Mag-andam sa Dimatuod nga mga Manalagna!

ANG isa ka mag-asawa nga taga-Brazil nagakatulog na sang gab-i sang mabatian nila nga may mga kawatan nga nagabungkal sang ila balay. Nag-agi ang hinadlukan nga mag-asawa sa bintana sang ila hulot-tulugan kag nagtawag sing pulis. Apang ginnerbios gid ang asawa sa sadto nga natabo amo kon ngaa indi sia makatulog sa ila balay kag gani nagkadto sia sa balay sang iya iloy.

Ang bisan sin-o nga nasudlan na sang makawat sa iya balay ukon nakawatan sa pila ka paagi makasimpatiya sa iya. Ini nga eksperiensia makakululba, kag, sing indi makalilipay, kapin kag kapin nga mga tawo ang nagaantos sini. Apang, may isa ka porma sang pangawat nga mas malala.

Ano ining mas malala nga porma sang pangawat, kag sin-o ang mga kawatan? Ginhatagan kita ni Jesucristo sing pila ka impormasyon nahanungod sini sang magsiling sia tuhoy sa aton adlaw: “Magalutaw ang madamo nga dimatuod nga manalagna kag magapatalang sang madamo.” (Mateo 24:11) Ang dimatuod nga mga manalagna mga kawatan. Ano ang ila ginapangawat? Nagapangawat sila paagi sa ila pagpanagna. Gani agod mahangpan ini sing bug-os, dapat naton anay hibaluon kon ano ang pagpanagna suno sa Biblia.

Ang Buot Silingon sang Pagpanagna

Kon ginahunahuna mo ang pagpanagna, mahimo nga ang una nga butang nga magasulod sa imo hunahuna amo ang pagtagna sang palaabuton. Amo sini sa pagkamatuod ang isa ka bahin sang hilikuton sang mga manalagna anay sang Dios, apang indi ini ang ila panguna nga hilikuton. Halimbawa, sang ginsugo si manalagna Ezequiel sa isa ka palanan-awon nga “tagna sa hangin,” ang iya lamang himuon amo nga ipahibalo ang sugo gikan sa Dios. (Ezequiel 37:9,10) Sang si Jesus ginabista sa atubangan sang mga saserdote, ginduplaan sia kag gintampa, kag ang mga nagahingabot sa iya mayagutaon nga nagsiling: “Itagna sa amon, ikaw nga Cristo. Sin-o bala ang nagsumbag sa imo?” Wala nila ginpangabay si Jesus nga itagna ang palaabuton. Ginhangkat nila sia nga itudlo paagi sa gahom sang Dios kon sin-o ang nagsumbag sa iya.—Mateo 26:67,68.

Sa kamatuoran, ang una nga ideya nga ginpaliton sang mga tinaga sang orihinal nga hambal sa Biblia nga ginbadbad “nagtagna” ukon “tagna” nagakahulugan sing pagpahibalo sang hunahuna sang Dios tuhoy sa isa ka butang, ukon subong sang ginasiling sang tulun-an sang Mga Binuhatan, ipamulong “ang dalagku nga mga buhat sang Dios.” (Binuhatan 2:11) Sa amo sini nga kahulugan nga ginakawatan sang dimatuod nga mga manalagna ang madamo nga tawo.

Apang, sin-o ang dimatuod nga mga manalagna, kag ano ang ila ginapangawat? Agod masabat ining pamangkot, balikan naton ang maragtas sang pungsod sang Israel sang tion ni Jeremias.