Ang Dugo nga Nagaluwas gid Sing Kabuhi

Maathag ang pila ka punto gikan sa nauna nga impormasyon. Bisan madamo nga tawo ang nagatamod sini subong nagaluwas sing kabuhi, ang pagtayhon sing dugo madamo sing katalagman. Kada tuig linibolibo ang nagakapatay subong resulta sang pagtayhon; madamo ang naggrabe pa sa ila balatian kag nagaatubang sa nagadugay nga halit. Gani, bisan pasad sa lawasnon nga pagtamod, may kaalam gid karon sa pagsunod sa sugo sang Biblia nga ‘maglihi sa dugo.’​—Binuhatan 15:​28, 29.

Ang mga pasyente ginaamligan gikan sa madamo nga katalagman kon mangabay sila nga wala sing dugo nga gamiton sa pagbulong sa ila. Suno sa pamatuod sang madamo nga report sang medisina, ang lantip nga mga manugbulong nga nagbaton sang hangkat nga himuon ini sa mga Saksi ni Jehova nakapauswag sing isa ka paagi nga luwas kag epektibo. Ang mga manugbulong nga nagaaman sing de-kalidad nga pag-atipan nga wala sing dugo wala nagakompromiso sang importante nga mga prinsipio sang medisina. Sa baylo, nagapakita sila sing pagtahod sa kinamatarong sang pasyente nga mahibaluan ang mga katalagman kag mga benepisyo agod nga makahimo sia sing may ihibalo nga desisyon sa kon ano ang dapat himuon sa iya lawas kag kabuhi.

Wala kita nagapakunokuno nga inosente sa sini nga butang, kay nahibaluan naton nga indi tanan magaugyon sa sini nga paagi. Lainlain ang konsiensia, moralidad, kag medikal nga pagtamod sang mga tawo. Busa, ang iban, lakip ang pila ka mga doktor, nabudlayan sa pagbaton sang desisyon sang pasyente nga maglihi sa dugo. Ang isa ka manugbusbos sa Nueva York nagsulat: “Indi ko gid malipatan sang nagligad nga 15 ka tuig, subong isa ka bata pa nga intern, sang nagatindog ako sa tupad sang katre sang isa ka Saksi ni Jehova nga naubusan sing dugo bangod sang duodenal ulcer. Gintahod ang desisyon sang pasyente kag wala sia gintayhunan, apang madumduman ko pa gihapon ang daku nga kapaslawan nga nabatyagan ko subong isa ka manugbulong.”

Wala sing duhaduha nga nagpati sia nga naluwas kuntani sang dugo ang kabuhi. Apang, isa ka tuig sa tapos niya ginsulat yadto, ang The British Journal of Surgery (Oktubre 1986) nagreport nga sang indi pa uso ang pagtayhon sing dugo “ang nagakapatay [sa pagdugo sang tiyan kag tinai] 2.5 por siento lamang.” Sugod sang mag-uso ang pagtayhon, ‘ang kalabanan sang dalagku nga mga pagtuon nagreport sing 10 porsiento nga kadakuon sang nagakapatay.’ Ngaa nagdamo sing apat ka beses ang nagakapatay? Ang mga mananalawsaw nagpanugda: “Ang temprano nga pagtayhon daw nagapugong sa pagbilog sang dugo gani nagasugod liwat ang pagdugo.” Sang ang Saksi nga may nagadugo nga ulser nagpangindi sa dugo, mahimo nga ang iya desisyon nagpadaku pa gani sang iya posibilidad nga mabuhi sia.

Ini gihapon nga manugbusbos nagdugang: “Ang pagligad sang tion kag ang pagbulong sa madamo nga pasyente nagapabag-o sang pagtamod sang isa, kag karon nasapwan ko nga ang pagsaligay sang pasyente kag sang iya manugbulong, kag ang katungdanan nga tahuron ang desisyon sang pasyente kapin ka importante sa bag-ong teknolohiya sang pagpamulong nga yara sa aton palibot. . . . Makawiwili nga ang pagbatyag sing kapaslawan ginbuslan karon sing pagbatyag sing pagdayaw kag pagtahod sa malig-on nga pagtuo sinang partikular nga pasyente.” Ang manugbulong naghinakop: ‘Ginapahanumdom ako sini nga dapat ko pirme tahuron ang personal kag relihioso nga mga desisyon sang isa ka pasyente walay sapayan kon ano man ang akon ginabatyag ukon ang nangin resulta sini.’

Mahimo nahangpan na ninyo kon ano ang naapresyar sang madamo nga manugbulong sa ‘pagligad sang tion kag sa tapos makabulong sing madamo nga pasyente.’ Bisan walay sapayan sang labing maayo nga medikal nga pag-atipan sa pinakamaayo nga mga ospital, sa pila ka punto ang mga tawo nagakapatay. May pagtayhon man sing dugo ukon wala, nagakapatay sila. Kita tanan nagatigulang, kag ang katapusan sang kabuhi nagahilapit. Indi ini kapalaran. Amo ini ang kamatuoran. Ang pagkapatay isa ka matuod nga bahin sang kabuhi.

