Ang Pagtamod sang Biblia

Dapat Bala Magpaabot ang mga Cristiano sang Pag-amlig sang Dios?

Ang Biblia masami nagasambit sang ikasarang sang Dios sa pag-amlig sa iya mga sumilimba gikan sa kahalitan. Si Hari David nagsiling: “Luwasa ako, O Jehova, sa mga malain nga tawo; kabay nga amligan mo ako gikan sa tawo nga nagabuhat sing kasingki.” (Salmo 140:⁠1) Sa karon, madamong sumilimba sang Dios nga nakaatubang sing kasingki, krimen, ukon kinaugali nga mga kalamidad ang haluson nga nakalikaw sa kamatayon ukon kahalitan. Nagpalibog ang iban kon bala milagruso sila nga gin-amligan sang Dios sa sini nga mga tion, ilabi na bangod may mga hitabo nga ang nagakahadlok sa Dios nga mga tawo wala makalikaw kundi nakaeksperiensia sing daku nga mga trahedya, kag sing masingki nga kamatayon pa gani.

GINAAMLIGAN bala ni Jehova nga Dios ang iban nga mga indibiduwal gikan sa malain apang ang iban naman indi? Dapat bala kita magpaabot nga luwason sing milagruso gikan sa kasingki kag mga kalamidad karon?

Milagruso nga Pag-amlig sa mga Kasaysayan sang Biblia

May madamo nga kasaysayan sa Biblia diin nagpasilabot sing milagruso ang Dios tungod sa iya mga sumilimba. (Isaias 38:​1-8; Binuhatan 12:1-11; 16:​25, 26) Ginsaysay man sang Kasulatan kon paano sa iban nga okasyon wala maluwas gikan sa kalamidad ang mga alagad ni Jehova. (1 Hari 21:1-16; Binuhatan 12:​1, 2; Hebreo 11:35-38) Kon amo, maathag nga nagaamlig si Jehova bangod sa isa ka partikular nga rason ukon katuyuan kon luyag niya. Gani, kon ang indibiduwal nga mga Cristiano wala maluwas gikan sa mga pagtilaw, indi sila dapat maghinakop nga ginbiyaan sila sang Dios. Dapat naton batunon ang kamatuoran nga nagakahanabo ang malain nga mga butang, bisan sa matutom nga mga alagad ni Jehova. Ngaa amo sini?

Kon Ngaa Nagakahanabo ang Malain nga mga Butang sa Matutom nga mga Alagad sang Dios

Ang isa ka rason amo nga tanan kita nagpanubli sang sala kag pagkadihimpit kanday Adan kag Eva. Gani, mahimo kita masakitan, mag-antos, kag mapatay. (Roma 5:12; 6:23) Ang isa pa ka rason amo nga nagakabuhi kita sa katapusan nga mga adlaw. Ginalaragway sang Biblia ang mga tawo sa aton panahon nga “mga wala sing kinaugali nga gugma, mga indi tampad sa bisan anong kasugtanan, mga mapatupatuon, mga wala sing pagpugong sa kaugalingon, mga mabangis, mga wala sing gugma sa kaayuhan.” (2 Timoteo 3:​1-5) Ginapamatud-an ini sang paglapnag sang pagpanglugos, pagpangidnap, pagpatay, kag iban pa mapintas nga mga krimen.

Madamong matutom nga mga alagad sang Dios ang nagakabuhi kag nagapangabudlay sa tunga sang masingki nga mga tawo kag kon kaisa nangin ila puntariya. Mahimo nga mabutang kita sa isa ka makatalagam nga sitwasyon bangod natabuan lamang nga didto kita sa sina nga tion. Isa pa, maeksperiensiahan naton ang kamatuoran sang ginsiling ni Solomon nga “ang tion kag wala ginapaabot nga hitabo nagakahanabo sa ila tanan.”​—⁠Manugwali 9:11.

