Pagkaluwas Padulong sa Bag-ong duta: Kapitulo 18
Matutom Ka Bala sa Bag-o nga Hari sang Duta?
SANG Nisan 9 sang 33 C.E., ginpresentar ni Jesucristo ang iya kabuhi sa mga Judiyo subong ang ila Hari, ang gintagna nga Mesias. Sang nagadulhog sia sa Bukid sang mga Olivo padulong sa Jerusalem, ang kadam-an sang mga disipulo nagkinasadya kag nagdayaw sa Dios bangod sang gamhanan nga mga buhat nga ginhimo ni Jesus. (Lucas 19:37, 38; Zacarias 9:9) Apang mangin matutom sila ayhan sa sinang Isa nga ila gindayaw subong Hari? Ang ila katutom gintilawan wala madugay.
2 Kutob sang 1914 ang ginhimaya nga si Jesucristo nga aktibo nga nagahari sa langit ginpresentar sa tanan nga katawhan subong amo ang bag-o nga Hari sang duta. Bangod sang paglaum nga kabuhi sa idalom sang isa ka pangulohan sa mga kamut ni Cristo, nga may matuod nga mga solusyon sa mga palaligban sang katawhan, ang katawhan sang tanan nga pungsod nagkinasadya. Apang mangin matutom ayhan sila? Kamusta ang tagsatagsa sa aton subong mga indibiduwal?
Ang Rekord sang Pagkatutom sang Hari
3 Naghatag si Jesucristo sing bugana nga pamatuod nga ang iya pagkatutom kay Jehova, ang Unibersal nga Soberano, indi mationg. Sia nagakaigo nga ginpatuhuyan sa Kasulatan subong ang “matutom” ni Jehova. (Salmo 16:10; Binuhatan 2:24-27) Ang Hebreong tinaga para sa “pagkatutom” nga gingamit diri may ideya nga mahigugmaon nga kalolo. Indi ini butang nga mabugnaw, napasad lamang sa kasugoan ukon katarungan, kundi ginapahulag man sang gugma kag kaluoy.—Ipaanggid ang Salmo 40:8; Juan 14:31.
4 Sa langit, sang si Satanas nagtinguha sa pagkuha sang kadungganan nga iya lamang sang Dios kag sang ang iban sang mga anghel nagbiya sang ila nagakaigo nga mga duog sa langitnon nga organisasyon ni Jehova, ang panganay nga Anak sang Dios wala mag-ilog sang ila espiritu. Malayo sa iya nga himuon yadto! Ang iya debosyon isa gid ka pagsakripisyo sang kaugalingon nga, sa pagtuman sang kabubut-on sang iya Amay, ginbiyaan sining matutom nga Anak ang iya langitnon nga himaya, nangin tawo kag nagpasugot nga mapatay sa usok sang pag-antos. Sing mahigugmaon, ginpat-od niya nga, kon tuhoy sa iya, wala sing detalye nga ginbalay sang Kasulatan para sa iya ang indi matuman.—Filipos 2:5-8; Lucas 24:44-48.
5 Sang si Jesus yari sa duta, daku gid ang pag-ipit sa iya ni Satanas agod talikdan niya ang hilikuton nga ginpahimo sa iya sang Dios—kon mahimo, hayluhon sia nga maghimo sing butang nga bangdan sang pagsikway sang Dios sa iya Anak. Ginpalig-on niya si Jesus nga maghimo sing mga butang nga makaresulta sa kabantogan kag gahom—apang bahin sang kalibutan nga ginagamhan ni Satanas. Nagdumili si Jesus, nga nagabalikwat sang Balaan nga Kasulatan subong iya tuytoy. (Mateo 4:1-10) Si Jesus may talalupangdon nga mga ikasarang kag gingamit niya ini sing maayo, apang nahisuno pirme sa kabubut-on sang iya Amay. Nagmasako gid sia sa bug-os nga paghimo sang hilikuton nga para sa amo ginpadala sia sang Dios. (Juan 7:16-18; 8:28, 29; 14:10) Daw ano ka maayong huwaran sang pagkatutom!