Ginapakita sang ebidensia nga ang mga tawo nga nagasikway sang sugo sang Dios tuhoy sa dugo masami nakaeksperiensia sing gilayon ukon napalantang nga halit; ang iban napatay pa gani bangod sa dugo. Ang mga naluwas wala makatigayon sing kabuhi nga wala sing katapusan. Gani ang pagpatayhon sing dugo indi permanente nga pangluwas sang kabuhi.

Nag-ayuhan ang madamo nga tawo nga, bangod sang relihioso kag/ukon medikal nga mga rason, nagpangindi sa dugo apang nagbaton sing tal-us nga pagbulong. Sa amo napalawig nila ang ila kabuhi sing tinuig. Apang indi sing dayon.

Bangod ang tanan nga tawo dihimpit kag amat-amat nga nagakapatay, nagadul-ong ini sa aton sa importante nga kamatuoran sang ginasiling sang Biblia nahanungod sa dugo. Kon mahangpan naton kag maapresyar ining kamatuoran, mahangpan naton kon paano ang dugo aktuwal nga nagaluwas sing kabuhi​—sang aton kabuhi​—sing dayon.

Ang Lamang nga Dugo nga Makaluwas sing Kabuhi

Subong nasambit na, ginsiling sang Dios sa tanan nga katawhan nga indi nila dapat kaunon ang dugo. Ngaa? Bangod ang dugo nagarepresentar sa kabuhi. (Genesis 9:​3-6) Ginpaathag niya ini sing dugang pa sa kodigo sang Kasuguan nga ginhatag sa Israel. Sang ginpalig-on ang kodigo sang Kasuguan, ang dugo sang ginhalad nga mga sapat gingamit sa altar. (Exodo 24:​3-8) Ginkilala sadtong kasuguan nga ang tanan nga tawo dihimpit; makasasala sila, suno sa Biblia. Ginsugiran sang Dios ang mga Israelinhon nga paagi sa mga sapat nga ginahalad sa iya, ginakilala nila ang kinahanglanon nga ang ila mga sala dapat tabunan. (Levitico 4:​4-7, 13-18, 22-30) Matuod, amo sini ang ginpangabay sang Dios sadto para sa ila, indi para sa matuod nga mga sumilimba karon. Apang importante gid ini para sa aton karon.

Ginpaathag sang Dios mismo ang prinsipio sa likod sadtong mga halad: “Ang kalag [ukon, kabuhi] sang unod yara sa dugo, kag ginhatag ko ini sa inyo sa ibabaw sang halaran sa paghimo sing katumbasan tungod sa inyo mga kalag, kay ang dugo amo ang nagahimo sing katumbasan bangod sang kalag sini. Busa nagsiling ako sa mga anak sang Israel: ‘Wala sing kalag sa inyo nga magkaon sing dugo.’ ”​—Levitico 17:​11, 12.

Sa dumaan nga piesta nga gintawag Adlaw sang Katumbasan, ginadala sang mataas nga saserdote sang Israel ang dugo sang ginhalad nga mga sapat sa labing balaan nga bahin sang templo, ang sentro sang pagsimba sa Dios. Ang paghimo sini isa ka simbuliko nga paagi sa pagpangabay sa Dios nga tabunan ang mga sala sang katawhan. (Levitico 16:​3-6, 11-16) Wala ginahugasan sini nga mga halad ang tanan nga sala, gani dapat nila suliton ini kada tuig. Sa gihapon, ining paggamit sa dugo nagapahamtang sing makahulugan nga sulundan.

Ang isa ka nagapanguna nga panudlo sa Biblia amo nga ang Dios sa ulihi magaaman sing isa ka himpit nga halad nga magatumbas sing bug-os sa mga sala sang tanan nga tumuluo. Ginatawag ini nga gawad, kag nasentro ini sa halad sang gintagna nga Mesias, ukon Cristo.

Ginapaanggid sang Biblia ang papel sang Mesias sa kon ano ang ginhimo anay sa Adlaw sang Katumbasan: “Sang mag-abot si Cristo subong isa ka mataas nga saserdote sang maayong mga butang nga nag-abot na, paagi sa daku pa kag himpit nga [templo] nga wala paghimua sang mga kamot, . . . nagsulod sia sing makaisa gid lang sa duog nga balaan [langit], nga wala nagadala sang dugo sang mga kanding kag mga tinday sang baka kundi sang iya kaugalingon nga dugo, sa amo nakatigayon sing pagtubos nga dayon para sa aton. Huo, halos tanan nga butang ginatinluan sang dugo suno sa Kasuguan, kag luwas kon ibubo ang dugo, wala sing kapatawaran nga matabo.”​—Hebreo 9:​11, 12, 22.

