Kahadlok sa Dios—Makabenepisyo Ka Bala sa Sini?
“Magkahadlok sa matuod nga Dios kag magbantay sa iya mga sugo. Kay amo ini ang bug-os nga katungdanan sang tawo.”—MANUGWALI 12:13.
1, 2. (a) Sa ano dapat ipasad ang aton pagsimba sa Dios? (b) Apang, ano pa ang ginakinahanglan sang Dios? (Deuteronomio 10:12)
MAKATILINGALA bala sa imo ang ekspresyon nga “kahadlok sa Dios”? Madamo ang nagapati nga kon ginahigugma gid nila ang Dios, indi man sila dapat mahadlok sa iya. Dapat bala nga himuon naton ining duha? Kon amo, paano kita makabenepisyo sa kahadlok sa Dios?
2 Ginapakita sang Kasulatan nga ang aton pagsimba kag pag-alagad sa Dios dapat napasad sa gugma. Maathag ini nga ginpakita ni Jesus sang ginsugo niya kita nga higugmaon si Jehova sa aton bug-os nga tagipusuon, kalag, hunahuna, kag kusog. (Marcos 12:30) Apang ang pagkaimportante sang pagkahadlok sa Dios ginpadaku man sa iya Pulong. Sing maathag gid, ginasilingan kita sa Manugwali 12:13: “Magkahadlok sa Dios kag magbantay sa iya mga sugo. Kay amo ini ang bug-os nga katungdanan sang tawo.” Wala bala nagakasinanto si Jehova sa pagpangabay sa aton nga kahadlukan sia kag higugmaon sia sa amo man nga tion?
3. Nahanungod sa kahadlok, ano ang dapat dumdumon?
3 Indi naman—kon hunahunaon naton nga may yara nanuhaytuhay nga sahi sang kahadlok. Kon ginahunahuna sang mga tawo ang kahadlok, ang masami nga nagasulod sa ila pensar amo ang makakulugmat nga balatyagon nga nagalaglag sang paglaum kag nagapaluya sa aton. Sing maathag, indi luyag ni Jehova nga subong sina ang batyagon naton nahanungod sa iya! Luyag sang aton langitnon nga Amay nga magpalapit kita sa iya subong sang bata nga nagapalapit sa iya amay, nagasalig sa gugma sang iya amay kag sa amo man nga tion nahadlok nga mapaakig sia. Ina nga kahadlok magabulig sa aton nga magpabilin sing matinumanon sa aton langitnon nga Amay kon ginasulay sa paghimo sing malain. Isa ini ka nagakaigo nga “diosnon nga kahadlok” nga dapat tigayunon sang mga Cristiano.—Hebreo 5:7; 11:7.
4. Ano nga sahi sang kahadlok ang dulaon sang gugma?
4 Si Jehova indi kaangay sang hukom nga wala sing balatyagon nga nagasilot lamang sa iya mga alagad sa kada tion nga sila magsala. Sa baylo, ginahigugma niya sila kag luyag niya nga magmadinalag-on sila. Gani kon magsayop kita ukon makahimo sing sala, ang kahadlok kay Jehova indi dapat magpugong sa aton sa pagpakighambal sa iya nahanungod sini. (1 Juan 1:9; 2:1) Ang aton matinahuron nga kahadlok kay Jehova indi kahadlok nga pangindian kita ukon sikwayon. Subong mabasa naton sa 1 Juan 4:18: “Wala sing kahadlok sa gugma, kundi ang himpit nga gugma nagasubol sang kahadlok, kay ang kahadlok nagapugong.” Apang, ang “himpit nga gugma” wala nagadula sang aton hanuot nga pagtahod kag nagakaigo nga kahadlok para kay Jehova subong aton Manunuga kag Manughatag-sing-kabuhi.”—Salmo 25:14.
Binagbinaga ang mga Benepisyo
5. (a) Paano lamang matigayon ang kaalam? (b) Ano ang nagpahulag sa isa ka giyan anay sa droga sa pagbag-o sang iya dimaalamon nga dalanon sa kabuhi?
