Ang Kamut ni Jehova Nag-ubay sa Amon

Gin-asoy ni Simon Kraker

“DAD, ano nga karera ang kuhaon ko?”

“Bueno, Simon, binagbinaga ina sing maayo bangod indi ako ang magdesisyon para sa imo.”

“Huo, Dad, apang mas maayo ang imo nahibaloan bangod may eksperiensia ka na!”

“Siguro, Simon. Madamo sing latagon nga mabinagbinag, kag daw makagalanyat sila tanan, apang diin sini ang magapahalipay gid sa imo?”

“Sige, Dad. Nabinagbinag ko ang musika, ballet, acrobatics, medisina, kag ang pagpari. Interesado ako sa kada isa sini.”

Karon, ano ang imo ginpili kuntani? Ano nga dalanon ang ginlakbayan mo kuntani? Sang maaga nga bahin sang katuigan 1920, may natabo sa akon pamilya nga nag-apektar sang karera nga ginpili ko. Tuguti ako nga isugid ini sa inyo.

Ang akon mga ginikanan, nga si Mary kag Joseph, lunsay natawo sa Austria, apang nagkilalahay sila kag nagpakasal sa Estados Unidos. Sa wala pa magsaylo sa Estados Unidos, nakalakbay na si Dad sa bug-os nga Europa subong isa ka propesyonal nga manugtrumpeta. Busa, ginpat-od niya nga ang tanan sang iya walo ka kabataan indi lamang may maayong akademiko nga edukasyon kundi makatuon man sing musika. Ang biolin amo ang akon amot sa orkestra sang pamilya.

Subong mga Romano Katoliko, handum ni Mom kag ni Dad nga tudloan kami tanan sing relihion. Madumduman ko pa ang akon Romano Katoliko nga Biblia sa amon balay. Kadaku sadto, may puni nga bulawanon nga krus sa madamol nga hapin sini, kag ginsulat sa dumaan Aleman nga tipo. Nakatuon ako diutay sa sini amo kon ngaa ginkabig ko ang Biblia subong Pulong sang Dios.

Sang maaga nga bahin sang katuigan 1920, may yara wala sing bayad nga mga tracts sa Biblia nga ginapanghatag sang isa ka relihion sa atubangan sang amon Holy Trinity Church sa siudad sang Cleveland, Ohio. Ginadala namon ini sa balay kag dayon ginapaanggid namon sa amon Biblia. Ginbalhag sila sang Mga Estudyante sang Biblia, subong amo sadto ang pagkakilala sa Mga Saksi ni Jehova. Ang isa ka tract nga akon gid madumduman bangod nagpahalipay yadto kay Mom amo ang may tema tuhoy sa kahimtangan sang mga patay. Namatyan sia sing duha ka anak nga lalaki sang lapsag pa sila. Gikan sa tract, naton-an niya nga wala sila sa limbo ukon nagaantos sa purgatoryo ukon impierno kundi wala sing pangalibotan sa lulubngan, nga nagahulat sang pagkabanhaw. (Manugwali 9:5, 10; Juan 11:24, 25) Daw ano nga paglipay ang gindala sadto indi lamang kay Mom kundi sa amon tanan!

Pagpili

Nag-athag pa ang Makasulatanhon nga mga kamatuoran sang ginduaw kami sa amon balay sang nagahambal sing Aleman nga Mga Estudyante sang Biblia (Bibelforscher). Samtang ginabaton namon ang dugang pa nga ihibalo gikan sa Biblia, nasapwan namon nga dugang pa nga nagapalayo kami gikan sa Katoliko nga relihion nga napanubli namon. Naglibog ang akon ulo sa sini. Ginhingalanan ako nga Simon sa pagkatawo, Peter sa bunyag, kag Joseph sa kompirmasyon. Nangin kabulig ako sa altar, nakatuon sing Latin nga mga pangamuyo kag mga Misa, kag nakahimo sing nanuhaytuhay nga serbisyo sa relihion. Naglaum ang akon mga ginikanan nga basi magpari ako, kag ang akon determinasyon amo nga makaambit sing bug-os pa sa relihioso nga kabuhi.

