Programa sa Pagpauswag Sang Ikasarang Subong Isa ka Humalambal kag Isa ka Manunudlo

PAMATAN-ON man ikaw ukon tigulang, lalaki ukon babayi, ini nga kurso makabulig sa imo sa pagpabutyag sang imo kaugalingon sing labi pa ka epektibo kag agod mangin kalipikado pa subong manunudlo sang Pulong sang Dios.

Ang mga asaynment sang mga estudyante sa Teokratikong Eskwelahan Para sa Ministeryo ihatag sang manugtatap sa eskwelahan. Sa masunod nga tatlo ka pahina, masapwan mo ang imo pormas para sa laygay. Ang mga numero antes sang nagkalainlain nga mga punto nagapatuhoy sa mga tulun-an sa masunod nga mga pahina. Sa sini nga mga tulun-an masapwan mo ang paathag kon ano ang nadalahig agod mangin lantip sa sining mga bahin sang paghambal kag pagpanudlo kag kon ngaa importante ang kada isa. Masapwan mo man ang makabulig nga panuytoy kon paano himuon ang ginapanugda.

Ang de-kolor nga tanda sa pormas para sa laygay nagapakita kon diin nga mga punto ang nagakadapat sa mga asaynment nga nagalakip sang (1) pagbasa sa mga tagpalamati, (2) pasundayag upod sa duha ukon kapin pa nga tawo, ukon (3) diskurso sa kongregasyon. Ang manugtatap sa eskwelahan amo ang magaasayn sing punto nga imo pangabudlayan. Mas maayo nga pangabudlayan ang isa lamang ka punto sa kada tion. Makabenepisyo ka paagi sa pagsunod sa ginpanugda nga mga pag-ensayo sa katapusan sang gin-asayn nga tulun-an. Kon napamatud-an mo nga naaplikar mo sing madinalag-on ang laygay sa gin-asayn nga tulun-an, ang imo manuglaygay magaasayn sa imo sing lain naman nga punto.

Kon ang imo asaynment isa ka pasundayag, kinahanglan mo ang isa ka danyag. Ang listahan sang mga danyag makita sa pahina 82, apang wala ka ginalimitehan sa sini nga listahan. Ang imo manuglaygay mahimo magpanugda nga tilawan mo ang isa ka danyag agod makatigayon sing eksperiensia, ukon mahimo tugutan ka niya nga magpili.

Ang pagbasa sini nga libro kag ang pagsunod sa mga pag-ensayo bisan pa wala ka nagahanda sang mga asaynment sa eskwelahan makabulig sing daku sa imo pag-uswag. Ayhan matuptupan mo ang isa ka tulun-an kada semana.

Walay sapayan kon daw ano kalawig na ikaw nga nagapakigbahin sa eskwelahan ukon nagapakigbahin sa ministeryo sa latagon, mahimo ka gihapon mag-uswag. Kabay nga makabenepisyo ka sing bug-os gikan sa pagpanudlo nga gin-aman paagi sa Teokratikong Eskwelahan Para sa Ministeryo.