5 Binagbinagon naton ang pila sang mga benepisyo nga nagagikan sa “kahadlok kay Jehova.” Halimbawa, nagadul-ong ini sa pagtigayon sing matuod nga kaalam. Madamo ang nagtilaw sa madamo nga paagi, wala sila sing ginwasi nga panikasog, sa pagtigayon sina nga kaalam, apang napaslawan sila bangod ginasikway nila ang isa ka sadsaran nga prinsipio: “Ang kahadlok kay Jehova amo ang pamuno sang kaalam.” (Salmo 111:10; Hulubaton 9:10) Binagbinaga kon paano ina nga kahadlok nakabulig sa isa ka giyan anay sa droga sa paghikot sing maalamon. Sia nagapaathag: “Samtang nagakuha ako sing ihibalo tuhoy sa Dios, napalambo ko man ang kahadlok nga masaklaw ukon mapaakig sia. Nahibaluan ko nga nagabantay sia, kag handum ko nga mahamut-an ako sa iya panulok. Nagpahulag ini sa akon nga ihulog sa kasilyas ang mga droga nga yari sa akon.” Nalandas sini nga tawo ang iya malain nga mga buhat, gindedikar ang iya kabuhi kay Jehova, kag isa na karon ka ministro sa Johannesburg, Bagatnan nga Aprika.
6. Paano ang “kahadlok kay Jehova” nagaamlig sa aton batok sa malain nga mga butang, kag sa ano ini magadul-ong sa aton?
6 Luyag mo bala likawan ang malaut? “Ang kahadlok kay Jehova nagakahulugan sing pagdumot sa malaut.” (Hulubaton 8:13) Huo, ining nagakaigo nga kahadlok makaamlig sa imo gikan sa madamo nga malain nga mga bisyo nga ginapakamalaut sang Dios, subong sang pagpanigarilyo, pag-abuso sa droga, pagpahubog, kag seksuwal nga imoralidad. Luwas sa pagpahamuot kay Jehova, ginaamligan mo ang imo kaugalingon gikan sa makakulugmat nga mga butang nga nagakatabo sa mga tawo, lakip ang makahaladlok nga mga balatian nga sa amo ginapadayag nila ang ila kaugalingon. (Roma 1:26, 27; 12:1, 2; 1 Corinto 6:9, 10; 1 Tesalonica 4:3-8) Ang kahadlok sa Dios indi lamang magabulig sa imo sa pagbantay batok sa malaut kag tiko kundi magadul-ong man sa imo sa putli kag maayo, kay ginasilingan kita nga “ang kahadlok kay Jehova putli.”—Salmo 19:9.
7, 8. (a) Paano naeksperiensiahan sang isa ka tin-edyer nga babayi nga ang “kahadlok kay Jehova” nagadul-ong sa kalipay? (b) Sambita ang dugang pa nga mga benepisyo nga nagaabot sa mga nagakahadlok kay Jehova.
7 Ang kalipay isa pa ka tulumuron nga ginatinguhaan sang kalabanan nga tawo. Paano mo ini matigayon? Ang Pulong sang Dios nagasiling: “Malipayon ang tawo nga nagakahadlok kay Jehova.” (Salmo 112:1; 128:1) Ang eksperiensia sang isa ka tin-edyer nga babayi nagapamatuod sa sini. Nadalahig sia sa tanan nga sahi sang ginadumilian nga sekso, subong man sa espiritismo kag pagpangawat. Nian nagsugod sia sa pagtuon sing Biblia kag nakita niya ang kinahanglanon nga mamati kag magkahadlok kay Jehova. Sia nagasiling: “Ang pagkilala kay Jehova amo ang labing maayong butang nga natabo sa akon. Ginbuligan ako ni Jehova sing daku nga makita ang kamatuoran kag ang kalipay. Ginabatyag ko nga daku gid ang nautang ko sa iya bangod ginbuksan niya ang akon mga mata kag ginhatagan ako sing kahigayunan nga maghunahuna kag pangitaon sia. Luyag ko karon nga buligan ang iban man nga mga tawo nga makita ining kalipay.”
8 Nagasaad man si Jehova nga padyaan niya ang ‘mga nagakahadlok sa iya ngalan.’ (Bugna 11:18) Dugang pa, “ang kahadlok kay Jehova nagapadulong sa kabuhi, kag ang isa magapaligad sang gab-i nga busog; ang isa indi pagduawon sing malaut.” (Hulubaton 19:23) Sa pagkamatuod, “ang kahadlok kay Jehova” amo ang magadala sa aton sang tanan nga kinahanglanon naton. Kon iangot sa pagkamapainubuson, ang resulta amo ang “manggad kag himaya kag kabuhi.”—Hulubaton 22:4; 10:27.
