Pagluwas sang Kabuhi Paagi sa Dugo—Paano?

“Pilia ang kabuhi . . . sa pagpamati sang tingog [sang Dios] . . . kay sia imo kabuhi kag kalawigon sang imo mga adlaw.”​—⁠DEUTERONOMIO 30:19, 20.

1. Paano pinasahi ang matuod nga mga Cristiano sa ila pagtahod sa kabuhi?

MADAMO ang nagasiling nga ginatahod nila ang kabuhi, ginatudlo subong pamatuod ang ila pagpamatok sa silot nga kamatayon, aborsion, ukon pagpangayam. Apang, ginapakita sang matuod nga nga Cristiano ang ila pagtahod sa dugo sa pinasahi nga paagi. Ang Salmo 36:9 nagasiling: “Kay sa imo [Dios] yara ang tuburan sang kabuhi.” Bangod kay ang kabuhi dulot halin sa Dios, ginabaton sang mga Cristiano ang iya pagtamod sa dugo.

2, 3. Ngaa dapat naton binagbinagon ang Dios kon nahanungod sa dugo? (Binuhatan 17:​25, 28)

² Ang aton kabuhi nasandig sa dugo, nga nagadala sang oksiheno sa aton lawas, nagakuha sang carbon dio­xide, nagabulig sa aton sa pagpasibu sa pagbag-o sang temperatura, kag sa pag-away sang balatian. Ang Isa nga naghatag sang aton kabuhi nagdesinyo kag nag-aman man sing makatilingala, nagasakdag sang kabuhi nga likido nga basad (tissue) nga ginatawag dugo. Nagapakita ini sang iya dalayon nga interes sa pag-amlig sang tawhanon nga kabuhi.​—⁠Genesis 45:5; Deuteronomio 28:66; 30:15, 16.

³ Dapat binagbinagon sang mga Cristiano kag sang katawhan sa kabilugan ini: ‘Makaluwas bala sang akon kabuhi ang dugo paagi lamang sa kinaugali nga mga pagpanghikot sini, ukon makaluwas bala sang kabuhi ang dugo sa mas masangkad nga paagi?’ Bisan pa ginakilala sang kalabanan nga mga tawo ang kaangtanan sa ulot sang kabuhi kag sang kinaugali nga mga pagpanghikot sang dugo, sa aktuwal labi pa ang nadalahig. Ang moralidad sang mga Cristiano, mga Muslim, kag mga Judiyo nasentro tanan sa isa ka Manughatag-sing-Kabuhi nga nagpabutyag sang iya kaugalingon nahanungod sa kabuhi kag dugo. Huo, ang aton Manunuga may daku nga masiling tuhoy sa dugo.

Ang Malig-on nga Tindog sang Dios sa Dugo

4. Sadto pa sa maragtas sang tawo, ano ang ginsiling sang Dios nahanungod sa dugo?

⁴ Ang dugo ginasambit sing kapin sa 400 ka beses sa Pulong sang Dios, ang Biblia. Ang isa sang pinakauna amo ang sugo sang Dios: “Tagsa ka butang nga nagagiho nga nagakabuhi mangin kalan-on ninyo. . . . Apang dili ninyo pagkaunon ang unod nga may dugo pa.” Nagdugang pa sia: “Kay sa pagkamatuod kinahanglanon ko ang dugo sang inyo kabuhi.” (Genesis 9:​3-5, New International Version) Ginpamulong ini ni Jehova kay Noe, ang katigulangan sang tawhanon nga panimalay. Gani, ang bug-os nga katawhan ginpahibalo sang pagtamod sang Dios subong nga nagalaragway sa kabuhi. Ang tanan nga nagaangkon nga nagakilala sa Dios subong Manughatag-sing-Kabuhi dapat magkilala nga may yara Sia malig-on nga tindog nahanungod sa paggamit sang dugo.

