Sin-o ang Mahimo nga Magabaton sing Pagtuon sa Biblia?
1 Si manalagna Amos nagsiling nga magaabot ang tiggulutom sa duta sang Israel, “isa ka tiggulutom, indi sa tinapay, kag sing kauhaw, indi sa tubig, kundi sa pagpamati sa mga pulong ni Jehova.” (Amos 8:11) Para sa kaayuhan sang mga ginagutom kag ginauhaw sa espirituwal, ang organisasyon ni Jehova nagapanagtag sing madamo nga literatura sa Biblia sa bug-os nga kalibutan.
2 Sa karon, nakaimprinta na kita sing 70 milyones ka Ihibalo nga libro kag 91 milyones ka Ginapatuman nga brosyur. Sa pagtudlo sing kamatuoran, ginaapresyar naton ang pagkasimple kag pagkaepektibo sining mga publikasyon. Apang, madamo sang mga tawo nga literal nga nakabaton sang aton literatura ang wala pa makatuon sing Biblia upod sa aton. Ano ang mahimo naton tuhoy sini?
3 Ang Tagsa nga Napahamtang Mahimo Mangin Pagtuon! Binagbinaga ang eksperiensia sang isa ka manugbantala nga nagtanyag sing pagtuon sa isa ka babayi sa una nga pagpakigsugilanon niya sa iya sa ganhaan. Ginbaton niya ini sa gilayon. Sang ulihi ang babayi nagsiling sa iya, “Ikaw pa lang ang una nga tawo nga nagtanyag sing pagtuon sa Biblia sa akon.” Sa inyo teritoryo, pila ayhan ka tawo nga nagapanag-iya na sang aton literatura ang mahimo man nga magsiling sing amo sini? Ang tagsa nga napahamtang nagahatag sing kahigayunan para sa mga pagduaw liwat kag sa isa ka pagtuon sa Biblia sa puluy-an.
4 Sanglit masunson kita makasumalang sing mga tawo nga may mga publikasyon na naton, paano naton mapukaw ang ila interes nga tun-an ang kaundan sang aton literatura? Direkta nga ginpamangkot sang isa ka Saksi ang tagbalay kon may mga pamangkot sia sa Biblia, apang sia nagsabat, “Wala.” Ang utod nga babayi nagpamilit, “Pat-od gid nga may mga pamangkot ka.” Ang babayi may mga pamangkot, kag isa ka pagtuon ang nasugdan. Ngaa indi pamangkuton ang tagbalay kon luyag niya mahibaluan ang pagtamod sang Biblia sa isa ka pamangkot ukon sa isa ka butang nga ginakabalak-an niya? Mangin handa sa pagpautwas sing makawiwili nga pamangkot kon wala sia sing mahunahuna. Ini nga mga paghambalanay mahimo nga magbukas sang dalan para sa regular nga pagtuon sa sadsaran nga mga kamatuoran sang Biblia.
5 Ang hilikuton nga pagtuon sa Biblia amo ang sentro sang aton ministeryo. Sanglit wala gid kita makahibalo kon sin-o ang mahimo nga magabaton sing pagtuon, indi magpangalag-ag sa pagtanyag sing isa kay bisan sin-o nga masugilanon mo. Ipangamuyo ini kay Jehova, kag magpanghikot suno sa imo mga pangamuyo. Masalapuan mo sa dili madugay ang isa nga magabaton sang pagtuon nga imo ginatanyag!—1 Juan 5:14, 15.