Apang, natalupangdan ko nga nagalas-ay na ako sa akon anay mga plano. Indi na yadto isa ka pamangkot kon paano ko malingaw ang mga tawo, mangin bantog nga gymnast, ukon mangin doktor. Sa baylo, ano ang mahimo ko agod mabuligan ang iban sa espirituwal? Wala ko gintamod ang pagkapari sa Romano Katoliko subong sabat.

Ang interes kag hilikuton sang akon mga ginikanan nagliso sa ‘maayong balita sang Ginharian sang Dios’ nga ginabantala sang Mga Estudyante sang Biblia, kag amo man ang sa akon. (Mateo 24:14) Sang 1924 si Mom kag si Dad nagsugod sa pagbantala sing “maayong balita” sa balay kag balay, kag nag-upod ako sa ila. Duha ka tuig sang ulihi, sang 12 anyos ako, narealisar ni Dad nga mahimo na ako mag-isa sa pagbantala. Gani ginhatagan niya ako sing de-bulsa nga Biblia nga magamit ko sa akon pag-ebanghelyo. Sa wala pa ako makagradwar sa hayskol sang 1929, nagdesisyon ako nga idedikar ang akon kaugalingon sa Dios.

Importante Teokratiko nga mga Butang

Kon hunahunaon ko liwat ang kapin sa 60 ka tuig nga nagligad kutob sang ang akon pamilya nagsugod sa pagpakigbahin sa pagbantala sing Ginharian, narealisar ko nga madamo kami sing gin-agihan nga importante nga mga butang sa pag-uswag sang kitaon nga organisasyon sang Dios. Halimbawa, sang 1925 ang The Watch Tower nagbalhag sing artikulo nga “Birth of the Nation.” Nalipay ako sa paghibalo nga si Jehova nagatipon sing sinsero nga mga indibiduwal gikan sa tanan nga pungsod agod mangin iya katawhan. Nahamuot gid ako sa sadtong Makasulatanhon nga punto! Ngaa? Bangod sa akon palibot, mabaskog sadto ang pag-ihig-ihig batok sa mga Judiyo kag mga itom. Apang ang pungsod sang Dios hilway sa tanan nagabahinbahin nga mga puersa—rasa, politika, komersiyo, militar, kag sekta. (Binuhatan 10:34, 35) Nalipay gid ako sa pagbasa sang paathag tuhoy sa tagna sang Isaias kapitulo 66 kag makita ang katumanan sini sa akon adlaw!

Ang kombension sang 1928 sa Detroit, Michigan isa pa ka daku teokratiko nga hitabo para sa amon pamilya. Matuod ina sa duha ka rason. Amo yadto ang nahauna nga kombension nga natambongan sang akon mga ginikanan. Kag sang pagpauli nila, kami nga kabataan naapektohan gid sang ang ila malipayon nga kapagsik nahanungod sa paghimo sing kapin pa sa pag-alagad kay Jehova ginpabutyag nila.—Roma 12:11.

Nian sang 1931 ang organisasyon sang Dios nagdala sa amon sing makakulunyag nga balita. Bag-o na ang amon ngalan—Mga Saksi ni Jehova. Daw ano ka tumalagsahon nga pribilehiyo nga dalhon ang ngalan sang Dios sa atubangan sang mga tawo kag sang mga anghel!—Isaias 43:10-12.

Indi ko gid malipatan ang tuig 1935, sang ang pagkanakilala sang “iban nga mga karnero” kag sang “dakung kadam-an” nag-athag. (Juan 10:16; Bugna 7:9) Nakabulig ini sa madamo nga indibiduwal—lakip ako—sa paghimo sing tikang nga magpabawtismo. Ang bawtismo wala ginpadaku sang maaga nga mga inadlaw ko sa kamatuoran. Sanglit nadedikar ko na ang akon kabuhi kay Jehova nga Dios, nakita ko karon nga nagakaigo nga simbulohan ina nga dedikasyon paagi sa pagpabawtismo sa tubig.