5. Anong panguna nga rason kon ngaa ang mga Israelinhon wala nagakaon sing dugo?

⁵ Ginsambit liwat sang Dios ang dugo sang ginhatag niya sa Israel ang Kasuguan. Ang Levitico 17:​10, 11, suno sa Judiyong Tanakh nga bersion, nagasiling: “Kon ang bisan sin-o sa panimalay sang Israel ukon sa mga dumuluong nga nagapanlugayaw sa tunga nila magkaon sing dugo, ipahamtang ko ang Akon nawong batok sa tawo nga nagakaon sing dugo, kag utdon ko sia gikan sa iya katawhan. Kay ang kabuhi sang unod yara sa dugo.” Samtang ang pagtuman sang kasuguan may kaayuhan nga ginahatag sa lawas, kapin pa ang nadalahig. Paagi sa pinasahi nga pagtamod sa dugo, ginpakita sang mga Israelinhon ang ila pagsandig sa Dios para sa kabuhi. (Deuteronomio 30:​19, 20) Huo, ang una nga rason kon ngaa indi sila magkaon sing dugo, indi nga malain yadto sa lawas, kundi nga ang dugo pinasahi sa Dios.

6. Ngaa makapat-od kita nga ginsakdag ni Jesus ang tindog sang Dios sa dugo?

⁶ Ano ang tindog sang Cristiano sa kon paano ang dugo makaluwas sang tawhanon nga kabuhi? Nakahibalo si Jesus sang ginsiling sang iya Amay nahanungod sa paggamit sang dugo. Si Jesus “wala magpakasala, [kag] wala sing limbong nga nasapwan sa iya baba.” Nagakahulugan ina nga gintuman niya ang Kasuguan sing himpit, lakip ang kasuguan sa dugo. (1 Pedro 2:​22, Knox) Busa nagpahamtang sia sing sulundan para sa iya mga sumulunod, lakip ang sulundan tuhoy sa pagtahod sa dugo kag kabuhi.

7, 8. Paano nangin maathag nga ang sugo sang Dios sa dugo nagadalahig sa mga Cristiano?

⁷ Ginapakita sa aton sang maragtas kon ano ang natuman sang ang isa ka konsilyo sang nagadumala nga hubon sang una nagpamat-od sa kon bala dapat sundon sang mga Cristiano ang mga kasuguan sang Israel. Sa idalom sang panuytoy sang Dios, nagsiling sila nga ang mga Cristiano wala gin-obligar sa pagtuman sang kasuguan nga ginhatag kay Moises apang “kinahanglanon” ang “paglihi sa mga butang nga ginhalad sa mga diosdios kag sa dugo kag sa nakuga [wala mapadugo nga karne] kag sa pagkamakihilawason.” (Binuhatan 15:​22-29) Ginpakita sini nga ang paglikaw sa dugo katupong sa paglikaw sa pagsimba sa mga diosdios kag sa imoralidad.a

⁸ Ginsakdag sang naunang mga Cristiano inang balaan nga pagdumili. Nagakomento sa sini, ang Britanikong eskolar nga si Joseph Benson nagsiling: “Ining pagdumili sa pagkaon sing dugo, nga ginhatag kay Noe kag sa tanan niya nga kaliwatan, kag ginsulit sa mga Israelinhon . . . wala gid ginkuha, kundi, sa kabaliskaran, ginpalig-on sa idalom sang Bag-ong Testamento, sa Binuhatan xv.; kag sa amo isa ka dalayon nga obligasyon.” Apang, ano ang ginasiling sang Biblia nahanungod sa sugo tuhoy sa dugo nga nagakubre sa medikal nga paggamit, subong sang pagtayhon, nga maathag nga wala anay ginagamit sang panahon ni Noe ukon sang mga apostoles?