6 Bangod sang napamatod-an nga pagkatutom ni Jesus, ginbanhaw sia ni Jehova gikan sa minatay, “ginbayaw sia sa superyor nga posisyon kag maluluy-on nga ginhatagan sing ngalan nga labaw sa tanan nga iban nga ngalan, agod nga sa ngalan ni Jesus ang tagsa ka tuhod magluhod . . . kag ang tagsa ka dila dayag nga magkilala nga si Jesucristo Ginuo sa himaya sang Dios nga Amay.” (Filipos 2:9-11) Ining “ngalan nga labaw sa tanan nga iban nga ngalan” nagarepresentar sa gahom kag awtoridad nga ginhatag kay Jesus agod nga matuman niya ang kabubut-on ni Jehova. Ang ‘pagluhod sang tuhod’ sa iya nagakahulugan sang pagkilala sa iya posisyon kag pagpasakop sa iya awtoridad. Nagalakip ini sing matutom nga pagpasakop sa iya subong Hari.
Matutom nga Gugma Para sa mga Hinaplas ni Jehova
7 Ang kamatuoran nga, sa tapos sang iya pagkayab sa langit, si Jesus indi na makita sang tawhanon nga mata nagresulta sa nagausisa sang tagipusuon nga mga pagtilaw sa pagkatutom sang iya mga sumulunod. Magakabuhi bala sila suno sa mga prinsipio nga iya gintudlo sa ila? Magapabilin bala sila nga nabulag sa kalibutan? Tahuron bala nila ang ginhatagan sang balaan nga espiritu sing mga salabton sa pagbantay? Mangin bug-os kalag bala sila sa paghimo sang hilikuton nga iya ginhatag sa ila?
8 Sa sibu nga tion ang “iban nga mga karnero” gintipon upod sa “diutay nga panong” sang mga manunubli sang langitnon nga Ginharian. Apresyahon gid bala nila ang posisyon nga ginhatag sa ila may kaangtanan kay Cristo subong ang Hari kag sa isa kag isa sa ila? Ginapakita sang mga kamatuoran nga nagaluntad ang matuod nga gugma sa tunga sang tanan nga bahin sang “isa ka panong” sa idalom ni Jesucristo. Ginlandong ini sang indi mabungkag, indi mapatay nga gugma ni Jonatan, nga anak ni Hari Saul, kay David. Sang masaksihan ang bug-os nga debosyon ni David kay Jehova kag ang iya pagsandig sa Dios sa pagpatay sa higante nga si Goliat, natandog gid si Jonatan kag ang iya “gid kalag natingob sa kalag ni David, kag ginhigugma sia ni Jonatan subong sang iya kaugalingon nga kalag.” Ang iya gugma wala mabuhinan bisan pa sang mag-athag nga ihatag ni Jehova ang pagkahari kay David kag indi kay Jonatan. Makapila nga ginrisgo ni Jonatan ang iya kabuhi bangod kay David.—1 Samuel 17:45-47; 18:1; 23:16, 17.
9 Luwas kay Jonatan, may iban pa nga mga di-Israelinhon nga naghigugma kay David. Indi sila mga mersenaryo kundi maisog nga mga tawo nga naghikot bangod sang debosyon kay David subong hinaplas ni Jehova. Ang Keretnon, mga Peletnon kag ang mga pumuluyo anay sa Filistinhon nga siudad sang Gat nalakip sa sini. Matutom sila nga nag-unong kay David sang ang iya anak nga si Absalom malimbungon nga nagtinguha sa pag-agaw sang gugma sang katawhan sang Israel. Walay sapayan sang pagkabantog kag pagkamalalangon ni Absalom, wala sila mahaylo sang maluib nga dalanon paagi sa iya talunsay nga hambal.—2 Samuel 15:6, 10, 18-22.
10 Ang isa pa ka makalilipay nga paglaragway sang kaangtanan sa tunga ni Cristo, sang hinaplas nga nagkalabilin kag sang “iban nga mga karnero” masapwan sa Salmo 45. Indi lamang ini matahom nga binalaybay kundi matagnaon sang Mesianikong Ginharian—ang Dios amo ang “trono,” kon sayoron, ang sadsaran kag ang supurta sang pagkahari ni Jesus. (Salmo 45:1-7; Hebreo 1:8, 9) Ginalaragway sang salmista ang nobya ni Cristo, subong “anak nga babayi sang hari,” nga ginadala sa Hari sa iya adlaw sang kasal. Upod sa iya amo “ang mga ulay nga iya kaupdanan.” Sin-o ini sila? Amo sila ang mga nagalaum nga mangin dutan-on nga mga sakop sang Ginharian sang Dios. “May kasadya kag kalipay” ginaupdan nila ang “nobya” nga klase tubtob ang katapusan sini sa ila mahiusa kay Cristo sa langit. Upod sa ila, sila “nagsaulog sa palasyo sang hari,” indi paagi sa pagkayab sa langit, kundi paagi sa pagtanyag sang ila kaugalingon para sa pag-alagad sa Hari. Bahin ka na bala sinang malipayon nga prosesyon?—Salmo 45:13-15.