Ang tuig 1938 isa ka tuig sang pag-organisar liwat sa organisasyon. Antes sadto nga tion, may isa lamang ka sentral nga tiliponan sang mga Saksi ni Jehova sa Cleveland—Engineer’s Auditorium, nga gingamit para sa Aleman, Polaco, Ingles, kag iban pa nga hambal. Pagligad sang 1938, ginhimus sang organisasyon sang Dios nga patindugon ang mga kongregasyon sa nanuhaytuhay nga bahin sang siudad. Si Dad kag ang iban sang akon kauturan nga lalaki gintangdo subong mga alagad sa kongregasyon. Ang akon asaynment amo ang sa departamento sang magasin.

Ang tuig 1939 nagdala sing isa pa ka maragtason nga hitabo nga nakabulig sa pagpalig-on sang akon pagtuo kay Jehova kag sa iya kitaon nga organisasyon. Samtang nagahilapit ang inaway, ang The Watchtower nagbalhag sing isa ka artikulo nga natig-ulohan “Neutrality.” Gikan sa sining artikulo, nahangpan ko nga ang katawhan sang Dios dapat makighidait sa tanan, bisan sa tunga sang peligro sang inaway. Nagapasalamat ako bangod ginhanda ako sini para sa mabudlay nga mga tion nga akon buot atubangon sadto.

Subong man sang 1939 nagkadto ako sa Siudad sang Nueva York sa nahaunang tion. Nabatian ko didto ang ikaduha nga presidente sang Watch Tower Society, nga si J. F. Rutherford, nga nagpamulongpulong sa Madison Square Garden. Ang relihioso nga mga kaaway, mga 500 sila, nagtinguha sa paggamo sadto nga miting paagi sa ila paggahod samtang nagahambal si Utod Rutherford. Apang wala ini magmadinalag-on. Nagpadayon sia tubtob natapos ang iya pamulongpulong, kag ang tumalambong nagsabat paagi sa mapagsik nga palakpak.

Ang malapit gid sa akon tagipusuon kag indi ko gid malipatan amo ang internasyonal nga kombension sang 1942 nga ginhiwat sa amon banwa, sa Cleveland. Ang ginpasayod sing lapnag nga pamulongpulong publiko amo “Peace—Can It Last?” Ginpresentar ang Makasulatanhon nga pamatuod agod ipakita nga ang bisan anong paghidait nga himuon sang tawo sa palaabuton indi magadugay.

Gintilawan ang Pagtuo

Amo sadto nga tion nga ang akon pagtuo gintilawan sa hulusayon sang pagkawalay nadampigan. Manedyer ako sa parts and accessory division sang General Motors nga kompanya sang awto. Gintugutan nila ako nga magtrabaho diri sing pakyaw, sa amo nahuptan ko sa una nga duog ang akon hilikuton subong ministro sang relihion. Apang bangod nagabalingaso ang unos sang inaway kag nadalahig na karon ang Estados Unidos, magabuylog bala ako sa inaway ukon magkuha bala ako sing exemption bangod sang akon sekular nga trabaho? Wala ako sing ginpili sa sining duha. Isa ako ka ordenado nga ministro kag may legal ako nga kinamatarong nga ipuera sa serbisyo militar sa sina nga rason. Apang, wala magsugot ang Selective Service Board.

Ang Board nagpanugda: “Sarang ikaw makabuylog sa puersa armada kag makaalagad didto subong isa ka ministro.” “Indi,” sabat ko. “Ang akon rason bangod sang akon konsiensia amo nga ministro ako sang ebanghelyo, kag ginhugod ko ang akon kabuhi sa sina nga hilikuton.”

“Apang sarang mo man ina mahimo sa armada.”

“Indi,” siling ko. “Sarang lamang ako makaalagad sa akon isigkatawo paagi sa ‘maayong balita’ nga masapwan sa Biblia.”

Ang akon kaso gindala sa mataas nga korte. Ginpakita ko sa Korte Pederal nga ang akon amay nalagyo gikan sa Austria kag nagkadto sa Estados Unidos bangod ang iya relihioso nga mga pagtuluohan batok sa pagdala sing armas kag sa pagpakigbahin sa militar.

“Apang indi ka iya magpakig-away,” siling sang hukom. “Bangod sang imo ginhalinan kag paghanas, mangin isa ikaw ka kapelyan.”

