Pagtipon Upod sa mga Nagakahadlok sa Dios

“ANG mga tawo bisan diin nagakahidlaw sa kahilwayan gikan sa kahadlok​—⁠kahadlok sa kasingki, kahadlok sa pagkawalay palamugnan, kag kahadlok sa malubha nga balatian. Ginaambitan naton ina nga pagkahidlaw. . . . Ngaa, kon amo, ginahambalan naton kon paano mapalambo ang kahadlok?” Inang makawiwili nga pamangkot ginpautwas sang humalambal nga naghatag sang sadsaran nga pamulongpulong sa tagsa sang “Diosnon nga Kahadlok” nga Distrito nga mga Kombension, nga nagsugod sang Hunyo 1994.

Ang minilyon nga nagtambong​—⁠una sa North America, nian sang ulihi sa Europa, Central kag South America, Aprika, Asia, kag sa mga kapuluan sang dagat​—⁠nalangkag sa pagtuon nga mapalambo ina nga kahadlok. Ngaa? Bangod ang pag-ambit naton sa mga pagpakamaayo ni Jehova nga Dios para sa iya katawhan nagasandig sa pagtigayon naton sing diosnon nga kahadlok. Ang mga kombensionista nagtipon sing tingob agod tun-an ang nahanungod sa diosnon nga kahadlok, kag sa sulod sang tatlo-ka-adlaw nga programa, daku ang ila natun-an nahanungod sining kinahanglanon nga Cristianong kinaiya.

‘Magkahadlok sa Dios kag Magtuman sang Iya mga Sugo’

Amo sina ang tema sa nahaunang adlaw sang kombension, pasad sa Manugwali 12:13. Ano ang kahulugan sang pagkahadlok sa Dios? Sa nahauna gid nga bahin sang programa, ginpa­athag sang tsirman sang kombension nga ang diosnon nga kahadlok nagapabanaag sing kahayanghag kag lubos nga pagtahod kay Jehova ­subong man sing nagakaigo nga pagkahadlok nga indi sia mapahamut-an. Inang diosnon nga kahadlok indi malain; maayo ini kag nagakaigo.

Paano kita makabenepisyo sa sining maayo nga kahadlok? Ang masunod nga pamulongpulong, “Indi Manglapyo kag Mangluya,” nagpaathag nga ang diosnon nga kahadlok magapahulag sa aton sa pagtuman sang mga sugo sang Dios nga may kalipay. Upod ang gugma sa Dios kag sa isigkatawo, ina nga kahadlok magahatag sa aton sing espirituwal nga kusog. Huo, ang diosnon nga kahadlok makabulig sa aton sa paglikaw sang paghinay sa palumba para sa kabuhi nga walay katapusan.

Ang masunod sa programa amo ang mga interbyu nga nagahatag sing buhi nga pamatuod nga ang diosnon nga kahadlok makasakdag sa aton. Ginsugid sang mga gin-interbyu kon paano sila naimpluwensiahan sang talahuron nga pagkahadlok sa Dios agod magpadayon sa ministeryo walay sapayan sang dipagsapak, walay interes, ukon paghingabot kag nagbulig sa ila sa pagbatas walay sapayan sang mabudlay nga personal nga mga pagtilaw.

Apang, ngaa ang iban nga mga tawo may diosnon nga kahadlok samtang ang iban wala? Sa pamulongpulong nga “Pagpalambo kag Pagpanginpulos Gikan sa Diosnon nga Kahadlok,” ginpaathag sang humalambal nga naghatag sang sadsaran nga pamulongpulong nga sa Jeremias 32:​37-39, nanaad si Jehova nga hatagan Niya sing mahinadlukon-sa-Dios nga tagipusuon ang Iya katawhan. Gintanum ni Jehova ang diosnon nga kahadlok sa aton mga tagipusuon. Paano? Paagi sa iya balaan nga espiritu kag sa iya inspirado nga Pulong, ang Biblia. Apang, sing maathag, dapat kita manikasog sing hanuot nga tun-an ang Pulong sang Dios kag himuslan sing bug-os ang buganang espirituwal nga mga aman nga ginaaman niya. Nagalakip ini sang aton mga kombension kag mga miting sa kongregasyon, nga nagabulig sa aton sa pagtuon nga kahadlukan sia.

