“Amo Gid ang Ginhimo” Nila

“Amo ini ang kahulugan sang gugma sang Dios, nga tumanon naton ang iya mga sugo.”​—⁠1 JUAN 5:⁠3.

1. Ano ang masiling tuhoy sa kasangkaron sang gugma sang Dios?

“ANG DIOS GUGMA.” Ang tanan nga nagakilala sa Dios kag nagatuman sang iya mga sugo may daku nga apresasyon sa pagkatudok sina nga gugma. “Sa sini amo ang gugma, indi nga ginhigugma ta ang Dios, kundi nga ginhigugma niya kita kag ginpadala ang iya Anak subong katumbasan sang aton mga sala.” Samtang ginatuuhan naton ang hamili nga halad-gawad ni Jesus, ‘nagapabilin [kita] sa gugma sang Dios.’ (1 Juan 4:​8-10, 16) Busa mahimo naton maagom ang isa ka manggad sang espirituwal nga mga kabulahanan sa karon kag sa sistema sang mga butang nga magaabot, ang kabuhi nga walay katapusan.​—⁠Juan 17:3; 1 Juan 2:​15, 17.

2. Paano ang pagtuman sa mga kasuguan sang Dios nakabenepisyo sa iya mga alagad?

² Ang rekord sang Biblia bugana sing mga halimbawa sadtong nagtuman sang mga sugo sang Dios kag bangod sini ginpakamaayo sing daku. Nagalakip ini sa mga saksi antes sang panahon sang Cristianismo, nga nahanungod sa ila si apostol Pablo nagsulat: “Ini sila tanan napatay sa pagtuo, walay sapayan nga wala sila makabaton sang katumanan sang mga saad, apang nakita nila ini gikan sa malayo kag gin-abiabi ini kag ginpahayag sing dayag nga mga dumuluong kag mga umalagi nga pumuluyo sila sa duta.” (Hebreo 11:13) Sang ulihi, ang debotado nga Cristianong mga alagad sang Dios nakabenepisyo gikan sa “dibagay nga kalulo kag kamatuoran [nga] nag-abot paagi kay Jesucristo.” (Juan 1:17) Sa mga 6,000 ka tuig sang maragtas sang tawo, ginpadyaan ni Jehova ang matutom nga mga saksi nga nagtuman sang iya mga sugo, nga tunay gid nga “indi mabug-at.”​—⁠1 Juan 5:​2, 3.

Sa mga Adlaw ni Noe

3. Sa anong paagi ginhimo ni Noe ang “amo gid”?

³ Ang rekord sang Biblia nagasiling: “Bangod sa pagtuo si Noe, pagkatapos mahatagan sing paandam halin sa Dios nahanungod sa mga butang nga wala pa makita, nagpakita sing diosnon nga kahadlok kag nagtukod sing arka sa pagluwas sang iya panimalay; kag paagi sini nga pagtuo gintagudilian niya ang kalibutan, kag nangin manunubli sia sang pagkamatarong nga nahisuno sa pagtuo.” Subong “manugbantala sang pagkamatarong,” gintuman sing bug-os ni Noe ang Dios, nagpaandam sa masingki nga kalibutan antes sang Anaw nahanungod sa nagahilapit nga paghukom sang Dios. (Hebreo 11:7; 2 Pedro 2:⁠5) Sa pagtukod sang arka, ginsunod niya sing mahalungon ang ginhatag sang Dios nga desinyo. Nian ginpasulod niya ang ginpili nga mga sapat kag mga pagkaon. “Si Noe nagpadayon sa paghimo suno sa tanan nga ginsugo sang Dios sa iya. Amo gid ang ginhimo niya.”​—⁠Genesis 6:⁠22.

4, 5. (a) Paano naapektuhan ang katawhan sining adlaw sang malain nga impluwensia? (b) Ngaa dapat naton himuon ang “amo gid” sa pagtuman sang mga instruksion sang Dios?

