Mahimo Ka Makapanaksi sing Di-pormal!
1 Pila sa inyo kongregasyon ang nakahibalo sang kamatuoran paagi sa di-pormal nga pagpanaksi? Mahimo ka makibot sa sabat. Ang di-pormal nga pagpanaksi nagadalahig sa pagpaambit sang maayong balita sa mga tawo nga aton masugilanon sa adlaw-adlaw nga mga buluhaton. Mahimo ini sa tion sang aton pagbiyahe, pagbisita sa mga paryente ukon kasilingan, ukon pagpamalaklon, subong man sa eskwelahan, sa trabaho kag iban pa. Sa isa grupo sang kapin sa 200 ka Saksi, 40 porsiento sa ila ang una nga napakig-angutan paagi sa di-pormal nga pagpanaksi. Gani, ini nga pamaagi sang pagbantala epektibo gid!
2 Ang mga ebanghelisador sang una nga siglo masami nga nagapanaksi sing di-pormal. Halimbawa, samtang nagalabay sa Samaria, ginpanaksihan ni Jesus ang isa ka babayi nga nagsag-ub sa bubon ni Jacob. (Juan 4:6-26) Ginsugdan ni Felipe ang pagsugilanon sa Etiopianhon nga opisyal sang palasyo nga nagabasa sang libro ni Isaias paagi sa pagpamangkot: “Nahibaluan mo gid bala ang imo ginabasa?” (Binu. 8:26-38) Sang napriso sa Filipos, ginpanaksihan ni apostol Pablo ang manugbilanggo. (Binu. 16:23-34) Sang ulihi, samtang nabilanggo si Pablo sa iya puluy-an, “ginbaton niya sing mainayuhon ang tanan nga nagduaw sa iya, nga nagabantala sa ila sang ginharian sang Dios kag nagapanudlo nahanungod kay Ginuong Jesucristo.” (Binu. 28:30, 31) Mahimo ka man makapanaksi sing di-pormal, bisan pa mahuluy-on ka. Paano?
3 Pagsugod: Madamo sa aton ang nabudlayan sa pagsugod sa pagpakighambal sa mga estranghero. Bisan sa mga kilala naton, mahimo nga medyo mabudlay ang pagsugid sa ila sang kamatuoran. Apang, mapahulag kita sa paghambal kon pamalandungan naton ang kaayo ni Jehova, ang espirituwal nga bahandi nga ginahatag niya sa iya mga alagad, kag ang masubo nga kahimtangan sang mga tawo sa kalibutan. (Jon. 4:11; Sal. 40:5; Mat. 13:52) Isa pa, mahimo kita magpabulig kay Jehova nga ‘makatipon sing kaisog.’ (1 Tes. 2:2) Nagsiling ang isa ka estudyante sang Gilead: “Masami nga nasapwan ko nga makabulig ang pagpangamuyo kon nabudlayan ako sa pagpakigsugilanon sa mga tawo.” Kon nagapangalag-ag ka sa pagpakigsugilanon, mangamuyo sing mahipos kag malip-ot.—Neh. 2:4.
4 Sa di-pormal nga pagpanaksi, indi kinahanglan nga sugdan naton ang paghambalanay paagi sa pormal nga introduksion ukon pagbasa sing teksto. Mahimo nga makabulig kon indi anay naton sia panaksihan sa umpisa sang pag-istoryahanay. Madamo nga manugbantala ang nagreport nga sa sini nga paagi nakatigayon sila sing kompiansa sa pagsugid sang maayong balita. Kon indi gusto sang tawo nga makig-istorya, indi naton sia pagpiliton. Matinahuron nga utdon ang pag-istoryahanay.
5 Samtang nagapamalaklon, ang isa ka mahuluy-on nga utod nga babayi nagatulok sa mata sang mga tawo kag nagayuhum. Kon magyuhum man ang tawo, tamyawon niya sia. Kon maayo ang sabat sang tawo, istoryahon niya sia. Nagapamati sia sing maayo kag ginatinguhaan nga hibaluon kon ano nga bahin sang maayong balita ang mahimo nga makagalanyat sa tawo. Sa sini nga paagi, nakapahamtang sia sing madamo nga literatura kag nakasugod pa gani sing pagtuon sa Biblia.