Ang programa sa hapon ginbuksan sang laygay nga magsalig kay Jehova kag sa iya Pulong. Ginsundan ini sang isa ka paghinun-anon nahanungod sa pangunang mga paagi nga ang Ginharian dapat magaapektar sa aton kabuhi subong mga Cristiano.

Ang masunod amo ang nahauna sa tatlo ka simposium nga ginhatag sa kombension. “Ang Diosnon nga Kahadlok Nagapahulag sa Aton sa Pagtuman sang mga Sugo sang Dios” amo ang tema sini nga simposium, nga naghatag sing igtalupangod sa pamilya. Ang masunod amo ang halimbawa sang Makasulatanhon​—⁠kag praktikal⁠—​nga laygay nga ginhatag.

□ Para sa mga bana: Ang diosnon nga kahadlok dapat magapahulag sa lalaki nga higugmaon ang iya asawa subong sang iya kaugalingon nga lawas. (Efeso 5:​28, 29) Wala ginahalitan sing hungod sang bana ang iya kaugalingon nga lawas, ginapakahuy-an ang iya kaugalingon sa atubangan sang iya mga abyan, ukon ginakutsokutso ang iya mga kakulangan. Gani, nian, dapat niya tamdon ang iya asawa nga may dignidad kag pagtahod kaangay sang pagtamod niya sa iya kaugalingon.

□ Para sa mga asawa: Ang diosnon nga kahadlok ni Jesus nagpahulag sa iya nga ‘pirme pahamut-an ang Dios.’ (Juan 8:29) Amo ini ang maayo nga espiritu nga dapat ilugon sang mga asawa sa pagpakig-angot sa ila mga bana.

□ Para sa mga ginikanan: Ang Cristianong mga ginikanan mahimo makapakita sing diosnon nga kahadlok paagi sa paghimo sing hanuot sang mga responsabilidad sang mga ginikanan, nagatamod sang ila kabataan subong palanublion halin kay Jehova. (Salmo 127:⁠3) Ang pangunang tulumuron sang mga ginikanan amo ang pagpadaku sa ila kabataan nga mangin matuod nga mga Cristiano.

□ Para sa kabataan: Ginatudluan ni Jehova ang kabataan nga tumanon ang ila “mga ginikanan nga nahiusa sa Ginuo.” (Efeso 6:⁠1) Gani, ang pagtuman sa ila mga ginikanan pagtuman sa Dios.

Ang katapusan nga pamulongpulong sa sina nga adlaw nag-apektar sang aton mga balatyagon, kay ginpaathag sini ang tudok nga mga balatyagon nga ginabatyag naton tanan kon mamatyan sing hinigugma. Walay sapayan, sa mga tungatunga sang pamulongpulong, may isa ka sorpresa. Ginpahalipay sang humalambal ang tumalambong paagi sa pagpahibalo sang pagpaguwa sang bag-ong brosyur nga Kon ang Isa nga Ginahigugma Mo Mapatay. Ining 32-ka-pahina, de-kolor nga publikasyon madamo sing masiling nga makabulig sa mga nagapangalisud agod mahangpan kag maatubang ang mga balatyagon kag mga emosyon nga nagalutaw kon mapatay ang isa nga ginahigugma. Indi mo bala mahibaluan kon ano ang isiling sa isa ka nalisdan nga tawo? Ang isa ka seksion sini nga brosyur nagahinun-anon kon paano naton mabuligan yadtong ­nagapangalisud. Samtang nagapamati sa humalambal, ginahunahuna sang madamo sa tumalambong ang isa nga mahimo makabenepisyo gikan sa sining bag-ong brosyur.

‘Himua ang Balaan nga Pag-alagad nga May Diosnon nga Kahadlok kag Kahayanghag’

Amo sina ang tema sa ikaduha nga adlaw, pasad sa Hebreo 12:28. Ang ikaduha nga simposium, “Ang mga Kongregasyon nga Nagalakat sa Kahadlok kay Jehova,” ginhatag sa programa sang aga. Ang una nga bahin naghinun-anon nahanungod sa pagtambong sa mga miting. Ang pagtambong naton sa mga miting nagapakita sang aton pagtahod sa Dios kag sa iya espirituwal nga mga aman. Paagi sa pagtambong, ginapakita naton nga ginakahadlukan naton ang iya ngalan kag nalangkag sa pagtuman sang iya kabubut-on. (Hebreo 10:​24, 25) Ginpaathag sang ikaduha nga humalambal nga agod ang kongregasyon subong kabilugan magalakat sa kahadlok kay Jehova, ang tagsa ka indibiduwal dapat magahimo sang iya bahin sa paghupot sing maayo nga paggawi. Ang katapusan nga humalambal nagpamulongpulong nahanungod sa pribilehiyo kag katungdanan sang tanan nga Cristiano​—⁠ang pagbantala sang maayong balita sa walay langan. Daw ano kalawig kita magapadayon sa pagbantala? Tubtob magasiling si Jehova nga husto na.​—⁠Isaias 6:⁠11.