⁴ Si Noe kag ang iya panimalay dapat makig-away sa malain nga impluwensia sang dimatinumanon nga mga anghel. Ining mga anak sang Dios nagmateryalisar kag nagpangasawa sa mga babayi, nag-anak sing labaw sa tawo nga mestiso nga kaliwat nga nagdaugdaug sa katawhan. “Ang duta nangin dunot sa mata sang matuod nga Dios kag ang duta napun-an sing kasingki.” Si Jehova nagpadala sing Anaw sa paglaglag sadtong malauton nga kaliwatan. (Genesis 6:​4, 11-17; 7:⁠1) Kutob sang panahon ni Noe ang yawan-on nga mga anghel wala na ginpahanugutan nga magmateryalisar sa dagway sang tawo. Walay sapayan, ‘ang bug-os nga kalibutan padayon nga yara sa gahom sang isa nga malauton,’ si Satanas nga Yawa. (1 Juan 5:19; Bugna 12:⁠9) Sing matagnaon, ginpaanggid ni Jesus yadtong mabinatuon nga kaliwatan sang panahon ni Noe sa kaliwatan sang katawhan nga nagsikway sa iya sugod sang nangin maathag ang tanda sang iya “presensia” sang 1914.​—⁠Mateo 24:​3, 34, 37-39; Lucas 17:​26, 27.

⁵ Sa karon, subong sang panahon ni Noe, ginatinguhaan ni Satanas nga laglagon ang katawhan kag ang aton planeta. (Bugna 11:​15-18) Hanti hilingagawon nga pamatian naton ang inspirado nga sugo: “Isuklob ang bug-os nga hinganib sang Dios agod nga sarang kamo makatindog nga malig-on batok sa malimbungon nga mga buhat sang Yawa.” (Efeso 6:​11, foot­note) Sa sini, ginapabakod kita paagi sa pagtuon sa Pulong sang Dios kag sa pag-aplikar sini sa aton kabuhi. Dugang pa, may yara kita mainulikdon nga organisasyon ni Jehova, upod ang hinaplas nga “matutom kag mainandamon nga ulipon” sini kag ang mahigugmaon nga mga gulang sini, sa pagbantay sa aton sing mapailubon sa dalan nga dapat naton pagalaktan. May yara kita tugob-globo nga pagbantala nga hilikuton nga pagahimuon. (Mateo 24:​14, 45-47) Kaangay ni Noe, nga nagtuman sing mahalungon sang mga sugo sang Dios, kabay nga pirme naton himuon ang “amo gid.”

Si Moises​—⁠Ang Pinakamahagop sa mga Tawo

6, 7. (a) Anong makapaladya nga pagpili ang ginhimo ni Moises? (b) Anong maisugon nga sulundan ang ginbilin ni Moises para sa aton?

⁶ Binagbinaga ang isa pa ka tawo sang pagtuo​—⁠si Moises. Naagom niya kuntani ang mapinatuyangon sa kaugalingon nga pagkabuhi sa tunga sang mga luho sang Egipto. Apang ginpili niya nga “pintasan kaupod sang katawhan sang Dios sa baylo nga agumon ang umalagi nga mga pagpangalipay sa sala.” Subong ginsugo nga alagad ni Jehova, “nagtan-aw sia sing maayo sa padya [kag] nagpadayon sia nga dimationg subong nga nakakita sa Isa nga dimakita.”​—⁠Hebreo 11:​23-28.

⁷ Sa Numeros 12:​3, aton mabasa: “Ang lalaki nga si Moises amo ang pinakamahagop sa tanan nga tawo nga yara sa kadaygan sang duta.” Sa kabaliskaran, si Paraon sang Egipto naghulag kaangay sang pinakabugalon sa tanan nga tawo. Sang ginsugo ni Jehova sanday Moises kag Aaron nga ipahayag ang iya paghukom kay Paraon, paano sila naghulag? Ginasugiran kita: “Ginhimo ni Moises kag ni Aaron ang suno sa ginsugo sa ila ni Jehova. Amo gid ang ginhimo nila.” (Exodo 7:​4-7) Daw ano ka maisugon nga sulundan para sa aton nga nagapahayag sang mga paghukom sang Dios karon!

8. Paano ang mga Israelinhon ginsugo sa paghimo sang “amo gid,” kag paano ang kasadya nga nagresulta mapaanggid sa malapit nga palaabuton?

