Si Jesus ‘Nagapaluntad sang Katarungan sa Duta’

1, 2. Sa ano nga sitwasyon naakig si Jesus, kag ngaa?

SANG nagkadto si Jesus sa templo ni Jehova, may nakita sia nga nagpaakig gid sa iya. Mahimo nga daw indi mo sia maimadyin nga nagapangakig, bangod kalmado sia nga tawo. (Mateo 21:5) Pero bisan naakig sia kontrolado niya gihapon ang iya kaugalingon, kay ang iya kaakig sadto isa ka matarong nga kasingkal.a Pero ano ang nagpaakig sa sining mahigugmaon sa paghidait nga tawo? Amo ang isa ka kaso sang daku nga inhustisya.

² Importante gid kay Jesus ang templo sa Jerusalem. Sa bilog nga kalibutan, amo lang ini ang sagrado nga lugar nga nadedikar para sa pagsimba sa iya Amay sa langit. Ang mga Judiyo halin sa madamo nga lugar naglakbay sing malayo para magsimba diri. Bisan gani ang mahinadlukon sa Dios nga mga Gentil nag-abot kag nagsulod sa luwang sang templo nga ginhanda para sa ila. Pero sa umpisa sang iya ministeryo, nagsulod si Jesus sa templo kag indi maayo ang iya nakita. Ang lugar nangin daw tiendahan imbes nga isa ka balay nga silimbahan! Puno ini sing mga negosyante kag mga manugbaylo sing kuarta. Ngaa masiling nga inhustisya ini? Kay para sa sini nga mga tawo, ang templo sang Dios isa lang ka lugar para hingalitan kag kawatan pa gani ang iban. Paano?—Juan 2:14.

3, 4. Ano ang natabo sa balay ni Jehova, kag ano ang ginhimo ni Jesus para tadlungon ini?

³ Ang mga lider sang relihion naghimo sing pagsulundan nga isa lang ka klase sang sensilyo ang puede magamit sa pagbayad sing buhis para sa templo. Dapat magpabaylo sang ila kuarta ang mga bisita para may amo sila sini nga sensilyo. Gani nagbutang ang mga manugbaylo sing kuarta sang ila lamesa sa sulod mismo sang templo, kag nagapanukot sila sa kada transaksion. Daku man ang kita sa pagbaligya sing mga sapat. Ang mga bisita nga gusto maghalad puede makabakal sa kay bisan sin-o nga negosyante sa siudad, galing mahimo magsiling ang mga opisyal sa templo nga ang ila mga halad, indi mabaton. Pero, ang mga halad nga ginbakal sa templo sigurado nga batunon. Kon kaisa mahal kaayo ang baligya sang mga negosyante, gani wala sing mahimo ang mga tawo.b Mas malain pa ini sa sakon nga negosyo kay pareho na ini sa pagpangawat.

⁴ Indi mabatas ni Jesus ini nga inhustisya. Balay ini sang iya Amay! Naghimo sia sing latigo nga lubid kag gintabog niya ang mga panong sang mga baka kag mga karnero sa templo. Dayon ginkadtuan niya ang mga manugbaylo sing kuarta kag ginpamaliskad ang ila mga lamesa. Imadyina nga naglinapta sa marmol nga salog ang tanan nga sensilyo! Maisog nga ginmanduan niya ang mga tawo nga nagabaligya sang mga salampati: “Kuhaa ninyo ini diri!” (Juan 2:15, 16) Wala gid sing bisan isa nga nangahas sa pagkontra sa sining maisog nga tawo.

Kon Ano ang Amay, Amo Man ang Anak

5-7. (a) Paano nabal-an ni Jesus kon ano ang katarungan para kay Jehova, kag ano ang matun-an naton paagi sa pagtuon sa halimbawa ni Jesus? (b) Paano gin-atubang ni Jesus ang mga inhustisya nga ginhimo ni Satanas, kag paano niya ini atubangon sa palaabuton?