9. Ngaa “ang kahadlok kay Jehova” nagadul-ong sa lamang nga dalanon sa kabuhi nga nagapakita sing kaalam? (Job 28:28; Miqueas 6:9)
9 Wala bala ini nagahatag sa aton sing pagpalig-on nga mahadlok sa matuod nga Dios? Sa pagkamatuod, “ang kahadlok kay Jehova” makagalanyat gid. Nagadul-ong ini sa tanan nga butang nga magahatag sa aton sing matuod nga kaayawan—isa ka malaka nga eksperiensia karon. Daw ano ka makapalig-on ining inspirado nga mga pulong: “Bisan ang makasasala maghimo sing malaut sing makaisa ka gatos kag maglawig ang iya mga adlaw, apang sa pagkamatuod nakahibalo ako nga mangin maayo sa mga nagakahadlok sa matuod nga Dios, bangod nga nagakahadlok sila sa iya. Apang indi mangin maayo sa malauton, kag indi sia magpalawig sang iya mga adlaw nga subong sang landong, bangod nga wala sia nagakahadlok sa Dios”! (Manugwali 8:12, 13) Sin-o ang tawo nga wala nagahandum sang mga butang nga “mangin maayo” sa iya? Ining makalilipay nga eksperiensia maagom lamang sang mga nagakahadlok sa Dios.—Salmo 145:19.
10. Ano ang pila ka importante nga rason nga dapat magpahulag sa aton sa pagkahadlok sa Dios?
10 Indi bala ini dapat maghimo sa aton nga mangin determinado sa paghupot sing hanuot nga pagtahod sa aton langitnon nga Amay nga si Jehova, huo, kapunaw sa iya? Sa pagkamatuod, dapat kita maghupot sing maayo nga kahadlok nga mapaakig sia. Ginaapresyar naton sing daku ang tanan nga mahigugmaon nga kaluoy kag kaayuhan nga ginpakita niya sa aton. Ang tanan nga yari sa aton naggikan sa iya. (Bugna 4:11) Dugang pa, sia ang Supremo nga Hukom, ang Labing Gamhanan, nga may gahom sa paglaglag sa mga nagalalis sa iya. “Panikasugi ang inyo kaluwasan nga may kahadlok kag pagkurog,” laygay ni apostol Pablo.—Filipos 2:12; Oseas 3:5; Lucas 12:4, 5.
11. (a) Anong panimuot ang dapat likawan sang mga Cristiano sa sining katapusan nga mga adlaw? (b) Anong espiritu ang dapat palambuon?
11 Wala ginapakita diri nga makatigayon kita sing kaluwasan paagi sa paghupot sing uyaya nga panimuot, nagahimo sing diutay lamang kag nagalaum nga kuntani ang mga butang mangin maayo. Indi ini ang panimuot nga ipasundayag sang mga Cristiano nga sa sining katapusan nga mga adlaw nagapanikasog sa pagtipig sang kaangtanan sa Isa nga makakita sang ila tagipusuon kag nakahibalo sang ila nasulod gid nga mga panghunahuna kag mga tinutuyo. (Jeremias 17:10) Sila lamang nga nagakilala sing nagakaigo kay Jehova ang kilalahon niya. Sia nagasiling: “Sa sining tawo magatulok ako, sa iya nga makaluluoy kag mahinulsulon sa espiritu kag nga nagakurog sa akon pulong.”—Isaias 66:2.
Dapat Kita Magtuon sa Pagkahadlok kay Jehova
12. (a) Sa anong mga paagi ang pungsod sang Israel ginkahamut-an labaw sa iban nga mga pungsod? (b) Ano ang ginpaabot ni Jehova bilang balos?