“Halangdon nga Hukom, paano ko ina mahimo? Kon indi ako makauyat sing armas bangod sang akon konsiensia, paano ko mapalig-on ang iban nga himuon ini?”

Kabuhi sa Bilanggoan

Walay sapayan sang akon dokumentado nga pamatuod sang akon pagkaministro sang ebanghelyo, sang tigragas sang 1943 ginpamatbatan ako sing lima ka tuig sa pederal nga bilanggoan sa Lewisburg, Pennsylvania. Apang, indi lamang ako ang Saksi sa Lewisburg, kay may yara mga 50 ka iban nga kauturan didto. Sang tion nga ginpaguwa ako, ang kadamuon nagdugang tubtob sa 200.

Ang bilanggoan nagaokupar sing mga isa ka libo ka akre (400 ha) nga duta. Sa sulod sini amo ang mga tinukod nga ginapuy-an sang peligruso nga mga kriminal, isa ka kampo nga uma para sa ginasaligan nga mga bilanggo, kag isa ka minuro nga ginapuy-an sang warden, mga guardia, kag sang iban pa nga manugtatap sa bilanggoan. Ang akon trabaho amo ang pagdul-ong kag pagsugat sa mga bilanggo sa kampo nga uma gikan sa ila ginatrabahoan.

Sang una nga pag-abot ko, ang amon relihioso nga mga miting kag literatura wala gintugutan. Apang regular kami nga nagabaton sing Watchtower nga magasin. Paano ini nangin posible? Ang iban sang mga dumuloaw nga nagalakbay sa kakahoyan nga mga bahin sang duta pakadto sa minuro kag mga tinukod sang bilanggoan mainandamon nga nagahulog sa dalan sing mga magasin nga nasulod sa puyo. Upod ang isa ka utod ginakadtoan namon ini kag ginapangita ang puyo kag ginapasa ang mga unod sini sa iban nga kauturan. Nakatigayon man kami sing literatura paagi sa kaluoy sang isa ka guardia nga nagapuyo sa minuro. Nagabilin sia sing daan nga mga pamantalaan sa balkon sang iya balay. Pag-abot sang tion nga kuhaon na namon ang mga pamantalaan, masami kami makakita sing amon mga magasin sa tunga sang daan nga mga pamantalaan. Sang ulihi, ginpasugtan sang warden ang amon pangabay nga maghiwat sing regular nga mga miting kag magbaton sing literatura sa Biblia.

Sang gindul-ong ko isa ka adlaw ang isa ka grupo sang mga trabahador sa hardin sang warden, kinulbaan gid ako. Sa akon bayo, gintago ko ang libro sang Sosiedad nga The Truth Shall Make You Free. Samtang nagapang-utod sing hilamon ang mga bilanggo, nagpungko ako sa sulod sang trak kag mahalungon nga ginpaguwa ko ang libro. Apang handurawa lamang ang akon kakibot sang ang gamay nga bata nga babayi sang warden hinali nga naglumpat sa likod ko kag nagsiling, “Wa! Ano ang imo ginabasa?”

Sanglit nadakpan niya ako nga nagabasa sing literatura nga dapat kuntani ginbilin ko sa akon selda, ginsingganan ko sia nga isa yadto ka libro nga nagapaathag sang Biblia. Labi pa nga nangusisa sia sang ginpakita ko sa iya ang isa sang mga laragway sang libro. Amo ang laragway sang isa ka tawo nga nagaduko kag nagahubad sang mga posas sa iya tiil. “Madamo nga tawo ang kaangay sina,” siling ko. “Naposasan sila sa dimatuod nga mga ideya sang relihion, kag luyag sila hilwayon ni Jesus bangod sia nagsiling: ‘Ang kamatuoran magahilway sa inyo.’”—Juan 8:32, King James Version.

Sang masunod nga adlaw ang iloy sang bata nagsiling: “Simon, ginsugiran ako sang akon bata nahanungod sa inyo paghambalanay sa Biblia kag sang libro nga ginpakita mo sa iya. Nahamuot gid sia, kag interesado man ako.” Maayo na lang, yadtong makapakibot nga hitabo wala magdul-ong sa malain nga mga resulta.

