Ginahimo Mo Bala ang Kabubut-on sang Dios?

SA ILA pamalaybalay nga pagministeryo, duha ka mga Saksi ni Jehova ang nakasugilanon sa isa ka pari sang Episcopal nga Iglesia. Daw sa mainayuhon sia nga tawo, buranguson, mga 60 anyos, nagasuksok sing T-shirt nga naimprintahan sing ngalan sang iya simbahan. Sa wala sing ano, sia nagsiling: “Handum ko nga ang mga katapo sang amon simbahan mangin subong sa inyo kakugi sa pagpalapnag sing Pulong, apang ginapangabay ko sa inyo nga indi na kamo magkadto liwat sa akon puluy-an.”

Huo, madamo nga mga tawo ang nagadayaw sa hilikuton sang mga Saksi ni Jehova kag nagaapresyar sa ila kakugi kag kapagsik. Apang, indi sila interesado sa ginahimo sang mga Saksi, ukon nagabinagbinag sa paghimo sang hilikuton mismo. Apang, ining daw nagasumpakilay nga kahimtangan, indi na bag-o. Natalupangdan ini ni Jesus sang iya adlaw, kag mabaskog niya nga ginpadaku ang punto paagi sa makapulukaw sing hunahuna nga ilustrasyon.

“Ano bala sa hunahuna ninyo? Ang isa ka tawo may duha ka anak nga lalaki. Nagpalapit sia sa nahauna kag nagsiling, ‘Anak ko, kadto ka sa pagpangabudlay karon sa ulubasan.’ Kag nagsabat sia, ‘Makadto ako, ginuo,’ apang wala magkadto. Nagpalapit sia sa ikaduha kag nagsiling sing amo man. Nagsabat sia, ‘Indi ako buot.’ Apang sang ulihi naghinulsol sia kag nagkadto. Sin-o bala sa ila nga duha ang naghimo sang kabubut-on sang iya amay?”​—⁠Mateo 21:​28-31.

Maathag ang sabat. Katulad sang kadam-an nga nakabati kay Jesus, magasabat man kita sing, “Ang ulihi.” Apang sa likod sina, paagi sa sina nga ilustrasyon, ginapatalupangod sa aton ni Jesus nga ang paghimo sing kon ano ang naluyagan sang amay amo ang importante. Bisan pa ang ikaduha nga anak nga lalaki nagsiling nga indi sia buot magkadto, nagkadto sia matuod kag gindayaw sa sini. Ang paghimo sing husto nga sahi sang hilikuton importante gid. Nanghikot ang ikaduha nga anak nga lalaki paagi sa pagpangabudlay sa ulubasan sang iya amay; wala sia maglakat kag magpangabudlay sa iya kaugalingon nga ulubasan.

Ano ang ginapahangop sini tanan para sa aton? Ano ang ginakinahanglan sang Dios sa mga manugsimba karon? Ano ang matun-an naton sa kabuhi ni Jesus nga makabulig sa aton sa pagtuman sang kabubut-on sang iya Amay? Importante ini nga mga pamangkot, kag ang pagsapo naton sa husto nga sabat nagakahulugan sang aton walay katapusan nga kaayuhan, kay “sia nga nagahimo sang kabubut-on sang Dios nagapabilin sing dayon.”​—⁠1 Juan 2:17; Efeso 5:⁠17.

Ano ang “Kabubut-on sang Dios”?

Ang nombre nga “kabubut-on” ginlista sing kapin sa 80 ka beses sa Comprehensive Concordance of the New World Translation of the Holy Scriptures. Sa halos 60 sini (ukon mga 75 porsiento) ang ginapatuhuyan amo ang kabubut-on sang Dios. Ang mga ekspresyon subong sang “pagbuot sang Dios,” “kabubut-on sang akon Amay,” kag “kabubut-on sang Dios” kapin sa 20 ka beses nga ginagamit. Makita naton sa sini nga ang kabubut-on sang Dios amo dapat ang labing importante sa aton. Ang paghimo sang kabubut-on sang Dios amo dapat ang panguna nga ginakabalak-an naton sa kabuhi.

Sa Ingles ang nombre nga “kabubut-on” nagakahulugan sing ‘handum, luyag, determinasyon, butang nga ginahandum, ilabi na ang desisyon ukon determinasyon sang isa nga may awtoridad ukon gahom.’ Gani, si Jehova, ang Supremo nga Awtoridad, may isa ka kabubut-on, isa ka handum ukon determinasyon. Ano ini? Ang Kasulatan nagasugid sa aton nga sa bahin “buot [sang Dios] nga ang tanan nga tawo maluwas kag makadangat sa pagkilala sa kamatuoran.” (1 Timoteo 2:⁠4) Si Jesucristo kag ang unang mga Cristiano nagpangabudlay sing bug-os kalag sa pagdala sining sibu nga ihibalo sa iban.​—⁠Mateo 9:35; Binuhatan 5:42; Filipos 2:​19, 22.

