaga ang balaan nga ngalan ni Jehova. (Neh. 9:5) Sigurado gid nga nalipay si Jehova sa sining mapainubuson kag tinagipusuon nga pagdayaw sa iya. w24.02 9 ¶6

Kon wala mo mahimo ang imo tulumuron bangod mabudlay ini himuon, indi paghunahunaon ni Jehova nga maluya ka. (2 Cor. 8:12) Kon may mga hitabo nga nagpabudlay sa imo, hibalua kon ano ang matun-an mo sa sini. Dumduma kon ano na ang imo mga nahimo. Ang Biblia nagasiling nga “ang Dios matarong kag indi niya pagkalimtan ang [imo] binuhatan.” (Heb. 6:10) Gani indi mo man dapat pagkalimtan ang imo mga nahimo. Pamalandungi ang imo mga tulumuron nga nahimo mo na, pareho sang pagpabakod sang imo kaangtanan kay Jehova, pagsugid sa iban parte sa iya, kag pagpabawtismo. Kon nasarangan mo nga himuon ang imo espirituwal nga mga tulumuron sang una, masarangan mo man nga himuon ang imo tulumuron subong. Masarangan mo nga himuon ang imo tulumuron sa bulig ni Jehova. Tinguhai nga makita kon paano ka ginabuligan ni Jehova kay makabulig ini sa imo nga mangin malipayon samtang ginapanikasugan mo ang imo espirituwal nga tulumuron. (2 Cor. 4:7) Kon indi ka mag-untat sa pagpanikasog sa imo tulumuron, mas madamo nga pagpakamaayo ang mabaton mo.​—Gal. 6:9. w23.05 31 ¶16-18

Ginapakita ni Jehova sa iya katawhan nga palangga niya sila kag nalipay sia sa ila, kag gusto gid niya nga himuon ini. Sa Biblia, duha ka beses nga ginsilingan Niya si Jesus nga sia ang Iya hinigugma kag ginakahamut-an nga Anak. (Mat. 3:17; 17:5) Gusto mo bala “mabatian” ang pagsiling ni Jehova nga nalipay sia sa imo? Wala sia nagapakig-istorya sa aton halin sa langit, pero ginaistorya niya kita paagi sa iya Pulong. Kon basahon naton ang mga ginsiling ni Jesus nga mabasa sa mga Ebanghelyo, daw pareho lang nga si Jehova mismo ang nagasiling sini sa aton. Perpekto nga ginpakita ni Jesus ang mga kinaiya sang iya Amay. Nagsiling si Jesus nga nalipay sia sa iya matutom nga mga sumulunod bisan pa indi sila perpekto. Gani sa kada tion nga mabasa naton ini, imadyinon naton nga ginasiling ini sa aton ni Jehova. (Juan 15:​9, 15) Kon makaeksperiensia kita sang mga pagtilaw, indi buot silingon sini nga wala na nalipay sa aton ang Dios. Sa baylo, nagahatag ini sa aton sang kahigayunan nga mapakita kon daw ano naton sia ka palangga kag kon daw ano kadaku ang aton pagsalig sa iya.​—Sant. 1:12. w24.03 28 ¶10-11