Nobiembre

Kon isa ikaw ka ginikanan, buligi ang imo mga bata nga makahanda sang ila komento base sa ila edad. Kon kaisa, ginabinagbinag ang parte sa serioso nga mga butang pareho sang problema sa pag-asawahay ukon mga prinsipio parte sa husto kag sala, pero posible nga may parapo gid nga puede makakomento ang imo mga bata. Ipaintiende man sa imo mga bata nga kon magbayaw sila, posible nga indi sila ang tuksuon. Kon himuon mo ini, mabuligan mo sila nga indi sila maluyahan sang buot kon iban ang tuksuon. (1 Tim. 6:18) Tanan kita puede makahanda sang komento nga makadayaw kay Jehova kag makapalig-on sa aton mga kauturan. (Hulu. 25:11) Kon kaisa, puede naton isugid sing malip-ot ang aton eksperiensia, pero indi kita dapat magpokus sa aton kaugalingon. (Hulu. 27:2; 2 Cor. 10:18) Sa baylo, dapat naton tinguhaan nga nakapokus ini kay Jehova, sa iya Pulong, kag sa iya katawhan.​—Bug. 4:11. w23.04 24-25 ¶17-18

Importante ang gugma para makapadayon kita nga nagamata kag mahuptan naton ang aton ikasarang sa paghunahuna sing maayo. (Mat. 22:​37-39) Ang aton gugma sa Dios makabulig sa aton nga padayon nga magbantala kag batason ang mga kabudlayan. (2 Tim. 1:​7, 8) Ginahigugma man naton ang mga tawo nga wala nagaalagad kay Jehova, gani padayon kita nga nagabantala. Nagabantala pa gani kita paagi sa telepono kag mga sulat. Wala kita nagakadulaan sang paglaum nga sa ulihi magabag-o ang mga tawo kag himuon nila ang husto. (Ezeq. 18:​27, 28) Ginahigugma man naton ang aton mga kauturan. Bangod sini, ‘ginapalig-on kag ginapabaskog naton ang isa kag isa.’ (1 Tes. 5:11) Pareho sa mga soldado nga nagabuligay sa tion sang inaway, ginapalig-on man naton ang isa kag isa. Indi gid naton gusto nga hungod nga sakiton ang aton mga kauturan ukon balusan sila bangod sa halit nga nahimo nila sa aton. (1 Tes. 5:​13, 15) Mapakita man naton nga ginahigugma naton ang aton mga kauturan kon ginarespeto naton ang mga nagapanguna sa kongregasyon.​—1 Tes. 5:12. w23.06 9 ¶6; 10-11 ¶10-11

Ang isa ka paagi para mapabakod naton ang aton pagtuo amo ang pagpamalandong parte sa gawad. Paagi sa gawad, makasalig kita nga matuman gid ang mga promisa sang Dios. Kon pamalandungan naton kon ngaa gin-aman ni Jehova ang gawad kag kon ano ang ginsakripisyo niya, magabakod pa gid ang aton pagtuo nga tumanon sang Dios ang iya promisa nga hatagan kita sang kabuhi nga wala sing katapusan sa mas maayo nga kalibutan. Ngaa masiling naton ini? Ano bala ang ginsakripisyo ni Jehova para maaman ang gawad? Halin sa langit, ginpadala niya ang iya pinalangga nga bugtong nga Anak nga pinakasuod niya nga kaupod para magkabuhi bilang perpekto nga tawo sa duta. Sang ari si Jesus sa duta, naeksperiensiahan niya ang tanan nga klase sang kabudlayan. Kag grabe gid ang iya pag-antos sang napatay sia. Daku gid ang ginsakripisyo sang aton mahigugmaon nga Dios nga si Jehova para hatagan kita sang maayo nga kabuhi. Sigurado nga indi gid niya pagtugutan nga mag-antos kag mapatay ang iya Anak kon malip-ot man lang nga kabuhi ang gusto niya ihatag sa aton. (Juan 3:16; 1 Ped. 1:​18, 19) Bangod daku gid ang ginsakripisyo ni Jehova, siguraduhon niya nga makaistar kita sa bag-ong kalibutan sing wala sing katapusan. w23.04 27 ¶8-9

Gusto gid bala ni Jehova nga banhawon ang mga patay? Huo. Gintuytuyan niya ang madamo nga manunulat sang Biblia nga isulat ang iya promisa nga banhawon ang mga patay. (Isa. 26:19; Bug. 20:​11-13) Kag pirme gid ginatuman ni Jehova ang iya mga promisa. (Jos. 23:14) Gusto na gid ni Jehova nga banhawon ang mga patay. Binagbinaga ang ginsiling ni Job. Sigurado sia nga bisan pa mapatay sia, ginakalangkagan gid ni Jehova nga banhawon sia. (Job 14:​14, 15, footnote) Amo man sini ang ginabatyag ni Jehova para sa tanan niya nga alagad nga napatay. Gusto na gid niya nga banhawon sila para magkabuhi sila nga mapagros kag malipayon. Pero ano naman ang ginabatyag ni Jehova para sa binilyon ka tawo nga napatay nga wala nakatuon sing kamatuoran parte sa iya? Gusto man sang aton mahigugmaon nga Dios nga banhawon sila. (Binu. 24:15) Gusto niya nga hatagan sila sing kahigayunan nga mangin abyan niya kag magkabuhi sila sing wala sing katapusan sa duta.​—Juan 3:16. w23.04 9 ¶5-6