⁵ Siempre, nagbalik ang mga negosyante. Mga tatlo ka tuig sang ulihi, gintabog sila liwat ni Jesus sa templo. Sini nga tion, ginsulit niya ang ginsiling mismo ni Jehova nga nagapakalain sa mga tawo nga naghimo sa Iya balay nga “kueba sang mga kawatan.” (Jeremias 7:11; Mateo 21:13) Huo, sang makita ni Jesus ang paghingalit sa mga tawo kag ang paghigko sa templo sang Dios, pareho sa iya Amay ang nabatyagan niya. Kag indi ini katingalahan kay sa sulod sang minilyon ka tuig, gintudluan si Jesus sang iya Amay sa langit. Bilang resulta, natun-an niya sing maayo kon ano ang katarungan para kay Jehova. Isa sia ka buhi nga halimbawa sang hulubaton nga, Kon ano ang amay, amo man ang anak. Gani kon gusto naton maintiendihan sing maayo ang kinaiya ni Jehova nga katarungan, dapat naton pamalandungan ang halimbawa ni Jesucristo.—Juan 14:9, 10.

⁶ Ara ang bugtong nga Anak ni Jehova sang indi makatarunganon nga gintawag ni Satanas nga butigon si Jehova nga Dios kag ginduhaduhaan ang pagkamatarong sang Iya paggahom. Pagpasipala gid ini! Nabatian man sang Anak ang akusasyon sang ulihi ni Satanas nga wala sing bisan sin-o ang magaalagad kay Jehova bangod palangga nila sia kundi bangod may makuha sila sa Iya. Sigurado nga nasakitan gid ang matarong nga tagipusuon sang Anak sa sining sala nga akusasyon. Gani sang nabal-an niya nga sia ang gamiton para depensahan ang ngalan sang iya Amay, sigurado nga nalipay gid sia! (2 Corinto 1:20) Paano niya ina himuon?

⁷ Natun-an na naton sa Kapitulo 14 nga ginsabat ni Jesucristo ang akusasyon ni Satanas kay Jehova sa pinakamaayo nga paagi kag indi gid ini makuestyon. Ang ginhimo ni Jesus nangin basihan para matinluan ang balaan nga ngalan sang Dios, nga Jehova, sa tanan nga pagpasipala, pati sa kabutigan nga indi insakto ang Iya perpekto nga paagi sa paggahom. Bilang Pangulo nga Ahente ni Jehova, siguraduhon ni Jesus nga matabo gid ang katarungan sang Dios sa bilog nga uniberso. (Binuhatan 5:31) Ginpakita man niya paagi sa iya mga ginsiling kag gintudlo sang ari sia sa duta kon ano ang katarungan sang Dios. Si Jehova nagsiling parte sa iya: “Ibutang ko sa iya ang akon espiritu, kag ipahibalo niya sa mga pungsod ang katarungan.” (Mateo 12:18) Paano ini gintuman ni Jesus?

Ginpaathag ni Jesus Kon Ano “ang Katarungan”

8-10. (a) Paano ang oral nga mga tradisyon sang Judiyo nga mga lider sang relihion nagpakalain sa mga indi Judiyo kag sa mga babayi? (b) Ngaa nangin kabug-atan ang sugo ni Jehova sa Adlaw nga Inugpahuway bangod sang oral nga mga kasuguan?

⁸ Ginhigugma ni Jesus ang Kasuguan ni Jehova kag ginsunod gid niya ini sa iya kabuhi. Pero sang ari si Jesus sa duta, ginpatiko sang mga lider sang relihion ini nga Kasuguan kag sala ang ila pagpatuman sa sini. Ginsilingan sila ni Jesus: “Makaluluoy kamo nga mga escriba kag mga Fariseo, kamo nga mga salimpapaw! . . . Ginapatumbayaan ninyo ang mas importante nga mga sugo sang Kasuguan may kaangtanan sa katarungan, kaluoy, kag katutom.” (Mateo 23:23) Imbes ipaathag sa mga tawo kon ano “ang katarungan,” ginpaburon sang mga manunudlo sang Kasuguan sang Dios sadto ang katarungan sang Dios. Paano? Binagbinaga ang pila ka halimbawa.