Ano ang Ginapatuman sa Aton sang Pagkatutom?
11 Ang dimaisip nga mga kahimtangan sa kabuhi nagapakita kon ano kita nga sahi sang mga tawo. Nagatuo gid bala kita sa Mesianikong Ginharian ni Jehova? Matuod gid bala ini sa aton? Si Jesus nagsiling nga ang iya matuod nga mga sumulunod “indi bahin sang kalibutan.” Matuod bala ina sa imo?—Juan 17:15, 16.
12 Sa aton bahin subong dihimpit nga mga tawo, ang pagkatutom wala nagakinahanglan sing kahimpitan. Apang ginapatuman sini sa aton nga likawan naton ang hungod nga paglalis sa mga sugo sang Biblia, makita man ukon indi sang iban nga tawo. Magapahulag ini sa aton sa pagtinguha nga iaplikar ang mga prinsipio sang Biblia sing bug-os, sa baylo nga tilawan kon tubtob diin kita kutob makapalapit sa mga dalanon sang kalibutan. Magapahulag ini sa aton nga palambuon ang matuod nga dumot sa malain.—Salmo 97:10.
13 Kon ginadumtan gid naton ang malain, indi naton pagtugutan ang sugyot nga mangusisa nga maghaylo sa aton sa pagpalapit sa sini. Ang pag-usisa sa kabuhi sang imoral sa sekso nga mga tawo makadul-ong sa madamo sa kapahamakan. (Hulubaton 7:6-23) Subong man, ang espirituwal nga kapahamakan mahimo mag-abot sa mga tawo nga bangod sang handum nga mangusisa nagabakal kag nagabasa sing literatura nga ginhimo sang mga apostata, mga tawo nga nagbiya kay Jehova kag sa iya organisasyon kag dayon “nagasakit” sa pulong sa ila mga kaupod anay. (Mateo 24:48-51) Ang Hulubaton 11:9 nagapaandam: “Paagi sa iya baba ang isa nga apostata nagalaglag sang iya isigkatawo.” Apang ang katutom magaamlig sa aton batok sa pagpatalang sang ila talunsay nga hambal.—2 Juan 8-11.
14 Ang isa sang labing importante nga mga paagi nga makapakita kita sing pagkatutom amo ang pagkabug-os kalag sa hilikuton nga gintudlo ni Jesus sa iya mga disipulo nga himuon nila. Sia personal nga nagpakita sing huwaran paagi sa pagkadto sa siudad kag siudad kag minuro kag minuro, nga nagabantala sing maayong balita sang Ginharian sang Dios. (Lucas 8:1) Gintagna ni Jesus ang himuon sang mga matuod nga mga Cristiano karon sang magsiling sia: “Ining maayong balita sang ginharian pagaibantala sa bug-os napuy-an nga duta subong panaksi sa tanan nga pungsod; kag ugaling magaabot ang katapusan.” (Mateo 24:14) Paagi sa sining pagbantala sing maayong balita, ang hulusayon sa Ginharian ginapresentar sa mga tawo bisan diin agod nga makahimo sila sing personal nga desisyon. Para sa dakung kadam-an, ina nga desisyon magadul-ong sa kaluwasan sa dakung kapipit-an. (Bugna 7:9, 10) Ikaw bala matutom nga nagapakigbahin sa sining hilingagawon nga hilikuton?
15 Madugay na, ang salmista nga si David nagsulat: “Ang tanan mo nga binuhatan magapasalamat sa imo, O Jehova, kag ang imo mga matutom magapakamaayo sa imo. Magapamulong sila sang himaya sang imo pagkahari, kag magahambal sang imo gahom, sa pagpakilala sa mga anak sang mga tawo sang iya gamhanan nga mga buhat kag sang himaya sang pagkahari sang iya ginharian. Ang imo ginharian dayon nga ginharian, kag ang imo ginsakpan nagapadayon sa tanan nga kaliwatan.” (Salmo 145:10-13) Inang pagkahari ginapakita na karon paagi sa Mesianikong Ginharian sa matutom nga mga kamut ni Jesucristo, kag ginapasundayag naton ang aton katutom sa Dios kag kay Cristo paagi sa paghambal sing hilway kag mapagsik nahanungod sini.
