Handa Ka Bala Manaksi sing Di-pormal?
1. Ano nga halimbawa ang nagapakita nga mahimo mangin epektibo ang di-pormal nga pagpanaksi?
1 Ang pagpanaksi sing di-pormal mahimo mangin epektibo gid. Ang Biblia nagaunod sing madamo nga halimbawa sang di-pormal nga pagpanaksi nga may maayo nga mga resulta. (Juan 4:7-15) Ano ang aton himuon agod mangin handa kita sa sini nga sahi sang pagpanaksi?
2. Paano makabulig ang aton pamayo kag pamustura sa aton pagpanaksi?
2 Pamayo kag Pamustura: Mahimo naton mapaambit sa iban ang aton pagtuo kon pirme naton hatagan sing nagakaigo nga igtalupangod ang aton pamayo kag pamustura. (1 Tim. 2:9, 10) Kon indi maugdang ang aton pamayo, mahimo mangalag-ag kita nga magpanaksi sa iban. Sa pihak nga bahin, bangod sang aton mahipid kag matinlo nga panagway, ang mga tawo mahimo mamangkot kon ngaa amo sini ang aton pagpamayo. Halimbawa, samtang nagabiyahe ang mag-asawa nga Saksi, natalupangdan sang ila katupad nga Muslim ang ila maugdang nga pamayo. Gani, ginpamangkot niya kon bala mga Cristiano sila. Nagresulta ini sa tatlo ka oras nga paghinun-anon sa Biblia.
3. Sa pagsunod sa halimbawa ni Jesus, paano mo mahimo masugdan ang isa ka paghambalanay?
3 Pagsugod sa Paghambalanay: Sang nasugilanon ni Jesus ang babayi nga taga-Samaria sa bubon ni Jacob, ginsugdan niya ang paghambalanay paagi sa pagpangabay sa babayi nga hatagan sia sing tubig. Sing kaanggid, mahimo man naton masugdan ang paghambalanay paagi sa isa ka malip-ot nga komento ukon simple nga pamangkot. Bisan pa kon kaisa nagapangalag-ag kita nga sugdan ang isa ka paghambalanay, mahimo kita ‘makatipon sing kaisog’ kon magsalig kita sa bulig ni Jehova.—1 Tes. 2:2.
4. Paano kita mangin handa sa pagpanaksi sing di-pormal?
4 Pagpangita sing mga Kahigayunan: Madamo nga manugbantala ang nakakita sing kahigayunan nga makapanaksi sing di-pormal. Usisaa ang imo kahimtangan, kag hunahunaa ang mga tawo nga imo masugilanon kada adlaw. Magdala sing nagakaigo nga mga literatura kag isa ka gamay nga Biblia. Mangin mapanilagon, kag mangin interesado sa mga tawo sa imo palibot. Kon abanse mo nga hunahunaon ang mga kahigayunan nga mahimo mo maatubang sa sina nga adlaw, mangin handa ka sa paghatag sing maayo nga panaksi.—Fil. 1:12-14; 1 Ped. 3:15.
5. Ngaa dapat gid kita manaksi sing di-pormal?
5 May duha kita ka maayo nga rason kon ngaa dapat naton hingalitan ang mga kahigayunan nga makapanaksi sing di-pormal—ang aton gugma sa Dios kag isigkatawo. (Mat. 22:37-39) Bangod hilingagawon ang aton pagbantala nga hilikuton, dapat gid kita manaksi sing di-pormal. Dapat naton hingalitan ang tagsa ka nagakaigo nga kahigayunan nga mapaambit ang maayong balita sang Ginharian sa iban samtang may tion pa.—Roma 10:13, 14; 2 Tim. 4:2.