“Ang Kalipay ni Jehova Amo ang Aton Kuta” amo ang tema sang masunod nga pamulongpulong, subong sang ginatuptupan karon sa mga artikulo nga tulun-an sa sining magasin. (Nehemias 8:10) Ngaa malipayon ang katawhan ni Jehova? Ginbalay sang humalambal ang pila ka rason. Ang isa gid ka talalupangdon amo nga ang suod nga kaangtanan sa Dios nagahimo sa aton nga ang labing malipayon nga katawhan sa duta. Hunahunaa lamang, pahanumdom sang humalambal sa mga kombensionista, pribilehiyo naton ang malakip sa tunga sang katawhan nga ginbuyok ni Jehova kay Jesucristo. (Juan 6:44) Daw ano ka daku nga rason sa pagkalipay!

Ang tumalagsahon sa tagsa ka kombension amo ang bawtismo, kag nalakip man sa sini ang “Diosnon nga Kahadlok” nga mga Kombension. Sa pamulongpulong nga “Dedikasyon kag Bawtismo sa Kahadlok kay Jehova,” ginpaathag sang humalambal nga apat ang personal nga mga obligasyon sang tanan nga bawtismado nga katawhan: (1) Dapat naton tun-an ang Pulong sang Dios sa bulig sang mga publikasyon nga nagabulig sa aton sa paghangop kag sa pag-aplikar sini; (2) dapat kita mangamuyo, (3) dapat kita makig-upod sa mga masigkatumuluo sa mga miting sa kongregasyon; kag (4) dapat kita magpanaksi sa ngalan kag Ginharian ni Jehova.

Ang programa sang Sabado sang hapon nagsugod paagi sa makapasalig liwat nga topiko nga “Isa ka Katawhan nga Wala Ginsikway ni Jehova.” Sang nagligad nga katluan kag lima ka siglo, sang ang pungsod sang Israel nag-atubang sing mabudlay nga mga tion, si Jehova naghatag sing garantiya paagi kay Moises, nga nagasiling: “Si Jehova nga imo Dios . . . indi magpabaya sa imo ukon magbiya sing lubos sa imo.” (Deuteronomio 31:⁠6) Ginpamatud-an ni Jehova ina nga garantiya paagi sa pag-amlig sa mga Israelinhon sang nagsulod sila sa Ginsaad nga Duta kag ginpanag-iyahan ini. Sa karon, kon nagaatubang sing mabudlay nga mga pagtilaw, makasalig man kita sing bug-os nga si Jehova indi magasikway sa aton, lamang nga magpabilin kita nga suod sa iya kag magpamati sa laygay sang iya Pulong.

Paano ka makasapo sing kalipay sa pagbasa sa Biblia? Sa pamulongpulong nga “Basaha ang Pulong sang Dios, ang Balaan nga Biblia, Adlaw-adlaw,” ang humalambal nagpanugda sang pagbasa nga may mausisaon nga hunahuna kag sang pagpamangkot subong sini: Ano ang ginatudlo sini nga kasaysayan sa akon nahanungod sa mga kinaiya kag mga dalanon ni Jehova? Paano ako labi pa nga mangin kaangay ni Jehova sa sining mga bahin? Ang pagbasa sa Biblia sa sining paagi isa ka makalilipay kag makaalayaw nga eksperiensia.