16 Anong daku nga bahin sa imo kabuhi ang nahatag mo sa sining hilikuton sa pagpanaksi sa Ginharian? Ginauna mo gid bala ini sa iban nga mga hilimud-osan? Ang imo personal nga ginahimo mahimo nga kapin ukon kubos sa ginahimo sang iban. Lainlain ang mga kahimtangan sang mga indibiduwal. Apang makabenepisyo kita tanan paagi sa pagpamangkot sang aton kaugalingon sang subong sini: ‘Ang akon bala pagpakigbahin nagapakita lamang sing obligasyon kag hapaw nga paghalad? Ginatamod ko bala ini subong isa lamang ka kinahanglanon para sa kaluwasan? Ukon ginapahulag bala ako sang gugma kay Jehova, debosyon sa iya Mesianikong Hari kag sang matuod nga kabalaka sa mga isigkatawo nga unahon ini agod nga ang iban nga mga interes sa akon kabuhi ginatukod sa palibot sini?’ Ang pagkatutom magapahulag sa aton sa pagpangita sing mga paagi sa pagpasundayag nga ining hilikuton importante sa aton subong nga importante man ini sa aton Hari.
17 Sa dili madugay ang Isa nga masadya nga gindayaw subong Hari sang iya mga disipulo samtang nagapasulod sia sa Jerusalem sang 33 C.E. magalaglag sa tanan nga nagasikway sa pagkasoberano ni Jehova nga ipabutyag paagi sa Iya Mesianikong Hari. Apang sia “magapamulong sing paghidait” sa “dakung kadam-an” sang mga tawo gikan sa tanan nga pungsod nga nag-ilog sang iya huwaran sang pagkatutom. Lakip ka bala sa ila?—Zacarias 9:10; Efeso 4:20-24.
[Mga Pamangkot sa Pagtinuon]
1. Sang ginpresentar si Jesus subong Hari sang 33 C.E., ano ang reaksion sang kadam-an?
2. (a) Ano ang reaksion karon sang madamo nga tawo sa pahibalo nga si Cristo amo ang bag-o nga Hari sang duta? (b) Apang anong mga pamangkot ang takus binagbinagon sing serioso?
3. (a) Ngaa ginpatuhuyan si Jesus subong ang “matutom” ni Jehova? (b) Ano ang pagkatutom?
4, 5. (a) Paano ginpakita ang pagkatutom ni Jesus sa langit, sa tapos magrebelde si Satanas? (b) Paano ginpakita ina nga pagkatutom sa duta?
6. Sa anong paagi ang padya nga ginhatag kay Jesus nagakinahanglan sa aton sing pagkatutom?
7. Sa anong mga butang gintilawan ang mga sumulunod ni Jesus tuhoy sa ila pagkatutom?
8. Ano ang ginlandong sang matutom nga gugma sa ulot ni Jonatan kag ni David?
9. Paano ang kaanggid nga pagkatutom ginpakita sang mga di-Israelinhon nga nag-alagad sa hangaway ni David?
10. (a) Paano ang suod nga kaangtanan sa tunga ni Cristo, sang hinaplas nga nagkalabilin kag sang “iban nga mga karnero” ginlaragway sa Salmo 45? (b) Sa anong kahulugan ‘ang mga ulay nga mga kaupdanan nagasulod sa palasyo sang hari’?
11. Anong mga kahimtangan ang nagatilaw sa aton tuhoy sa ‘pagkaindi bahin sang kalibutan’?
12. Bisan dihimpit kita, sa anong dugang pa nga mga paagi makahatag kita sing pamatuod sang pagkatutom?
13. Paano ang pagkatutom magaamlig sa aton batok sa talunsay nga hambal sang mga apostata?
14. (a) Ano ang isa sang labing importante nga mga paagi nga makapasundayag kita sang aton pagkatutom kay Cristo subong Hari? (b) Ngaa importante gid ining hilikuton?
15. (a) Ano ang ginasiling sang Salmo 145:10-13 nga ihambal sang mga matutom kay Jehova? (b) Paano ina naaplikar sa aton?
16. Paano ang pagkatutom magaimpluwensia sang kasangkaron sang aton pagpakigbahin sa pagbantala sang Ginharian kag sang aton motibo sa paghimo sini?
17. Kay sin-o si Jesus “magahambal sing paghidait” kon laglagon niya ang mga malauton?