Mangin Mapisan sa ‘Pagpanaksi sing Maid-id’
1, 2. Ano ang nakapadayaw sa imo tuhoy sa pagtamod ni Pablo sa pagbantala sing maayong balita, kag paano naton mailog ang iya halimbawa sa ‘pagpanaksi sing maid-id’?
1 Kaangay ni Jesus kag sang madamo pa nga matutom nga mga alagad sang una, si apostol Pablo isa ka makugi nga manugbantala sang maayong balita, ‘nagapanaksi sing maid-id’ walay sapayan sang kahimtangan. Bisan sang ginhunong sa iya balay, ‘ginabaton niya sing mainayuhon ang tanan nga nagakadto sa iya, nga nagabantala sang ginharian sang Dios sa ila kag nagatudlo sang mga butang tuhoy kay Ginuong Jesucristo nga may daku nga kahilwayan sa paghambal.’—Binu. 28:16-31.
2 Mahimo man kita mangin mapisan sa ‘pagpanaksi sing maid-id’ sa tanan nga tion. Nagalakip ini sa pagpanaksi sa mga tawo nga aton masumalang sa aton mga paglakbay pakadto sa mga asambleya kag mga kombension ukon kon nagalakbay sa pagbakasyon.—Binu. 28:23; Sal. 145:10-13.
3. Paano naton malikawan nga ang aton di-pormal nga pagpanaksi natabuan lamang?
3 Natabuan Ukon Di-pormal nga Pagpanaksi? May kinatuhayan bala? Huo. Ang isa ka butang nga natabuan nagakatabo lamang nga wala ginahungod, nga daw indi ini importante. Indi gid amo sini ang aton ministeryo. Subong sang kay Pablo, ang paghimaya sa Dios paagi sa aton pagpanaksi importante sa aton, kag dapat hungdon naton nga magpanaksi kon posible sa aton mga paglakbay sini nga tig-ilinit. Apang, ang paagi sa pagpalapit naton sa iban masiling gid nga di-pormal—bangod ini relaks, mainabyanon, kag natural. Ini nga pamaagi may maayo nga mga resulta.
4. Paano nakapanaksi si Pablo sa iya puluy-an?
4 Maghanda sa Pagpanaksi: Dapat maghimo sing mga kahigayunan si Pablo agod makapanaksi samtang ginahunong sa balay sa Roma. Gikan sa iya dalayunan, nagmatumato sia sa pag-agda sang lokal nga Judiyong mga lider sa iya puluy-an. (Binu. 28:17) Bisan pa may Cristianong kongregasyon sa Roma, nahibaluan ni Pablo nga diutay nga impormasyon ang nabaton sang Judiyong komunidad tuhoy sa Cristianong pagtuo. (Binu. 28:22; Roma 1:7) Wala sia mag-isol sa ‘pagpanaksi sing maid-id’ tuhoy kay Jesucristo kag sa Ginharian sang Dios.
5, 6. Ano nga mga kahigayunan nga sarang kita makapanaksi sing di-pormal, kag ano nga mga paghanda ang aton mahimo agod mangin epektibo ini?
5 Hunahunaa ang mga tawo nga imo mapakig-angutan sa imo mga paglakbay nga diutay lamang sing nahibaluan sa mga Saksi ni Jehova. Basi wala gani nila mahibaluan nga nagatanyag kita sing wala bayad nga pagtuon sa Biblia sa puluy-an. Mangin alisto sa mga kahigayunan nga makapanaksi sa sadtong mapakig-angutan naton samtang nagalakbay, sa ginapunduhan sang mga salakyan, nagapagasolina, nagapamalaklon, nagadayon sa otel, nagakaon sa mga restawran, nagasakay sa de-pasahero nga mga salakyan, kag iban pa. Planuha sing abanse ang imo isiling agod makasugod sang paghambalanay kag makapanaksi sing malip-ot. Ayhan sa masunod nga mga inadlaw sarang ka makahanas paagi sa pagpanaksi sing di-pormal sa imo mga kaingod, mga himata, mga kaupod sa trabaho, kag iban pa nga mga kilala mo.
6 Kinahanglan mo ang mga publikasyon agod magamit kon nagapanaksi sing di-pormal. Diin sini? Sarang mo magamit ang tract nga Luyag Mo Bala Madugangan ang Imo Nahibaluan sa Biblia? Ipadaku ang nahauna nga lima ka parapo, diin ginahatag ang nagkalainlain nga rason sa pagbasa sing Biblia. Ipakita ang kupon sa likod nga nagapangabay sang isa ka wala sing bayad nga pagtuon sa Biblia. Kon may masapwan ka nga interesado nga tawo, itanyag ang Ginapatuman nga brosyur. Basi kon may masumalang ka nga mga tawo nga tuhay ang lenguahe, magdala sang pulyeto nga Good News for All Nations. Ang pahina 2 nagapaathag kon paano gamiton ini sa pagpanaksi. Kon nagalakbay paagi sa salakyan, sarang mo madala ang pila ka sadsaran nga mga publikasyon para sa sadtong nagapakita sang matuod nga interes sa mensahe sang Ginharian.
7, 8. Ano nga paandam tuhoy sa aton personal nga panagway kag paggawi kon nagalakbay kag nagapaliwaliwa ang dapat naton pamatian?