⁸ Mainunungon bala nga ginsakdag sang mga Israelinhon si Moises? Pagkatapos ginpadal-an ni Jehova ang Egipto sing siam sang napulo ka kalalat-an, ginhatagan niya ang Israel sing detalyado nga mga instruksion tuhoy sa pagsaulog sang Paskuwa: “Kag ang katawhan nagyaub kag nagsimba. Nian ang katawhan sang Israel naglakat kag naghimo sang subong suno sa ginsugo ni Jehova kay Moises kag kay Aaron. Amo gid ang ginhimo nila.” (Exodo 12:​27, 28) Sang tungang-gab-i sadtong maragtason nga adlaw, Nisan 14, 1513 B.C.E., ginpamatay sang anghel sang Dios ang tanan nga panganay nga anak sang Egipto apang ginligaran ang Israelinhon nga mga puluy-an. Ngaa ginluwas ang mga panganay sang Israel? Bangod gin-amligan sila sang dugo sang kordero sang Paskuwa, nga ginwisik sa bakalan sang ila mga ganhaan. Ginhimo nila ang suno gid sa ginsugo ni Jehova kay Moises kag kay Aaron. Huo, “amo gid ang ginhimo nila.” (Exodo 12:​50, 51) Sa Dagat nga Mapula, ginhimo ni Jehova ang dugang pa nga milagro sa pagluwas sa iya matinumanon nga katawham samtang ginlaglag si Paraon kag ang iya gamhanan nga kasangkapan sa militar. Nalipay gid ang mga Israelinhon! Amo man sa karon, madamo sang nagtuman sa mga sugo ni Jehova ang malipay sa pagsaksi sa pagbindikar sa iya sa Armagedon.​—⁠Exodo 15:​1, 2; Bugna 15:​3, 4.

9. Anong modernong-adlaw nga mga pribilehiyo ang ginalandong sang paghimo sang mga Israelinhon sang “amo gid” may kaangtanan sa tabernakulo?

⁹ Sang ginsugo ni Jehova ang Israel sa pag-amot kag sa pagpatindog sing kayangkayang sa kamingawan, ang katawhan maalwan nga naghatag sang ila bug-os nga pagsakdag. Nian, bisan sa pinakamagamay nga detalye, ginsunod ni Moises kag sang iya mapisan nga mga masigkamanugpangabudlay ang mga plano sa pagpatindog nga ginhatag ni Jehova. “Sa amo nahuman ang tanan nga buluhaton sang kayangkayang sang layanglayang nga tilipunan, kag ginhimo sang katawhan sang Israel ang suno sa tanan nga ginsugo ni Jehova kay Moises. Amo gid ang ginhimo nila.” Sa kaanggid, sang gin-inagurahan ang pagkasaserdote, “si Moises nagpadayon sa paghimo sang tanan suno sa ginsugo sa iya ni Jehova. Amo gid ang ginhimo niya.” (Exodo 39:32; 40:16) Sa modernong tion, may kahigayunan kita nga sakdagon sing bug-os tagipusuon ang pagbantala nga hilikuton kag ang mga programa sa pagpasangkad sa Ginharian. Busa pribilehiyo naton nga maghiusa sa paghimo sing “amo gid.”

Si Josue​—⁠Maisugon kag Mabakod Katama

10, 11. (a) Ano ang nagsangkap kay Josue para sa kadalag-an? (b) Paano kita mapabakod sa pag-atubang sa modernong-adlaw nga mga pagtilaw?

¹⁰ Sang ginsugo ni Moises si Josue nga pangunahan ang Israel pasulod sa ginsaad nga duta, ang inspirado nga nasulat nga Pulong ni Jehova mahimo nga matigayon lamang sa lima ka tulun-an ni Moises, sa isa ukon duha ka salmo, kag sa tulun-an ni Job. Ginsugo ni Moises si Josue nga tipunon ang katawhan pag-abot nila sa Ginsaad nga Duta kag ‘basahon ining kasuguan sa atubangan sang bug-os nga Israel sa igdulungog nila.’ (Deuteronomio 31:​10-12) Isa pa, si Jehova mismo nagsugo kay Josue: “Ining tulun-an sang kasuguan indi magbulag sa imo baba, kag pamalandungan mo ini sa adlaw kag gab-i, agod nga makabantay ka sa paghimo suno sa tanan nga nasulat sa sini; kay nian himuon mo ang imo dalanon nga madinalag-on kag nian magapanghikot ka sing maalamon.”​—⁠Josue 1:⁠8.

