Ang mga Paktakon sang Dios kag ang Iya Katuyuan
KON wala sing isa nga makahibalo sang sabat, nian isa ini ka hangkat; apang kon may isa nga nakahibalo sang sabat, nian indi na ini isa ka hangkat. Ano ini? Amo ang paktakon.
Sa wala sing bungog nga katilingban karon, ginatamod sang mga tawo ang paktakon subong binatabata, apang sa dumaan nga mga tion ang paktakon “isa ka pagtilaw sang kaalam,” siling sang The Interpreter’s Dictionary of the Bible.—Ipaanggid ang Hulubaton 1:5, 6.
Sa baylo nga ihambal sing maathag ang iya kabubut-on ukon katuyuan, kon kaisa hungod nga wala ginahambal sing maathag ni Jehova ang iya matagnaon nga mga pulong, nagagamit sing mga pagpaanggid, nagahimo nga makalilibog sang “indi maathag nga mga pulong,” ukon mga paktakon nga nagapagumon sang painuino. (Salmo 78:2, King James Version; Numeros 12:8, The Emphasized Bible) Sa katunayan, samtang ang Hebreo nga tinaga para sa paktakon ginagamit lamang sing 17 ka beses sa Biblia, ang Kasulatan literal nga puno sing mga paktakon kag mga hulubaton.
Bugana ang mga Paktakon sa Biblia
Si Hari Solomon ginasugid nga nakalubad bisan sang pinakamakalilibog nga mga pamangkot, ukon mga paktakon, nga gindala sa iya. (1 Hari 10:1, footnote) Pat-od nga resulta ini sang hatag-Dios nga kaalam. Kon matuod gid man ang report sang dumaan nga mga istoryador nga kis-a nalutos kuno si Solomon sa paindisanay sa paktakon kay Hari Hiram sang Tiro, ayhan natabo ini sa tapos nga nadula niya ang espiritu ni Jehova subong resulta sang iya apostasya. Nagpakita man si Hukom Samson sing kaanggid nga kaluyag sa paktakon. Isa ka bes, may gahom sang balaan nga espiritu, ginhatagan sia sing kahigayunan sang isa ka paktakon nga mapahadlok ang tagipusuon sang mga kaaway sang Dios.—Hukom 14:12-19.
Apang, madamo nga paktakon sa Biblia ang direkta nga may kaangtanan sa mga katuyuan ni Jehova. Halimbawa, binagbinaga ang Genesis 3:15. Ini nga tagna, nga nangin sadsaran sang tema sang Biblia, isa mismo ka butang nga makatalanhaga, isa ka “balaan nga tinago.” (Roma 16:25, 26) Magluwas nga ginhatagan sing labaw-sa-kinaugali nga mga palanan-awon kag mga bugna, nakita man ni apostol Pablo ang pila ka pat-od nga bahin sang katuyuan sang Dios sa “malubog nga balayan,” ukon sing literal, “indi mahangpan nga ekspresyon.” (1 Corinto 13:12; 2 Corinto 12:1-4) Kag ano naman ang tuhoy sa walay katapusan nga pagpakotpakot nga nagalibot sa makatalanhaga nga numero sang mapintas nga sapat—“anom ka gatos kag kan-uman kag anom”—nga ginpakilala dayon kag wala sing paathag sa Bugna 13:18? Sin-o ang makalubad sining nga mga paktakon nga iya sang Dios, kag ano ang katuyuan sini?
Paglubad sa Balaan nga mga Tinago
Para sa madamo sa aton, ang panan-aw amo ang labing hamili sa aton lima ka igbalatyag. Apang kon wala sing kapawa, ang panan-aw sang tawo halos wala sing pulos. Mahimo nga daw bulag kita. Amo man ang tawhanon nga hunahuna. May makatilingala ini nga ikasarang sa pagpaanggid sa sulundan nga mga kinaiya, sa paggamit sang pangatarungan, kag sa amo malubad ang mga paktakon. Apang, kapin pa nga butang ang kinahanglan sa paglubad sa balaan nga mga tinago. Samtang ang iban mahimo maghatag sing mga sabat sa mga paktakon sa Biblia, ang Awtor lamang sini, si Jehova, ang Dios sang kapawa, ang makasugid sang pat-od nga kahulugan sini.—1 Juan 1:5.
Sing makapasubo, masami nga tuman ka bugalon kag independiente ang mga tawo sa paghulat kay Jehova para sa mga sabat. Nawili sa misteryo, may mga tawo nga, sa pagpangita sing dugang nga hangkat sa hunahuna apang indi gid man sing kamatuoran, nagpangita sing solusyon sa guwa sang Pulong sang Dios. Halimbawa, ang Judiyong mistisismo suno sa ginpabutyag sa Cabala nagbinagbinag sa makatalanhaga nga kahulugan sang mga numero kag mga letra sang Hebreo nga alpabeto. Ang mga Gnostiko sang ikaduha nga siglo, sa pihak nga bahin, naggamit sang Hebreo kag Griego nga Kasulatan sa pagtinguha nga mahibaluan ang sekreto nga mga kahulugan gikan sa sini.
