Ngaa Dapat Naton Kahadlukan ang Dios?
“KAHADLUKI ninyo ang Dios kag hatagi sia sing himaya, kay nag-abot na ang takna sang iya paghukom.” (Bugna 14:7) Ining makapahulag nga mga pulong una nga nabatian sang tigulang nga si apostol Juan sa isa ka palanan-awon. Ginpamulong sang isa ka anghel nga nagalupad sa tunga sang langit, ginpatuhoy ini labi na sa katawhan nga nagakabuhi sa sining tion sang katapusan, ang nagabukas nga panahon sang “adlaw sang Ginuo.”—Bugna 1:10.
Apang daw ano ka dinagakabagay ining mga pulong para sa iban! Madamo ang nagaduhaduha pa gani sa pagluntad sang Dios, labi na ang pagkahadlok sa iya. Para sa pila nga nagapangangkon nga Cristiano, ang ideya nga kahadlukan ang Dios kinaraan na. Sarang nila mabaton ang gugma sa Dios. Apang ang pagkahadlok sa iya daw uso lamang sang Edad Media. Amo bala ini ang pagtamod mo sa bagay?
Ang Kahadlok sa Dios ni Jesus
Kon amo, binagbinaga kon ano ang kahulugan sang mangin isa ka Cristiano. Suno sa Biblia, ang mangin Cristiano nagadalahig sing suod nga pagsuod sa mga tikang ni Jesucristo. (1 Pedro 2:21) Karon, samtang indi maduhaduhaan nga ginhigugma ni Jesus ang Dios, maathag nga ginapakita sang Biblia nga ginkahadlukan man niya sia. Si Isaias, nagapamulong sing matagnaon nahanungod kay Jesus, nagsiling nga sia makatigayon sing “espiritu sang ihibalo kag sang kahadlok kay Jehova.” (Isaias 11:2) Apang, sing makawiwili, ining kahadlok indi lulan para kay Jesus. Indi naton dapat hunahunaon ini subong sang bata nga nagakahadlok sa isa ka mapintas nga amay ukon isa ka pumuluyo nga ginapahog sang isa ka mapiguson nga manuggahom. Sa kamatuoran, si Isaias nagtagna man nahanungod kay Jesus: “Magakalipay sia sa kahadlok kay Jehova.” (Isaias 11:3) Paano ikaw malipay nga nahadlok ka?
Ang kamatuoran amo, sa Biblia ang tinaga nga “kahadlok” may pila ka kahulugan. May yara pisikal nga kahadlok ukon kakulba nga ginabatyag naton kon may isa nga luyag maghalit sa aton. Sa amo, ang Israelinhon nga mga hangaway “nahadlok sing tama” kay Goliat. (1 Samuel 17:23, 24) Nian may yara kahadlok sa pagkakibot sa wala ginapaabot ukon wala mahibal-i nga butang, subong sang nabatyagan ni Zacarias sang hinali sia gin-atubang sang anghel ni Jehova sa templo. (Lucas 1:11, 12) Apang, ang kahadlok nga nabatyagan ni Jesus sa iya Amay indi kaangay sini.
Sa baylo, ang orihinal nga Hebreo kag Griegong mga tinaga nga ginagamit sa Biblia para sa “kahadlok” masami nagapatuhoy sa isa ka daku nga pagtahod kag pagkapunaw sa Dios. Amo sina ang diosnon nga kahadlok nga ginbatyag ni Jesus kag amo ang ginpalig-on sang anghel nga palambuon sang tanan karon. Ining matinahuron nga pagkapunaw, ukon kahadlok, nagapanggamot sa aton tagipusuon kon magpamalandong kita tuhoy sa kusog kag gahom ni Jehova kag ipaanggid ini sa aton kadiutayon. Nagabaskog ini kon binagbinagon anton ang iya gamhanan nga mga binuhatan, kag nagalambo man ini paagi sa mapangamuyuon nga pagdumdom sang kamatuoran nga sia ang Supremo nga Hukom, nga may gahom sa paghatag sing kabuhi subong man sa pagsilot sing walay katapusan nga kamatayon.
Ini nga kahadlok importante bangod nagapugong ini sa aton sa paghimo sing sayop kag sa pagpasapayan sa Dios, kon sa aton pa. Nagabulig ini sa aton sa paglikaw sa panimuot subong sang: ‘Patawaron ako sang Dios. Nahibaluan niya nga maluya ako,’ kon ginaatubang kita sing pagsulay kag mahimo nga magpadala sa baylo nga magpakig-away. Subong ginasiling sa aton sang Hulubaton 8:13: “Ang kahadlok kay Jehova nagakahulugan sing pagdumot sa malaut.” Kag ang Hulubaton 16:6 nagadugang: “Tungod sa kahadlok kay Jehova ang tawo nagatalikod sa malaut.” Si Adan kag si Eva napaslawan sa pagpakita sining nagakaigo kag mapuslanon nga kahadlok kay Jehova sang ginlalis nila sia. Ang resulta? Nakabatyag sila sing lain kag negatibo nga sahi sang kahadlok kag nanago gikan sa iya. Si Adan nagsiling: “Nabatian ko ang imo tingog sa katamnan, apang hinadlukan ako.”—Genesis 3:10.