12 Dugang pa nga mapadulot sa aton hunahuna ang kinahanglanon nga mahadlok sa iya kon binagbinagon naton ang mga pagpakig-angot ni Jehova sa Israel. Wala sing iban nga pungsod nga nakaeksperiensia sina nga pag-atipan kag pagtalupangod gikan sa Soberano sang uniberso. (Deuteronomio 4:7, 8, 32-36; 1 Samuel 12:24) Nakita gid sang mga mata sang mga Israelinhon ang ginhimo ni Jehova sa mga Egiptohanon, nga, wala sing kahadlok sa iya, nag-ulipon kag nagpigos sa iya katawhan. Ano ang iya ginpaabot bilang balos? “Tipuna ang katawhan, ang mga lalaki kag ang mga babayi kag ang mga magamay kag ang imo manlulugayaw nga yara sa sulod sang imo mga gawang, agod nga magpamati sila kag nga magtuon sila kag magkahadlok kay Jehova nga imo Dios kag magbantay sa paghimo sang tanan nga pulong sining kasuguan. Kag agod nga ang mga anak nila nga wala makakilala, makapamati kag makatuon sa pagkahadlok kay Jehova nga inyo Dios tubtob nga nagakabuhi kamo sa duta diin nagatabok kamo sang Jordan sa pagtag-iya sini.”—Deuteronomio 31:12, 13; 14:23.
13. Ano ang dapat una nga kabalak-an sang mga ginikanan tuhoy sa ila kabataan?
13 Kaangay sang mga Israelinhon, ang mga alagad sang Dios karon “dapat magtuon sa pagkahadlok kay Jehova.” Daw ano nga salabton ang ginabutang sini sa aton tanan—labi na sa mga ginikanan! Mga ginikanan, pamangkuta ang inyo kaugalingon: ‘Paano ko mabuligan ang akon kabataan sa pagtigayon sing tagipusuon nga nagakahadlok kay Jehova?’ Sa isa ka adlaw kon magdaku na sila kag magbiya sa puluy-an, ano ang magahatag sing mas maayo nga proteksion para sa inyo kabataan, sa espirituwal, sa hunahuna, ukon sa materyal, sang sa sina? Ginapadaku ni Jehova mismo ang pagkaimportante sini sang magpakiluoy sia: “Kon kuntani palambuon nila ang ila tagipusuon sa pagkahadlok sa akon kag sa pagbantay pirme sang tanan ko nga sugo, agod nga magmaayo sa ila kag sa ila mga anak tubtob sa walay katubtuban!”—Deuteronomio 5:29; 4:10.
14. Hingadli ang isa ka butang nga dapat dumdumon sang mga ginikanan sa paghanas sa ila kabataan agod mahadlok kay Jehova, kag ipaathag kon paano ini dapat iaplikar.
14 Ang bisan sin-o nga Cristiano nga nakasagod sing pamilya magaugyon sa gilayon nga indi ini mahapos nga hilikuton. Walay sapayan, ginapatalupangod sang inspirado nga Pulong sang Dios ang pila ka importante nga mga butang sa igtalupangod sang mga ginikanan. Ang isa amo ang pagsugod kon ang kabataan bata pa. Daw ano ka bata? Sang magtipon ang mga Israelinhon agod magbaton sing instruksion gikan kay Jehova, ang “mga magamay” ginlakip. (Deuteronomio 29:10-13; 31:12, 13) Mahimo gid nga ang Israelinhon nga mga babayi nagdala sang ila mga lapsag sa sadto nga mga okasyon, kay ang tanan obligado sa pagtambong. Kutob gid sa “pagkalapsag,” ang ila mga anak nga lalaki kag babayi dapat makatuon sang kinahanglanon nga maghipos kag mamati sa sina nga mga pagtinipon. (2 Timoteo 3:15) Gani paupda sa mga miting ang inyo “mga magamay.” Paupda man sila sa pag-alagad sa latagon kon may ikasarang na sila. Madamo nga pamatan-on ang nakatuon sa pagtanyag sing magasin ukon tract bisan sa wala pa sila nagaeskwela. Umpisahi sing temprano ang pagtudlo sa inyo “mga magamay,” sa diutay nga mga paagi, sing “kahadlok kay Jehova.”
