Ang Pagtamod sang Biblia

Makapaabot Bala ang Matuod nga mga Cristiano sing Pag-amlig sang Dios?

SANG magdul-ong sing mga ayuda sa mga masigkasumilimba, ang mga Cristiano, pagkatapos mangamuyo, nagbiyahe nga kumboy sa tunga sang may inaway nga lugar nga mahimo sila mapatay. Nalampuwasan nila ini, sa daku nga katingala sang nagainaway nga mga soldado. Gin-amligan bala sila sang anghel sang Dios?

Isa ka Cristianong mag-asawa nga nag-alagad subong mga ministro sa sulod sang madamong tinuig ang napatay sang mahulog ang isa ka eroplano sa duog nga nagapamalaybalay sila sa pagbantala. Ngaa wala sila ukon ang eroplano gintuytuyan sang anghel sang Dios sa iban nga duog sa sadtong partikular nga tion?​—⁠Ipaanggid ang Binuhatan 8:26.

Ginapaanggid sining mga hitabo, mahimo kita mamangkot: Ngaa ang iban nga mga Cristiano nagakapatay samtang nagahimo sang kabubut-on sang Dios, samtang ang iban, nga masami yara sa tuman ka makatalagam nga kahimtangan, nakalampuwas? Mapaabot bala sang mga Cristiano ang pag-amlig sang Dios, ilabi na sa sining makahalanguyos nga “katapusan nga mga adlaw”?​—⁠2 Timoteo 3:⁠1.

Ang Katuyuan sang Pangamlig sang Dios

Si Jehova nga Dios nagsaad sa pagpakamaayo kag pag-amlig sa iya katawhan. (Exodo 19:​3-6; Isaias 54:17) Nakita ini sing talalupangdon sang unang siglo, sang bag-o pa lang ang Cristianong kongregasyon. Bugana ang tagsa ka sahi sang mga milagro. Ginpamuad ni Jesus ang kalan-on agod mapakaon ang linibo; ginpang-ayo niya kag sang iya mga sumulunod ang tanan nga sahi sang balatian kag kasablagan sa lawas, ginpaguwa ang labaw sa tawo nga mga espiritu gikan sa ginsudlan sing demonyo nga tawo, kag ginbanhaw pa gani ang mga patay. Sa idalom sang panuytoy sang Dios ang lamharon nga kongregasyon nagtubo kag naglig-on. Apang, walay sapayan sang tanan nga pagsakdag sang Dios, madamong matutom nga Cristiano ang nag-antos sang ginatawag nga maaga nga kamatayon.​—⁠Ipaanggid ang Salmo 90:⁠10.

Binagbinaga ang kahimtangan nanday Santiago kag Juan, mga anak ni Zebedeo. Ginpili subong mga apostoles, sila, kaupod ni Pedro, amo ang pila sang labing suod nga mga abyan ni Jesus.a Apang si Santiago ginpatay subong martir sang tuig 44 C.E., samtang ang iya utod nga si Juan nagkabuhi tubtob sa hingapusan sang unang siglo. Maathag nga lunsay sila nagahimo sing kabubut-on sang Dios. Ngaa gintugutan nga mapatay si Santiago, samtang padayon nga nagkabuhi si Juan?

Pat-od nga may ikasarang ang Labing Gamhanan nga Dios sa pagluwas sang kabuhi ni Santiago. Sa pagkamatuod, wala madugay sa tapos sang kamatayon ni Santiago, ginluwas sang anghel ni Jehova si Pedro gikan sa ­kamatayon. Ngaa wala pagluwasa sang anghel si Santiago?​—⁠Binuhatan 12:​1-11.

Gingamit sa Pagtuman sang Katuyuan sang Dios

Agod mahangpan kon ngaa ginahatag ang pag-amlig sang Dios, dapat naton mahangpan nga ginahatag ini indi lamang agod magkabuhi ang indibiduwal sing mas malawig kundi agod amligan ang isa ka butang nga mas importante, ang katumanan sang katuyuan sang Dios. Halimbawa, ang kaluwasan sang Cristianong kongregasyon subong kabilugan ginpat-od bangod naangot ini sing suod sa katumanan sinang katuyuan. Apang, maathag nga ginsilingan ni Jesus ang iya mga disipulo nga sila subong mga indibiduwal mahimo mag-atubang sing kamatayon bangod sang ila pagtuo. Sa tapos masiling ini, ginpadaku ni Jesus, indi ang milagruso nga pagluwas, kundi ang ‘pagbatas tubtob sa katapusan.’ (Mateo 24:​9, 13) Ang kamatuoran nga ang pila ka mga indibiduwal gin-amligan, samtang ang iban wala, wala nagapakita nga may pinilian ang Dios. Ginagamit lamang sang Dios ang tawo nga yara sa labing maayo nga kahimtangan sa pagtuman sang iya katuyuan, nga sa ulihi para sa kaayuhan sang tanan nga katawhan.