⁹ Ginsugo ni Jehova ang iya katawhan nga magpain sila sa pagano nga mga pungsod sa palibot nila. (1 Hari 11:1, 2) Pero, ginsulsulan sang pila ka panatiko nga mga lider sang relihion ang katawhan nga pakalainon ang tanan nga indi Judiyo. Ginlakip pa gani sang Mishnah ini nga pagsulundan: “Indi pag-ibilin ang mga baka sa mga balay-dalayunan sang mga gentil kay ginasuspetsahan sila nga nagapakig-sex sa sapat.” Ini nga pagpakalain sa tanan nga indi Judiyo wala nagasanto sa ginatudlo sang Mosaikong Kasuguan kag indi matarong. (Levitico 19:34) Ang iban nga mga pagsulundan nga ginhimo sang tawo nagpakanubo sa mga babayi. Ang oral (ukon sa hambal lang) nga sugo nagasiling nga ang isa ka asawa dapat magpaulihi, indi magdungan, sa iya bana kon nagalakat sila. Ang isa ka lalaki indi dapat makig-istorya sa isa ka babayi sa publiko, bisan sa iya mismo asawa. Pareho sang mga ulipon, wala ginatugutan ang mga babayi nga magtestigo sa korte. May ara pa gani isa ka pangamuyo nga sa diin ang mga lalaki nagapasalamat sa Dios nga indi sila mga babayi.

¹⁰ Naghimo sang madamo kaayo nga mga pagsulundan kag regulasyon ang mga lider sang relihion amo nga indi na mabal-an kon diin gid dira ang Kasuguan sang Dios. Halimbawa, ang sugo sa Adlaw nga Inugpahuway nagdumili lang sang pagpangabudlay sa Adlaw nga Inugpahuway. Dapat itigana ini nga adlaw sa pagsimba, pagpakigsuod sa Dios, kag pagpahuway. Pero ginhimo sang mga Fariseo ini nga sugo nga isa ka kabug-atan. Sila ang nagdesisyon kon ano ang buot silingon sang “pagpangabudlay.” Ginkabig nila nga pagpangabudlay ang 39 ka hilikuton, pareho sang pagpangani ukon pagpangayam. Gani indi na mabal-an sang mga tawo kon ano ang puede ukon indi puede himuon sa Adlaw nga Inugpahuway. Madamo sila sang pamangkot pareho sang: Kon ang isa ka tawo nakapatay sing bitik sa Adlaw nga Inugpahuway, nagapangayam bala sia? Kon nangutol sia sing isa ka hakop nga uyas para kaunon samtang nagalakat sia, nagapangani bala sia? Kon ginpaayo niya ang isa ka tawo nga nagamasakit, nagapangabudlay bala sia? Ini nga mga pamangkot ginsabat paagi sa estrikto kag detalyado nga mga pagsulundan.

11, 12. Paano ginpamatukan ni Jesus ang tradisyon sang mga Fariseo nga wala nabase sa Kasulatan?

¹¹ Sa sini nga kahimtangan, paano mabuligan ni Jesus ang mga tawo nga maintiendihan kon ano ang katarungan? Sa iya pagpanudlo kag sa iya pagkabuhi, maisog sia nga nagpanindugan kontra sa mga lider sang relihion sadto. Binagbinaga anay ang pila sang iya mga panudlo. Direkta nga ginpakalain niya ang madamo nga pagsulundan nga ginhimuhimo nila, nga nagasiling: “Ginahimo ninyo nga wala sing pulos ang pulong sang Dios bangod sang inyo tradisyon nga ginpanubli ninyo kag ginpasubli man sa iban.”—Marcos 7:13.