¹¹ Ang adlaw-adlaw nga pagbasa sang “tulun-an” ni Jehova nagsangkap kay Josue sa pag-atubang sa mga pagtilaw sa unahan, kon paano nga ang adlaw-adlaw nga pagbasa sang Pulong ni Jehova, ang Biblia, nagapabakod sa Iya modernong-adlaw nga mga Saksi sa pag-atubang sa mga pagtilaw sining ital-ital nga “katapusan nga mga adlaw.” (2 Timoteo 3:⁠1) Walay sapayan nga ginapalibutan kita sang masingki nga kalibutan, dumdumon man naton ang paandam sang Dios kay Josue: “Magpakaisog kag magpakabakod. Dili ka mahadlok ukon mahangawa, kay si Jehova nga imo Dios nagaupod sa imo bisan diin ka makadto.” (Josue 1:⁠9) Pagkatapos madaug ang Canaan, ang mga tribo sang Israel ginpakamaayo sing bugana sang magpuyo sila sa ila palanublion. “Subong sang ginsugo ni Jehova kay Moises, amo ini ang ginhimo sang katawhan sang Israel.” (Josue 14:⁠5) Ang kaanggid nga padya nagahulat sa aton tanan karon nga nagabasa sang Pulong sang Dios kag nagaaplikar sini sa aton kabuhi, matinumanon nga nagahimo sang “amo gid.”

Mga Hari​—⁠Matutom kag Dimatinumanon

12. (a) Anong sugo ang ginhatag sa mga hari sang Israel? (b) Sa ano nagresulta ang kapaslawan sang hari sa pagtuman?

¹² Kamusta naman ang mga hari sang Israel? Ginpatuman ni Jehova sa hari ini nga sugo: “Kon maglingkod sia sa lingkoran nga harianon sang iya ginharian, magsulat sia nga sa iya sing huwad sining kasuguan sa tulun-an, gikan sa sina nga sa atubangan sang mga saserdote nga Levinhon. Kag ini mangin sa iya, kag magabasa sia sini sa tanan nga adlaw sang iya kabuhi, agod nga makatuon sia sa pagkahadlok kay Jehova nga iya Dios kag sa pagbantay sang tanan nga pulong sining kasuguan kag sining mga palatukuran paagi sa paghimo sa ila.” (Deuteronomio 17:​18, 19) Gintuman bala sang mga hari sang Israel yadto nga sugo? Sa kalabanan nga bahin, napaslawan sila, amo nga nag-antos sila sing mga pagpakamalaut nga gintagna sa Deuteronomio 28:​15-68. Sang ulihi, ang Israel nag-alaplaag “kutob sa isa ka ukbong sang duta tubtob sa isa ka ukbong sang duta.”

13. Paano kita mahimo makabenepisyo, kaangay ni David, paagi sa pagpakita sing gugma sa Pulong ni Jehova?

¹³ Apang, si David​—⁠ang nahaunang matutom tawhanon nga hari sang Israel⁠—​nagpakita sing tumalagsahon nga debosyon kay Jehova. Napamatud-an sia nga ‘totoy nga leon sa Juda,’ nga naglandong kay Cristo Jesus, ang nagapangdaug nga ‘leon sang tribo sang Juda, ang gamot ni David.’ (Genesis 49:​8, 9; Bugna 5:⁠5) Sa diin nasandig ang kusog ni David? May tudok sia nga apresasyon para sa nasulat nga Pulong ni Jehova kag nagkabuhi nahisuno sini. Sa Salmo 19, sa “isa ka melodiya ni David,” aton mabasa: “Ang kasuguan ni Jehova himpit.” Sa tapos mahinambitan ang pahanumdom, mga sugo, mando, kag hudisyal nga mga desisyon ni Jehova, si David nagpadayon sa pagsiling: “Halandumon sila sing labi pa sa bulawan, huo, sangsa madamo pa nga bulawan nga bus-og; kag matam-is pa man sa dugos kag sa mga nagatulo sa uludlan. Labot pa, paagi sa ila ginapaandaman ang imo alagad; sa pagbantay sa ila may dakung balus.” (Salmo 19:​7-11) Kon ang adlaw-adlaw nga pagbasa sang Pulong ni Jehova kag pagpamalandong sa sini makapaladya sang nagligad nga 3,000 ka tuig, daw ano pa ini karon!​—⁠Salmo 1:​1-3; 13:6; 119:​72, 97, 111.

