Magtindog sing Malig-on sa Cristianong Kahilwayan!

Importante nga mga Punto Gikan sa Mga Taga-Galacia

SI Jehova amo ang Dios sang kahilwayan. (2 Corinto 3:17) Ang iya Anak, si Jesucristo, nagsiling: “Kamo makakilala sang kamatuoran, kag ang kamatuoran magahilway sa inyo.” (Juan 8:32) Kag bilang pag-ilog kay Cristo, ginwali ni apostol Pablo ang maayong balita sang kahilwayan.​—⁠Roma 6:18; 8:⁠21.

Paagi sa pagbantala sinang nagahatag-kahilwayan nga mensahe, gintukod ni Pablo ang mga kongregasyon sa Galacia (isa ka probinsia sang Roma sa Asia Minor) sa iya nahaunang misyonero nga paglakbay (47-48 C.E.). Nahibal-an sang mga taga-Galacia ang desisyon sang Nagadumala nga Hubon nga ang sirkunsisyon wala ginakinahanglan para sa mga Cristiano. (Binuhatan 15:​22-29) Apang ang mga Judaizer nagtinguha nga ulipunon sila paagi sa pag-insister nga magpasirkunsidar sila. Gani ginpadaku ni Pablo ang Cristianong kahilwayan sa sulat nga ginsulat niya sa mga taga-Galacia halin sa Corinto ukon Antioquia sa Siria sang mga 50-52 C.E. Halimbawa, sia nagsiling: “Tungod sa kahilwayan ginhilway kita ni Cristo. Busa magtindog kamo sing malig-on, kag dili magpagota liwat sa kahiolipnan.”​—⁠Galacia 5:⁠1.

Ginapangapinan ni Pablo ang Iya Pagkaapostol

Ginpakita primero ni Pablo nga ang iya pagkaapostol “paagi kay Jesucristo kag sa Dios.” (1:1–2:14) Bangod sang bugna, si Pablo (kaupod sanday Bernabe kag Tito) nagkadto sa Jerusalem nahanungod sa problema sa sirkunsisyon. Didto narealisar nanday Santiago, Cefas (Pedro), kag Juan nga gintugyanan sia nga mangin apostol sa mga pungsod. Kag sang nagbulag sang ulihi si Pedro gikan sa Gentil nga mga tumuluo sa Antioquia bangod nahadlok sia sa Judiyong mga Cristiano gikan sa Jerusalem, ginsabdong sia ni Pablo.

Paano Ginapahayag nga Matarong?

Ginhatag man sang apostol ang makapulukaw nga punto nga paagi lamang sa pagtuo kay Jesucristo nga ang bisan sin-o mapahayag nga matarong. (2:15–3:29) Ang mga taga-Galacia nakabaton sang espiritu sang Dios, indi bangod sang mga buhat sang kasuguan, kundi bangod sang pagbaton sang maayong balita sa pagtuo. Ang matuod nga mga anak ni Abraham may pagtuo, apang ang mga indibiduwal nga nagapanikasog nga pamatud-an ang ila kaugalingon nga matarong paagi sa “mga buhat sang kasuguan yara sa idalom sang pagpakamalaut.” Ngaa? Bangod indi nila matuman ang Kasuguan sing himpit. Sa pagkamatuod, ang Kasuguan nagapadayag sang mga paglapas kag “manugtuytoy tubtob kay Cristo.”

Magtindog nga Malig-on!

Paagi sa iya kamatayon, si Cristo ‘naghilway sadtong yara sa idalom sang kasuguan.’ Apang ang iya mga sumulunod dapat magtindog nga malig-on sa Cristianong kahilwayan. (4:1–6:18) Gani ang mga taga-Galacia kinahanglan magbatu kay bisan sin-o nga nagatinguha sa pagsulay sa ila nga batunon ang gota sang pagkaulipon. Dugang pa, indi nila dapat pag-abusohan ang ila kahilwayan kundi likawan ang “mga buhat sang unod” kag ipakita ang bunga sang espiritu sang Dios. Ang mga nagapanikasog nga mag-ulipon sa ila sa Kasuguan nagahandum “sang maanyag nga dagway sa unod,” nagalikaw sang paghingabot, kag may rason sa pagpabugal. Apang, ginpakita ni Pablo nga ang sirkunsisyon ukon disirkunsisyon walay ano man. Kundi, “ang bag-o nga tinuga.” Ginpangamuyo niya nga ang paghidait kag kaluoy manginsa espirituwal nga Israel, sa mga bag-o nga tinuga.

Ang sulat ni Pablo sa mga taga-Galacia nagbulig sa ila nga mabatuan ang mga nagapanikasog nga mag-ulipon sa ila sa espirituwal. Kabay nga magabulig man ini sa aton nga maipakita ang bunga sang espiritu kag magtindog nga malig-on sa Cristianong kahilwayan.

[Kahon/Piktyur sa pahina 23]

Mga Pat-in: “Walay tawo nga maggamo sa akon,” sulat ni Pablo, “kay ginadala ko sa akon lawas ang mga pat-in ni Jesus.” (Galacia 6:17) Sa dumaan nga mga pagano, ang mga ulipon ginapat-inan agod makilala ang mga nagapanag-iya sa ila. Lainlain nga desinyo ang ginsunog ukon ginsulat sa ila panit. Sa walay duhaduha, ang madamong pisikal nga pagsakit sa lawas ni Pablo bangod sang iya Cristianong pag-alagad nagbilin sing pinalian, nagapamatuod sa ginaangkon niya subong matutom nga ulipon nga kay Cristo, isa nga ginhingabot tungod sa Iya. (2 Corinto 11:​23-27) Mahimo nga amo ini ang “pat-in” nga ginapatuhuyan ni Pablo, ukon mahimo ginahunahuna niya ang kabuhi nga ginkabuhi niya subong isa ka Cristiano, nagapakita sang bunga sang espiritu sang Dios kag nagatuman sang iya ministeryo.

[Piktyur]

Ang Romanong mga ulipon ginpilit sa pag-alagad sa ila agalon, apang si Pablo isa ka kinabubut-on kag malipayon nga ulipon ni Jesucristo