¹² Si Jesus maisog nga nagpanudlo nga sala ang mga Fariseo parte sa sugo sa Adlaw nga Inugpahuway. Ang matuod, wala nila maintiendihan kon ano gid ang katuyuan sadto nga sugo. Ang Mesias, paathag niya, amo ang “Ginuo sang Adlaw nga Inugpahuway” kag gani may kinamatarong sa pag-ayo sa mga tawo sa Adlaw nga Inugpahuway. (Mateo 12:8) Para ipadaku ang punto, naghimo sia sing mga milagro nga pagpang-ayo sa Adlaw nga Inugpahuway. (Lucas 6:7-10) Ini nga mga pagpang-ayo sampol sang pagpang-ayo nga himuon niya sa bilog nga duta sa tion sang iya Isa ka Libo ka Tuig nga Paggahom. Ini nga Milenyo mangin amo ang daku nga Adlaw nga Inugpahuway, kay ang tanan nga matutom nga mga tawo magapahuway na sa ila malawig nga kasakit kag pag-antos bangod sa sala kag kamatayon.

13. Ano nga kasuguan ang ginpatuman sa tapos sang ministeryo sang Cristo sa duta, kag ngaa indi ini pareho sa Mosaikong Kasuguan?

¹³ Maathag man nga ginpakita ni Jesus kon ano ang katarungan paagi sa paghatag sang isa ka bag-o nga kasuguan, “ang kasuguan sang Cristo.” Ginpatuman ini sang matapos niya ang iya ministeryo sa duta. (Galacia 6:2) Indi pareho sang ginsundan sini, ang Mosaikong Kasuguan, ining bag-o nga kasuguan wala nabase sa nasulat nga mga sugo, kundi sa mga prinsipio. Pero, may ara man ini sing pila ka direkta nga mga sugo. Ang isa sini, gintawag ni Jesus nga “bag-o nga sugo.” Gintudluan ni Jesus ang iya mga sumulunod nga dapat maghigugmaanay man sila pareho sa paghigugma niya sa ila. (Juan 13:34, 35) Gani, ang tanan nga nagatuman sang “kasuguan sang Cristo” makilala paagi sa ila gugma sa isa kag isa nga handa magsakripisyo.

Isa ka Buhi nga Halimbawa sang Katarungan

14, 15. Paano ginpakita ni Jesus nga ginkilala niya ang limitasyon sang iya awtoridad, kag ano ang epekto sini sa aton?

¹⁴ Wala lang gintudlo ni Jesus ang parte sa gugma. Ginkabuhi niya ang “kasuguan sang Cristo.” Ginpakita niya ini sa tanan niya nga ginahimo. Binagbinaga ang tatlo ka paagi diin maathag nga ginpakita sang halimbawa ni Jesus kon ano ang katarungan.

¹⁵ Una, naglikaw gid si Jesus sa paghimo sing bisan ano nga klase sang inhustisya. Mahimo natalupangdan mo nga madamo nga inhustisya ang nagakatabo kon ang indi perpekto nga mga tawo mangin matinaastaason kag nagapasobra sa ila awtoridad. Wala ina ginhimo ni Jesus. Isa ka bes, ginpalapitan si Jesus sang isa ka tawo kag nagsiling: “Manunudlo, silinga ang akon utod nga partihan niya ako sang iya palanublion.” Ano ang sabat ni Jesus? “Lalaki, sin-o ang nagtangdo sa akon subong hukom ukon manughusay sa inyo nga duha?” (Lucas 12:13, 14) Ano ang ginatudlo sini sa aton? Ang kaalam ni Jesus, ang iya ikasarang sa paghukom, kag bisan gani ang kadakuon sang awtoridad nga ginhatag sa iya sang Dios labaw sa awtoridad sang bisan sin-o sa duta. Pero, wala sia magpasilabot sa problema sang lalaki, kay wala sia ginhatagan sing awtoridad sa paghimo sini. Halin pa sa iya malawig nga pagkabuhi antes sia nangin tawo, maugdang gid pirme si Jesus. (Judas 9) Ginapakita sini nga si Jesus mapainubuson, kag nagsalig kay Jehova sa pagdesisyon kon ano ang matarong.

16, 17. (a) Paano ginpakita ni Jesus ang katarungan sa iya pagbantala sing maayong balita sang Ginharian sang Dios? (b) Paano ginpakita ni Jesus nga ang iya katarungan may kaluoy?