14. Sa anong paagi ginapakita sang dalanon ni Solomon ang pagkinahanglan sing kapin pa sa ihibalo?

¹⁴ Walay sapayan, indi lamang bastante ang pagtigayon sing ihibalo. Kinahanglan man para sa mga alagad sang Dios nga magpanghikot sa sina nga ihibalo, sa pag-aplikar sini suno sa kabubut-on sang Dios​—⁠huo, sa paghimo sang “amo gid.” Sarang ini mailustrar sa bahin sang anak ni David nga si Solomon, nga ginpili ni Jehova “sa paglingkod sa trono sang ginharian ni Jehova sa Israel.” Si Solomon nakabaton sing asaynment nga magtukod sang templo, nga nagagamit sang mga plano sa pagpatindog nga ginbaton ni David “paagi sa pagbugna.” (1 Cronica 28:​5, 11-13) Paano mahimo ni Solomon ining daku nga hilikuton? Bilang sabat sa isa ka pangamuyo, ginhatagan sia ni Jehova sing kaalam kag ihibalo. Paagi sini, kag paagi sa pagsunod sa mga plano nga gin-aman sang Dios, napatindog ni Solomon yadtong halangdon nga balay, nga napun-an sang himaya ni Jehova. (2 Cronica 7:​2, 3) Apang, sang ulihi, napaslawan si Solomon. Sa anong bahin? Ang kasuguan ni Jehova nagsiling nahanungod sa hari sang Israel: “Dili sia magpadamo nga sa iya sing mga asawa, agod nga indi magpahilayo ang iya tagipusuon.” (Deuteronomio 17:17) Apang si Solomon “may pito ka gatos ka asawa, mga prinsesa, kag tatlo ka gatos ka mga babayi; kag ang iya mga asawa amat-amat . . . nga nagpatalang sang iya tagipusuon sa pagsunod sa iban nga mga dios.” Sa iya katigulangon, si Solomon nagpahilayo sa paghimo sing “amo gid.”​—⁠1 Hari 11:​3, 4; Nehemias 13:⁠26.

15. Paano ginhimo ni Josias ang “amo gid”?

¹⁵ May yara pila ka matinumanon nga mga hari sa Juda, ang katapusan sa ila amo si Josias. Sang tuig 648 B.C.E., ginsugdan niya nga tinluan ang duta sing idolatriya kag kay-uhon ang templo ni Jehova. Didto kag nakita sang mataas nga saserdote ang “tulun-an sang kasuguan ni Jehova nga ginhatag paagi kay Moises.” Ano ang ginhimo ni Josias sa sini? “Kag ang hari nagsaka sa balay ni Jehova upod ang tanan nga tawo sang Juda kag ang mga pumuluyo sang Jerusalem kag ang mga saserdote kag ang mga Levinhon, ang bug-os nga katawhan dalagku kag magamay; kag ginbasa niya sa ila mga igdulungog ang tanan nga pulong sang tulun-an sang katipan nga nakita sa balay ni Jehova. Kag ang hari nagtindog sa iya duog kag nagpakigkatipan sa atubangan ni Jehova sa pagsunod kay Jehova kag sa pagbantay sang iya mga sugo kag sang iya mga pagpamatuod kag sang iya mga palatukuran sa bug-os niya nga tagipusuon kag sa bug-os niya nga kalag, sa pagtuon sang mga pulong sang katipan nga nasulat sa sini nga tulun-an.” (2 Cronica 34:​14, 30, 31) Huo, “ginhimo [ni Josias] ang amo gid.” Bangod sang iya matutom nga dalanon, ang pagpatuman sang paghukom ni Jehova sa walay pagtuo nga Juda napalantang tubtob sa mga adlaw sang iya delingkwente nga mga anak.