Masunod nga ginpatuhoy ang igtalupangod sa ikatlo nga simposium sang programa, “Mga Aman sa Pagbulig sa mga Nagakahadlok kay Jehova.” Bisan pa nga si Jehova wala nagahimo sing mga milagro tungod sa iya mga alagad sa karon, pat-od gid nga nagahatag sia sing bulig sa mga nagakahadlok sa iya. (2 Pedro 2:⁠9) Ginbinagbinag sini nga simposium ang apat ka aman halin kay Jehova sa pagbulig sa aton sa sining makahalanguyos nga mga tion: (1) Paagi sa iya espiritu, si Jehova nagahatag sa aton sing gahom sa paghimo sang mga buhat nga labaw sa aton kaugalingon nga kusog. (2) Paagi sa iya Pulong, nagaaman sia sing laygay kag panuytoy para sa aton. (3) Paagi sa gawad, nagahatag sia sa aton sing matinlo nga konsiensia. (4) Paagi sa iya organisasyon, lakip ang mga gulang, nagaaman sia sing panuytoy kag pangamlig. (Lucas 11:13; Efeso 1:7; 2 Timoteo 3:16; Hebreo 13:17) Paagi sa paghimulos sing bug-os sa sining mga aman, sarang naton mabatas kag busa maagom ang kahamuot ni Jehova.

Ang katapusan nga pamulongpulong sang Sabado sang hapon gintig-uluhan nga “Ang Makakulugmat nga Adlaw ni Jehova Malapit Na,” pasad sa tagna ni Malaquias. May makakulugmat nga mga adlaw sadto anay sang nagligad nga maragtas, subong sang ginpatuman ang paghukom sa Jerusalem sang 70 C.E. Apang ang labing makakulugmat nga adlaw nga maagihan sang bug-os nga katawhan amo ang nagapakari nga adlaw ni Jehova nga ‘ang mga wala nagakilala sa Dios kag wala nagatuman sang maayong balita sang aton Ginuong Jesus pagatimalusan.’ (2 Tesalonica 1:​6-8) Daw ano na ina kalapit? Ang humalambal nagsiling: “Ang katapusan malapit na! Nahibaluan ni Jehova ina nga adlaw kag takna. Indi niya pagbag-uhon ang iya orasan. Dapat kita magbatas sing mapailubon.”

Mabudlay mapatihan nga ang duha ka adlaw nakaligad na. Ano ang programa sa katapusan nga adlaw?

“Kahadluki Ninyo ang Dios kag Hatagi Sia sing Himaya”

Ang tema sa ikatlo nga adlaw ginpasad sa Bugna 14:⁠7. Sa programa sang aga, ang serye sang mga pamulongpulong nagpadaku sang pila ka doktrina nga mga panudlo nga nagapakilala sa mga Saksi ni Jehova gikan sa tanan iban pa nga relihiosong mga organisasyon.

Sa pamulongpulong nga “May Pagkabanhaw sang mga Matarong,” ang humalambal nagpautwas sing makawiwili nga pamangkot: “Sa sinang isa ka libo ka tuig nga Adlaw sang Paghukom, san-o bala banhawon ang mga napatay nga matutom sa sining ulihi nga mga tinuig sang sistema sang mga butang ni Satanas?” Ang sabat? “Ang Biblia wala nagasugid,” paathag sang humalambal. “Apang, indi bala makatarunganon nga yadtong nagkalamatay sa aton adlaw pagabanhawon sing una agod makigbahin upod sa dakung kadam-an sang mga makalampuwas sa Armagedon sa dakung hilikuton sa pagpanudlo nga pagahimuon sa bug-os nga Adlaw sang Paghukom? Huo, sa pagkamatuod!” May mga makalampuwas bala? Pat-od nga may yara. Ang mga panudlo kag mga halimbawa sa Biblia nga nagapasalig sini sa aton ginpaathag sing maayo sa masunod nga pamulongpulong, “Nakalampuwas nga Buhi sa Dakung Kapipit-an.”

Madugay na nahangpan sang mga Saksi ni Jehova nga ang Biblia nagahatag sing duha ka kaladtuan​—⁠walay katapusan nga kabuhi sa paraiso sa duta para sa dimaisip nga minilyon kag dimamalatyon nga langitnon nga kabuhi para sa limitado nga kadamuon nga magagahom kaupod ni Cristo sa iya Ginharian. Ang langitnon nga paglaum ginpaathag sa pamulongpulong nga “Dili Mahadlok, Diutay nga Panong.” (Lucas 12:32) Bangod sang karon nga kahimtangan sa kalibutan, ang diutay nga panong indi dapat mahadlok; ang kada isa sa ila dapat magbatas tubtob sa katapusan. (Lucas 21:19) “Ang ila pagkawalay-kahadlok,” siling sang humalambal, “nagapalig-on sa dakung kadam-an. Dapat man nila palambuon ang panimuot sang pagkawalay-kahadlok samtang ginahulat nila ang pagkalampuwas sa labing daku nga tion sang kagamo nga nakilal-an sa duta.”