Sanglit ang maaga nga kamatayon sa pag-alagad sa Dios mahimo nga matabo, dapat nga ang mga Cristiano may kaangay balanse nga panimuot sa tatlo ka matutom nga Hebreo nga ginpamatbatan sing kamatayon bangod sang pagsimba sa Dios. Ginsilingan nila ang hari sang Babilonia: “Kon amo ini, ang amon Dios nga ginaalagad namon makasarang sa pagluwas sa amon. Gikan sa nagadabadaba nga hurno sang kalayo kag gikan sa imo kamot, O Hari, magaluwas sia sa amon. Apang kon indi, makilala mo, O Hari, nga indi kami mag-alagad sa imo dios, kag indi kami magsimba sa larawan nga bulawan nga imo ginpatindog.”​—⁠Daniel 3:​17, 18.

Gintipigan ni Jehova ang kabuhi nanday Pedro kag Juan bangod sang ila pangunang katungdanan sa katumanan sang iya katuyuan. Gingamit si Pedro sa “pagpalig-on” sa kongregasyon paagi sa paghimo sing pagbantay nga hilikuton, nga naglakip sa pagsulat sing duha ka inspirado nga tulun-an sa Biblia. (Lucas 22:32) Ginsulat ni Juan ang lima ka tulun-an sang Biblia kag isa sia ka ‘haligi’ sa una nga kongregasyon.​—⁠Galacia 2:9; Juan 21:​15-23.

Imposible mahibaluan kon paano si Jehova nagapamat-od sa kon san-o gid kag sa anong paagi nga sia magapasilabot sa kabuhi sang iya mga alagad. Ang masiling lamang sing pat-od amo nga nagsaad si Jesus nga mangin kaupod sia sang iya mga sumulunod ‘sa tanan nga adlaw tubtob sa katapusan sang sistema sang mga butang.’ (Mateo 28:20) Sing partikular, mangin ‘kaupod [sia] naton’ paagi sa panuytoy sang anghel sa pagbantala nga hilikuton. (Mateo 13:​36-43; Bugna 14:⁠6) Magluwas sa sining kabilugan nga mga pamatuod, indi naton mapaabot sing eksakto kon paano ipadayag ang bulig sang Dios ukon kon sin-o ang mahimo nga makabaton sang pag-amlig sang Dios. Ano kon ginabatyag sang isa ka Cristiano nga may pag-amlig kag panuytoy sia sang Dios? Sanglit indi gid ini mapamatud-an ukon mapanghiwala, wala sing isa ang dapat maghukom sa sinsero nga mga pangangkon sinang isa.

Matig-a Bala sing Buot ang Dios?

Ang kamatuoran bala nga ginatugutan sang Dios nga mapatay ang mga Cristiano nagapakita nga daw matig-a sia sing buot? Indi gid. (Manugwali 9:11) Si Jehova nagapanghikot agod tipigan ang aton kabuhi indi lamang sa sulod sang pila ka tuig ukon mga dekada pa kundi sing dayon. Gikan sa iya superyor nga pagtamod, ginamaniobra niya ang mga hitabo para sa walay katapusan nga kaayuhan sang kada indibiduwal nga nagahigugma sa iya ukon nagapalapit sa iya. (Ipaanggid ang Mateo 18:14.) Ang katumanan sang iya katuyuan magakahulugan sing bug-os nga pagkadula sang bisan anong butang nga ginaantos naton sa sining sistema sang mga butang​—⁠bisan ang kamatayon. Tuman ka sibod kag himpit ang mga pagpakig-angot sang Dios amo nga si apostol Pablo napahulag sa pagtuaw: “O pagkadalom sang kamanggaran kag kaalam kag ihibalo sang Dios! Pagkadimatungkad sang iya mga paghukom kag pagkadimausoy sang iya mga dalanon!”​—⁠Roma 11:⁠33.

Sanglit wala sing makabulag sa aton gikan sa gugma sang Dios, ang pamangkot nga dapat ipamangkot sang tagsa ka Cristiano indi nga ‘May pag-amlig bala ako sang Dios?’ kundi ‘May pagpakamaayo bala ako ni Jehova?’ Kon huo, hatagan niya kita sing dayon nga kabuhi​—⁠walay sapayan kon ano ang matabo sa aton sa sining sistema sang mga butang. Kon ipaanggid sa dayon himpit nga kabuhi, ang bisan anong pag-antos​—⁠bisan ang kamatayon​—⁠sa sining sistema daw ‘umalagi kag mamag-an.’​—⁠2 Corinto 4:⁠17.

[Footnote]