15. Ano ang ikaduha nga butang, kag paano ini mahimo sang mga ginikanan?
15 Ang isa pa ka butang amo ang indi pagbag-obag-o. Sarang ini mahimo kon pirme kita mag-unong sa Pulong sang Dios sa paghanas, sa pagdisiplina, kag sa pagtudlo sa aton kabataan. Bisan kon tuhoy sa pagpaliwaliwa ukon paglingawlingaw, indi magbag-obag-o sa pagtugot sa mga prinsipio sang Biblia nga magdikta kon ano ang tugutan sa sina nga mga okasyon. (Efeso 6:4) Magakinahanglan ini sing panikasog, subong maathag nga ginapakita sang Pulong sang Dios sa pagsiling: “Kag ining mga pulong nga ginasugo ko karon sa imo mangin sa imo tagipusuon; kag itudlo mo ini sing makugihon sa imo mga anak kag ihambal mo ini sa nagalingkod ka sa imo balay, kag sa nagalakat ka sa dalanon, kag sa nagahigda ka, kag sa nagabangon ka.” (Deuteronomio 6:4-9; 4:9; 11:18-21) Daku ang mahimo sinang indi pagbag-obag-o sa sulod sang mga tinuig sa pagbulig sa imo kabataan sa pagpalambo sing tagipusuon nga nagakahadlok kay Jehova.
16. (a) Ano ang ikatlo nga butang, kag ngaa importante gid ini? (b) Anong mga pamangkot ang mapamangkot sang mga ginikanan sa ila kaugalingon?
16 Dapat man magpanikasog ang mga ginikanan nga ipasalop sa hunahuna kag tagipusuon sang ila kabataan nga sila mismo, subong mga ginikanan “nagakahadlok kay Jehova.” (Salmo 22:23) Ang isa ka paagi nga mahimo nila ini amo ang pag-aplikar sang teokratiko nga laygay kon ginahanas kag ginadisiplina nila ang ila kabataan. Amo ini ang ikatlo nga butang nga pagabinagbinagon. Pamangkuta ang imo kaugalingon: ‘Regular bala ako nga nagatuon sing Biblia upod sa akon kabataan?’ ‘Ginagamit ko bala sing bug-os para sa akon lamharon nga kabataan ang bulig subong sang Ang Akon Libro sang mga Sugilanon sa Biblia kag Pagpamati sa Dakung Manunudlu?’ ‘Samtang nagadaku sila, ginagamit ko bala ang libro nga Your Youth—Getting the Best out of It kag ang “Pamangkot sang mga Pamatan-on” sa mga artikulo sang Magmata!?’ ‘Nagahimos bala ako sing makalilipay nga pagpaliwaliwa kag paglingawlingaw nga indi makahatag sing malain nga epekto sa akon kabataan?’ ‘Ginabaton ko bala ang ginasiling sang organisasyon ni Jehova tuhoy sa mataas nga edukasyon?’ ‘Ginatudluan ko bala ang akon kabataan nahisuno sa sini?’ ‘Ang mga tulumuron nga ginpahamtang ko para sa akon kabataan amo bala ang magabulig sa ila sa pagtigayon sing “diosnon nga kahadlok”?’—Hebreo 5:7.
17. Sin-o ang nagabenepisyo kon ang kabataan makatuon sa pagkahadlok kay Jehova? Iilustrar.
17 Ang mga benepisyo kag mga kalipay magaabot indi lamang sa inyo kabataan kundi sa inyo man bangod ginahimo ninyo ang tanan ninyo nga masarangan sa pagtudlo sa ila sing “kahadlok kay Jehova.” Halimbawa, ang isa ka Saksi nga, sa katapusan sang adlaw, nagabatyag sing daku nga kalapyo, nagakabig sang tanan nga butang nga mapuslanon kon mabatian niya ang iya siete anyos nga anak nga babayi nga nagapangamuyo kay Jehova. Nagatulo ang mga luha sa iya mga mata kag nagahugot ang iya tutunlan samtang ginapamatian niya ang pangamuyo sang iya anak nga babayi: “Mahigugmaon nga Jehova, salamat sa tanan nga maayong butang nga ginhimo mo para sa akon karon nga adlaw. Kag salamat sa akon kalan-on. Buligi ang tanan nga kauturan sa bilangguan kag sa mga kampo konsentrasyon nga makakita sing kalan-on, Jehova, kag ang tanan nga maniwang nga utod nga lalaki kag utod nga babayi sa iban nga kadutaan. Buligi man sila, Jehova, nga makatigayon sing bastante nga kalan-on. Kag ang mga nagamasakit, buligi sila nga mag-ayo agod nga makatambong sila sa mga miting. Tuguti, palihog, ang mga anghel nga bantayan ako samtang nagakatulog ako sa gab-i, Jehova, kag ang akon man mommy kag daddy, kag ang akon utod nga lalaki, kag ang akon lola kag lolo, kag ang tanan nga utod nga lalaki kag utod nga babayi sa kamatuoran. Paagi sa imo Anak nga si Jesus, Amen.”