Pagkabuhi Suno sa Pulong sang Dios

16, 17. (a) Sa anong mga bahin dapat naton sundon ang tikang ni Jesus? (b) Anong iban pa matutom nga mga alagad sang Dios ang nagahatag sing mga halimbawa para sa aton?

¹⁶ Tuhoy sa tanan nga mga lalaki nga nagkabuhi, ang pinakamaayo nga halimbawa sang nagpamalandong sa Pulong sang Dios kag nagkabuhi suno sa sini amo si Ginuong Jesucristo. Ang Pulong sang Dios kaangay sang pagkaon sa iya. (Juan 4:34) Nagsiling sia sa iya mga tagpalamati: “Ang Anak indi makahimo sing bisan ano sa iya kaugalingon, kundi lamang ang nakita niya nga ginahimo sang Amay. Kay ang bisan ano nga ginahimo sinang Isa, ini ginahimo man sang Anak sa amo nga bagay.” (Juan 5:​19, 30; 7:28; 8:​28, 42) ‘Amo gid ang ginhimo’ ni Jesus, nga nagasiling: “Nagkari ako gikan sa langit, indi sa paghimo sang akon kabubut-on, kundi sang kabubut-on sang nagpadala sa akon.” (Juan 6:38) Kita nga mga dedikadong Saksi ni Jehova ginapangabay sa paghimo sang “amo gid” paagi sa pagsunod sa mga tikang ni Jesus.​—⁠Lucas 9:23; 14:27; 1 Pedro 2:⁠21.

¹⁷ Ang paghimo sang kabubut-on sang Dios amo pirme ang nagalabaw sa hunahuna ni Jesus. Pamilyar gid sia sa Pulong sang Dios kag sa amo nasangkapan sa paghatag sing Makasulatanhon nga mga sabat. (Mateo 4:​1-11; 12:​24-31) Paagi sa paghatag sing dalayon nga igtalupangod sa Pulong sang Dios, kita man mahimo mangin “bug-os nga may ikasarang, bug-os nga nasangkapan para sa tagsa ka maayong buhat.” (2 Timoteo 3:​16, 17) Sundon naton ang huwaran sang matutom nga mga alagad ni Jehova sang una kag sang ulihi nga mga tion kag labaw sa tanan ang iya sang aton Agalon, nga si Jesucristo, nga nagsiling: “Agod mahibaluan sang kalibutan nga ako nagahigugma sa Amay, subong sang sugo nga ginhatag sang Amay sa akon nga himuon, amo ang ginahimo ko.” (Juan 14:31) Kabay nga ipakita man naton ang aton gugma sa Dios paagi sa padayon nga paghimo sang “amo gid.”​—⁠Marcos 12:​29-31.

18. Ano ang dapat magapahulag sa aton nga “mangin mga manugtuman sang pulong,” kag ano ang masunod nga pagahinun-anunan?

¹⁸ Samtang ginapamalandungan naton ang matinumanon nga dalanon sang mga alagad sang Dios sang panahon sang Biblia, wala bala kita ginapalig-on sa paghimo sing matutom nga pag-alagad sa nagahinakop nga mga adlaw sang malauton nga sistema ni Satanas? (Roma 15:​4-6) Sa pagkamatuod dapat kita mapahulag nga “mangin mga manugtuman sang pulong” sa bug-os nga kahulugan, subong sang pagahinun-anunan sang masunod nga artikulo.​—⁠Santiago 1:⁠22.

Madumduman Mo Bala?

◻ Ano dapat ang kahulugan sang “gugma sang Dios” para sa aton?

◻ Ano ang matun-an naton gikan sa mga halimbawa ni Noe, ni Moises, kag ni Josue?

◻ Tubtob diin gintuman sang mga hari sang Israel ang “pulong” sang Dios?

◻ Paano si Jesus ang aton Huwaran sa paghimo sang “amo gid”?

[Mga retrato sa pahina 15]

Si Noe, si Moises, kag si Josue “naghimo sing amo gid”