Busa maathag kon ngaa kinahanglan nga huptan naton ang pagtamod sang Dios sa dugo. Nahisuno sa iya kinamatarong subong Manunuga, ginpamat-od niya ang pinasahi nga paggamit sa sini. Ang mga Israelinhon sang una mahimo nga nag-ayuhan sa panglawas bangod sang indi pagkaon sing dugo sang sapat ukon tawo, apang indi yadto ang labing importante nga punto. (Isaias 48:17) Dapat nila likawan nga sakdagon ang ila kabuhi paagi sa dugo, indi una sa tanan bangod ang indi paghimo sini malain sa lawas, kundi bangod indi ini balaan sa Dios. Dapat nila likawan ang dugo, indi bangod mahigko ini, kundi bangod hamili ini sa pagtigayon sing kapatawaran.

Nagpaathag si apostol Pablo nahanungod sa gawad: “Paagi sa iya [Cristo] gintubos kita paagi sa dugo sinang isa, huo, ang kapatawaran sang aton mga sala, suno sa kamanggaran sang iya dibagay nga kaluoy.” (Efeso 1:7) Ang orihinal nga Griegong tinaga nga masapwan didto nagakaigo nga ginbadbad “dugo,” apang ang pila ka bersion sang Biblia nagasayop sa pagtal-us sing tinaga nga “kamatayon.” Busa, mahimo nga indi matalupangdan sang mga bumalasa ang pagpadaku sa pagtamod sang aton Manunuga sa dugo kag sa bili sang halad nga naangot sa sini.

Ang tema sang Biblia nagapalibot sa kamatuoran nga si Cristo napatay subong isa ka himpit nga halad nga gawad apang wala sia magpabilin nga patay. Bilang pagsunod sa sulundan nga ginpahamtang sang Dios sa Adlaw sang Katumbasan, si Jesus ginbanhaw pa langit agod “magpahayag sa atubangan sang Dios tungod sa aton.” Ginpresentar niya didto ang bili sang iya ginhalad nga dugo. (Hebreo 9:24) Ginapadaku sang Biblia nga dapat naton likawan ang bisan anong dalanon nga mangin katumbas sa ‘pagtapak sa Anak sang Dios kag pagkabig sa iya dugo subong wala sing bili.’ Paagi lamang sa sini makahupot kita sing maayong kaangtanan kag paghidait sa Dios.​—Hebreo 10:​29; Colosas 1:20.

Aguma ang Kabuhi nga Ginluwas sang Dugo

Kon mahangpan naton ang ginasiling sang Dios tuhoy sa dugo, tahuron naton sing bug-os ang nagaluwas kabuhi nga bili sini. Ginalaragway sang Kasulatan si Cristo subong ang isa nga ‘naghigugma sa aton kag naghilway sa aton gikan sa aton mga sala paagi sa iya kaugalingon nga dugo.’ (Bugna 1:​5; Juan 3:16) Huo, paagi sa dugo ni Jesus, matigayon naton ang bug-os kag dayon nga kapatawaran sang aton mga sala. Si apostol Pablo nagsulat: “Sanglit ginpakamatarong kita karon paagi sa iya dugo, maluwas kita paagi sa iya gikan sa kasingkal.” Amo sini ka dayon ang kabuhi nga ginluwas sang dugo.​—Roma 5:​9; Hebreo 9:14.

Naghatag si Jehova nga Dios sing pasalig madugay na nga paagi kay Cristo ‘ang tanan nga pamilya sang duta magapakamaayo sang ila kaugalingon.’ (Genesis 22:18) Ini nga pagpakamaayo nagalakip sang pagpasag-uli sang duta sa isa ka paraiso. Nian ang nagatuo nga katawhan indi na pagpaantuson sang balatian, pagtigulang, ukon bisan sang kamatayon; maagom nila ang mga pagpakamaayo nga labaw pa sa temporaryo nga bulig nga matanyag karon sa ila sang mga mediko. Aton ining matahom nga saad: “Pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”​—Bugna 21:4.

Daw ano ka maalamon, kon amo, nga batunon naton sing tinagipusuon ang tanan nga ginapatuman sang Dios! Nagalakip ini sang pagtuman sa iya mga sugo nahanungod sa dugo, wala ini ginagamit sing sayop bisan sa medikal nga mga kahimtangan. Sa amo indi kita magakabuhi sing temporaryo lamang. Sa baylo, ipakita naton ang aton bug-os nga pagtahod sa kabuhi, lakip ang aton ginapaabot nga paglaum sing kabuhi nga wala sing katapusan sa kahimpitan.