Apang, ining tanan nga pagpangita nagdul-ong pa gid sa ila sa pagano nga mga rito ukon mga disparatis kag palayo sa balaan nga kamatuoran. ‘Ti, kon ang kalibutan puno sing kalautan,’ pangatarungan sang mga Gnostiko, ‘nian ang Manunuga sini, si Yahweh, indi mahimo nga isa ka maayo nga Dios.’ Amo bala sini ang labing maayo nga konklusion nga matanyag nila? Daw ano gid kanabaw ang tawhanon nga pangatarungan! Indi katingalahan nga si apostol Pablo, nga nagpamatok sa apostata nga mga ideya nga sang ulihi ginpalambo sang Gnostiko nga mga sekta, nagpaandam sing matigdas sa iya mga sulat: “Indi maglampas sa mga butang nga ginsulat”!—1 Corinto 4:6.
Pagpaathag sa “Indi Maathag nga mga Pulong”
Apang, ngaa ang Dios sang kapawa magahambal pa gid sing “indi maathag nga mga pulong”? Ang kinaiya mismo sang isa ka paktakon nagahangkat sang mga ikasarang sang isa sa paghanduraw kag pagpangatarungan. Busa, ginlapta sa bug-os nga Kasulatan kaangay sang manamit nga pangpagana nga ginlapta sa isa ka pinili nga pagkaon, gingamit ini kon kaisa agod lamang pukawon ang interes sang tagpalamati ukon mapaalinton ang mensahe sing maayo. Sa sining mga halimbawa, ang mga paathag masami nga ginahatag dayon.—Ezequiel 17:1-18; Mateo 18:23-35.
Si Jehova nagahatag sing bugana nga kaalam apang indi kon kay bisan sin-o lang. (Santiago 1:5-8) Binagbinaga ang tulun-an sang Hulubaton, ang isa ka inspirado nga koleksion sang madamo makalilibog nga mga hambalanon nga mahimo ginatamod sang iban subong mga paktakon. Ang paghangop sa sini nagakinahanglan sing tion kag pagpamalandong. Apang pila ka tawo ang handa sa pagpanikasog? Ang ginaunod sini nga kaalam matigayon lamang sang mga handa sa pagkutkot sini.—Hulubaton 2:1-5.
Naggamit man si Jesus sing mga ilustrasyon sa pagbuyagyag sang panimuot sang tagipusuon sang iya tagpalamati. Ang kadam-an nagpanong sa palibot niya. Nalingaw sila sa iya mga sugilanon. Naluyagan nila ang iya mga milagro. Apang, pila sa ila ang handa sa pagbag-o sang ila estilo sang pagkabuhi kag sundon sia? Daw ano nga kinatuhayan sa mga disipulo ni Jesus, nga sulitsulit nga nagtinguha nga hangpon ang mga panudlo ni Jesus kag handa nga sikwayon ang kaugalingon agod mangin iya mga sumulunod!—Mateo 13:10-23, 34, 35; 16:24; Juan 16:25,29.
Pagtan-aw sa Kapawa
“Ang pagkawili sa paktakon,” siling sang isa ka tiliman-an, “daw nagasanto sa mga panag-on sang intelektuwal nga pagkamarasmas.” Sa karon pribilehiyo gid naton nga magkabuhi sa tion nga ang espirituwal nga “kapawa mismo nag-iwag” sa katawhan sang Dios. (Salmo 97:11; Daniel 12:4,9) Makahulat bala kita sing mapailubon kay Jehova sa pagpahayag sang iya mga katuyuan suno sa iya orasan? Sing labi pa ka importante, ginabag-o bala naton dayon ang aton kabuhi kon matalupangdan naton kon paano labi pa gid nga makapahisuno kita sa ginpahayag nga kabubut-on sang Dios? (Salmo 1:1-3; Santiago 1:22-25) Kon himuon naton ini, pakamaayuhon ni Jehova ang aton mga panikasog, agod nga, subong nga ang antipara nagapasanag sang buron nga panan-aw, ituon sing maathag sang balaan nga espiritu ang bug-os nga laragway sang balaan nga katuyuan sa mata sang aton panghunahuna, nga nagapatin-aw sang aton espirituwal nga panan-aw.—1 Corinto 2:7, 9, 10.
Sa pagkamatuod, ang mga paktakon sa Kasulatan nagapadaku kay Jehova subong ang “Manugpahayag sang mga tinago.” (Daniel 2:28, 29) Dugang pa, Manug-usisa man sia sang mga tagipusuon. (1 Cronica 28:9) Indi kita dapat makibot sa paghibalo nga ang pagpahayag sing kapawa sang kamatuoran sang Dios pirme nga amat-amat. (Hulubaton 4:18; Roma 16:25, 26) Sa baylo nga pangitaon ang ihibalo tuhoy sa madalom nga mga butang sang Dios paagi sa mistisismo ukon manabaw nga kaalam sang tawo, nga nagadul-ong lamang sa walay kapuslanan, masinaligon kita nga maglaum kay Jehova nga Dios sa pagpasiga sa kapawa sang kamatuoran sa iya “indi maathag nga mga pulong,” ginapahibalo ang iya matahom nga mga katuyuan sa matutom nga mga alagad sa iya gintalana nga tion.—Amos 3:7; Mateo 24:25-27.
[Ginkuhaan Sang Laragway sa pahina 26]
Biblia Hebraica Stuttgartensia, Deutsche Bibelgesellschaft Stuttgart