Dugo sa Ukon Subong Bulong

9. Paano anay ginagamit ang dugo subong bulong, kabaliskaran sa anong Cristianong tindog?

⁹ Ang matuod, ang paggamit sang dugo subong bulong indi bag-o. Ang libro nga Flesh and Blood, ni Reay Tanna­hill, nagasugid nga sang nagligad nga mga 2,000 ka tuig, sa Egipto kag sa iban nga duog, “ang dugo ginkabig subong bulong sa aru.” Sang panahon sang mga Romano ang dugo gingamit sa pagbulong sa kuyap. Si Ter­tullian nagsulat nahanungod sining paggamit sang “medisina” sa dugo: “Hunahunaa ang mga tawo nga sa kauhaw sa dugo, sa isa ka palaguwaon sa arena, nagakuha sang lab-as nga dugo sang malaut nga mga kriminal . . . kag gindala ini agod ibulong sa ila kuyap.” Tuhay gid ini sa ginhimo sang mga Cristiano: “Wala gani kami nagagamit sing dugo sang mga sapat sa amon pagkaon . . . Sa mga bista sang mga Cristiano ginatanyagan ninyo sila sing mga soreso nga may dugo. Sa pagkamatuod, kombinsido kamo, nga [ini] batok sa kasuguan para sa ila.” Binagbinaga ang implikasyon: Luyag pa sang nahaunang mga Cristiano nga mapatay sang sa magkaon sing dugo.​—⁠Ipaanggid ang 2 Samuel 23:​15-17.

10, 11. Ngaa masiling naton nga ang sulundan sang Dios sa dugo nagadumili sang pagbaton sang gintayhon nga dugo?

¹⁰ Huo, ang dugo wala sadto anay ginatayhon, kay ang pag-eksperimento sa sini nagsugod halos sa pagsugod sang ika-16 nga siglo. Apang, sang ika-17 nga siglo, ang isa ka propesor sa anatomy sa University of Copenhagen nagprotesta: ‘Ang mga nagapamilit sa paggamit sing dugo sang tawo subong bulong batok sa mga balatian nagagamit sini sing sayop kag nagapakasala sing daku. Ginakondenar ang mga cannibal (nagakaon sing unod sang tawo). Ngaa wala naton ginadumtan ang mga nagamantsa sang ila tutunlan paagi sa dugo sang tawo? Kaanggid man ang pagbaton sing dumuluong nga dugo gikan sa gin-utod nga ugat, kon bala paagi sa baba ukon paagi sa mga instrumento sang pagtayhon. Ang mga awtor sini nga operasyon ginahukman sang kasuguan sang Dios.’

¹¹ Huo, bisan sang nagligad nga mga siglo, nahangpan sang katawhan nga ang sugo sang Dios nagdumili sang pagkaon sing dugo paagi sa mga ugat ukon sa baba. Kon mahangpan ini karon sang dugang pa nga mga tawo, mahimo nga makabulig ini sa ila sa paghangop sang tindog sang mga Saksi ni Jehova, isa nga nahisuno sa tindog sang Dios. Samtang ginapabilihan gid naton sing daku ang kabuhi kag luyag naton magpabulong, ang matuod nga mga Cristiano nagatahod sa kabuhi subong regalo gikan sa Manunuga, gani wala nila ginatinguhaan nga sakdagon ang kabuhi paagi sa pagkaon sing dugo.​—⁠1 Samuel 25:⁠29.

Bulong Bala nga Nagaluwas sang Kabuhi?

12. Ano ang makatarunganon nga binagbinagon sang nagahunahuna nga mga tawo nahanungod sa pagtayhon sing dugo?

¹² Sa sulod sang tinuig ang mga eksperto nagaangkon nga ang dugo ginagamit sa pagluwas sing kabuhi. Ang mga doktor makasugid sing mga kaso nga sa diin ang isa nga nadulaan sing madamo nga dugo, madasig nga nag-ayo, sang gintughungan sing dugo. Gani mahimo nagapalibog ang mga tawo, ‘Daw ano ka maalamon ukon dimaalamon sa pagpabulong ang Cristianong tindog?’ Antes magpasugot sa isa ka serioso nga medikal nga pagbulong, handumon sang isa ka nagahunahuna nga tawo nga hibaluon ang mga benepisyo kag mga katalagman. Ano ang masiling sa pagtayhon sing dugo? Ang matuod, ang pagtayhon sing dugo madamo sing katalagman. Makamamatay pa gani ini.

13, 14. (a) Ano ang pila ka paagi nga ang pagtayhon sing dugo napamatud-an nga makatalagam? (b) Paano ginapakita sang natabo sa papa ang katalagman sang dugo sa panglawas?