Paano mo mapabakod ang imo paglaum? Kon may paglaum ka nga magkabuhi sing wala sing katapusan sa duta, basaha sa Biblia kon paano ginalaragway ang Paraiso kag pamalandungi ini. (Isa. 25:8; 32:​16-18) Imadyina nga ara ka na sa bag-ong kalibutan kag kon ano ang kabuhi didto. Kon pirme naton imadyinon ang paglaum nga bag-ong kalibutan, mangin ‘umalagi lang kag mamag-an’ ang aton mga problema. (2 Cor. 4:17) Paagi sa paglaum nga ginhatag sa imo ni Jehova, mapabakod ka niya. Ginhatag na ni Jehova ang kinahanglan mo para mapabakod ka niya. Gani kon kinahanglan mo ang bulig para mahimo mo ang imo asaynment, para mabatas mo ang imo problema, ukon para indi madula ang imo kalipay, hanuot nga mangamuyo kay Jehova kag magpagiya sa iya paagi sa personal nga pagtuon. Kon ginapalig-on ka kag ginabuligan sang imo mga kauturan, batuna ini. Imadyina pirme ang imo paglaum sa palaabuton. Kon himuon mo ini tanan, ‘mapabakod ka sang kusog halin sa iya mahimayaon nga gahom agod makabatas ka sing bug-os nga may pagpailob kag kalipay.’—Col. 1:11. w23.10 17 ¶19-20

Madamo kita sang rason para pasalamatan si Jehova sa aton mga pangamuyo. Dapat naton sia pasalamatan sa tanan nga maayo nga butang nga ara sa aton bangod sia ang nagahatag sang tanan nga maayo nga regalo. (Sant. 1:17) Halimbawa, puede naton sia pasalamatan sa aton matahom nga planeta nga duta kag sa iya dalayawon nga mga tinuga. Puede man naton sia pasalamatan bangod ginhatagan niya kita sang kabuhi, pamilya, mga abyan, kag paglaum. Kag gusto naton pasalamatan si Jehova bangod ginpaposible niya nga mangin abyan naton sia. Posible nga kinahanglan naton hunahunaon sing maayo ang mga rason kon ngaa dapat naton pasalamatan si Jehova. Ngaa? Bangod madamo nga tawo subong ang wala na nagapasalamat. Sa masami, wala nila ginahunahuna kon paano nila mapakita nga nagapasalamat sila sa mga butang nga ara sa ila. Sa baylo, ginahunahuna nila kon paano nila mapanag-iyahan ang mga butang nga gusto nila. Kon maimpluwensiahan kita sini nga pamatasan sang mga tawo, posible nga puro lang pangayo ang aton ipangamuyo. Para indi naton sila mailog, dapat naton padayon nga pasalamatan si Jehova sa tanan niya nga ginahimo para sa aton.​—Luc. 6:45. w23.05 4 ¶8-9

Bilang aton mahigugmaon nga Amay, indi gusto ni Jehova nga nagaantos kita. (Isa. 63:9) Pero wala niya ginapunggan ang tanan naton nga problema nga daw pareho sa suba ukon kalayo. (Isa. 43:2) Pero nagpromisa sia nga buligan niya kita nga ‘matabok’ ini nga mga problema. Kag bisan ano pa ang aton problema, siguraduhon niya nga makapadayon kita gihapon sa pag-alagad sa iya. Ginahatagan man kita ni Jehova sang iya gamhanan nga balaan nga espiritu para buligan kita nga makabatas. (Luc. 11:13; Fil. 4:13) Gani, makasalig kita nga buligan gid niya kita pirme para mabatas naton ang aton mga problema kag padayon kita nga mangin matutom sa iya. Gusto ni Jehova nga magsalig kita sa iya. (Heb. 11:6) May mga tion nga pamatyag naton daw indi naton masarangan ang aton mga problema nga daw pareho sa pader nga indi mataklas. Posible mahunahuna pa gani naton nga daw wala kita ginabuligan ni Jehova. Pero ginapasalig kita sang Biblia nga ‘mataklas naton ang pader’ paagi sa bulig sang gahom sang Dios. (Sal. 18:29) Gani imbes nga magduhaduha, dapat kita magtuo kag magsalig sing bug-os nga sabton ni Jehova ang aton mga pangamuyo.​—Sant. 1:​6, 7. w23.11 22 ¶8-9

Kanami gid sini nga paglaragway sa matuod nga gugma. Makapalig-on gid ini sa mga mag-asawa. Ngaa? Bangod ginapahangop sini nga masarangan ninyo nga ipakita ang matuod nga gugma sa isa kag isa. Para mapakita sang mag-asawa ang matuod nga gugma sa isa kag isa sa bilog nila nga kabuhi, dapat nila ini panikasugan. Binagbinaga ang isa ka campfire ukon dabok. Para indi ini mapatay, dapat padayon ini nga gatungan sang kahoy. Kon indi ini paghimuon, mapatay gid ang kalayo. Amo man sini ang dapat himuon sang bana kag sang asawa sa ila gugma sa isa kag isa. Dapat padayon nila ini nga pabakuron para indi ini madula. Pero may mga tion nga pamatyag sang mag-asawa daw indi na nila palangga ang isa kag isa, ilabi na kon nagapamigado sila, may nagamasakit sa ila pamilya, ukon nabudlayan sila sa pagpadaku sang ila kabataan. Gani para padayon nga magdabdab “ang kalayo ni Jah,” dapat pabakuron sang bana kag sang asawa ang ila kaangtanan kay Jehova. w23.05 20-21 ¶1-3

