Ang Bug-os Globo nga Paghiliutod Pat-od Gid!

WALA pa madugayi ang isa ka misyonero sa Nakatundan nga Aprika sang magtambong sia sa isa ka relihioso nga kombension sa isa ka nabaw-ing nga rehiyon. Samtang nagahinampot sia sa isa ka lokal nga pamilya, sa wala sing kabangdanan, naghibi ang dos-anyos nga bata nga lalaki.

Gin-uluuluhan sang misyonero ang bata, apang nagsinggit pa gani tapat ang bata. “Ano ang problema?” pamangkot sang misyonero sa iloy. Nagsabat sia nga may kahuya: “Sa banta ko ikaw. Nahadlok sia sa imo kolor. Wala pa gid sia makakita anay sing puti nga tawo.”

Kutob sa pagkalapsag mahimo nga nahibaluan naton ang mga pagkatuhay sa lawas sa ulot sang mga katawhan. Ang pagdampigdampig nagalambo sa ulihi. Ang mga pagtamod sang kabataan ginadihon samtang ginapanilagan nila ang mga panimuot kag paggawi sang tigulang nga mga tawo, subong sang ila mga ginikanan. Sa eskwelahan ginaimpluwensiahan sila sing dugang pa sang ila mga manunudlo, mga abyan, kag mga kaklase.

Suno sa malawig nga pagtuon sa Estados Unidos, sa tion nga ang kabataan makalab-ot sa edad nga 12 anyos, nakapalambo na sila sing permanente nga mga pagtamod kag mga panimuot nahanungod sa etniko, rasyal, kag relihioso nga mga grupo sa palibot nila. Paghamtong nila ining mga pagtamod nakapanggamot na sing tudok.

Tuhay ang mga Saksi ni Jehova

Sa isa ka kalibutan nga nagabaskog ang pagdampigdampig, ang mga Saksi ni Jehova talalupangdon nga tuhay gid. Kilala sila sa mga pungsod sa ila paghiusa sang mga rasa. Masami ini nga natalupangdan sang mga nakapanilag sa ila dalagku nga tuigan nga mga kombension.

Halimbawa, ginreport ini sang pamantalaan nga States-Item nahanungod sa isa ka daku nga kombension sang mga Saksi sa nabagatnan nga Estados Unidos: “Napuno sang paghiliutod ang Louisiana Superdome sang mag-abot ang mga bata kag tigulang, itom kag puti nga mga Saksi agod sugdan ang . . . pagtuon kag pagpaambitay nga eksperiensia. . . . Ang pagdampigdampig sa rasa . . . indi isa ka problema para sa mga saksi.”

Sa isa ka kombension sang mga Saksi, sa Bagatnan nga Aprika, ang Xhosa nga babayi nagsiling: “Makatilingala nga diri sa Bagatnan nga Aprika ang mga tawo sang tanan nga rasa nagahiusa gid. Tuhay gid ini sa kinaandan nga nakita ko sa mga iglesia.”

Sang ang mga bisita gikan sa Nakatundan kag Bagatnan nga Amerika subong man sa Europa nagtambong sa dalagku nga mga kombension sang mga Saksi sa Malayo nga Sidlangan kag sa Bagatnan nga Pasipiko, “wala sadto,” suno sa isa ka report, “sing bisan ano nga agi sang rasismo sa ila bahin, ukon sa bahin sang mga tagadidto.”

Sa amo, ang tuhay gid nahanungod sa minilyon sang mga Saksi ni Jehova sa bug-os nga duta amo ang ila matuod nga paghiusa kag pagharmoniya sang mga rasa. Ginabugkos sila sang matuod nga Cristianong gugma. Subong gid ini sang ginsiling ni Jesus: “Paagi sa sini mahibaluan sang tanan nga kamo mga disipulo ko, kon maghigugmaanay kamo.”—Juan 13:35.