18. Paano naton maapektuhan ang isa kag isa sa sining bagay sang pagkahadlok kay Jehova?
18 Sa sining bagay sang pagkahadlok kay Jehova, dapat naton dumdumon nga may epekto kita sa isa kag isa paagi sa halimbawa nga aton ginapakita. Ang mga ginikanan may epekto sa ila kabataan. Ang mga gulang kag ministeryal nga mga alagad may epekto sa ila mga kongregasyon. Ang nagalakbay nga mga manugtatap may epekto sa ila mga ginaalagdan. Sing maathag, amo sini kon ngaa ang mga hari sang Israel ginsugo nga basahon ang Kasuguan sang Dios sa bug-os nga adlaw sang ila kabuhi agod nga sila “makatuon sa pagkahadlok kay Jehova.” (Deuteronomio 17:18-20) Ang halimbawa nga ginapahamtang sang hari sa pagkahadlok kay Jehova may epekto sa bug-os nga pungsod.
19. Ano ang ginapamatud-an sang maragtas tuhoy sa mga Israelinhon?
19 Ang maragtas nagapamatuod sa kamatuoran nga nadula sang Israel, subong isa ka pungsod, ang ila kahadlok kay Jehova. Nagdumdom sila nga ang paghupot sang templo sa Jerusalem nagaserbe subong proteksion para sa ila, nga subong bala daw “anting-anting,” tumanon man nila ukon indi ang iya kasuguan. (Jeremias 7:1-4; Miqueas 3:11, 12) Apang sayop sila. Ang Jerusalem kag ang templo sini ginlaglag. Sang ulihi, sang gintukod sila liwat subong isa ka pungsod, napaslawan sila liwat sa pagpakita sing nagakaigo nga kahadlok kay Jehova. (Malaquias 1:6) Daku ang maton-an naton gikan sa sining eksperiensia, nga pagakobrehan sa masunod nga artikulo.
20. Paano naton masumaryo kon ngaa dapat naton kahadlukan si Jehova?
20 Dumduma, nian, nga ang kahadlok kay Jehova wala nagapaluya sang aton gugma sa iya; sa baylo, nagapalig-on ini kag nagasakdag. Ang pagkamatinumanon sa tanan nga sugo niya magapamatuod nga indi lamang nagakahadlok kita kay Jehova kundi nga ginahigugma naton sia. Importante ining duha. Imposible nga tigayunon ang isa kag ang isa indi. Daw ano ka importante para sa mga ginikanan nga ipasalop sa ila kabataan ining diosnon nga kahadlok kay Jehova kag ang gugma sa iya! Kag daw ano ka daku nga kalipay ang ginadala sini sa mga tigulang kag bata! Busa, kabay nga ang pagbatyag naton mangin subong sang iya sang salmista sang magsiling sia: “Bug-osa ang akon tagipusuon sa pagkahadlok sa imo ngalan.”—Salmo 86:11.
Mga Punto nga Binagbinagon
◻ Paano naton ginahigugma kag ginakahadlukan si Jehova?
◻ Ano ang pila sang mga benepisyo sang pagkahadlok kay Jehova?
◻ Anong tatlo ka butang ang makabulig sa mga ginikanan sa pagbulig sa ila kabataan sa pagpalambo sing tagipusuon nga nagakahadlok kay Jehova?
◻ Paano naton maapektuhan ang isa kag isa sa bagay sang pagkahadlok kay Jehova?
[Laragway sa pahina 12]
Ang kahadlok kay Jehova magabulig sa mga pamatan-on sa pagsikway sa mga pagsulay nga maghimo sing malain
[Laragway sa pahina 14]
Dapat buligan sang mga ginikanan ang ila kabataan sa pagpalambo sing mapuslanon nga kahadlok kay Jehova
[Laragway sa pahina 15]
“Mangin maayo sa mga nagakahadlok sa matuod nga Dios.”—Manugwali 8:12.
[Ginkuhaan]
Sa maayong kabubut-on sang Hartebeespoort Snake and Animal Park