Ano ang Imo mga Plano Para sa Tion sang Bakasyon?

Kon ginahunahuna naton ang tion sang bakasyon, ginahunahuna naton ang mas mainit nga paniempo kag ang mga plano sa pagliwaliwa ukon ang makalilipay nga pagduaw sa mga himata kag mga abyan. Kon nagaplano ka para sa bakasyon, yari ang pila ka pahanumdom nga magabulig sa imo nga unahon pirme ang mga interes sang Ginharian:

◼ Kon maglakat ka para magbakasyon, magplano sa pagtambong sa mga miting sang lokal nga kongregasyon kag makigbahin sa ministeryo. Pat-ura nga ihatag ang imo mga report sa pag-alagad; kon kinahanglanon, ipadala ini paagi sa koreo sa sekretaryo sang inyo kongregasyon.

◼ Ang pagduaw sa mga himata nga wala sa kamatuoran mahimo nga magahatag sa imo sing kahigayunan nga makapanaksi sing dipormal. Pat-ura nga dala mo ang imo Biblia kag literatura.

◼ Nahunahuna mo na bala ang pagbulig sa kaingod nga kongregasyon nga nagakinahanglan sing bulig sa pagtuptop sang teritoryo sini? Makighambal sa mga gulang ukon sa manugtatap sang sirkito agod makakuha sing impormasyon nahanungod sang mga kinahanglanon sa inyo lugar.

◼ Ang mga bakasyon sa eskwelahan nagahatag sing maayong kahigayunan para mapasangkad sang mga pamatan-on ang ila hilikuton sa pag-alagad. Mga pamatan-on, mahimo bala kamo makaauxiliary payunir?

◼ Bangod sang maayo nga paniempo kag mas malawig nga mga oras nga may adlaw, mahimo ikaw makatigayon sing maayong resulta paagi sa paghimo sang dugang nga pagpanaksi sa gab-i nga ang madamong tawo yara sa balay.

◼ Ang mga gulang dapat mangin alisto sa paghupot sang mga hilikuton sang kongregasyon nga organisado, nagahimo sing kahimusan nga may isa nga magaatipan sang mga responsabilidad nga gintangdo sa kon sin-o ang magabakasyon.

Dumduma nga ang “mga plano sang isa nga makugi nagapadulong lamang sa kabuganaan.” (Hulu. 21:5) Planuha nga gamiton sing maalamon ang imo tion sang bakasyon.