¹³ Sining karon, sanday Dr. L. T. Good­nough kag J. M. Shuck nagsiling: “Ang medikal nga komunidad madugay na nakahibalo nga bisan pa ang suplay sang dugo wala sing peligro subong sang nahibaluan naton kon paano ini himuon, ang pagtayhon sing dugo pirme nagadala sing katalagman. Ang labi kasunson nga komplikasyon sang pagtayhon sing dugo padayon nga amo ang non-A, non-B hepatitis (NANBH); ang iban pa nga posible nga komplikasyon nagalakip sang hepatitis B, allo­immu­nization, reaksion sa pagtayhon, napunggan nga imunidad, kag sobra nga iron.” ‘Haganhagan’ nga pagbanta sang isa lamang sinang serioso nga mga katalagman, ang report nagdugang: “Ginapaabot nga mga 40,000 ka tawo [sa Estados Unidos lamang] ang magamasakit sing NANBH kada tuig kag nga tubtob sa 10% sa ila ang magamasakit sing cirrhosis kag/ukon hepatoma [kanser sa atay].”​—⁠The American Journal of Surgery, Hunyo 1990.

¹⁴ Samtang ang katalagman nga malatnan sang balatian gikan sa gintayhon nga dugo labi nga nagalapnag, ang mga tawo nagabinagbinag liwat sang ila pagtamod sa pagtayhon. Halimbawa, sang gintiro anay ang papa sang 1981, ginbulong sia sa ospital kag ginpaguwa. Sang ulihi ginbalik sia sa ospital sa duha ka bulan, kag grabe gid ang iya balatian amo kon ngaa ginhuringhuring nga maretiro sia nga baldado. Ngaa? Bangod sang cytome­galo­virus in­fection nga naghalin sa dugo nga gintayhon sa iya. Ang iban nagapalibog, ‘Kon ang dugo nga ginhatag sa papa pa gani indi sigurado, ano na lang ang dugo nga ginahatag sa mga tawo sa kabilugan?’

15, 16. Ngaa ang pagtayhon sing dugo indi sigurado bisan pa nga ang dugo gin-usisa para sa mga balatian?

¹⁵ ‘Apang indi bala nila mausisa ang dugo para sa mga balatian?’ mahimo ipamangkot sang isa. Ti, binagbinaga subong halimbawa ang pag-usisa para sa hepatitis B. Ang Patient Care (Pebrero 28, 1990) nagsiling: “Ang paglaton sang hepatitis pagkatapos sang pagtayhon nagnubo pagkatapos nga gin-usisa sing maayo ang dugo para sa [sini], apang 5-10% sang mga kaso sang hepatitis pagkatapos sang pagtayhon ang ginatuga gihapon sang hepatitis B.”

¹⁶ Ang pagkamasaypunon sang pag-usisa makita man sa isa pa ka katalagman nga ginadala sang dugo​—⁠AIDS. Ang AIDS nga pandemiko, upod ang pagtimalos, nagpabugtaw sa mga tawo sa katalagman sang pagtigayon sing makalalaton nga mga balatian gikan sa dugo. Matuod, may mga paagi na karon sa pag-usisa kon bala may amo sini nga ­virus ang dugo. Apang, ang dugo wala ginausisa sa tanan nga duog, kag mahimo nga ang tawo may virus sang AIDS sa ila dugo sa sulod sang tinuig nga indi mamutikan sang nga mga pagtilaw karon. Gani ang mga pasyente mahimo makatigayon sing AIDS​—⁠nakatigayon na sang AIDS​—⁠gikan sa dugo nga gin-usisa kag nakalusot ina nga wala madiparahi!