6 Pagsugod sang Pag-istoryahanay: Ano ang mahimo naton isiling sa pagsugod sang pag-istoryahanay? Sang nakig-istorya si Jesus sa babayi sa bubon, gin-umpisahan niya ini paagi sa pagpangayo sing tubig. (Juan 4:7) Gani mahimo naton masugdan ang pag-istoryahanay paagi sa mainabyanon nga pagtamyaw ukon pagpamangkot. Sa tion sang pag-istoryahanay, mahimo ka makakita sing kahigayunan para mapaambit ang isa ka Kasulatan kag sa amo matanom mo ang binhi sang kamatuoran. (Man. 11:6) Ang pila nangin madinalag-on paagi sa pagpautwas sing makapukaw-interes nga mga komento para mamangkot ang iban. Halimbawa, samtang nagahulat para makigkita sa doktor, mahimo mo masugdan ang pag-istoryahanay paagi sa pagsiling, “Maayo tani kon indi na gid ako magbalatian.”
7 Makabulig man sa aton ang pag-obserbar para masugdan ang pag-istoryahanay. Kon maobserbahan naton ang isa ka ginikanan nga may mabuot nga kabataan, mahimo naton dayawon ang ginikanan kag mamangkot, “Ano ang nakabulig sa imo para mangin madinalag-on nga ginikanan?” Natalupangdan sang isa ka utod nga babayi ang topiko nga ginaistoryahan sang iya kaupod sa trabaho kag nian nagpaambit sang espesipiko nga impormasyon base sa ginaistoryahan sang iya mga katrabaho. Sang nahibaluan niya nga nagaplano sa pagpamana ang iya katrabaho, ginhatagan niya sia sing Magmata! nga nagabinagbinag kon paano planuhon ang pagpakasal. Nagresulta ini sa dugang pa nga paghambalanay.
8 Ang isa pa ka paagi nga makasugod sa pag-istoryahanay amo ang pagbasa sang aton mga literatura sa publiko nga mga duog. Ginbuksan sang isa ka utod nga lalaki Ang Lalantawan ukon Magmata! sa artikulo nga may makapainteres nga tig-ulo kag ginbasa ini sing mahipos. Kon matalupangdan niya nga nagatan-aw sa magasin ang iya katupad, pamangkuton niya sia ukon magkomento sing malip-ot parte sa artikulo. Masami ini nagaresulta sa pag-istoryahanay kag pagpanaksi. Ang pagdispley sang mga publikasyon mahimo makapukaw sang interes sang aton mga katrabaho ukon klasmeyt kag magapahulag sa ila nga mamangkot parte sa sini.
9 Mangita sing mga Kahigayunan: Bangod hilingagawon ang aton pagbantala, dapat naton hungdon ang pagpanaksi sing di-pormal. Gani, dapat kita mangita sing paagi nga makapanaksi samtang ginahimo naton ang aton mga buluhaton kada adlaw. Hunahunaa sing abanse ang mga tawo nga mahimo naton masugilanon, kag binagbinaga kon paano ka makasugod sang mainabyanon nga pag-istoryahanay. Magdala sing gamay nga Biblia kag literatura nga mahimo mo mapaambit sa mga interesado.—1 Ped. 3:15.
10 Paagi sa pagpangita sing mga kahigayunan, madamo nga manugbantala ang nakapanaksi sing di-pormal. Ang isa ka utod nga babayi nga nagaistar sa isa ka guardiado nga apartment nagbutang sang jigsaw puzzle parte sa matahom nga mga danyag sang kinaugali sa duog nga ila ginahampangan. Kon tan-awon ini sang mga tawo kag magkomento sa sining matahom nga danyag, ginasugilanon niya sila kag ginasugiran sang saad sang Biblia parte sa “isa ka bag-o nga langit kag isa ka bag-o nga duta.” (Bug. 21:1-4) May nahunahunaan ka bala nga pamaagi sa pagpanaksi sing di-pormal?
11 Pagtatap sang Interes: Kon may masapwan ka nga interesado, tinguhai nga matatap ini. Kon nagakaigo, mahimo mo silingan ang tawo: “Nalipay gid ako sa aton pag-istoryahanay. Sa diin ko ikaw kadtuan para makaistoryahanay kita liwat?” Ang pila ka manugbantala nagahatag sang ila adres kag numero sang telepono kag nagasiling: “Nanamian gid ako sa aton paghambalanay. Kon luyag mo makahibalo sing dugang parte sa aton ginhambalan, mahimo mo ako kontakon sa sini nga adres ukon sa sini nga numero.” Kon indi mo personal nga matatap ang interes, mahimo mo ihatag sa sekretaryo sang kongregasyon ang nasulatan nga Please Follow Up (S-43) nga pormas para mapadala sa nagakaigo nga kongregasyon.