Para mangin maisog kita, ano ang dapat naton himuon? Posible nga palig-unon kita sang aton mga ginikanan nga dapat kita mangin maisog. Pero bisan pa maisog ang aton mga ginikanan, indi awtomatiko nga mangin maisog man kita. Dapat naton ini tun-an. Daw pareho ini sa pagtuon sang bag-o nga ikasarang. Para magsagad kita sa isa ka ikasarang, dapat naton panilagan ang mga ginahimo sang nagatudlo sa aton sini nga ikasarang, kag dayon sundon naton ang iya ginahimo. Sing kaanggid, para mangin maisog kita, panilagan naton kon paano ini ginpakita sang iban kag ilugon naton ang ila halimbawa. Pareho kay Daniel, dapat naton tun-an sing maayo ang Pulong sang Dios. Dapat naton pirme istoryahon si Jehova kag isugid naton sa iya ang tanan naton nga ginabatyag kay makabulig ini para mangin suod pa gid kita sa iya. Kag dapat kita magsalig kay Jehova nga buligan niya kita. Kon himuon naton ini, sigurado nga mangin maisog kita kon tilawan ang aton pagtuo. Kon mangin maisog kita, respetuhon kita sang iban. Posible man nga mapalig-on naton ang sinsero nga mga tawo nga magtuon parte kay Jehova. Gani, maayo gid kon tinguhaan naton nga ipakita ang kaisog. w23.08 2 ¶2; 4 ¶8-9

Ang Griego nga tinaga nga gin-translate “pat-ura” nagalaragway sa ginahimo sang mga tawo para hibaluon kon bala matuod ukon peke ang mga metal pareho sang bulawan ukon pilak. Gani, dapat man naton hibaluon kon bala matuod gid ang mga impormasyon nga aton mabatian ukon mabasahan. Amo sini ang dapat naton himuon subong kay malapit na gid ang dakung kapipit-an. Imbes nga patihan lang dayon ang tanan nga ginasiling sang iban, dapat naton gamiton ang aton ikasarang sa paghunahuna sing maayo. Kon may nabasahan kita ukon nabatian, ipaanggid naton ini sa ginasiling sang Biblia kag sang organisasyon ni Jehova. Kon himuon naton ini, indi gid kita mapatalang sang indi matuod nga mga impormasyon nga ginapalapta sang mga demonyo. (Hulu. 14:15; 1 Tim. 4:1) Kabalo kita nga ang katawhan ni Jehova maluwas sa tion sang dakung kapipit-an. Pero, wala kita kabalo kon ano ang matabo sa kada isa sa aton samtang wala pa ini nga tion. (Sant. 4:14) Posible nga mapatay kita antes sang dakung kapipit-an ukon posible man nga makalampuwas kita sa dakung kapipit-an. Ano man ang matabo sa aton, sigurado nga padyaan gid kita sang kabuhi nga wala sing katapusan kon padayon kita nga mangin matutom. Kabay pa nga pirme naton dumdumon ang aton matahom nga paglaum kag mangin handa pirme sa adlaw ni Jehova. w23.06 13 ¶15-16

Wala kita kabalo kon paano matuman ang pila ka tagna sa Biblia. (Dan. 12:​8, 9) Pero bisan pa wala kita kabalo kon paano gid matuman ang isa ka tagna, indi buot silingon sini nga indi na ini matuman. Kay man, sigurado nga isugid ni Jehova sa aton sa husto nga tion ang mga dapat naton mahangpan. Makasalig kita sa sini kay ginhimo na niya ini sang una. Ang mga pungsod magapahibalo sang “paghidait kag kalig-unan!” (1 Tes. 5:3) Dayon, salakayon sang mga gobierno sa kalibutan ang butig nga relihion kag laglagon ini. (Bug. 17:​16, 17) Pagkatapos, salakayon naman sang mga gobierno ang katawhan sang Dios. (Ezeq. 38:​18, 19) Magasugod dayon ang Armageddon nga amo ang katapusan nga inaway. (Bug. 16:​14, 16) Malapit na lang ini tanan matabo. Samtang wala pa ini, kabay pa nga padayon naton nga bantayan ang katumanan sang mga tagna sa Biblia kag buligan naton ang iban nga himuon man ini. Kon himuon naton ini, ginapakita naton nga nagapasalamat gid kita sa aton mahigugmaon nga Amay sa langit. w23.08 13 ¶19-20