Gani ang mga Saksi ni Jehova may yara na matuod, permanente nga internasyonal nga paghiliutod! Ginabaton nila sa tagipusuon ang ginsiling ni Jesus sa Mateo 23:8: “Kamo tanan mag-ulutod.” Kag nagakatabo ini sa tion gid nga ang pagbinahinbahin sang mga rasa kag etniko kag ang mga pagdumtanay nagawasak sa mga pungsod.—Tan-awa man ang 1 Corinto 1:10; 1 Juan 3:10-12; 4:20, 21; 5:2, 3.

Kon Paano Natigayon ang Paghiusa

Ang sadsaran sining paghiusa amo ang napasad sa Biblia nga instruksion nga ginabaton sang mga Saksi ni Jehova sa ila mga Kingdom Hall kag paagi sa ila personal nga pagtuon sang Biblia. Kaangay sila sang mga Cristiano sa Tesalonica, nga tuhoy sa ila si apostol Pablo nagsiling: “Sang mabaton ninyo ang pulong sang Dios nga inyo nabatian sa amon, ginbaton ninyo indi subong sang pulong sang mga tawo, kundi, nga sa pagkamatuod amo gid ini, ang pulong sang Dios, nga nagapanghikot man sa inyo nga mga nagatuo.”—1 Tesalonica 2:13.

Busa, ginapatihan sang mga Saksi ang ginasiling sang Biblia kag hanuot nga nagatinguha sila nga ilugon ang panghunahuna sang Dios. Ginabaton nila sa tagipusuon ang ginsiling sang Cristianong apostol Pedro sa idalom sang inspirasyon: “Matuod gid ginahantop ko nga ang Dios wala sing ginapasulabi sa mga tawo, apang sa tagsa ka pungsod ang nagakahadlok sa iya kag nagahimo sang katarungan kalahamut-an sa iya.”—Binuhatan 10:34, 35.

Nahisanto sa sini, ginsugo ni Jesus ang iya mga sumulunod sa paghimo sing mga disipulo sa katawhan “sang tanan nga kapungsuran.” (Mateo 28:19) Busa, aktibo nga ginapangita sang mga Saksi ni Jehova ang mga nagahigugma sa pagkamatarong sa tanan nga rasyal kag etniko nga mga grupo, nga wala sing eksepsion. Kag kon ang mga tawo nga may nanuhaytuhay nga ginhalinan kag rasa maghiusa sa pagsimba, sa pagpangabudlay, kag paghililuong, ang nanggamot na nga panghunahuna ginalandas. Nagatuon sila sa pagpabili sa isa kag isa, sa paghigugma sa isa kag isa.

Matuod, ang isa ka tawo nga madugay na naugot sa isa ka rasa mahimo nga indi dayon magbag-o sang iya mga pagtamod. Apang kon mangin Saksi sia, nagasugod sia sa ‘pagsuklob sing bag-ong personalidad’ sang isa ka matuod nga Cristiano, kag nagapangabudlay sing lakas sa paglandas sang iya ginahuptan anay nga mga pagtamod. (Efeso 4:22-24) Wala niya ginapakamatarong ang iya pagkaugot paagi sa pagsiling, ‘Ginapadaku ako nga subong sina.’ Indi, nagatinguha sia sa pagbag-o sang iya hunahuna kag sa ‘paghigugma sa bug-os nga paghiliutod.’—1 Pedro 2:17.

Mga Tagna sang Biblia nga Nagakatuman

Ang nagakatabo sa tunga sang mga Saksi ni Jehova karon may daku nga kahulugan. Sa pagkamatuod, gintagna ini sa Biblia.

Talupangda kon ano ang gintagna sang Isaias 2:2-4 nga mahanabo “sa ulihi nga mga adlaw,” sa sining “katapusan nga mga adlaw” sining malaut nga sistema sang mga butang. (2 Timoteo 3:1-5, 13) Ginsambit sadto nga tagna ni Isaias nga ang matuod nga pagsimba ni Jehova tukuron sa sining kaliwatan, kag ‘magadugok sa sini ang katawhan gikan sa tanan nga pungsod. Kag madamo nga katawhan ang magakadto kag magasiling: “Kari kamo, magataklad kita sa bukid sang matuod nga pagsimba ni Jehova. Kag tudluan niya kita sang iya mga dalanon, kag magalakat kita sa iya mga banas.”’

