Report sang mga Manugbantala sang Ginharian
Ginapasalamatan Mo Bala ang Pagministeryo sa Publiko?
ANG pamalaybalay nga ministeryo Makasulatanhon, kag kilala ang mga Saksi ni Jehova sa bilog nga kalibutan sa sini nga bahin sang ila pag-alagad sa publiko. (Binuhatan 20:20, 21) Si Jesus nagsiling sa iya mga masigkatumuluo: “Magabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.” (Binuhatan 1:8) Ginapakita sang Binuhatan 5:42 nga ang mga Cristiano sang una ‘nagpamalaybalay’ sa walay untat.
Sa Haiti natabo ang isa ka pag-engkwentrohanay nahanungod sa pamalaybalay nga ministeryo sang mga Saksi ni Jehova. Natabo ini sang masumalang sang isa ka espesyal payunir ang isa ka Protestante nga babayi. Sa tion sang paghambalanay ginpakita sang utod nga lalaki nga ang mga Saksi ni Jehova lamang ang nagabantala sa balay kag balay subong ginabalay sang Biblia. Nagsabat ang babayi nga ang mga katapo sang iya iglesia mahimo man magpamalaybalay kag nakahimo na sini kon kaisa. Amo gid, sang masunod nga Sabado, nasugata sang Saksi ang isa ka grupo nga nagapamalaybalay, nga ginapangunahan sining babayi. Mga isa ka gatos sila sa grupo. Gintawag sang babayi, nga nagapabugal sini, ang utod agod saksihan ini.
Sang masunod nga semana, ginpangunahan sang amo gihapon nga babayi ang isa naman ka grupo kag nalipay sia nga ipakita ini sa utod. Apang, nagsiling sia nga katunga lamang ini sang grupo sang nagligad nga semana. Sang ikap-at nga Sabado ang grupo nabuhinan tubtob sa 20, kag sang ikalima nga Sabado ang babayi isahanon na lang. Sing mapainubuson, nagkadto sia sa utod kag nagbaton: “Ang mga Saksi ni Jehova lamang ang may kamatuoran, kay sila lamang ang makapadayon sang pagpanaksi nga hilikuton kada semana.”
Gintanyagan sang espesyal payunir ang babayi sing pagtuon sa Biblia nga magapakita sa iya kon ngaa ang mga Saksi makapadayon sa pagbantala sa balay kag balay kag kon ngaa ang iban indi. Nagsugot ang babayi. Sia kag ang iya bana nagsugod sa pagtuon kag nag-uswag. Sila nga duha nagapakig-upod na karon sa mga Saksi ni Jehova, makugi nga nagabantala sang Ginharian sing dayag kag sa balay kag balay!
Ang pamalaybalay kag ang iban pa nga mga paagi sa pag-alagad sa publiko dalayawon kag mahigugmaon nga aman nga ginhimus ni Jehova para sa pagpangita sa mga bunayag sing tagipusuon kag buligan sila nga makatuon sang iya mga kinahanglanon para sa kabuhi. Sing nagakahisuno, ang mga Saksi ni Jehova malipayon nga nagapakigbahin sa sini kag sa iban pa nga mga bahin sang ila balaan nga pag-alagad sa Dios. Ang ila panimuot kaanggid sa iya ni apostol Pablo, nga nagsiling: “Nagapasalamat ako kay Cristo Jesus nga aton Ginuo, nga nagapabakod sa akon, bangod nga ginkabig niya ako nga matutom paagi sa pagtangdo sa akon sa ministeryo.”—1 Timoteo 1:12.