Sang ginbinagbinag ni apostol Pablo ang parte sa pagtuo, paglaum, kag gugma, nagsiling sia nga “ang pinakaimportante sa sining tatlo amo ang gugma.” (1 Cor. 13:13) Ngaa nasiling ini ni Pablo? Sa palaabuton, indi na naton kinahanglan magtuo ukon maglaum nga matuman ang mga promisa sang Dios parte sa bag-ong kalibutan bangod matuman na ini tanan. Pero kinahanglan naton pirme higugmaon si Jehova kag ang iya katawhan. Ang matuod, padayon nga magabakod ang aton gugma sa ila asta sa wala sing katapusan. Ang gugma man ang nagapamatuod nga matuod kita nga mga Cristiano. Ginsilingan ni Jesus ang iya mga apostoles: “Paagi sini mahibaluan sang tanan nga mga disipulo ko kamo, kon nagahigugmaanay kamo.” (Juan 13:35) Nagabulig man ang aton gugma sa isa kag isa para indi maguba ang aton paghiusa. Nagsiling si Pablo nga ang gugma amo ang “himpit nga higot sang paghiusa.” (Col. 3:14) Ginsulatan ni apostol Juan ang iya mga kauturan: “Ang bisan sin-o nga nagahigugma sa Dios dapat man maghigugma sa iya utod.” (1 Juan 4:21) Gani kon ginahigugma naton ang isa kag isa, ginapakita naton nga ginahigugma naton ang Dios. w23.11 8 ¶1, 3

Ginkumparar sang Biblia sa isa ka palumba ang aton kabuhi bilang mga Cristiano. Padyaan sang kabuhi nga wala sing katapusan ang mga makatapos sa sini nga palumba. (2 Tim. 4:​7, 8) Malapit na lang gid matapos ini nga palumba, gani indi gid kita dapat mag-untat sa pagdalagan. May ginsiling si apostol Pablo nga makabulig sa aton. Nagsiling sia nga ‘ihaboy naton ang tagsa ka kabug-atan kag magdalagan kita nga may pagbatas sa palumba nga ginabutang sa aton atubangan.’ Buot bala silingon ni Pablo nga wala sing lulan ang mga Cristiano nga dapat nila dal-on? Indi amo sina ang buot niya silingon. Sa baylo, buot niya silingon nga indi naton dapat pagdal-on ang bisan ano nga kabug-atan nga indi makabulig sa aton. Ini nga mga kabug-atan posible makapahinay kag makapakapoy sa aton. Para makabatas kita, dapat naton dayon hibaluon kon may dala kita nga amo sini nga klase sang mga kabug-atan kag dapat naton dayon ini ihaboy. Pero may mga lulan kita nga dapat gid naton dal-on. Kon indi naton ini pagdal-on, indi kita makapadayon sa pagdalagan sa palumba para sa kabuhi.​—2 Tim. 2:5. w23.08 26 ¶1-2

Kon makatarunganon kita, ginarespeto naton ang opinyon sang iban. Halimbawa, gusto sang pila naton ka sister nga maggamit sang makeup, pero may ara man nga indi gusto maggamit sini. Gusto sang pila naton ka utod nga mag-inom sang alak sing haganhagan lang, pero may mga utod nga indi gid mag-inom sang alak. Gusto naton tanan nga mangin maayo ang aton panglawas, pero lainlain nga paagi sang pagbulong ang ginapili sang kada isa sa aton. Kon ginahunahuna naton nga kita lang pirme ang husto kag ginapilit naton sa iban ang aton gusto, posible nga may masandad sa aton kag maguba ang aton paghiusa. (1 Cor. 8:9; 10:​23, 24) Halimbawa, wala nagsiling si Jehova kon ano nga estilo sang mga bayo ang aton isuksok, pero naghatag sia sang mga prinsipio nga dapat naton sundon. Dapat naton isuksok ang estilo sang mga bayo nga nagakabagay sa isa ka ministro sang Dios. Paagi sa sini, mapakita naton nga makatarunganon kita, maugdang, kag may “maligdong nga hunahuna.” (1 Tim. 2:​9, 10) Gani indi naton gusto nga magpokus ang mga tawo sa aton bangod sa estilo sang aton bayo. Makabulig man sa mga gulang ang mga prinsipio sa Biblia para malikawan nila nga maghimo sang ila kaugalingon nga mga kasuguan parte sa estilo sang bayo kag buhok. w23.07 23-24 ¶13-14

Ginatudluan kita ni Jehova kon paano mangin malipayon ang aton kabuhi. Ang mga nagabaton sang pangagda sang magahod kag “buangbuang nga babayi” nagakalipay sa paghimo sang imoral. Pero bangod sa ila mga ginahimo, ang “kadadalman sang Lulubngan” amo ang ila madangatan. (Hulu. 9:​13, 17, 18) Pero maayo ang resulta para sa mga nagabaton sang pangagda sang babayi nga nagarepresentar sa “matuod nga kaalam.” (Hulu. 9:1) Ginatun-an naton nga higugmaon ang mga ginahigugma ni Jehova kag dumtan ang mga ginadumtan niya. (Sal. 97:10) Kag nalipay kita kay may pribilehiyo kita nga agdahon ang iban nga magtuon sa “matuod nga kaalam.” Daw pareho lang nga “[nagapanawag kita] sa pinakamataas nga mga lugar sang siudad: ‘Kon sin-o ang kulang sing kinaalam, magpalapit sia diri.’” Nagabenepisyo na kita subong sa “matuod nga kaalam” pati na ang mga nagabaton sini. Pero padayon naton nga mabaton ini nga benepisyo kay may paglaum kita nga “magkabuhi” asta sa wala sing katapusan basta padayon kita nga “maglakat sing paabante sa dalanon sang paghangop.”​—Hulu. 9:​3, 4, 6. w23.06 24 ¶17-18

