Makabulig Ka Bala?

¹ Pirme ginabuligan ni Jehova ang iya matutom nga mga alagad. (2 Cron. 16:⁠9; Isa. 41:​10, 13) Nagapaanggid sa iya sa isa ka matinatapon nga manugbantay, si Isaias nagsulat: “Paagi sa iya butkon tipunon niya ang mga kordero; kag dalhon niya sila sa iya dughan. Tuytuyan niya sing mahalungon ang mga nagapasuso.” (Isa. 40:11) Binagbinaga ang pila ka paagi nga sarang naton mailog ang mahigugmaon nga kabalaka ni Jehova.

² Buligi ang mga Bag-uhan: Sarang kita makabulig paagi sa pag-agda sa mga bag-uhan nga makig-upod sa aton. (Hulu. 13:20) Nagahinumdom kon paano sia ginbuligan sang iban sang nagsugod sia sa pagpakig-angot sa kongregasyon, ang isa ka utod nga lalaki nagsiling: “Pila ka beses nga gin-upod ako sang isa ka pamilya sa ila pagtuon subong pamilya. Samtang nagauswag ako, pirme ako ginaagda sang isa ka mag-asawa nga payunir nga updan sila sa bug-os nga adlaw sa ministeryo. Pirme gid maayo ang amon paghambalanay sa espirituwal.” Sia nagdugang: “Sang indi pa ako Cristiano, pirme ako nagalingawlingaw kon gab-i sang Biernes kag Sabado. Apang nauntat ini sang nakig-upod na ako sa mga kauturan.” Nagtudok kag nagbakod ang pagtuo sining utod bangod sang mahigugmaon nga interes sang kongregasyon, kag katapo na sia karon sang pamilya Bethel.​​—⁠Col. 2:​6, 7.

³ Magpalig-unanay: Basi makakita kita sing kahigayunan nga makabulig sa aton mga kauturan nga may mabudlay nga mga kahimtangan. Makapanaksi ka bala paagi sa telepono kaupod ang may sablag nga manugbantala ukon maagda sia nga updan ikaw sa ginatun-an mo sang Biblia, ukon ayhan iupod ang imo ginatun-an sa iya puluy-an? Nagakinahanglan bala sing bulig ang isa ka ginikanan nga may magamay nga kabataan kon nagabantala? May mga mahuluy-on bala nga malipay kon buligan mo sila sa mga pagduaw liwat ukon kon nagapakigbahin sa iban nga paagi sang pagministeryo? Ang mahigugmaon nga interes sa aton mga kauturan amo ang magapahulag sa aton nga mangita sing mga paagi agod palig-unon sila.​​—⁠Roma 14:19.

⁴ Samtang ginailog naton ang mapinalanggaon nga kabalaka ni Jehova sa iya mga alagad, ginapabakod naton ang kada isa, ginabuligan nga mangin suod ang kongregasyon, kag ginahimaya ang aton langitnon nga Amay.​​—⁠Efe. 4:⁠16.