Maghambal Tuhoy sa Himaya sang Pagkahari sang Dios
“Magapamulong sila sang himaya sang imo pagkahari, kag magahambal sang imo gahom.”—SALMO 145:11.
1. Una, ngaa ginhatagan kita ni Jehova sing ikasarang sa panghambal?
MAY katuyuan si Jehova sang ginhatagan niya kita sing ikasarang sa paghambal. (Exodo 4:11) Una, ang aton mga bibig ‘magamitlang sing pagdayaw’ sa iya. (Salmo 119:171, 172) Subong sang ginsiling ni salmista David: “Ang tanan mong binuhatan magapasalamat sa imo, O Jehova, kag ang imo mga balaan magapakamaayo sa imo. Magapamulong sila sang himaya sang imo pagkahari, kag magahambal sang imo gahom, sa pagpakilala sa mga anak sang mga tawo sang iya gamhanan nga mga buhat kag sang himaya sang pagkahalangdon sang iya pagkahari. Ang imo pagkahari dayon nga pagkahari, kag ang imo ginsakpan nagapadayon sa tanan nga kaliwatan.”—Salmo 145:10-13.
2. Sa anong mga paagi ginatiklod kita sa ‘pagmitlang sing pagdayaw’?
2 Ang hinaplas nga mga sumulunod ni Jesucristo kag ang ila mga kaupdanan nga “dakung kadam-an” nalangkag sa pagdayaw kay Jehova, ang “Hari sang katuigan.” (Bugna 7:9; 15:3) Paagi sa makugi nga pagtuon sang Biblia upod sang Ang Lalantawan kag iban pa Cristianong mga publikasyon subong bulig, matigayon naton ang sibu nga ihibalo nahanungod sa Dios nga kaangay sang sapa sang matin-aw, nagarepresko, nagahatag sing kabuhi nga tubig. Busa, sa bahin naton ‘ang tuburan sang kaalam subong sang sapa nga nagailig.’ (Hulubaton 18:4) Ginatiklod kita sa ‘pagmitlang sing pagdayaw’ sa pamalaybalay nga pagpanaksi kag iban pa nga dagway sang pag-alagad sa latagon. Apang may Makasulatanhon man nga rason para sa dipormal nga pagpanaksi.
Makasulatanhon nga mga Sulundan
3. Palihog maghatag sing halimbawa sang dipormal nga pagpanaksi ni Jesucristo.
3 Ang nahaunang pagbantala nga ginhimo ni Jesus sa tapos mahaplas sang balaan nga espiritu amo ang sa iya duog dalayunan, diin gin-agda niya si Juan, si Andres, kag ayhan si Pedro. Naghinguyang sila sing isa ka adlaw didto, ayhan nagpanaksi sing maayo sa sinang dipormal nga danyag. (Juan 1:35-42) Sa idalom man sang dipormal nga mga sirkunstansia—“sang naglabay didto”—nga nakita ni Jesus si Mateo sa buluhisan kag nakabaton sing positibo nga mga resulta sang magsiling sia: “Sunod ka sa akon.”—Mateo 9:9.
4. Ano ang ginsiling ni Jesus sang nagpanaksi sa Samaritano nga babayi, kag sa ano ini nagdul-ong?
4 Si Jesus amo ang labing maayo nga halimbawa sang ‘tuburan sang kaalam.’ Bisan pa nga nagutom sia kag nakapoy sa tuburan ni Jacob malapit sa Sicar, nagpanaksi sia sa isa ka Samaritano nga babayi nga nagkadto sa pagsag-ub sing tubig. “Ang bisan sin-o nga nagainum sang tubig nga akon ihatag sa iya indi na gid pag-uhawon,” siling ni Jesus, “ang tubig nga akon ihatag sa iya mangin tuburan sa sulod niya nga nagaibwal sa kabuhi nga walay katapusan.” Ining dipormal nga pagpanaksi nagdul-ong sa pagbantala ni Jesus sa isa ka grupo nga ginpahulag sang babayi nga magtipon kag magpamati sa kon ano ang isiling niya.—Juan 4:6-42.
