Ang Pagbantala Nagapakilala sa Aton nga Tuhay

¹ Madamo nga tawo ang nagapamangkot, “Ano ang nagahimo sa mga Saksi ni Jehova nga tuhay sa iban nga mga relihion?” Paano ka magasabat? Mahimo mo mapaathag ang pila sang aton napasad-sa-Biblia nga pagtuluuhan. Apang nahunahuna mo man bala ang tuhoy sa pagpakita kon paano ang aton dayag nga pagpanaksi nagapakilala gid sa aton nga tuhay sa iban nga mga relihion?​—⁠Mateo 24:​14; 28:​19, 20.

² Sa karon, pila lamang ka relihioso nga mga tawo ang ginapahulag nga ipaambit ang ila pagtuluuhan sa iban. Mahimo sila maghunahuna nga nagakaigo na ang pagtuman sa mga kasuguan ni Cesar, ang pagkabuhi sing desente sa moral, ukon ang paghimo sing mainayuhon nga mga buhat sa iban. Apang, wala sila nagabatyag nga obligado sa pagbulig sa iban nga mahibaluan ang ginasiling sang Biblia tuhoy sa pagtigayon sing kaluwasan. Paano kita tuhay?

³ Ang aton makugi nga ministeryo tuhay gid sa ginahimo sang iban nga mga relihion. Sa kapin na sa 100 ka tuig, ang modernong-adlaw nga mga Saksi makugi nga nagabantala sing maayong balita tubtob sa kaukbungan sang duta, bilang pag-ilog sa unang mga Cristiano. Ang aton katuyuan sa paghimo sini amo ang pagbulig sa madamo gid nga tawo nga mapahisanto ang ila pagkabuhi sa kabubut-on sang Dios.​—⁠1 Tim. 2:​4; 2 Ped. 3:⁠9.

⁴ Ano ang Imo Reputasyon? Kilala ka bala subong isa ka makugi nga manugbantala sang Pulong sang Dios? (Binu. 17:​2, 3; 18:25) Bangod sang imo pagbantala nga hilikuton, makita bala dayon sang imo mga kaingod ang kinatuhayan sang ila relihion kag sang imo? Kilala ka bala subong isa nga nalangkag gid sa pagpaambit sang iya paglaum sa iban? Ikaw bala may regular nga rutina sa pagpakigbahin sa ministeryo? Dumduma nga ginapakilala naton ang aton kaugalingon indi lamang paagi sa aton ngalan kundi paagi man sa aton paghimo sang kon ano ang ginalaragway sina nga ngalan​—⁠ang pagpanaksi tuhoy kay Jehova.​—⁠Isa. 43:⁠10.

⁵ Ang gugma sa Dios kag sa isigkatawo nagapahulag sa aton sa pagpakigbahin sa pagbantala nga hilikuton. (Mat. 22:​37-39) Amo ina kon ngaa, kaangay ni Jesus kag sang mga apostoles, luyag naton himuslan ang tanan nga kahigayunan nga mapaambit ang mensahe sang Ginharian sa iban. Kabay nga padayon naton nga ibantala ang maayong balita sing makugi sa mga handa sa pagpamati. Ang paghimo sini magabulig sa mga bunayag-sing-tagipusuon nga ‘makita ang kinatuhayan sa ulot . . . sang isa nga nagaalagad sa Dios kag sang isa nga wala nagaalagad sa iya.’​—⁠Mal. 3:⁠18.