¹⁶ Ikaduha, ginpakita ni Jesus ang katarungan sa iya pagbantala sing maayong balita sang Ginharian sang Dios. Wala sia sing ginpasulabi. Nagpanikasog gid sia nga bantalaan ang tanan nga klase sang tawo, manggaranon man ukon pigado. Lain gid sia sa mga Fariseo, nga manubo ang panan-aw sa mga pigado kag sa ordinaryo nga mga tawo. Para sa mga Fariseo, indi sila bagay buligan kag ginapakalain sila paagi sa termino nga ʽam-ha·ʼaʹrets, ukon “katawhan sang duta.” Maisog nga gintadlong ni Jesus ini nga inhustisya. Ginhimo niya ini sang gintudlo niya sa mga tawo ang maayong balita, sang nagkaon sia upod sa ila, sang ginpakaon niya sila, gin-ayo sila, ukon sang ginbanhaw pa gani ang iban sa ila. Ginpakita gid niya ang katarungan sang Dios, nga ang gusto amo nga maluwas ang “tanan nga sahi sang tawo.”c—1 Timoteo 2:4.

¹⁷ Ikatlo, pirme ginapakita ni Jesus nga ang iya katarungan may kaluoy. Gintinguhaan gid niya nga buligan ang mga makasasala. (Mateo 9:11-13) Maabtik sia sa pagbulig sa mga tawo nga wala sing ikasarang sa pag-amlig sa ila kaugalingon. Halimbawa, wala mag-ugyon si Jesus sa mga lider sang relihion nga nagatudlo nga indi pagsaligan ang bisan sin-o nga indi Judiyo. Maluluy-on nga ginbuligan niya kag gintudluan ang iban sa ila, bisan pa nga ang iya panguna nga misyon amo ang mga Judiyo. Nagsugot sia nga maghimo sing milagro para mag-ayo ang alagad sang isa ka Romano nga opisyal sang mga soldado, nga nagasiling: “Wala pa ako sing nakita sa Israel nga may subong sini kadaku nga pagtuo.”—Mateo 8:5-13.

18, 19. (a) Paano ginpadunggan ni Jesus ang mga babayi? (b) Paano ang halimbawa ni Jesus nagabulig sa aton nga maintiendihan ang koneksion sang kaisog kag katarungan?

¹⁸ Wala man nagaugyon si Jesus sa panan-aw sang mga tawo sa mga babayi. Maisog nga ginhimo niya kon ano ang matarong. Ang mga Samaritana ginakabig nga indi matinlo pareho sang mga Gentil. Pero, wala nagduhaduha si Jesus nga magbantala sa isa ka Samaritana sa bubon sa Sicar. Ang matuod, sa sini nga babayi una nga ginpakilala ni Jesus ang iya kaugalingon bilang ang ginpromisa nga Mesias. (Juan 4:6, 25, 26) Ang mga Fariseo nagsiling nga ang mga babayi indi dapat pagtudluan sing Kasuguan sang Dios. Pero nanikasog gid si Jesus nga tudluan ang mga babayi. (Lucas 10:38-42) Base sa tradisyon, ang mga babayi indi makahatag sang masaligan nga testimonya. Pero ginpadunggan ni Jesus ang pila ka babayi kay ginhatagan sila sang pribilehiyo nga amo ang una nga makakita sa iya sang mabanhaw sia. Ginsugo pa gani niya sila nga isugid sa lalaki niya nga mga disipulo ining pinakaimportante nga hitabo!—Mateo 28:1-10.

¹⁹ Huo, maathag nga ginpakita ni Jesus sa mga pungsod kon ano ang katarungan. Madamo nga beses niya ini nga ginhimo bisan pa delikado ini para sa iya. Ang halimbawa ni Jesus nagabulig sa aton nga maintiendihan nga ang pagsuporta sa matuod nga katarungan nagakinahanglan sing kaisog. Insakto gid nga gintawag sia nga “ang Leon halin sa tribo ni Juda.” (Bugna 5:5) Dumduma nga ang maisog nga leon pirme ginagamit nga simbulo sang katarungan. Kag sa indi na lang madugay, paluntaron gid ni Jesus ang “katarungan sa duta.”—Isaias 42:4.