Nakulbaan ka bala kon ginapamangkot ka sang imo mga kaupod sa obra ukon sa eskwelahan parte sa imo mga ginapatihan? Amo ini ang ginabatyag sang kalabanan sa aton. Pero kon ginapamangkot nila kita, mabuligan kita sini nga mahangpan ang ila ginahunahuna ukon ginapatihan, kag mahatagan kita sang kahigayunan nga masugid sa ila ang maayong balita. Pero kon kaisa, ginapamangkot kita sang iban kay gusto lang nila magpakigbais sa aton. Wala na kita natingala sa sini kay sala nga mga impormasyon ang ila nabatian parte sa aton mga ginapatihan. (Binu. 28:22) Isa pa, nagakabuhi na kita “sa katapusan nga mga adlaw” ukon sa tion nga madamo ang “indi magsugot sa bisan ano nga kasugtanan” kag “mabangis.” (2 Tim. 3:​1, 3) Posible ginapamensar mo, ‘Ano ang makabulig sa akon nga mangin kalmado kag mataktikanhon kon ginakuestyon sang iban ang akon mga ginapatihan nga nabase sa Biblia?’ Ang kalulo amo ang makabulig sa imo. Ang malulo nga tawo kalmado lang gihapon bisan pa ginapaakig sia sang iban ukon bisan pa indi sia sigurado kon paano sabton ang isa ka pamangkot. w23.09 14 ¶1-2

Kon kaisa, makabaton kita sang mga laygay halin sa organisasyon para amligan kita. Halimbawa, ginpaandaman kita parte sa materyalismo kag parte sa mga buhat nga posible makasulay sa aton nga lapason ang mga kasuguan sang Dios. Para gid sa aton kaayuhan ang pagsunod sa mga panuytoy ni Jehova parte sa sini. (Isa. 48:​17, 18; 1 Tim. 6:​9, 10) Sigurado gid nga padayon nga magagamit si Jehova sing mga tawo para maghatag sing panuytoy sa tion sang dakung kapipit-an asta sa tion sang Isa ka Libo ka Tuig nga Paggahom sang Cristo. Sa sina nga tion, padayon bala naton nga sundon ang ila mga panuytoy? Nagadepende ini sa aton reaksion sa mga panuytoy ni Jehova subong. Gani, pirme naton sundon ang mga panuytoy ni Jehova, lakip na ang mga panuytoy nga ginahatag niya paagi sa mga utod nga gintangdo nga magbantay sa aton. (Isa. 32:​1, 2; Heb. 13:17) Masaligan gid naton ang aton Guide ukon Manugtuytoy nga si Jehova bangod ginabuligan niya kita nga malikawan ang bisan ano nga posible makaguba sang aton kaangtanan sa iya, kag ginatuytuyan niya kita pakadto sa aton destinasyon nga amo ang kabuhi nga wala sing katapusan sa bag-ong kalibutan. w24.02 25 ¶17-18

Nalipay si apostol Pablo sa pag-alagad kay Jehova, pero nakaeksperiensia man sia sang madamo nga kabudlayan. Pirme nagalakat kag nagabiyahe sing malayo si Pablo, kag indi ini mahapos himuon sadto. May mga tion nga nakaeksperiensia sia sing ‘mga katalagman sa mga suba kag sa mga kawatan.’ May mga tion man nga ginbunal sia sang mga nagapamatok sa iya. (2 Cor. 11:​23-27) Kag bisan pa sang mga pagpanikasog ni Pablo para buligan ang iya mga kauturan, may mga tion nga wala nila sia ginapasalamatan. (2 Cor. 10:10; Fil. 4:15) Ano ang nakabulig kay Pablo nga padayon nga mag-alagad kay Jehova? Madamo sing natun-an si Pablo parte sa mga kinaiya ni Jehova paagi sa Kasulatan kag paagi sa iya mga naeksperiensiahan. Gani nakumbinsi si Pablo nga ginahigugma sia ni Jehova nga Dios. (Roma 8:​38, 39; Efe. 2:​4, 5) Bangod sini, mas ginhigugma pa gid niya si Jehova. Ginpakita ni Pablo ang iya gugma kay Jehova “paagi sa pag-alagad kag sa padayon nga pag-alagad sa mga balaan.”​—Heb. 6:10. w23.07 9 ¶5-6