Sin-o ang nagatuman sang kabubut-on sang Dios karon? Sa tunga sang malapit sa duha ka bilyon ka tawo nga nagapangangkon nga mga sumulunod ni Jesucristo, pila ang katulad sa manghod nga anak nga lalaki sa ilustrasyon ni Jesus, nga naglakat kag nagtuman sang kabubut-on sang iya amay? Ang sabat indi mabudlay pangitaon. Ang matuod nga sumulunod sang tikang ni Jesucristo dapat maghimo sang buluhaton nga iya ginsugo nga hikuton: “Ang maayong balita kinahanglan ibantala anay sa tanan nga kapungsuran.” (Marcos 13:10) Ang Mga Saksi ni Jehova, nga nagadamo sing kapin sa apat ka milyon kag tunga sa bug-os nga duta, aktibo nga nagabantala sing maayong balita sang Ginharian sang Dios kag nagatudlo sa iban, nagatudlo sa Ginharian subong ang lamang nga paglaum sang katawhan para sa paghidait kag kalig-unan. Nagapakigbahin ka bala sing bug-os sa pagtuman sang kabubut-on sang Dios? Ginabantala mo bala ang maayong balita sang Ginharian subong sang ginhimo ni Jesus?​—⁠Binuhatan 10:42; Hebreo 10:⁠7.

Pagsapo sing Kalipay sa Paghimo sing Kabubut-on sang Dios

Samtang may yara kalipay sa pagtuon sang kabubut-on sang Amay, mas daku ang kalipay sa pagtudlo sa iban sang kabubut-on sang Dios. Nakasapo si Jesus sang kalipay sa pagtudlo sa mga tawo tuhoy sa iya Amay. Katulad yadto sang pagkaon sa iya. (Juan 4:34) Kita man magaagom sing matuod nga kalipay kon aton himuon ang ginhimo ni Jesus, nga amo ang pagbantala kag pagtudlo sang mga butang nga iya gintudlo, ang mga butang nga iya nabaton sa iya Amay. (Mateo 28:19, 20) Subong sang ginsaad ni Jesus, “kon nakahibalo kamo sining mga butang, malipayon kamo kon ginahimo ninyo sila.”​—⁠Juan 13:⁠17.

Sa pag-ilustrar: Ang isa ka iloy nga bag-o lang makabalik sa bug-os tion nga ministeryo sang pagpayunir nagsiling: “Ang makita ang masanag nga nawong sang isa ka estudyante sa Biblia samtang ang madamo nga mga kamatuoran sang Biblia nagatandog sa tagipusuon tuman ka makakulunyag! Isa gid ka kalipay sa akon nga makita ang isa ka partikular nga estudyante nga nagasulat sang tanan nga mga kasulatan antes sang pagtuon kag naganota sa tion sang pagtuon agod makasabat sia sa ano man nga repaso nga mga pamangkot sa ulihi.” Ang isa sang iya mga estudyante sa Biblia nakapakig-angot sa kamatuoran sadtong dalagita pa lamang sia. Karon nga minyo na kag nabalaka tuhoy sa pila ka personal nga mga problema, ginhandum gid niya nga makakita sing mga Saksi. Daw ano ang iya kalipay sang makit-an sia sang payunir nga utod! Ang bataon nga babayi nalipay gid nga napadayon liwat ang iya pagtuon sa Biblia.

Paghupot sing Kalipay sa Paghimo sang Kabubut-on sang Dios

Si Hari David sang dumaan nga Israel isa nga nagtinguha himuon ang kabubut-on sang Dios sa iya bug-os nga kabuhi. Walay sapayan sang madamo nga mga kabudlayan kag pag-ipit nga iya nasumalang, gin-inspirar sia sa pagsiling: “Nagakalipay ako sa paghimo sang imo kabubut-on, O Dios ko, kag ang imo kasuguan yari sa sulod sang akon tagipusuon.” (Salmo 40:⁠8) Ang paghimo sang kabubut-on sang Dios yara sa kalag ni David, sa iya pagkatawo. Amo yadto ang sekreto sang iya walay pag-ugdaw nga kalipay sa pag-alagad kay Jehova. Ang paghimo sang kabubut-on sang Dios indi isa ka kabudlayan sa kay David. Sa baylo, isa yadto ka kalipay, butang nga naggikan sa iya tagipusuon. Sa bug-os niya nga kabuhi, nagtinguha sia sa paghimo sang iya bug-os nga masarangan sa pag-alagad sa iya Dios, si Jehova, bisan pa nakahimo sia kon kaisa sing sala.