7 Talupangda ang Imo Panagway kag Paggawi: Dapat pat-uron naton nga ang aton paggawi kag subong man ang aton pamayo kag pamustura indi makahatag sing sayop nga impresyon sa iban ukon mangin kabangdanan nga ‘pakalainon’ nila ang organisasyon ni Jehova. (Binu. 28:22) Naaplikar ini indi lamang kon nagatambong sa mga asambleya ukon mga kombension kundi samtang nagalakbay man kag nagapaliwaliwa. Ang Agosto 1, 2002, nga Ang Lalantawan, pahina 18, parapo 14, nagpaandam: “Ang aton panagway indi dapat mangin pakitakita, tuhay gid sa kinaandan, mahayluhon, nagapakita sang bahin sang kalawasan, ukon sobra ka uso. Isa pa, dapat kita magpanapot sa paagi nga nagapabanaag sing ‘pagtaha sa Dios.’ Indi bala mga butang ini nga dapat naton hunahunaon? Indi buot silingon nga magpanapot kita sing nagakaigo kon magtambong lamang sa mga miting sa kongregasyon [ukon mga asambleya] kag kon ano na lang sa iban nga tion. Ang aton personal nga panagway dapat pirme magpakita sing isa ka matinahaon, dungganon nga panimuot bangod mga Cristiano kita kag mga ministro sa sulod sang 24 ka oras kada adlaw.”—1 Tim. 2:9, 10.
8 Dapat kita magpamayo sing maugdang kag may dignidad. Kon ang aton panagway kag paggawi pirme nagapabanaag sang aton pagpati sa Dios, indi gid kita mahuya sa pagpanaksi sing di-pormal bangod ang aton personal nga panagway nagakaigo.—1 Ped. 3:15.
9. Ano ang kadalag-an ni Pablo sa pagpanaksi sa Roma?
9 Mabungahon ang Di-pormal nga Pagpanaksi: Sa sulod sang duha ka tuig nga paghunong kay Pablo sa puluy-an sa Roma, nakita niya ang maayo nga mga resulta sang iya mga panikasog sa pagpanaksi. Si Lucas nagreport nga ang “pila nagpati sa mga butang nga ginsiling.” (Binu. 28:24) Si Pablo mismo nagtakus sang pagkaepektibo sang iya ‘pagpanaksi sing maid-id’ sang sia nagsulat: “Ang nahanabo sa akon nangin sa kauswagan sang maayong balita indi sang kabaliskaran, sa bagay nga ang pagbilanggo sa akon nahibaluan sang tanan nga Guardia sang Praetorio kag sa tanan nga iban nga tungod ini sa Cristo; kag ang kalabanan sang mga kauturan sa Ginuo, nga nagabatyag sing pagsalig bangod sang akon mga gapos sang pagkabilanggo, nagapakita sing labi pa nga kaisog sa paghambal sang pulong sang Dios nga walay kahadlok.”—Filip. 1:12-14.
10. Ano nga kadalag-an sa pagpanaksi ang natigayon sang mag-asawa sang nagligad nga tig-ilinit?
10 Sang nagligad nga tingadlaw, pagkatapos makahinguyang sing isa ka adlaw sa distrito nga kombension, isa ka mag-asawa ang may mabungahon nga eksperiensia sa pagpanaksi sing di-pormal sa isa ka serbidora nga namangkot sa ila tuhoy sa ila mga badge card sang kombension. Ginsugiran nila sia tuhoy sa kombension kag tuhoy man sa paglaum nga ginatanyag sang Biblia para sa palaabuton sang katawhan. Ginhatagan nila sia sing tract nga Luyag Mo Bala Madugangan ang Imo Nahibaluan sa Biblia? kag ginpaathag ang kahimusan tuhoy sa isa ka wala bayad nga pagtuon sa Biblia sa puluy-an. Nagsiling ang babayi nga luyag niya nga may magduaw sa iya, ginsulat niya ang iya ngalan kag direksion sa likod sang tract, kag ginpangabay ang mag-asawa nga maghimo sing kahimusan. Ano nga kadalag-an ang sarang mo matigayon bangod sang imo kapisan sa ‘pagpanaksi sing maid-id’ sa tagsa ka kahigayunan?
11. Ano nga kinaiya ang dapat naton pauswagon agod mapauswag naton ang maayong balita paagi sa ‘pagpanaksi sing maid-id’?
11 Pauswaga Sing Maid-id ang Maayong Balita: Hunahunaa kon daw ano ka malipayon si Pablo sang mabatian niya nga ang mga masigka-Cristiano nag-ilog sang iya makugi nga halimbawa! Kabay nga himuon naton ang aton tanan nga masarangan sa pagpauswag sang maayong balita paagi sa paggamit sa tagsa ka nagakaigo nga kahigayunan sa pagpanaksi sing di-pormal tuhoy sa aton mga pagpati pasad sa Biblia.
[Kahon sa pahina 3]
Mga Publikasyon nga Kinahanglanon sa Di-pormal nga Pagpanaksi
■ Luyag Mo Bala Madugangan ang Imo Nahibaluan sa Biblia? (tract)
■ Ano ang Ginapatuman Sang Dios sa Aton? (brosyur)
■ Good News for All Nations (pulyeto)
■ Iban pa nga sadsaran nga mga publikasyon