Suno sa Biblia, ang mga gobierno amo ang “mas mataas nga mga awtoridad.” Madamo nga tawo ang nagasiling nga kinahanglan naton ang mga gobierno, kag kinahanglan naton tumanon ang ila mga kasuguan. Pero kon indi gani sila komporme sa isa ka kasuguan ukon pamatyag nila indi ini makatarunganon, wala sila nagatuman. Suno sa Biblia, ang mga gobierno nga ginagamhan sang tawo nagaresulta sa pag-antos, ginakontrol ini ni Satanas, kag laglagon ini sa ulihi. (Sal. 110:​5, 6; Man. 8:9; Luc. 4:​5, 6) Ginasugiran man kita sang Biblia nga “ang tawo nga nagapamatok sa awtoridad nagapamatok sa kahimusan sang Dios.” Temporaryo nga ginatugutan ni Jehova ang paggahom sang mga gobierno sang tawo para mangin organisado ang tanan. Gani, “ihatag [naton] sa tanan ang para sa ila,” lakip ang buhis, respeto, kag pagtuman. (Roma 13:​1-7) Posible nga may mga kasuguan ang mga gobierno nga pamatyag naton mabudlay tumanon, indi makatarunganon, ukon magastuhan kita kon tumanon naton. Pero bangod ginasugo kita ni Jehova nga tumanon ang mga gobierno, dapat naton sila tumanon magluwas lang kon suguon nila kita nga supakon ang iya mga kasuguan.​—Binu. 5:29. w23.10 8 ¶9-10

Sang natawo si Samson, ang mga Filistinhon amo ang nagagahom sa pungsod sang Israel kag ginapigos nila ang mga Israelinhon. (Huk. 13:1) Nag-antos gid sila bangod sang mapintas nga paggahom sang mga Filistinhon. Ginpili ni Jehova si Samson nga amo “ang magaluwas sa Israel batok sa mga Filistinhon.” (Huk. 13:5) Para mahimo ini ni Samson, dapat sia magsalig kay Jehova. Sang ara si Samson sa Lehi, nga posible sakop sang Juda, ginkadtuan sia sang Filistinhon nga mga soldado para dakpon. Hinadlukan ang mga lalaki sang Juda, gani gintugyan nila si Samson sa ila mga kaaway. Gingapos si Samson sang pareho niya nga mga Israelinhon paagi sa duha ka bag-o nga lubid, kag gindala nila sia sa mga Filistinhon. (Huk. 15:​9-13) Pero, “ginhatagan sia sang espiritu ni Jehova sing kusog” kag ginbugto ni Samson ang mga lubid. “Dayon may nakita sia nga tul-an sang sag-ang sang asno nga lalaki nga bag-o lang napatay.” Ginkuha niya ini kag gingamit sa pagpatay sa 1,000 ka Filistinhon nga mga lalaki.​—Huk. 15:​14-16. w23.09 2-3 ¶3-4

Amat-amat nga ginpahayag ni Jehova ang iya “dayon nga katuyuan” sa Biblia. “Ginhimo ni Jehova ang tanan nga butang para matuman ang iya katuyuan,” gani pirme gid sia nagamadinalag-on. (Hulu. 16:4) Masiling naton nga “dayon” ang katuyuan ni Jehova para sa mga tawo kag sa duta bangod magapadayon asta sa wala sing katapusan ang mga resulta sang iya mga ginahimo. Ano ang katuyuan ni Jehova, kag paano niya gin-adjust ang iya paagi para matuman ini? Ginsugid sang Dios sa una nga mga tawo kon ano ang iya katuyuan para sa ila. Dapat sila ‘magpanganak kag magdamo, pun-on nila ang duta kag dumalahan ini, kag gamhan nila ang tanan nga buhi nga mga sapat sa duta.’ (Gen. 1:28) Sang nagrebelde sanday Adan kag Eva, wala ginbag-o ni Jehova ang iya katuyuan bisan pa nga nangin makasasala ang tanan nga tawo. Pero gin-adjust niya ang iya paagi sa pagtuman sang iya katuyuan. Nagdesisyon dayon si Jehova nga magahimo sia sang Ginharian sa langit nga amo ang magatuman sang iya orihinal nga katuyuan para sa mga tawo kag sa duta.​—Mat. 25:34. w23.10 19-20 ¶6-7

Buligan kita ni Jehova para padayon kita nga makaalagad sa iya. Posible nga may mga tion nga nabudlayan kita nga himuon ini, ilabi na kon may kaluyahon kita nga madugay na naton nga ginapakigbatuan. Kon kaisa, posible nga nagabatyag kita nga mas mabudlay pakigbatuan ang aton mga kaluyahon sangsa mga kaluyahon ni apostol Pedro. Pero pabakuron kita ni Jehova para indi kita mag-untat sa pag-alagad sa iya. (Sal. 94:​18, 19) Halimbawa, antes natun-an sang isa ka brother ang kamatuoran, isa sia ka homoseksuwal sa sulod sang madamo nga tinuig. Ginbag-o niya ang iya kabuhi kag gintuman niya ang mga kasuguan sa Biblia. Pero, may mga tion nga ginapakigbatuan niya gihapon ang sala nga mga handum. Ano ang nakabulig sa iya nga padayon nga himuon ang husto? Nagsiling sia: “Ginapabakod kita ni Jehova.” Nagsiling pa sia: “Sa bulig sang espiritu ni Jehova . . . , masarangan naton nga tumanon sia kag padayon naton ini nga mapakita sa aton paagi sang pagkabuhi . . . Bisan pa sang akon mga kaluyahon, gingamit ako ni Jehova kag padayon niya ako nga ginapabakod.” w23.09 23 ¶12