17. Paano makahimo sing halit ang pagtayhon sing dugo nga indi sa gilayon makita?

¹⁷ Ginsambit man nanday Dr. Good­nough kag ­Shuck ang “napunggan nga imunidad.” Huo, madamo ang pamatuod nga bisan ang ginparis sing maayo nga dugo sarang makahalit sang im­mune sys­tem sang pasyente, nagabukas sang ganhaan sa kanser kag kamatayon. Gani, ang isa ka pagtuon sa Canada tuhoy sa “mga pasyente nga may kanser sa ulo kag liog nagpakita nga ang gintayhunan sang dugo sang ginkuha ang [isa ka] tumor nakaeksperiensia sing talalupangdon nga pagnubo sang ikasarang sa pagbato pagkatapos.” (The Medical Post, Hulyo 10, 1990) Ang mga doktor sa University of South­ern Cal­ifor­nia nagreport: “Ang kadamuon sang paglukmat sang tanan nga kanser sa larynx 14% sa mga wala magbaton sing dugo kag 65% sa mga nagpatughong sing dugo. Tuhoy sa kanser sa baba, pharynx, kag ilong ukon sinus, ang kadamuon sang paglukmat 31% sa mga wala gintayhunan kag 71% sa mga gintayhunan.” (Annals of Otology, Rhinology & Laryngology, Marso 1989) Daw mahimo man nga ang napunggan nga imunidad amo ang rason kon ngaa ang ginhatagan sing dugo sa tion sang operasyon may mas daku sing posibilidad nga maimpeksion.​—⁠Tan-awa ang kahon, pahina 10.

Mga Tal-us sa Dugo?

18. (a) Ang mga katalagman sa pagtayhon sing dugo nagpaliso sa mga manugbulong sa ano? (b) Anong impormasyon nahanungod sa mga tal-us ang mahimo ninyo mapaambit sa inyo manugbulong?

¹⁸ Ang iban nagasiling, ‘Ang pagtayhon sing dugo makatalagam, apang may yara bala mga tal-us sa sini?’ Luyag gid naton ang epektibo nga pagbulong nga de-kalidad, busa may yara bala maayo kag epektibo nga mga paagi sa pagbulong sang serioso nga mga balatian nga wala nagagamit sing dugo? Sing malipayon, huo. Ang The New England Journal of Medicine (Hunyo 7, 1990) nagreport: “Ang mga manugbulong, nga nakahibalo gid sang mga katalagman sang [AIDS] kag iban pa nga mga impeksion nga ginlaton paagi sa pagtayhon sing dugo, nagabinagbinag liwat sang mga katalagman kag mga benepisyo sang pagtayhon kag nagaliso sa mga tal-us, lakip ang bug-os nga paglikaw sa pagtayhon sing dugo.”b

19. Ngaa makasalig kamo nga mapangindian ninyo ang dugo kag sa gihapon mabulong sing madinalag-on?

¹⁹ Madugay na nga ginsikway sang mga Saksi ni Jehova ang pagtayhon sing dugo, indi bangod sang mga katalagman sa lawas, kundi bangod sang pagtuman sa kasuguan sang Dios sa dugo. (Binuhatan 15:​28, 29) Apang, nabulong sing madinalag-on sang lantip nga mga doktor ang Saksi nga mga pasyente nga wala nagagamit sing dugo, upod ang resulta nga mga risgo. Subong isa lamang sang madamong mga halimbawa nga ginreport sa literatura sa medisina, ang Archives of Surgery (Nobiembre 1990) naghinun-anon sang pag-ilis sang tagipusuon sang Saksi nga mga pasyente nga ang ila mga konsiensia nagtugot sina nga paagi nga wala nagagamit sing dugo. Ang report nagsiling: “Ang kapin sa 25 ka tuig nga eksperiensia sang pag-opera sa tagipusuon sa mga Saksi ni Jehova nagdul-ong sa madinalag-on nga pag-ilis sang tagipusuon nga wala nagatayhon sang mga produkto sang dugo . . . Wala sing napatay samtang sa ospital antes ukon pagkatapos sang operasyon, kag ginapakita sang masunod nga pagtuon nga ining mga pasyente indi madali latnan sang pagsikway sa gin-ilis nga organo.”

Ang Labing Bilidhon nga Dugo

20, 21. Ngaa dapat maghalong ang mga Cristiano nga wala nila ginapalambo ang panimuot nga “Ang dugo isa ka malain nga bulong”?