Kubos sa katunga sang akon sentensya sa bilanggoan ang naalagdan ko. Sa tapos ako ginpaguwa sang 1946, nagbuylog ako dayon liwat sa grupo sang bug-os tion nga payunir nga mga ministro.

Pag-alagad sa Bethel

Ang Glad Nations Theocratic Assembly, nga ginhiwat sa Cleveland sang 1946, isa pa ka importante nga punto sa akon kabuhi. Didto ako nag-aplay sa pagkadto sa Bethel—bug-os tion nga pag-alagad sa ulong-talatapan sang Watchtower Society sa Brooklyn, Nueva York.

Duha ka tiglawas sang Sosiedad, sanday Utod Milton Henschel kag Robert Morgan, ang naghatag sing malip-ot nga paathag tuhoy sa pag-alagad sa Bethel, kag dayon gin-interbyu nila ang mga nagtambong sadto. Ginpalapitan ko sila nga may pangalag-ag. Apang, sang magsugod ang interbyu, maluluy-on gali sila kag mabuot.

“Ngaa luyag mo mag-alagad sa Bethel?” pamangkot sang isa sa mga utod.

“Ginahimo ko ang tanan nga masarangan ko sa pag-alagad kay Jehova subong isa ka payunir,” sabat ko. “Apang kon makakadto ako sa Bethel, napat-od ko nga kapin pa ang mahimo ko.”

“Kon magkadto ka sa Bethel, pat-od nga kapin pa ang imo mahimo,” siling sang isa pa.

Husto sia! Sugod sang akon una nga adlaw sa Bethel, Pebrero 18, 1947, nasapwan ko ang akon pag-alagad diri subong amo ang labing makawiwili kag makapaladya. Ginapasalamatan ko si Jehova kada adlaw nga gintuytuyan ako sang iya kamut padulong sa sining maayo gid nga pribilehiyo sang pag-alagad.—2 Tesalonica 3:5.

Ang mga Pamatuod sang Espiritu sang Dios nga Nakita Namon

Pagligad sang 45 ka tuig nga soltero bangod sang Ginharian, nakit-an ko ang akon “sangkol nga asawa,”—si Grace Suiter—diri mismo sa Brooklyn Bethel. (Hulubaton 31:10) Nagkari sia sa Bethel gikan sa Midwest sang 1939, apang naton-an niya kag sang iya pamilya ang kamatuoran sa California.a Sugod sang amon kasal sang 1959, nasapwan namon nga ang kamut ni Jehova nagaubay sa mga nagahigugma kag nagaalagad sa iya sing matutom.

Sa madamo nga paagi pareho ang ginhalinan namon sang palangga ko nga si Grace. Lunsay kami natawo sang 1914, ang amon mga pamilya nangita sing relihioso nga kamatuoran, kag lunsay kami nagsugod sa pagpakigbahin sing aktibo upod sa amon mga ginikanan sa pamalaybalay nga pagbantala sa pareho nga edad—12. Dugang pa, subong mag-asawa nga nagaalagad sa Bethel, daw ano ka makalilipay nga maeksperiensiahan ang maisugon nga inisyatibo sang organisasyon sang Dios sa pagpasangkad sang hilikuton sa pagpanaksi “tubtob sa ukbong sang duta”!—Binuhatan 1:8

May paghinulsol bala kami bangod napaidalom kami sa kamut sang Dios? Wala siling ni Grace. “Wala kami magmanggaranon sa kalibutanon nga mga butang sa pag-alagad diri sa Bethel,” siling niya. “Ang amon kabuhi nangin manggaranon sa kapin ka dayon nga paagi. Bisan pa wala kami sing kinaugali nga kabataan, madamo gid kami sing espirituwal nga kabataan.”

Wala man ako nagahinulsol! Ang amon ginpili nga dayawon si Jehova sa bug-os tion nga pag-alagad maayo gid. Nakatigayon kami sing bug-os nga kabuhi nga may dungganon nga katuyoan, bangod nagpaubos kami sa “idalom sang gamhanan nga kamut sang Dios.”—1 Pedro 5:6.

[Footnote]

[Laragway sa pahina 23]

Ang akon mga ginikanan, sanday Joseph kag Mary

[Laragway sa pahina 25]

Si Simon kag ang iya asawa nga si Grace