Report sang mga Manugbantala sang Ginharian
Mabungahon ang Pagtuptop sa Nabaw-ing nga Teritoryo sa Paraguay
ANG sanga talatapan sang Watch Tower Society sa Paraguay nakahibalo gid sang kinahanglanon nga ibantala ang maayong balita sang Ginharian sa tanan nga teritoryo sini. (Binuhatan 1:8) Karon na ang tion sang tanan nga magtuon tuhoy sa Ginharian kag mag-alagad kay Jehova antes niya laglagon ining malauton nga sistema sa nagapakari nga “dakung kapipit-an.” (Mateo 24:21, 22) Ginapakita sang masunod nga mga eksperiensia kon ano ang ginahimo nga bulig sa mga tawo sa mga teritoryo nga wala pa matuptupan. Ang sanga nagareport:
Ginhimo ang mga kahimusan agod tuptupan ang wala pa matandog nga mga teritoryo paagi sa temporaryo nga mga espesyal payunir. Sang mga bulan kutob sang Nobiembre tubtob Enero 1990 nga tuig sang pag-alagad, 39 ka mga kauturan nga lalaki kag babayi ang nagtuptop sa mga ginatos ka siudad kag magamay nga mga banwa sa kabilugan diin wala pa gid sing mga manugbantala sang Ginharian. Nakapahamtang sila sing mga 6,119 ka libro, 4,262 ka bukleta, kag 5,144 ka magasin. Subong resulta sini nga pagpanghikot, bag-o nga mga grupo sang mga manugbantala ang natukod.
◻ Ang isa ka babayi nagbaton gikan sa utod nga babayi nga payunir nga nagpanghikot sa wala pa matuptupan nga teritoryo sing libro nga Mahimu Ka Mabuhi sing Dayon sa Paraiso sa Duta. Gintanyagan sia sang payunir sang pagtuon sa Biblia, kag malipayon niya nga ginbaton. Sang magbalik ang payunir, nagahulat sa iya indi lamang ang babayi kundi ang iya bana man kag ang napulo nila ka kabataan. Sang masunod nga pagduaw, ang amo nga pamilya upod sang ila mga kaingod kag mga abyan nakahanda na sa pagtuon sang Biblia! Gin-agda sila sang babayi kag nagsiling nga maayo gid ang pagtuon kag nga ang paglaum kag mga pagpakamaayo nga ihatag ni Jehova tuman gid ka makadalayaw. Wala pa gid sing nakasugid sang kasubong sini sa iya, gani ginbatyag niya nga dapat man nga makabati ang iya mga kaingod kag mga abyan tuhoy sining maayong balita.
Sa tagsa ka paghiwat sang payunir sing pagtuon, madamo pirme ang nagatambong nga daw nangin kaangay ini sang isa ka diutay nga kongregasyon. Madamo sing pamangkot ining mga interesado kag nagapakigbahin sila sa pagtuon. Sang ginsiling sang payunir nga kon matuptupan na ang teritoryo, masaylo sila sang iya kaupod sa bag-o nga duog, ang interesado nga babayi may kabalaka nga namangkot kon paano na lang sila. Ginhimos nga ang isa ka utod nga lalaki gikan sa malapit nga kongregasyon amo ang magpadayon sa pagdumala sang pagtuon. Sa karon may mga espesyal payunir nga gin-asayn agod nga buligan ining mga interesado, tulad karnero nga mga tawo.
◻ Samtang nagapamalaybalay sa isa ka wala pa matuptupan nga teritoryo, nasapwan sang isa ka payunir nga utod nga babayi ang isa ka tawo nga sang nagligad nga napulo ka tuig nakabaton sing libro nga Ang Kamatuoran nga Nagadul-ong sa Kabuhi nga Dayon. Sugod sadto wala na sia makapakig-angot sa mga Saksi ni Jehova. Walay sapayan, nahibaluan niya nga si Jehova, nga ginatawag niya nga si Jehova sang kasuldadusan, amo lamang ang matuod nga Dios kag Sia lamang ang dapat nga simbahon. Sa iya kaugalingon nga pagpanghikot, ginasugid niya ang tuhoy kay Jehova sa kay bisan sin-o nga iya kakilala. Sa pagkamatuod, tagsa ka semana nagalakat sia sang tatlo ka kilometro agod duawon ang interesado nga mag-asawa agod sugilanunon sila tuhoy sa Dios bangod, subong sang ginsiling niya, ‘kon mag-untat ako sa pagduaw sa ila, malipatan nila ang tuhoy kay Jehova.’ Dugang sa sini nga mag-asawa, may yara pa napulo nga maluyag magtuon sang Biblia—ini tanan bangod ining interesado nga tawo nagpanaksi sa ila.
Sing talalupangdon, mga pila lamang ka adlaw antes makadtuan sang payunir, ini gihapon nga tawo wala magtugot sa lokal nga pari kag sa prosesyon sini nga magsulod sa iya balay nga dala ang imahen sang birhen, nagapaathag nga wala sia nagatuo sa mga larawan. Naakig ang pari. Sa sina nga gab-i nangamuyo sia kay Jehova para sa bulig. Gani hunahunaa kon daw ano ang iya kakunyag kag kalipay sang magduaw sa iya ang payunir! Ginhimos sa gilayon ang isa ka sistematiko nga pagtuon sa Biblia, kag ining tawo nagpadayon sa pag-uswag sa pagpakig-angot sa teokratikong organisasyon.
Sa pagkamatuod, ginapakamaayo gid ni Jehova ang hilikuton sang pagtipon sa Paraguay samtang ginapaninguhaan sang mga kauturan ang paghikot sing maid-id sa sining wala pa makobrehan nga mga teritoryo.—Mateo 24:14.