Indi kaangay ni Adan kag ni Eva, si Job isa ka tawo nga nagpabilin nga matutom kay Jehova walay sapayan sang labing mabudlay nga pagtilaw. Ngaa? Si Jehova mismo nagsiling nga si Job isa ka ‘tawo nga mahadlukon sa Iya kag busa nagalikaw sa malaut.’ (Job 1:8; 2:3) Sa karon dapat naton pag-uron nga amo man ang isiling sa aton ni Jehova! Ang kahadlok sa Dios nagakaigo, kag dapat ini mangin bahin sang aton panghunahuna.
Kahadlok sa Dios kag Kahadlok sa Tawo
Ang kahadlok sa Dios isa ka kinaugali nga balatyagon nga nagahatag sa aton sing kalig-onan nga subong sang ginahatag sa iya mga anak sang isa ka amay nga takus sa hanuot nga pagtahod. Ina nga kahadlok nagabulig man sa pagdula sang hindi maayo kag negatibo nga kahadlok sa tawo, nga isa ka siod. (Hulubaton 29:25) Ang isa nga wala makatuon sining leksion amo si Urias, anak ni Semaya, nga nagbantala sa Jerusalem upod kay Jeremias antes sang 607 B.C.E. Indi kaangay ni Jeremias, gintugutan ni Urias ang kahadlok sa hari sa pagsiod sa iya. Nag-untat sia sa pagbantala kag nalagyo sa iya tulumanon. Sang ulihi, nadakpan sia sang hari kag ginpapatay. (Jeremias 26:20-23) Paano kuntani nalikawan ni Urias yadtong masubo nga nadangatan? Paagi sa pagpalambo sing kahadlok kay Jehova nga mabaskog pa sa iya kahadlok sa tawo.
Si Jesus, sa tapos sang iya pagkabanhaw kag pagkayab sa langit, naglaygay sa iya mga sumulunod: “Dili pagkahadluki ang dali na lang nimo antuson.” (Bugna 2:10) Ginapakita sang maragtas nga kinahanglanon ina nga laygay, kay ang mga Cristiano—gikan sa Romanong mga arena tubtob sa Nazi nga mga kampo konsentrasyon—nag-atubang sing makahaladlok nga mga kahimtangan. Paano nila nadaug ang kahadlok nga gintinguhaan sang ila mga kaaway nga batyagon nila? Paagi sa pag-aplikar sang mga pulong ni Jesus: “Dili kamo mahadlok sa mga nagapatay sang lawas kag sa tapos sina wala na sila sing sarang mahimo. Apang nagapaandam ako sa inyo kon sin-o ang kahadlukan ninyo: Kahadluki sia nga, sa tapos makapatay, may gahom sa pagpilak sa inyo sa Gehenna.”—Lucas 12:4, 5.
Sa Salmo 19:9 ginatudluan kita: “Ang kahadlok kay Jehova putli, nga nagapadayon sing dayon. Ang mga hudisyal nga mga desisyon ni Jehova matuod; napamatud-an sila tanan nga matarong.” Gani wala sing bisan ano nga negatibo nahanungod sa kahadlok sa Dios. Putli ini kag maamligon kay nagahimo sa alagad sang Dios nga mas mabaskog sa iya mga kaaway. Kaangay ni Jesus, ang Cristiano makasapo sing kalipay sa sining kahadlok sa pareho nga paagi nga nagakalipay sia sa tanan nga iban pa nga pagpakamaayo gikan kay Jehova.—Isaias 11:3.
Busa, nagakaigo gid nga palig-unon sang anghel ang tanan nga katawhan karon nga kahadlukan ang Dios. Kon wala sing nagakaigo nga diosnon nga kahadlok, mahimo gid nga magapadala kita sa sayop nga mga sugyot ukon magpadaug sa kahadlok sa tawo. Kong palambuon naton ang nagakaigo nga porma sang kahadlok, mabuligan kita sa paghikot sing maalamon. “Ang kahadlok kay Jehova amo ang pamuno sang kaalam.” (Hulubaton 9:10; Salmo 111:10) Matuod, dapat naton higugmaon ang Dios sa bug-os naton nga tagipusuon, kalag, hunahuna, kag kusog. (Marcos 12:30) Kag dapat man kita mapunaw sa iya, ginatahod sia, ukon, sa mga pulong sang anghel, “kahadluki ang Dios kag hatagi sia sing himaya, kay nag-abot na ang takna sang iya paghukom.”—Bugna 14:7.