12 Dapat naton ireport ang aton oras sa pagpanaksi sing di-pormal. Gani, pat-ura nga may rekord ka sa sini, bisan pila lang ini ka minuto. Binagbinaga ini: Kon ang tagsa ka manugbantala magpanaksi sing lima ka minuto kada adlaw, kon tingbon ini, makalab-ot ini sing kapin sa 17 milyones ka oras kada bulan!
13 May daku kita nga mga rason sa pagpanaksi sing di-pormal—gugma sa Dios kag sa isigkatawo. (Mat. 22:37-39) Ginapahulag kita sang aton apresasyon sa mga kinaiya kag mga katuyuan ni Jehova sa pagsugid tuhoy sa “himaya sang pagkahari sang iya ginharian.” (Sal. 145:7, 10-12) Ang matuod nga kabalaka sa aton isigkatawo nagapahulag sa aton nga kalitan ang tagsa ka nagakaigo nga kahigayunan sa pagpaambit sang maayong balita samtang may panahon pa. (Roma 10:13, 14) Paagi sa pagplano kag paghanda, tanan kita makapanaksi sing di-pormal kag mabatyagan ang kalipay sa pagpaambit sang kamatuoran sa mga interesado.
[Mga Pamangkot sa Pagtinuon]
1. (a) Ano ang di-pormal nga pagpanaksi? (b) Pila sa aton diri ang nakatuon sa kamatuoran paagi sa di-pormal nga pagpanaksi?
2. Ano ang mga halimbawa sa Kasulatan tuhoy sa di-pormal nga pagpanaksi?
3. Ano ang makabulig sa aton nga malandas ang kahuya?
4. Ano nga tulumuron ang mahimo naton mapahamtang sa pagsugod sang pag-istoryahanay, kag ngaa?
5. Ano ang nakabulig sa isa ka utod para makabantala sing di-pormal?
6. Paano naton masugdan ang pag-istoryahanay sa di-pormal nga pagpanaksi?
7. Paano ang pag-obserbar makabulig sa aton nga makapanaksi sing di-pormal?
8. Paano naton magamit ang aton mga literatura sa pagsugod sang pag-istoryahanay?
9, 10. (a) Paano kita makakita sing kahigayunan para makapanaksi sing di-pormal? (b) Paano mo ini mahimo?
11. Paano naton matatap ang interes nga aton nasapwan sa pagpanaksi sing di-pormal?
12. (a) Ngaa dapat irekord kag ireport ang oras nga aton ginhinguyang sa pagpanaksi sing di-pormal? (b) Ano ang resulta sa di-pormal nga pagpanaksi? (Tan-awa ang kahon nga “Mga Resulta sa Di-pormal nga Pagpanaksi!”)
13. Ano ang magapahulag sa aton nga magpanaksi sing di-pormal?
[Blurb sa pahina 4]
Mahimo nga makabulig kon mangin tulumuron naton nga pangilalahon ang mga tawo kag sugdan ang pag-istoryahanay
[Blurb sa pahina 5]
Paagi sa pagpangita sing mga kahigayunan, madamo nga manugbantala ang nakapanaksi sing di-pormal
[Kahon sa pahina 5]
Mga Panugda Para Masugdan ang Pag-istoryahanay
◼ Mangamuyo
◼ Pilia ang daw mga mainabyanon kag wala nagadali
◼ Magtulok sa mata, magyuhum, kag magkomento parte sa mga butang nga pareho ninyo nanamian
◼ Mamati sing maayo
[Kahon sa pahina 6]
Mga Resulta sa Di-pormal nga Pagpanaksi!
• Samtang nagahulat sa pagpakay-o sang iya salakyan, ginpanaksihan sang isa ka utod nga lalaki ang mga tawo sa iya palibot kag nanghatag sing mga handbill para sa pamulongpulong publiko. Pagligad sang isa ka tuig, gintamyaw sia sang isa ka utod nga indi niya kilala sa isa ka kombension. Isa sia sa mga tawo nga iya nahatagan sing handbill sa talyer! Nagtambong sa pamulongpulong publiko ini nga tawo kag nangabay sing pagtuon sa Biblia. Bawtismado na sila karon nga mag-asawa.