Ang Mesianiko nga Hari ‘Magapaluntad sing Katarungan sa Duta’

20, 21. Subong, paano ginasuportahan sang Mesianiko nga Hari ang katarungan sa bilog nga duta kag sa sulod sang Cristianong kongregasyon?

²⁰ Sugod sang nangin Mesianiko nga Hari si Jesus sang 1914, may ginhimo sia para magluntad ang katarungan sa duta. Paano? Ginsuportahan niya ang katumanan sang iya tagna sa Mateo 24:14. Gintudluan sang mga sumulunod ni Jesus sa duta ang mga tawo sa tanan nga pungsod sing kamatuoran parte sa Ginharian ni Jehova. Pareho kay Jesus, wala sila sang may ginpasulabi sa ila pagbantala. Ang tanan, bata ukon tigulang, manggaranon ukon pigado, lalaki ukon babayi, ginhatagan nila sing tsansa nga makilala si Jehova, ang Dios sang katarungan.

²¹ Ginsuportahan man ni Jesus ang katarungan sa sulod sang Cristianong kongregasyon, diin sia ang Ulo. Pareho sa gintagna, ginsigurado niya nga may “dulot nga mga lalaki,” nga amo ang matutom nga Cristianong mga gulang nga nagapanguna sa kongregasyon. (Efeso 4:8-12) Sa ila pagbantay sa pinalangga nga panong sang Dios, ginasunod sini nga mga lalaki ang halimbawa ni Jesucristo sa pagsuporta sa katarungan. Gintandaan gid nila nga gusto ni Jesus nga may katarungan ang pagtratar sa iya mga karnero bisan ano man ang ila posisyon, bisan kilala man sila sa komunidad ukon indi, ukon bisan manggaranon man sila ukon pigado.

22. Ano ang ginabatyag ni Jehova sa grabe nga mga inhustisya sa kalibutan subong, kag ano ang gintangdo niya nga himuon sang iya Anak?

²² Sa indi madugay, paluntaron ni Jesus ang katarungan sa bilog nga duta nga wala pa gid anay matabo. Grabe gid ang inhustisya sa sining sakon nga kalibutan subong. Halimbawa, may mga bata nga nagakapatay bangod wala sila sing makaon. Pero daku gid ang ginagasto sang mga pungsod sa paghimo sang mga armas, kag ginausikan lang sang sakon nga mga tawo ang ila kuarta sa pagpangalipay. Minilyon ka tawo ang nagakapatay kada tuig bangod sang mga problema nga puede kuntani malikawan ukon masolusyunan. Isa lang ini sa madamo nga porma sang inhustisya nga nagapaakig gid kay Jehova. Gani, gintangdo niya ang iya Anak sa isa ka matarong nga pagpakig-away sa sining malain nga kalibutan para permanente nga tapuson ang tanan nga inhustisya.—Bugna 16:14, 16; 19:11-15.

23. Sa tapos sang Armageddon, paano suportahan sang Cristo ang katarungan asta sa wala sing katapusan?

²³ Pero, indi lang kalaglagan sang mga malain ang himuon sang katarungan ni Jehova. Gintangdo man niya ang iya Anak nga maggahom bilang “Prinsipe sang Paghidait.” Sa tapos sang inaway sang Armageddon, paluntaron sang paggahom ni Jesus ang paghidait sa bilog nga duta, kag magagahom sia “paagi sa katarungan.” (Isaias 9:6, 7) Malipay si Jesus nga dulaon ang tanan nga inhustisya nga amo ang rason sang grabe nga pag-antos sa kalibutan. Suportahan gid niya ang perpekto nga katarungan ni Jehova asta sa wala sing katapusan. Gani, importante nga tinguhaan naton nga sundon ang katarungan ni Jehova subong. Tan-awon naton kon paano naton ina mahimo.