²⁰ Apang may yara mahunahunaon nga pamangkot nga dapat ipamangkot sang kada isa sa aton sa aton kaugalingon. ‘Kon namat-od ako nga indi magpatayhon sing dugo, ngaa? Sing bunayag, ano gid bala ang akon pangunang rason?’

²¹ Subong nasambit na naton, may yara epektibo nga mga tal-us sa dugo nga wala nagapadayag sa isa sa madamo nga katalagman sang pagpatayhon sing dugo. Ang mga katalagman subong sang hepatitis ukon AIDS nagpahulag sa madamo nga pangindian ang dugo tungod sang direlihioso nga mga rason. Ang iban prangka sa sini, nga subong bala nagamartsa sila sa idalom sang hayahay nga nagasiling, “Ang Dugo Isa ka Malain nga Bulong.” Posible madala sa sina nga martsa ang isa ka Cristiano. Apang isa ini ka martsa nga nagapadulong sa dead-end nga dalan. Paano?

22. Anong realistiko nga pagtamod sa kabuhi kag kamatayon ang binagbinagon naton? (Manugwali 7:2)

²² Nahibaluan sang matuod nga mga Cristiano nga walay sapayan sang labing maayo nga pagbulong sang labing maayo nga mga ospital, sa pila ka punto ang mga tawo nagakapatay. Ginatayhunan man sing dugo ukon wala, ang tawo nagakapatay. Indi ini pagtamod nga may huyog sa kamatayon. Ini realistiko. Ang kamatayon isa ka kamatuoran sang kabuhi sa karon. Ang mga tawo nga nagalalis sa sugo sang Dios tuhoy sa dugo masami nga nagaatubang sing gilayon ukon napalantang nga mga halit. Ang iban nagakapatay bangod sang gintayhon nga dugo. Apang, dapat naton tanan hibaluon nga ang mga nakasalbar wala makatigayon sing kabuhi nga wala sing katapusan, gani ang dugo wala nagaluwas sing kabuhi sing permanente. Sa pihak nga bahin, ang kalabanan nga, bangod sa relihioso kag/ukon medikal nga rason, nangindi sa dugo kundi nagbaton sang tal-us nga medikal nga terapiya nakasalbar kag nag-ayo. Mahimo nila mapalawig ang ila kabuhi sing tinuig​—⁠apang indi sing dayon.

23. Paano naangot ang sugo sang Dios sa dugo sa aton pagkamakasasala kag pagkinahanglan sing gawad?

²³ Nga ang tanan nga tawo dihimpit kag amat-amat nga nagakapatay nagadul-ong sa aton sa panguna nga hulusayon nga ginasiling sang Biblia tuhoy sa dugo. Ginsugo sang Dios ang tanan nga katawhan nga indi magkaon sing dugo. Ngaa? Bangod nagalaragway ini sa kabuhi. (Genesis 9:​3-6) Sa koda sang Kasuguan, nagpahamtang sia sing mga sugo nga ginabinagbinag ang kamatuoran nga ang tanan nga tawo makasasala. Ginsugiran sang Dios ang mga Israelinhon nga paagi sa dugo sang mga sapat nga halad, mapakita nila nga kinahanglan nila nga tabunan ang ila mga sala. (Levitico 4:​4-7, 13-18, 22-30) Walay sapayan nga indi amo sini ang ginapangabay niya sa iya katawhan karon, may importante gihapon ini nga kahulugan. Ang Dios nagtuyo sa pag-aman sing halad nga magatumbas sing bug-os sa mga sala sang tanan nga tumuluo​—⁠ang gawad. (Mateo 20:28) Amo ini ang kabangdanan kon ngaa kinahanglanon naton ang pagtamod sang Dios sa dugo.

24. (a) Ngaa sayop kabigon ang mga katalagman sa lawas subong ang sentro nga punto nahanungod sa dugo? (b) Ano gid ang kabangdanan sang aton pagtamod sa paggamit sing dugo?