Kon kaisa, ang aton kalipay mahimo nga mabuhinan. Mahimo nga lapyuon kita ukon masubuan. Mahimo nga tublagon kita sang aton nagligad, konsiensiahon kita sang pila ka kasaypanan nga nahimo naton sang una. Sa masami, madaug naton ini nga mga balatyagon paagi sa isa ka maid-id nga pagtuon sa pulong sang Dios. Mahimo naton tinguhaan nga masulat ang kasuguan sang Dios sa “sulod sang [aton] tagipusuon,” subong sa ginhimo ni David. Kon tinguhaan naton nga himuon ang kabubut-on sang Dios sing bug-os kalag, buot silingon, sa aton bug-os nga masarangan, padyaan niya kita sing nahisuno bangod matutom sia.​—⁠Efeso 6:6; Hebreo 6:​10-12; 1 Pedro 4:⁠19.

Sing makawiwili, sa Hebreo 10:​5-7, ginbalikwat ni apostol Pablo ang mga pinamulong ni David sa Salmo 40:​6-8 kag gin-aplikar ini kay Jesucristo. Sa paghimo sini, ginpakita ni Pablo kon daw ano ka suod si Jesus sa iya Amay. Ang Hebreo nga tinaga para sa “kabubut-on” nagadala sing mga ideya nga ‘kasadya, handum, pabor, ukon kalipay.’ Busa, ang Salmo 40:8 mahimo mabasa tuhoy kay Cristo: “Nagakalipay ako sa paghimo sang imo kabubut-on, O Dios ko.”a Si Jesus, naluyag maghimo sang kon ano ang makapahalipay sa iya Amay. Si Jesus naghimo sang labaw sa ginpangabay sa iya. Ginhimo niya ang suod sa tagipusuon sang iya Amay, kag nagkalipay sia sa paghimo sini.

Ang bug-os nga kabuhi ni Jesus nasentro sa pagtudlo sa iban sang kon ano ang kabubut-on sang Dios kag kon ano ang ila himuon agod maagom ang pagpakamaayo sang Dios. Sia bug-os tion nga manugbantala kag manunudlo kag nakasapo sing daku nga kalipay sa paghimo sinang hilikuton. Gani makatarunganon lamang ang resulta nga kon mas labi nga ginahimo naton ang hilikuton ni Jehova, mas labi nga kalipay ang aton mabaton. Makaalagad ka man bala sing bug-os tion sa pagbantala nga hilikuton agod nga ang imo kalipay magaawas man?

Ang isa ka dugang nga bulig agod mahuptan ang kalipay sa paghimo sang kabubut-on sang Dios amo ang padayon nga pagtulok sing maid-id sa palaabuton. Amo ina ang ginhimo ni Jesus. “Tungod sa kalipay nga ginbutang sa iya atubang nagbatas sia sang usok sang pag-antos, nga nagatamay sang kahuluy-an.” Para sa iya, ang kalipay yara sa pagpamatuod sing katutom sa Dios tubtob sa katapusan kag nian ang pag-agom sing padya nga paggahom sa tuo nga kamot sang iya Amay.​—⁠Hebreo 12:⁠2.

Handurawa ang palaabuton nga kalipay nga magaabot sa sadtong magapadayon sa paghimo sang kabubut-on sang Dios. Makita nila ang kalaglagan sang mga nagapamilit sa paghimo sang ila makagod nga kabubut-on bisan pa magapaantos ini sa mga nagatinguha nga himuon ang kabubut-on sang Dios. (2 Tesalonica 1:​7, 8) Handurawa ang kalipay sang mga pagabanhawon sa pagtigayon sing kahigayunan nga makatuon kag himuon ang kabubut-on sang Dios. Ukon binagbinaga ang katuyuan sang Dios sa pagpasag-uli sang duta sa Paraiso. Kag sa katapusan, handurawa ang kahilwayan nga magaresulta gikan sa bug-os nga paglaglag kay Satanas, ang manugpamatok sa kabubut-on ni Jehova.

Huo, ang paghimo sang kabubut-on sang Dios karon makadala sing tuman nga kalipay karon kag sing mapinadayunon nga kalipay sa palaabuton. Ano man ang sabat nga aton mabaton sa pagbantala nga hilikuton, aton ilugon ang halimbawa ni Jesus sa pagkalipay sa paghimo sing kabubut-on sang iya Amay.

[Footnote]