Ginsambit man sang tagna ni Isaias ang masunod nga tumalagsahon nga resulta, nga nakita sa internasyonal nga kasangkaron sa tunga sang mga Saksi ni Jehova sa sining bug-os nga siglo. “Kag ang ila mga espada salsalon nila nga mga punta sang arado kag ang ila mga bangkaw nga mga galab nga inughagbas. Ang pungsod indi magbayaw sing espada batok sa pungsod, kag indi na sila magtuon sing inaway.”

Subong man, ang tulun-an nga Bugna sang Biblia, nga nagahambal tuhoy sa aton tion, nagtagna nga ang dakung kadam-an sang katawhan “gikan sa tanan nga pungsod kag tribo kag katawhan kag hambal” magatingob sa matuod nga paghiliutod agod mag-alagad sa Dios sing nahiusa.—Bugna 7:9, 15.

Indi ini isa ka handum lamang nga panghunahuna. Ginaporma na ang isa ka dakung kadam-an gikan sa tanan nga pungsod, gikan sa tanan nga rasa kag tribo. Ang isa ka matuod kag dayon nga paghiliutod sa bug-os nga globo ginaporma karon! Amo ini ang sadsaran sang isa ka bag-o gid nga bug-os globo nga katilingban sang nahiusa, malipayon nga katawhan nga magabulos sa malaut karon nga katilingban nga sa dili madugay laglagon sang Dios. Ining nahiusa nga katilingban, subong sang ginsiling ni Jesus, “magapanubli sang duta,” kag magapuyo sila sa sini sing dayon sa idalom sang paggahom sang Ginharian sang Dios.—Mateo 5:5; 6:9, 10; Salmo 37:10, 11, 28, 29, 37, 38.

Ngaa indi ini pamatud-an para sa inyo kaugalingon? Ginaabiabi kamo sa pagduaw sa bisan diin nga Kingdom Hall sang mga Saksi ni Jehova kag eksperiensiahan ang ila pagharmoniya sa mga rasa. Ukon sa masunod nga tion nga magduaw sa inyo ang mga Saksi, agdaha sila kag pangabaya sila nga ipakita sa inyo gikan sa Biblia kon ano ang sadsaran sang ila pagharmoniya sa mga rasa. Pangabaya sila nga ipakita sa inyo ang ila Biblikanhon nga paglaum tuhoy sa isa ka bag-ong kalibutan nga sa diin magaluntad ang matuod nga paghiliutod sa bug-os nga duta.

Ang Labing Gamhanan nga Dios, si Jehova, nagahatag sang iya garantiya nga ang iya katuyuan sa pagtukod sing paghiliutod sang tanan nga katawhan matuman. Sia nagsiling: “Mangin subong sini ang akon pulong nga nagaguwa sa akon baba. Indi magbalik ini sa akon nga wala sing mga resulta, kundi pat-od nga himuon sini ang akon nahamut-an, kag pat-od nga magamadinalag-on ini sa butang nga akon ginpadal-an sini.”—Isaias 55:11.

Ginaagda namon kamo nga usisaon ang pamatuod gikan sa mga tagna sang Biblia kag gikan sa katumanan sining mga tagna. Kon himuon ninyo ina, makita ninyo nga ang pagharmoniya sang mga rasa indi lamang posible kundi indi malikawan!

[Piktyur sa pahina 9]

Ang nagakatabo sa tunga sang mga Saksi ni Jehova karon gintagna anay sa Biblia

[Laragway sa pahina 10]

Ang mga Saksi ni Jehova tumalagsahon sa paghupot sing matuod nga pagharmoniya sang mga rasa sa tunga nila