5. Ano nga mga halimbawa sang dipormal nga pagpanaksi ang ginhatag ni Felipe nga ebanghelisador kag ni apostol Pablo?
5 Gintawag ni Felipe nga ebanghelisador ang nagalabay nga kangga kag nagpanaksi sing dipormal sa nagasakay sa sini, nga nagabasa sang tagna ni Isaias. Gin-agda sa pagsakay sa kangga, ginpaathag ni Felipe “ang maayong balita nahanungod kay Jesus” sa sinang Etiopiahanon nga eunuco nga ang mainapresyahon nga sabat nagresulta sa pagbawtismo sa iya. (Binuhatan 8:26-38) Sang ang gapus ni apostol Pablo nahubad sa isa ka daku nga linog sa Filipos, nagpanaksi sia sing dipormal sa manugbantay sang bilanggoan. Ang resulta? “Nagpabawtismo sia sa gilayon upod ang iya bug-os nga panimalay.”—Binuhatan 16:19-34.
6. Ang dipormal nga pagpanaksi mahimo nga may bahin sa anong hilikuton sa mga disipulo ni Jesus sa tapos ginbato si Esteban?
6 Karon, ang dipormal nga pagpanaksi amo ang isa ka paagi sa pagbantala sang maayong balita diin ang aton Cristianong buluhaton ginadumilian. Bisan pa ginahingabot kita, walay sapayan, ang aton mga tagipusuon nagatiklod sa aton sa paghambal nahanungod sa himaya sang pagkahari sang Dios. Sang si Esteban ginbato tubtob kamatayon, ang kalabanan sang ginhingabot nga mga disipulo naglinapta. Apang, nagpadayon sila sa pagbantala sang maayong balita, kag sa walay duhaduha ang dipormal nga pagpanaksi ginlakip sa ila mga panikasog sa pagbantala sang Ginharian.—Binuhatan 8:4-8; 11:19-21.
7. Sang nabilanggo, ano ang ginhimo ni Pablo, nga nagapautwas ini sing anong pamangkot?
7 Ang dipormal nga pagpanaksi amo ang isa ka paagi sa paghambal nahanungod sa himaya sang pagkahari sang Dios kon kita nabilanggo ukon indi makahalin sa aton mga puluy-an bangod sang balatian ukon sablag. Si Pablo nabilanggo sa sulod sang duha ka bulan sa idalom sang Romanong bantay. Apang sa baylo nga magluya, gintawag niya ang isa ka tumalambong kag “nagbaton sang tanan nga nagduaw sa iya nga nagawali sang ginharian sang Dios kag nagapanudlo nahanungod kay Ginuong Jesucristo sa bug-os nga kasidla kag walay nagaupang sa iya.” (Binuhatan 28:16-31) Daw ano katahom nga halimbawa! Kon nagapuyo ka sing kinaugalingon nga saksi ni Jehova, mahimo man bala nimo ina?
8. Daw ano ka epektibo ang dipormal nga pagpanaksi ni Pablo?
8 Samtang ang mga bantay kay Pablo nagabinuslanay, lainlain ang nakabati sa iya nga nagahambal sa iban nahanungod sa pagkahari sang Dios. Apang, makapat-od kita nga nagpanaksi man sia sing direkta sa mga bantay. Tuman gid ka epektibo ining dipormal nga pagpanaksi sa bagay nga si Pablo nakasulat: “Ang nahanabo sa akon hinonoo nanginsa kauswagan sang maayong balita sa bagay nga ang pagbilanggo sa akon nahibaluan sa Praetorianhon nga Guardia kag sa tanan nga iban nga tungod ini kay Cristo; kag ang kalabanan sang mga kauturan ginapaisug sa Ginuo bangod sa pagbilanggo sa akon, kag nagamasidla sing labi pa sa paghambal sang pulong sang Dios sa walay kahadlok.” (Filipos 1:12-14) Kaangay ni Pablo, kon kita mabilanggo kag dingotan sang mga kahigayunan para sa pormal nga pagpanaksi, makahambal gihapon kita nahanungod sa pagkahari sang Dios. Kag daw ano nga kaisug ang ipatudok sini sa aton mga kauturan!
9, 10. Ano ang sekular nga pamatuod nga ang dumaan nga mga Cristiano nagpanaksi sing dipormal?
