Pagdumala sing Epektibo nga mga Pagtuon sa Biblia
1. Ano ang papel sang mga manugbantala nga nagadumala sing pagtuon sa Biblia?
1 Wala sing tawo nga makaalagad kay Jehova kon indi niya ini “pagbuyukon.” (Juan 6:44) Pero dapat tungdan sang mga manugbantala nga nagadumala sing pagtuon sa Biblia ang ila papel nga buligan ang mga tawo nga mangin suod sa ila Amay sa langit. (Sant. 4:8) Nagakinahanglan ini sang paghanda. Indi bastante nga basahon lamang ang kada parapo kag sabton ang naimprinta nga pamangkot para mahangpan sang mga estudyante ang mensahe kag mag-uswag.
2. Ano ang resulta kon epektibo ang pagdumala sing pagtuon sa Biblia?
2 Agod makadumala sing epektibo nga mga pagtuon, dapat buligan sang mga manugbantala ang ila mga estudyante nga (1) mahangpan kon ano ang ginatudlo sang Biblia, (2) batunon kon ano ang ginatudlo sang Biblia, kag (3) iaplikar kon ano ang ginatudlo sang Biblia. (Juan 3:16; 17:3; Sant. 2:26) Nagakinahanglan sing pila ka bulan para giyahan sila nga mahimo ini. Pero ang tagsa ka tikang makabulig para mapalambo sang estudyante ang iya kaangtanan kay Jehova kag magdedikar sa iya.
3. Ngaa ang epektibo nga mga manunudlo nagagamit sing makapahunahuna nga mga pamangkot?
3 Ano ang Ginahunahuna sang Estudyante sa Biblia?: Agod mahibaluan naton kon nahangpan kag ginabaton sang aton estudyante sa Biblia ang iya ginatun-an, likawi nga ikaw lang ang magsige ka hambal kag palig-una sia nga ipabutyag ang iya kaugalingon. (Sant. 1:19) Nahangpan bala niya ang ginasiling sang Biblia sa topiko nga ginabinagbinag? Mapaathag bala niya ini sa iya kaugalingon nga mga tinaga? Ano ang iya ginabatyag sa iya natun-an? Para sa iya, makatarunganon bala ang ginatudlo sang Biblia? (1 Tes. 2:13) Nagapati bala sia nga ang iya ginatun-an makapabag-o sang iya kabuhi? (Col. 3:10) Agod masabat ini nga mga pamangkot, dapat kita maggamit sing makapahunahuna nga mga pamangkot kag dayon pamatian ang iya sabat.—Mat. 16:13-16.
4. Ano ang dapat himuon kon nabudlayan ang estudyante sa paghangop ukon sa pag-aplikar sang ginatudlo sang Biblia?
4 Nagakinahanglan sing tion para madula ang nanggamot na nga mga batasan kag pagpati. (2 Cor. 10:5) Pero ano abi kon indi pagbatunon ukon wala ginaaplikar sang aton estudyante ang iya ginatun-an? Kinahanglan ang pagpailob para makapanghikot ang Pulong sang Dios kag ang balaan nga espiritu sa tagipusuon sang aton estudyante. (1 Cor. 3:6, 7; Heb. 4:12) Sa baylo nga piliton ang estudyante, mas maayo nga magsaylo anay sa iban nga topiko kon nabudlayan sia sa paghangop ukon sa pag-aplikar sang ginatudlo sang Biblia. Samtang padayon naton nga ginatudluan sia sing mapailubon kag mahigugmaon halin sa Biblia, mahimo sia mapahulag sa ulihi nga maghimo sing mga pagbag-o.