²⁴ Mangin sayop gid para sa aton nga padakuon lamang ang peligro sa lawas sang dugo, kay indi amo sina ang una nga kabangdanan sa Dios. Mahimo nga ang mga Israelinhon nakatigayon sing pila ka benepisyo sa lawas paagi sa indi pagkaon sing dugo, subong nga sila mahimo nga nakatigayon sing mga benepisyo sa lawas paagi sa indi pagkaon sing karne sang baboy ukon sang dapay. (Deuteronomio 12:​15, 16; 14:​7, 8, 11, 12) Apang, dumduma, nga sang ginhatagan sang Dios si Noe sing kinamatarong sa pagkaon sing karne sang sapat, ang Dios wala sing ginsiling batok sa pagkaon sing karne sang baboy. Apang ginsugo niya nga indi pagkaunon sang tawo ang dugo. Ang Dios wala lamang nagsentro sa posible nga mga risgo sa panglawas. Indi amo sina ang importante nga punto sa iya sugo sa dugo. Ang iya mga sumilimba nagadumili sa pagsakdag sang ila kabuhi paagi sa dugo, indi bangod ang paghimo sini malain sa lawas, kundi bangod indi ini balaan. Nagapangindi sila sa dugo, indi bangod mahigko ini, kundi bangod hamili ini sa Dios. Paagi lamang sa mahalaron nga dugo nga matigayon nila ang kapatawaran.

25. Paano mapinadayunon nga makaluwas sang kabuhi ang dugo?

²⁵ Amo man sa aton karon. Sa Efeso 1:⁠7, si apostol Pablo nagpaathag: “Paagi sa iya [Cristo] ginhilway kita sang gawad paagi sa dugo sinang isa, huo, ang kapatawaran sang aton mga sala, suno sa kamanggaran sang iya dibagay nga kaluoy.” Kon ang Dios nagapatawad sang mga sala sang isa ka tawo kag nagatamod sa iya subong matarong, may paglaum sia sang kabuhi nga walay katapusan. Gani ang halad nga dugo ni Jesus sarang makaluwas sang kabuhi​—⁠sa mapinadayunon, sa katunayan, sa walay katapusan.

[Mga footnote]

Mapaathag Mo Bala?

◻ Ano ang pangunang rason kon ngaa ang mga Saksi ni Jehova wala nagapatayhon sing dugo?

◻ Anong pamatuod ang nagapalig-on nga ang tindog sang Biblia sa dugo makatarunganon sa medisina?

◻ Paano ginaangot ang gawad sa sugo sang Biblia sa dugo?

◻ Ano ang lamang nga paagi nga ang dugo permanente nga makaluwas sang kabuhi?

[Kahon sa pahina 10]

PAGTAYHON KAG IMPEKSION

Pagkatapos sang masangkad nga pagrepaso sa kon bala ang mga pagtayhon sing dugo nagahimo sa pasyante nga madali maduktan sing impeksion, si Dr. Neil Blumberg naghinakop: “Sa 12 ka klinikal nga pagtuon [sa sini], natukiban sang 10 nga ang pagtayhon may kaangtanan sa dugang nga katalagman nga maimpeksion sang bakterya . . . Dugang pa, ang pagtayhon sing una pa antes sang operasyon mahimo makaapektar sa pagbato sang pasyente sa impeksion kon ang imunolohiko nga mga epekto sang pagtayhon subong kadugay sa ginapakita sang pila ka pagtuon . . . Kon ining data mapasangkad kag makompirma, mahimo nga ang malala nga mga impeksion pagkatapos sang operasyon amo ang labing kinaandan nga komplikasyon nga may kaangtanan sa homolo­gous nga pagtayhon.”​—⁠Transfusion Medicine Reviews, Oktubre 1990.

[Laragway sa pahina 8]

Ginpadaku nga mapula nga selula sang dugo. “Ang kada mikrolitro (0.00003 onsa) sang dugo nagaunod sing halin sa 4 milyones tubtob 6 milyones ka mapula nga selula sang dugo.”​—⁠“The World Book Encyclopedia”

[Ginkuhaan]

Kunkel-CNRI/PHOTOTAKE NYC