9 Ang dipormal nga pagpanaksi tuman gid ka kinaandan sa tunga sang dumaan nga mga Cristiano nga bisan sang ulihi nga tinuig masiling ini: “Gikan sa Cristiano nga manunulat, ayhan sa Cartago sang mga 200, nakuha naton ang laragway . . . [nga] nahanungod sa mga tawo nga may mataas sing edukasyon. Tatlo ka lamharon nga mga abogado, mga mahirup nga mag-abyan, ang naghinguyang sing isa ka adlaw nga piesta opisyal sa tupad sang baybay. Ang duha mga Cristiano, ang ikatlo pagano. Nagkadto sang ulihi ang ila paghambalanay sa relihion . . . Ang kasaysayan sang malawig nga pagbaisay natapos, ‘Nagpauli kami nga malipayon, kami nga tatlo. Ang isa malipayon bangod nagdangat sia sa Cristianong pagtuo, ang iban bangod gintuytuyan nila sia sa sini.’ Ang sinulatan wala nagapakunokuno nga matuodtuod nga maragtas; isa ini ka Apology (Pagpangayo sing Pasensya) ni Minucius Felix. Apang nagarepresentar ini sa kon ano ang nagakatabo sa mas may pribilehiyo nga mga tawo. (Church History 1—The First Advance: AD 29—500, ni John Foster, pahina 46, 48) Huo, kag ini nga kasaysayan nagapakita nga ang dipormal nga pagpanaksi wala madula sa tunga sang nagapangangkon nga mga Cristiano sadto nga panahon.
10 Nahanungod sa dumaan nga mga Cristiano, ginsiling man ini: “May pirme nagadugang nga kadamuon sang indibiduwal nga Cristianong mga tumuluo, nga, bisan diin sila magkadto, kon bala sa ila regular nga negosyo ukon gintabog bangod sang paghingabot, nagabantala kay Cristo . . . Tuhoy sa mga nagabuhat sang ila palamugnan, sang ila propesyon, sang ila matag-adlaw nga hilikuton, bisan ano man nga sahi, ang paagi sang pagpasangkad sang ila pagtuo, madamo.” (The Missionary Enterprise, ni Edwin Munsell Bliss, pahina 14) Huo, ang dumaan nga mga manugbantala sang Ginharian nagpanaksi sing pormal kag dipormal.
Paghunahuna Anay kag Paghanda
11. Ano ang maton-an naton gikan kay Jesus nahanungod sa pagsentro sang igtalupangod sa kamatuoran sang Dios?
11 Kaangay ni Jesus kag sang iya dumaan nga mga dumuluong, dapat kita magpanaksi sing pormal kag dipormal. Ang epektibo nga paghimo sini nagakinahanglan sing paghunahuna anay kag paghanda. Agod makapanaksi sing dipormal ukon makahatag sing instruksion, si Jesus nagpatuhoy sa kabataan, pagkaon, panapton, pispis, bulak, paniempo, kag palamugnan. (Mateo 4:18, 19; 6:25-34; 11:16-19; 13:3-8; 16:1-4) Magamit man naton ang halos bisan ano nga topiko subong sadsaran para sa pagsentro sang igtalupangod sa kamatuoran sang Dios.
12. Kon nagaplano sa paglakbay, paano ang isa makahanda sing dipormal nga pagpanaksi?
12 Makapanaksi kita sing dipormal sa mga tawo nga nagapungko sa mga parke, nagatindog sa mga linya sang mga shopping center, kag iban pa. Sa Atenas, si Pablo nagpakigbais “sa mga masugata niya sa balaligyaan sa adlaw-adlaw.” (Binuhatan 17:17) Apang dapat naton handaan ang dipormal nga pagpanaksi. Halimbawa, nagaplano bala ikaw sa pagbiyahe paagi sa eroplano, tren, ukon bus? Nian magdala sing Biblia kag mga tract, mga magasin, ukon brosyur. Ang pagbasa sing Cristianong mga publikasyon sa publiko nga transportasyon ukon bisan diin masunson nga nagapukaw sing paghambalanay.