Pamatan-on nga mga brother, kinahanglan ninyo magpanikasog para mangin hamtong kamo nga mga Cristiano. Kinahanglan ninyo ilugon ang maayo nga mga halimbawa, ipakita ninyo ang ikasarang sa paghunahuna sing maayo, ipakita ninyo nga masaligan kamo, magtuon kamo sang mga ikasarang nga makabulig sa inyo, kag handai ninyo ang posible mga responsibilidad ninyo sa palaabuton. Kon binagbinagon ninyo ang mga dapat ninyo himuon, posible mahunahuna ninyo nga mabudlay gid ini. Pero masarangan ninyo ini. Tandai ninyo nga gusto gid kamo buligan ni Jehova. (Isa. 41:​10, 13) Kag siempre, buligan man kamo sang inyo mga kauturan sa kongregasyon. Kon mangin hamtong kamo nga mga Cristiano, mangin malipayon gid kamo kag kontento. Pamatan-on nga mga brother, palangga gid namon kamo. Kabay pa nga pakamaayuhon gid ni Jehova ang inyo ginahimo nga pagpanikasog para mangin hamtong kamo nga mga Cristiano. w23.12 29 ¶19-20

Ibutang ta nga nagtipontipon kamo upod sa pila ka kauturan. Masadya gid ang inyo pagtipontipon, kag nagpapiktyur kamo. Pagkatapos sang inyo una nga piktyur, duha ka beses ka pa gid nga nagkuha sing piktyur engkaso indi manami ang inyo kuha sa una nga piktyur. Gani, tatlo tanan ang inyo piktyur. Pero nakita mo sa isa ka piktyur nga nagakusmod ang isa ka brother. Gani gin-delete mo ini bangod may duha ka pa ka piktyur nga nagakadlaw kamo tanan lakip na ang brother. Madamo gid kita sang manami nga mga eksperiensia kaupod ang aton mga kauturan. Pero ano abi kon naglain ang aton buot bangod may indi maayo nga ginsiling ukon ginhimo ang isa ka utod? Ano ang himuon naton sa sini nga eksperiensia? Dapat naton panikasugan nga kalimtan ini pareho sa pag-delete naton sa indi manami nga piktyur. (Efe. 4:32) Puede naton ini kalimtan kay madamo pa man kita sang manami nga mga eksperiensia kaupod sia. Ining manami nga mga eksperiensia amo ang gusto naton dumdumon kag pabaloran. w23.11 12 ¶16-17

Ang Griego nga mga tinaga nga gingamit sa sini nga teksto nagapahangop nga dapat makita sa pamayo sang mga babayi nga ginarespeto nila ang Dios kag ang balatyagon sang iban. Ginapabugal gid naton ang aton hamtong nga mga sister nga maugdang ang pamayo. Para mangin hamtong ang mga sister, importante man ang paghantop. Ano ang paghantop? Amo ini ang ikasarang nga mabal-an kon ano ang husto kag sala kag dayon himuon ang husto. Binagbinaga ang halimbawa ni Abigail. Bangod sang indi maayo nga desisyon sang iya bana, nabutang sa peligro ang bilog nila nga panimalay. Pero bangod may paghantop si Abigail, may ginhimo sia dayon para maluwas ang ila kabuhi. (1 Sam. 25:​14-23, 32-35) Kon may paghantop kita, makabulig man ini sa aton nga mabal-an kon san-o kita dapat maghambal kag kon san-o kita dapat maghipos. Makabulig man ang paghantop kon nagaistorya kita sa iban. Punggan kita sini nga mamangkot parte sa mga butang nga wala kita sing labot ukon sang mga pamangkot nga posible masaw-ahan ang aton ginaistorya.​—1 Tes. 4:11. w23.12 20 ¶8-9

Ginsulat ini ni apostol Pablo para sa kongregasyon sa Roma. Natun-an sang mga kauturan didto ang parte kay Jehova kag kay Jesus, dayon nagtuo sila, kag nangin Cristiano sila. Gani ‘ginpakamatarong sila sang Dios tungod sang ila pagtuo,’ kag ginhaplasan niya sila sang balaan nga espiritu. (Roma 5:1) Matahom gid ang ila paglaum kag makasigurado sila nga mabaton nila ini. Sang ulihi, ginsulatan ni Pablo ang mga hinaplas sa Efeso parte sa paglaum nga ginhatag sa ila sang Dios. Nalakip sa sini nga paglaum ang pagbaton nila sang “palanublion para sa mga balaan.” (Efe. 1:18) Kag mahangpan naton sa ginsiling ni Pablo sa mga taga-Colosas kon diin nila mabaton ang ila padya. Gintawag niya ini nga “paglaum nga natigana para sa inyo sa langit.” (Col. 1:​4, 5) Gani amo ini ang paglaum sang mga hinaplas: Banhawon sila sa langit para magkabuhi didto sing wala sing katapusan kag magagahom sila upod sa Cristo.​—1 Tes. 4:​13-17; Bug. 20:6. w23.12 9 ¶4-5