Dugang pa, si apostol Pablo nagsiling nga mangin puntariya sang paghingabot ang mga Cristiano bangod ginasimba nila ang Dios. Sia nagsiling: “Sa pagkamatuod, ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.” (2 Timoteo 3:12) Nangin matuod ini sa pila ka pungsod sining karon lang nga mga tuig.

Gani, indi luwas ang nagakahadlok sa Dios nga mga tawo sa mga epekto sang kasingki, krimen, kinaugali nga kalamidad, ukon sang wala ginapaabot nga kamatayon. Gingamit ni Satanas ang pangatarungan nga ginaamligan ni Jehova ang Iya katawhan agod magkabuhi sila nga indi gid mahalitan. (Job 1:​9, 10) Indi ini matuod. Apang, mapat-od naton nga bisan pa wala si Jehova nagaluwas sing milagruso gikan sa isa ka kahimtangan, ginaamligan gid niya ang iya katawhan.

Kon Paano Ginaamligan ni Jehova ang Iya Katawhan Karon

Paagi sa iya Pulong, nagahatag si Jehova sing panuytoy nga nagaamlig sa iya katawhan. Ang espirituwalidad kag ihibalo sa Biblia makahatag sa aton sing paghantop kag kaligdong sang hunahuna, nga makabulig sa aton nga malikawan ang di-kinahanglanon nga mga sayop kag makahimo sing maalamon nga mga desisyon. (Salmo 38:⁠4; Hulubaton 3:21; 22:⁠3) Halimbawa, ang pagsunod sa laygay sang Biblia tuhoy sa seksuwal nga moralidad, kakagod, kaakig, kag kasingki nagluwas sa mga Cristiano gikan sa madamo nga kalamidad. Isa pa, kon wala kita nagapakigsuod sa malain nga mga tawo, mahimo gid nga indi kita maulamid kon may matabo nga kalamidad sa ila ginasayuhan. (Salmo 26:​4, 5; Hulubaton 4:14) Ang nagakabuhi suno sa mga prinsipio sang Biblia may mas maayo nga pagkabuhi, nga masami nagaresulta sa mas mapagros nga hunahuna kag lawas.

Labi nga makalipay ang ihibalo nga bisan pahanugutan sang Dios nga mahanabo ang malain nga mga butang, hatagan niya ang iya mga sumilimba sing kinahanglanon nga kabakod agod mabatas nila ini. Si apostol Pablo nagpasalig sa aton: “Ang Dios matutom, kag indi sia magtugot nga sulayon kamo labaw sa inyo masarangan, kundi kaupod sang pagsulay magahatag man sia sing lulutsan agod nga mabatas ninyo ini.” (1 Corinto 10:13) Ginasaad man sang Biblia ang “gahom nga labaw sa kinaandan” nga magabulig sa aton nga mabatas ang mga kalamidad.​—⁠2 Corinto 4:7.

Ginahimo sang Dios ang Suno sa Iya Kabubut-on

Dapat bala magpaabot ang mga Cristiano nga luwason sila sang Dios sing milagruso sa tagsa ka mahanabo nga kalamidad? Wala ginasakdag sang Biblia ini nga pagpaabot.

Sa pagkamatuod, mahimo magpasilabot sing direkta si Jehova nga Dios tungod sa bisan sin-o niya nga alagad. Kag kon nagapati ang isa nga nakalikaw sia sa kahalitan bangod sang pagpasilabot sang Dios, indi sia dapat pagmulayon. Apang kon indi si Jehova magpasilabot, indi gid ini dapat tamdon nga tanda sang iya di-kahamuot.

Kabay nga magsalig kita nga bisan ano man nga pagtilaw ukon sitwasyon ang aton maatubang, amligan ni Jehova ang iya matutom nga mga alagad, paagi sa pagdula sang sitwasyon, paagi sa paghatag sa aton sing kabakod nga mabatas ini ukon, kon mapatay kita, paagi sa pagbanhaw sa aton padulong sa walay katapusan nga kabuhi sa iya bag-ong kalibutan.​—⁠Salmo 37:​10, 11, 29; Juan 5:​28, 29.