13. Iilustrar kon paano ikaw makasugod sa pagpanaksi sa isa ka tigulang nga tawo samtang nagalakbay.
13 Ang mainabyanon nga introduksion amo ang una. Ang libro nga Reasoning From the Scriptures nagahatag sing mga introduksion para gamiton sa pag-alagad sa latagon, apang ang iban sini mahimo mapasimple para magamit sa pagpanaksi sing dipormal. Halimbawa, kon sa paglakbay naglingkod ka sa tupad sang isa ka tigulang nga tawo, ayhan makasiling ka: “Ang akon ngalan amo si——. Madugay ko na ginahunahuna ang katuyuan sang kabuhi. Madamong tawo ang tuman kasaku sa pagpangabuhi amo kon ngaa halos wala na sila sing tion sa paghunahuna nahanungod sa katuyuan sang kabuhi. Apang, samtang nagatigulang, narealisar naton nga ang kabuhi daw malip-ot kag mahimo magapamangkot: ‘Amo lamang bala sini ang kabuhi?’ Sa banta mo ang Dios bala may katuyuan para sa aton pagluntad?” Pasabta sia. Nian ayhan masambit mo ang nahanungod sa katuyuan sang Dios para sa katawhan kag makumentuhan ang matahom nga mga butang nga ginsaad sa Bugna 21:3, 4. Para sa epektibo nga dipormal nga pagpanaksi, maaplikar man nimo ang iban pa matahom nga mga punto nga naton-an sa mga miting sa kongregasyon kag sa Cristianong mga publikasyon.
Sarang Matigayon ang Maayong mga Resulta
14. Ano ang kadalag-an sang isa ka utod sa pagpanaksi sing dipormal samtang nagalakbay?
14 Kaangay ni Jesus kag sang iya dumaan nga mga sumulunod, magamadinalag-on kita kon nagapanaksi sing dipormal. Sa pag-ilustrar: Samtang nagalakbay sa eroplano, ginsugilanon sang isa ka Saksi ang opisyal sang militar nga minyo sa sulod sang 20 ka tuig. Ang asawa sina nga tawo nagadruga, madamong beses na nga nagtinguha sa paghikog, kag magabiya sa iya tungod sa mas batabata nga lalaki. Sang ginhambal sang Saksi ang Makasulatanhon nga bulig nga ginabaton niya sa Ang Lalantawan kag sa kaupod sini nga balasahon nga Magmata!, ang opisyal nagsuskribe kag luyag niya nga ang mga magasin ipadala sa iya asawa. Nabatian sang iban nga mga pasahero ang ginsiling sang Saksi. Ang resulta? Ti, bangod sang pagpanaksi sa sadto lang nga okasyon, nakatigayon sia sing 22 ka suskripsion kag nakapahamtang sing 45 ka magasin kag 21 ka libro!
15, 16. (a) Maghatag sing mga halimbawa sang madinalag-on nga dipormal nga pagpanaksi sa mga kaupod sa trabaho. (b) Ano ang ginapanugda sa imo sining mga resulta?
15 Kamusta ang pagpanaksi sing dipormal sa mga kaupod sa trabaho? Ang isa ka utod nga lalaki nagbilin sing mga kopya sang aton balasahon sa hulot hulugasan (kasilyas) sa lugar sang palamugnan. Ginbasa sang isa ka kaupod sa trabaho ang mga magasin, ginsugilanon ang utod, kag nagsuskribe sa sini. Ginbaton man niya ang isa ka pagtuon sa Biblia kag ginbayaan ang iya malain nga pagkabuhi, apang ang iya asawa nagahalin sa balay sa kada tion nga ginasambit ang ngalan sang Dios. Sang luyag niya maghalin sa lokal nga iglesia, ang ministro nagkari agod hambalan ini, kag naabtan niya ang asawa lamang sang lalaki. Nakibot ang asawa sa pagkawala sing pagtuo sang ministro kag sa iya mga pagbinutig nahanungod sa mga Saksi ni Jehova, kay nakita niya nga ang iya bana nagbag-o sing daku. Ginsilingan niya ang ministro: “Sarang ka makasulat sing isa ka sertipiko nahanungod sa paghalin man nakon kag sang mga kabataan!” Sang ulihi, ini nga lalaki kag ang iya asawa nangin bawtismado nga mga Saksi.