Ang orihinal nga tinaga para sa ‘bantay’ nagapatuhoy sa mga soldado nga nagabantay sa isa ka siudad nga handa magpakig-away sa mga magasalakay sa sini. Mahamuok ang tulog sang mga tawo nga nagaistar sa sini nga siudad kag kalmado sila bangod kabalo sila nga may mga soldado nga nagaamlig sa ila. Sing kaanggid, bangod ginabantayan sang paghidait sang Dios ang aton tagipusuon kag hunahuna, kalmado kita bangod kabalo kita nga may nagaamlig sa aton. (Sal. 4:8) Pareho sa naeksperiensiahan ni Hana, bisan pa indi dayon magbag-o ang aton sitwasyon, malinong gihapon ang aton hunahuna. (1 Sam. 1:​16-18) Kag kon kalmado kita, makahunahuna kita sang maayo kag mas mahapos maghimo sang maayo nga mga desisyon. Ano ang dapat naton himuon? Kon ara sa peligro ang mga tawo nga nagaistar sa siudad, ginatawag nila ang mga bantay. Puede man naton ini himuon. Paano? Mangamuyo kita kay Jehova asta nga mabatyagan naton ang paghidait sang Dios. (Luc. 11:9; 1 Tes. 5:17) Kon may problema ka, indi mag-untat sa pagpangamuyo kay Jehova. Makasalig ka nga bantayan sang iya paghidait ang imo tagipusuon kag hunahuna.​—Roma 12:12. w24.01 21 ¶5-6

Para mapakabalaan ni Jesus ang ngalan sang iya Amay, ginbatas niya ang pagsakit sa iya, ang mga pag-insulto sa iya, kag ang pagpakalain sa iya. Kabalo sia nga gintuman niya ang tanan nga ginsugo sang iya Amay, gani wala sia sing dapat ikahuya. (Heb. 12:2) Kabalo man sia nga samtang ara sia sa mabudlay nga sitwasyon, direkta sia nga ginasalakay ni Satanas. (Luc. 22:​2-4; 23:​33, 34) Gusto gid ni Satanas nga magkompromiso si Jesus, pero napaslawan gid sia. Ginpamatud-an ni Jesus nga butigon si Satanas. Ginpamatud-an man niya nga may mainunungon nga mga alagad si Jehova nga nagapabilin nga matutom bisan sa pinakamabudlay nga mga pagtilaw. Gusto mo bala nga malipay sa imo ang aton Hari nga si Jesus? Padayon nga dayawa ang ngalan ni Jehova paagi sa pagbulig sa iban nga matun-an ang tanan nga dalayawon nga mga kinaiya sang aton Dios. Kon himuon mo ini, ginailog mo si Jesus. (1 Ped. 2:21) Ginapamatud-an mo man nga butigon kag wala sing huya ang kaaway ni Jehova nga si Satanas. Kag pareho kay Jesus, malipay sa imo si Jehova. w24.02 11-12 ¶11-13

Sa sulod sang nagligad nga lima ka tuig, sobra isa ka milyon ang nagpabawtismo bilang mga Saksi ni Jehova. Kon ginadedikar mo ang imo kaugalingon kay Jehova, nagadesisyon ka nga gusto mo mangin disipulo ni Jesucristo kag mangin pinakaimportante na sa imo kabuhi ang paghimo sa kabubut-on sang Dios. Ano ang nalakip sa imo dedikasyon? Nagsiling si Jesus: “Kon ang bisan sin-o luyag magsunod sa akon, ipanghiwala niya ang iya kaugalingon.” (Mat. 16:24) Ang Griego nga ekspresyon nga gin-translate “ipanghiwala niya ang iya kaugalingon” puede man i-translate nga “pangindian niya ang iya kaugalingon.” Bilang isa ka alagad ni Jehova nga nadedikar sa iya, dapat mo pangindian ang bisan ano nga indi suno sa iya kabubut-on. (2 Cor. 5:​14, 15) Nalakip sa sini ang pagpangindi sa “mga buhat sang unod,” pareho sang seksuwal nga imoralidad. (Gal. 5:​19-21; 1 Cor. 6:18) Mabudlayan ka lang bala kon tumanon mo ang mga kasuguan sang Dios? Kon palangga mo si Jehova kag kon kumbinsido ka nga para sa imo kaayuhan ang iya mga kasuguan, indi mo gid paghunahunaon nga nagapabudlay ini sa imo.​—Sal. 119:97; Isa. 48:​17, 18. w24.03 2 ¶1; 3 ¶4

Basta nalipay si Jehova sa iya alagad, ginahatagan niya sia sang iya balaan nga espiritu. (Mat. 12:18) Pamangkuton naton ang aton kaugalingon, ‘Nasarangan ko bala nga ipakita ang pila ka kinaiya nga ginapatubas sang espiritu sang Dios?’ Halimbawa, natalupangdan mo bala nga nangin mas mapinasensiahon ka na subong kon ikumparar sang una nga indi mo pa kilala si Jehova? Ang matuod, kon pirme mo ginapakita ang mga kinaiya nga ginapatubas sang espiritu sang Dios, pamatuod ini nga nalipay sa imo si Jehova. Nalipay sa aton si Jehova gani nagabenepisyo kita sa halad-gawad. (1 Tim. 2:​5, 6) Pero ano abi kon daw indi kita gihapon magpati nga nalipay sa aton si Jehova bisan pa nagatuo kita sa halad-gawad kag bawtismado na kita? Dumduma nga indi sa tanan nga tion masaligan naton ang aton balatyagon, pero masaligan naton si Jehova. Ginakabig niya nga matarong ang mga nagatuo sa halad-gawad kag nagapromisa sia nga pakamaayuhon niya sila.​—Sal. 5:12; Roma 3:26. w24.03 30 ¶15; 31 ¶17