Sa paghinakop sang programa sa aga, ang tumalambong nagtan-aw nga may kalipay sa drama sa Biblia nga Mga Pililian nga Dapat Ninyo Desisyunan. Sadtong panahon ni Josue, kag subong man ni manalagna Elias, ang mga Israelinhon dapat maghimo sing desisyon. Dapat sila magpili. Si Elias nagsiling: “Tubtob pa bala san-o magpiniang kamo sa tunga sang duha ka magkatuhay nga panghunahuna? Kon si Jehova among matuod nga Dios, sunda sia; apang kon si Baal, nian sunda sia.” (1 Hari 18:21) Sa karon, ang katawhan dapat man maghimo sing desisyon. Indi ini ang tion agod magpiniang sa duha ka magkatuhay nga panghunahuna. Ano ang husto nga pagpili? Ang ginpili ni Josue sang una. Sia nagsiling: “Nahanungod sa akon kag sa akon panimalay, magaalagad kami kay Jehova.”​—⁠Josue 24:⁠15.

Daw sa hinali lamang, Domingo na sang hapon kag tion na para sa diskurso publiko nga natig-uluhan sing “Kon Ngaa Magkahadlok sa Matuod nga Dios Karon.” Sa Bugna 14:​6, 7, ang tanan nga katawhan ginalaygayan: “Kahadluki ninyo ang Dios kag hatagi sia sing himaya.” Ngaa hilingagawon nga kahadlukan ang Dios karon? Bangod, subong sang padayon nga ginasiling sang kasulatan, “nag-abot na ang takna sang iya paghukom.” Paagi sa iya Anak, nga nagalingkod karon subong Hari sang langitnon nga Ginharian sang Dios, tapuson ni Jehova ang karon dimatinlo, mabinatuon nga sistema sang mga butang. Ginpaathag sang humalambal nga amo lamang ini ang paagi sa paghatag sing paumpaw sa mga nagakahadlok sa Dios subong man sa pagluwas kag sa pag-amlig sa aton dutan-on nga puluy-an. Sanglit amo ini ang katapusan nga mga adlaw sining sistema sang mga butang, hilingagawon nga kahadlukan naton ang matuod nga Dios karon!

Pagkatapos sang sumaryo sa leksion sa Ang Lalantawan sadto nga semana, ang katapusan nga humalambal nagkadto sa entablado. Subong resulta sang programa sang kombension, ang diosnon nga kahadlok may daku pa nga kahulugan para sa mga kombensionista, paathag niya. Ginpadaku niya ang madamong benepisyo nga matigayon sadtong nagakahadlok sa Dios. Ginpahibalo sang humalambal ang pagpaguwa sa bag-ong vid­eo​—⁠United by Divine Teaching. Ginapatalupangod sini ang pinasahi nga mga bahin sang “Balaan nga Panudlo” nga Internasyonal nga mga Kombension nga ginhiwat sang 1993-94. Samtang nagahingapos ang pamulongpulong, madamo ang nagpalibog, ‘Ano ang paabuton naton sa masunod nga tuig?’ Ang tatlo-ka-adlaw nga distrito nga mga kombension sa madamong lugar.

Sa katapusan, ginpatuhuyan sang humalambal ang Malaquias 3:​16, nga nagasiling: “Sadto nga tion ang mga nagakahadlok kay Jehova nagsinilingay, ang kada isa sa iya kaupod, kag si Jehova padayon nga nagdungog kag nagpamati. Kag ang tulun-an nga handumanan ginsugdan nga isulat sa atubangan niya tungod sa mga nagakahadlok kay Jehova kag tungod sa nagpainoino sa iya ngalan.” Ang mga kombensionista nagpauli upod ang maathag nga determinasyon nga hunahunaon ang ngalan ni Jehova kag alagaron sia nga may diosnon nga kahadlok.

[Retrato sa pahina 24]

Ang mga kandidato sa bawtismo dapat padayon nga magpakita sing diosnon nga kahadlok

[Retrato sa pahina 25]

Ang drama nga “Mga Pililian nga Dapat Ninyo Desisyunan” nagpatudok sa mga tagpalamati sang kinahanglanon nga mangin mapinamat-uron tuhoy sa pag-alagad kay Jehova

[Retrato sa pahina 26]

Ang mga kombensionista nalipay sa pagbaton sang bag-ong brosyur nga “Kon ang Isa nga Ginahigugma Mo Mapatay”