16 Sang nagligad nga mga tinuig, ang isa ka utod nga nagaistar na karon sa Estados Unidos nagpanaksi sing dipormal sa isa ka kaupod sa trabaho sa Inglaterra kag gindala ang pamatan-on sa isa ka sine nga ginhimus sang mga Saksi ni Jehova. Katloan kag isa ka tuig sang ulihi, ang utod nakabaton sini nga sulat: “Luyag ko ikaw sugiran karon nga ang pagpanaksi nga ginhatag mo [sa pamatan-on] may resulta, kay mga duha ka tuig sang ulihi isa pa ka utod nga lalaki ang nakigsugilanon sa iya, nakapahamtang sing mga magasin, kag nagdala sa iya sa lokal nga Kingdom Hall . . . Nangin isa sia ka Saksi, ginbawtismuhan sang 1959, kag karon isa ka gulang sa iya kongregasyon . . . Pagligad sang mga 14 ka tuig ang iya asawa nangin isa ka Saksi kag ginbawtismuhan man. Duha ka tuig sang ulihi ang iya anak nga babayi ginbawtismuhan kag isa na karon ka regular payunir sa North Derbyshire . . . Halin sa sinang diutay nga pagpanaksi nga ginhimo mo sadto anay sa Ashford, yadto nga tawo, ang iya asawa kag anak nga babayi, pakaisa kag ang iya anak nga babayi, bana kag lima ka bata, kag ang isa ka bata sang isa pa ka utod sang iya pakaisa nangin mga Saksi tanan . . . Luyag ko ikaw pasalamatan, Ted, sing daku gid katama, kay ako yadto ang manugpatindog sing kable kag ang sugilanon nga bag-o ko lang ginsugilanon akon kaugalingon nga sugilanon tuhoy sa imo pagpanaksi sa akon kag sa kon ano ang resulta sini.”
17. Ano ang mga kahigayunan para sa dipormal nga pagpanaksi sang pamatan-on nga mga alagad ni Jehova?
17 Kamong mga pamatan-on nga alagad ni Jehova may matahom man nga teritoryo nga mapanaksihan—ang inyo mga kabutho kag mga manunudlo. Nagahatag ka bala sing dipormal nga pagpanaksi sa mga essays, oral nga mga repaso, kag iban pa? Subong tuburan nga materyal para sa isa ka essay, isa ka taga-Ecuador nga hayskul nga estudyante nga ginahiwatan sing pagtuon sa Biblia ang naggamit sang mga serye sang panghapin nga “Hiroshima—Has Its Lesson Been Lost?” sang Agosto 22, 1985 nga Awake! Ang iya komposisyon ginhatagan sing komendasyon sang mga hukom sa isa ka internasyonal nga paindis-indis kag nagresulta sa isa ka walay bayad nga paglakbay pakadto sa Japan. Siempre pa, ang pagdaug sa mga paindis-indis indi amo ang katuyuan sang Cristianong mga publikasyon. Apang nagailustrar ini sang balor sang subong sina nga literatura kag sang pagkaepektibo sang paghatag sing panaksi sa kadayawan sang Dios sa eskwelahan.
18. Ano ang nagresulta gikan sa paghatag sing malip-ot nga pagpanaksi sa isa nga nagapangita sing kuarto nga maarkilahan?
18 Bangod sang pinansial nga rason, ginpaarkilahan sang isa ka utod nga babayi ang iya isa ka kuarto. Sang makabaton sing tawag sa telepono nga nagapamangkot nahanungod sa sini, ginsilingan niya ang babayi nga nagtawag nga isa sia ka Saksi ni Jehova kag indi niya mapahanugutan ang pagkasalamwanan sa iya balay. Ang mga bisita dapat maglakat sing temprano pa, kag ang lalaki nga mga bisita dapat makita sa tanan nga tion. Ang nagtawag nag-alang-alang, nian nagsiling: “Nagtuon ako sang tin-edyer pa ako, apang wala ko ini maluyagi. Gani nag-eskwela ako sa kolehiyo.” Sang ginpamangkot kon luyag niya padayunon ang iya pagtuon sang Biblia, nagsabat sia sing, “Huo.” Sang ulihi, ang nagtawag, ang iya iloy, kag ang iya utod nga babayi nangin bawtismado nga mga alagad ni Jehova—ang tanan bangod sang dipormal nga pagpanaksi sang utod nga babayi.