• Ang isa ka utod nga babayi nga nakatuon sing kamatuoran paagi sa di-pormal nga panaksi nanikasog nga makapanaksi sa mga tawo nga iya makilala paagi sa iya tatlo ka kabataan. Nalakip sa sini ang ila mga kaingod kag mga ginikanan nga iya makilala sa eskwelahan kag sa tion sang mga miting sang mga ginikanan. Kon magpakilala sia, nagapabutyag sia sing simple pero tinagipusuon nga komento sa kapuslanan sang Biblia sa pagpadaku sa iya kabataan, kag nian ginaliton niya ang pag-istoryahanay sa iban nga topiko. Pero bangod nasugdan na niya ang pag-istoryahanay, mas mahapos na para sa iya nga ipaambit ang ginasiling sang Biblia. Paagi sa sini, nabuligan niya ang 12 ka tawo nga makapabawtismo.
• Sang ginduaw sang isa ka insurance salesman ang isa ka utod nga babayi, ginpanaksihan niya sia. Ginpamangkot niya sia kon luyag niya makatigayon sing maayong panglawas, kalipay, kag kabuhi nga dayon. Nagsiling ang salesman nga huo kag namangkot kon ano nga insurance policy ang iya ginatumod. Ginpakita niya sa iya ang mga saad sa Biblia kag gintanyagan sia sang isa ka publikasyon, kag ginbasa ini sang salesman sa isa ka gab-i. Gindumalahan sia sang pagtuon sa Biblia. Nagtambong sia sa mga miting, kag sang ulihi nabawtismuhan.
• Samtang nagasakay sa eroplano, ginsugilanon sang isa ka utod nga babayi ang iya katupad nga babayi kag ginpanaksihan niya sia. Sa tapos sang ila pagsugilanon, ginhatag sang utod ang iya adres kag numero sang telepono kag ginpalig-on ang babayi nga mangabay sing pagtuon sa Biblia sa tion nga may magbisita sa ila nga mga Saksi ni Jehova. Pagkadason gid nga adlaw, may duha ka Saksi nga nagbisita sa babayi. Nagtuon sa Biblia ang babayi, madasig nga nag-uswag, nabawtismuhan, kag sang ulihi nagdumala sing tatlo ka pagtuon sa Biblia.
• Ang utod nga bulag kag nagaedad sing 100 ka tuig nga nagaistar sa nursing home masami nga nagasiling, “Kinahanglan naton ang Ginharian.” Bangod sini, ginapamangkot sia sang mga nars kag mga pasyente kag ginpaathag niya sa ila kon ano ang Ginharian. Ginpamangkot sia sang isa ka babayi nga nagaobra diri kon ano ang iya himuon sa Paraiso. Nagsabat sia, “Makakita na ako kag makalakat liwat kag sunugon ko ang akon wheelchair.” Bangod bulag sia, ginpangabay niya ang babayi nga basahan sia sang mga magasin. Sang nagduaw ang anak nga babayi sang utod, naglisensia ang babayi sa anak nga dalhon niya ang mga magasin sa ila balay. Ginsilingan sang nars ang anak, “Ang amon bag-o nga tema diri sa nursing home amo: ‘Kinahanglan naton ang Ginharian.’”
• Ang isa ka utod nga nagalinya sa isa ka restawran nakabati nga nagabaisay parte sa pulitika ang isa ka grupo sang mga tigulang nga nagapungko malapit sa ila. Nagsiling ang isa nga indi masolbar sang gobierno ang aton mga problema. Nagsiling ang utod sa iya kaugalingon, ‘Tsansa ko na ini.’ Nangamuyo sia sing makadali kag nagpalapit sa ila. Sang napakilala na niya ang iya kaugalingon, ginsugiran niya sila parte sa Ginharian sang Dios nga amo ang gobierno nga makasolbar sang mga problema sang katawhan, kag gintanyagan sila sang iya dala nga brosyur. Nian nagpalapit ang manedyer. Abi sang utod kon pahalinon sia. Pero, ginsilingan sia sang manedyer nga nagapamati sia kag luyag man niya makabaton sang brosyur. Ang isa ka trabahador nga nagapamati nagpalapit nga nagatulo ang luha. Nagatuon sia anay sa Biblia kag luyag niya ini padayunon.