Magpanaksi Bisan Diin Nga May Tawo

¹ Nagakilala sa papel sang espiritu sang Dios sa iya ministeryo, si apostol Pablo nagsiling: “Ang Dios padayon nga nagapatubo sini.” Sia man nagbaton: “Mga masigkamanugpangabudlay kita sang Dios.” (1 Cor. 3:​5-9) Isa ini ka matahom nga pribilehiyo. Paano naton mapakita sing dayag nga ginaapresyar naton ang mangin mga masigkamanugpangabudlay sang Dios? Paagi sa pagbantala sing maayong balita sa tanan nga masugilanon naton sa pamalaybalay nga hilikuton kag sa bisan diin man nga lugar.

² Ginasugo kita nga “maghimo sing mga disipulo sa mga tawo.” (Mat. 28:19) Kon diutay lamang nga mga tawo ang masugilanon naton kon nagapakigbahin kita sa ministeryo, mahimo kita gilayon maluyahan sing buot kag magabatyag nga diutay lamang ang aton nahimo. Sa pihak nga bahin, labi gid kita nga malipay sa aton ministeryo kon madamo nga tawo ang aton masalapuan kag masugilanon. Makahalangkat gid ini, kay nagakinahanglan ini nga magamatumato kita sa pagkadto kon diin may mga tawo agod masugilanon naton sila.

³ Praktikal nga mga Halimbawa: Mahimo kita makapanaksi sa mga tawo sa mga tiendahan, parke, paradahan sing mga salakyan, kag terminal sang bus. Kon nagasakay ka sa publiko nga transportasyon, handa ka bala sa pagpanaksi samtang nagalakbay? Duha ka Saksi nga nakasakay sa gutok nga bus pakadto sa ila miting antes magguwa sa latagon ang nakapakigsugilanon tuhoy sa larawan sang Paraiso sa Ihibalo nga libro. Subong sang ginalauman nila nga matabo, isa ka pamatan-on nga lalaki nga nagatindog malapit sa ila ang nagapamati kag nahamuot sa iya nabatian. Antes manaug sa bus, nagkuha sia sing libro kag nangabay nga may magduaw sa iya balay.

⁴ Madamong manugbantala ang nakasapo sing kalipay paagi sa pagpanaksi sing di-pormal. Isa ka utod nga babayi ang nagkadto sa lokal nga shopping center isa ka hapon kag ginsugilanon ang mga tawo nga nakatapos na sa ila pagpamalaklon apang daw wala nagadali. Napahamtang niya ang tanan nga literatura sa iya bag. Isa ka tawo nga nagahulat sa iya awto ang nalipay nga makabaton sing mga magasin gikan sa iya. Nakatambong na sia anay sa mga miting, kag ang ila paghambalanay nagpukaw liwat sang iya interes.

⁵ Isa ka pribilehiyo nga bayawon ang ngalan ni Jehova. Paagi sa pagpakita sang aton kakugi sa pagbantala nga hilikuton, ginapakita naton nga nahangpan naton ang katuyuan sang di-bagay nga kaluoy sang Dios sa aton. Bangod “karon ang labi na ka kalahamut-an nga tion” sa pagbulig sa iban, makadto kita bisan diin nga may mga tawo kag panaksihan sila nahanungod sa “adlaw sang pagluwas” ni Jehova.​—⁠2 Cor. 6:​1, 2.