19. Ano ang resulta sang dipormal nga pagpanaksi sa isa ka babayi sa Bahamas?
19 Sa Bahamas gintublag sang iya konsiensia ang isa ka Katoliko nga babayi bangod wala sia makakadto sa simbahan sa sulod sang lima ka tuig. Sang isa ka maulanon nga Domingo sang aga, naglakat sia sa dalan pakadto sa simbahan. Nag-abot sang ulihi ang tatlo ka Saksi, nga nag-angkas sa iya sa awto—kag nagpanaksi. Sang makalab-ot sila sa simbahan, luyag niya mamati sing dugang pa kag nag-upod sa ila samtang nagalakbay sila agod sugaton ang isa ka ginaton-an sa Biblia. Naglabay sila liwat sa simbahan, apang luyag pa gid niya mamati sing dugang kag gani nag-upod sa Kingdom Hall. Ang miting publiko sadto amo ang nahanungod mismo sa topiko nga ginhambalan sa awto. Isa ka pagtuon sa Biblia ang ginsugdan upod sa babayi, nga nagbiya sa lalaki nga ginapuyopuyo niya (ang amay sang iya apat ka kabataan), kag ginbawtismuhan sia sa isa ka kombension sa Nassau sang 1986. Daw ano kadaku ang kalipay niya nga may isa nga nagpanaksi sa iya sing dipormal!
Padayon nga Maghambal Nahanungod sa Pagkahari sang Dios!
20. (a) Paano dapat tamdon ang dipormal nga pagpanaksi may kahilabtanan sa pag-alagad sa latagon? (b) Ano ang ginapanugda kon ang isa nagapangalag-ag sa pagpanaksi sing dipormal?
20 Ang dipormal nga pagpanaksi indi amo ang tal-us para sa regular nga pag-alagad sa latagon sang mga Saksi ni Jehova. Ang pagbantala sa balay kag balay maathag nga Makasulatanhon kag epektibo. (Binuhatan 5:42; 20:20, 21) Apang, ang dipormal nga pagpanaksi mabungahon, kag ang mga alagad ni Jehova dapat makigbahin sa sini. Bisan diin man nga may mga tawo—mga himata, mga kabutho, mga kaupod sa trabaho, iban pa—may kahigayunan nga maghambal nahanungod sa himaya sang pagkahari sang Dios. Gani indi pagtuguti ang kahadlok ukon pamahog nga mag-upang sa imo. (Hulubaton 29:25; 2 Timoteo 1:6-8) Kon nagaalang-alang ikaw sa pagpanaksi sing dipormal, ngaa indi magpangamuyo kaangay sang ginhimo sang ginhingabot anay nga mga disipulo ni Jesus? Nakitluoy sila: “Jehova, . . . itugut sa imo mga ulipon ang pagpamulong sang imo pulong sa bug-os nga kasidla.” Ginsabat bala ang ila pangamuyo? Huo, kay “nag-uyog ang duog diin sila nagtipon sing tingob; kag napuno sila tanan sang balaan nga espiritu kag nagpamulong sila nga may kasidla sang pulong sang Dios.”—Binuhatan 4:23-31.
21. Ano ang magapahulag sa isa sa paghatag sing panaksi sa idalom sang tanan nga mga sirkunstansia?
21 Busa, nian, palambuon naton ang positibo nga panimuot nahanungod sa dipormal nga pagpanaksi. Tuguti ang gugma sa Dios nga magpahulag sa imo nga magpanaksi sa idalom sang tanan nga sahi sang kahimtangan. Mangin mapagsik, nga nagahambal sing kamatuoran sa tanan nga kahigayunan. Sa pagkamatuod, padayon nga maghambal nahanungod sa himaya sang pagkahari sang Dios.
Ano ang Imo mga Sabat?
◻ Ano ang Makasulatanhon nga sadsaran sang dipormal nga pagpanaksi?
◻ Ano ang pila ka paagi sa paghanda para sa dipormal nga pagpanaksi?
◻ Kon nagapanaksi kita sing dipormal, ano nga mga resulta ang paabuton naton?
◻ Paano naton dapat tamdon ang dipormal nga pagpanaksi may kahilabtanan sa regular nga pag-alagad sa latagon?
[Laragway sa pahina 23]
Kon ikaw isa ka bilanggo, nagapanaksi ka bala subong sang ginhimo ni Pablo samtang nabilanggo?
[Laragway sa pahina 25]
Ang abanse nga paghanda nagahimo sa aton nga magpanaksi sing dipormal sa epektibo nga paagi