Ang mga Karnero ni Jehova Nagakinahanglan sing Mapinalanggaon nga Pag-atipan

“Kilalaha ninyo nga si Jehova Dios. . . . Kita iya katawhan kag mga karnero sa iya halalban.”​—⁠SALMO 100:⁠3.

1. Paano ginapakig-angutan ni Jehova ang iya mga alagad?

SI Jehova amo ang Dakung Manugbantay. Kon kita mga alagad niya, ginatamod niya kita subong mga karnero niya kag mapinalanggaon niya kita nga ginaatipan. Ang aton langitnon nga Amay nagalugpay kag nagapasulhay sa aton kag nagatuytoy sa aton sa “mga banas sang pagkamatarong tungod sa iya ngalan.” (Salmo 23:​1-4) Daku gid ang paghigugma sa aton sang Maayong Manugbantay, si Jesucristo, nga ginhatag niya ang iya kabuhi para sa aton.​—⁠Juan 10:​7-15.

2. Sa anong kahimtangan nasapwan sang katawhan sang Dios ang ila kaugalingon?

² Subong mga bumalaton sang mapinalanggaon nga pag-atipan, makasiling kita upod sa salmista: “Alagda si Jehova nga may kasadya. Magkari sa iya atubangan nga may pag-amba. Kilalaha ninyo nga si Jehova Dios. Sia ang naghimo sa aton, kag indi kita. Kita iya katawhan kag mga karnero sang iya halalban.” (Salmo 100:​2, 3) Huo, malipayon kita kag malig-on. Daw subong bala nga luwas kita gikan sa malaut nga mga manunukob sa isa ka toril nga may malig-on nga mga pader nga bato.​—⁠Numeros 32:16; 1 Samuel 24:3; Sofonias 2:⁠6.

Kinabubut-on nga mga Manugbantay sang Panong

3. Paano ginapakig-angutan sang gintangdo nga Cristianong mga gulang ang panong sang Dios?

³ Indi katingalahan nga malipayon kita subong mga karnero sang Dios! Ang gintangdo nga mga gulang nagapanguna sa tunga naton. Wala sila ‘nagahimo sang ila kaugalingon nga prinsipe,’ nagapakaginuo sa aton, ukon nagatinguha nga mangin mga agalon sang aton pagtuo. (Numeros 16:13; Mateo 20:​25-28; 2 Corinto 1:24; Hebreo 13:⁠7) Sa baylo, mahigugmaon sila nga mga manugbantay nga nagaaplikar sang laygay ni apostol Pedro: “Bantayi ninyo ang panong sang Dios nga ginaatipan ninyo, indi sa pilit, kundi sing kinabubut-on; indi bangod sang dibunayag nga daug, kundi sing malangkagon; indi nga nagapakaginuo sa mga panublion sang Dios, kundi nangin mga huwaran sang panong.” (1 Pedro 5:​2, 3) Si apostol Pablo nagsiling sa mga masigkagulang: “Hatagi ninyo sing igtalupangod ang inyo kaugalingon kag ang bug-os nga panong, nga sa ila gintangdo kamo sang balaan nga espiritu nga mga manugtatap, sa pagbantay sang kongregasyon sang Dios, nga ginbakal niya sang dugo sang iya kaugalingon nga Anak.” Kag nagapasalamat gid ang mga karnero nga ining mga lalaki nga gintangdo sang balaan nga espiritu “nagapakig-angot sa panong sing mapinalanggaon”!​—⁠Binuhatan 20:​28-30.

4. Sa anong sahi sang kaangtanan sa panong nakilal-an si ­Charles T. Russell?

⁴ Si Jesus naghatag sa kongregasyon sing “mga hiyas sa mga lalaki,” ang iban subong mga “pastor,” ukon mga manugbantay, nga nagapakig-angot sa panong sang Dios sing mapinalanggaon. (Efeso 4:​8, 11; King James Version) Ang isa sining mga lalaki amo si ­Charles T. Rus­sell, ang nahaunang presidente sang Watch Tower Society. Gintawag sia nga si Pastor Rus­sell bangod sang iya mahigugmaon kag mainawaon nga mga hilikuton sa pagbantay sa panong sa idalom sang Puno nga Manugbantay, si Jesucristo. Karon, ang Cristianong mga gulang ginatangdo sang Nagadumala nga Hubon sang mga Saksi ni Jehova, kag nagahalong nga indi paggamiton ang mga termino kaangay sang “pastor,” “gulang,” ukon “manunudlo” subong mga titulo. (Mateo 23:​8-12) Apang, ang karon nga mga gulang nagahimo sang hilikuton sa pagpastor, ukon pagbantay, para sa kaayuhan sang mga karnero sa halalban ni Jehova.

5. Ngaa dapat makilala sang mga bag-uhan ang gintangdo nga mga gulang sa Cristianong kongregasyon?

⁵ Subong mga manugbantay, ang mga gulang may importante nga bahin sa espirituwal nga pag-uswag sang mga bag-uhan. Hanti, ang bag-ong libro nga Ang Ihibalo nga Nagadul-ong sa Kabuhi nga Walay Katapusan nagasiling sa pahina 168: “Kilalaha ang gintangdo nga mga gulang sa kongregasyon. Madamo sila sing eksperiensia sa pag-aplikar sang ihibalo sang Dios, kay nahimo nila ang mga kalipikasyon para sa mga manugtatap nga ginpahamtang sa Biblia. (1 Timoteo 3:​1-7; Tito 1:​5-9) Indi magpang-alag-ag sa pagpalapit sa isa sa ila kon nagakinahanglan kamo sing espirituwal nga bulig agod malandas ang isa ka batasan ukon kinaiya nga nagasumpakil sa mga sugo sang Dios. Masapwan ninyo nga ginasunod sang mga gulang ang laygay ni Pablo: ‘Magpamulong sing malinugpayon sa mga kalag nga napung-awan, sakdaga ang maluya, mangin mabinatason ayon sa tanan.’​—⁠1 Tesalonica 2:​7, 8; 5:14.”

Kon ang mga Bag-uhan Maluyag sa Pagbantala

6. Anong paagi ang ginasunod kon ang isa ka estudyante sang Biblia maluyag mangin manugbantala sang Ginharian?

⁶ Pagkatapos ang isa ka estudyante sang Biblia nakakuha sing ihibalo kag nakatambong sa mga miting sa pila ka beses, mahimo nga luyag niya mangin isa ka manugbantala sang Ginharian, isa ka manugwali sang maayong balita. (Marcos 13:10) Kon amo, ang Saksi nga nagadumala sing pagtuon sa Biblia sa iya dapat makigsugilanon sa nagadumala nga manugtatap, nga magahimos agod makigsapol ang isa sa mga gulang sa Komite sang Pag-alagad sa Kongregasyon kag ang isa pa ka gulang sa estudyante sang Biblia kag sa nagatudlo sa iya. Ang paghinun-anon igapasad sa libro nga Organisado sa Pagtuman sang Aton Ministeryo, pahina 98 kag 99. Kon nakita sining duha ka gulang nga ang bag-uhan nagapati sa sadsaran nga mga panudlo sang Biblia kag nagpahisuno sa mga prinsipio sang Dios, pagasugiran sia nga kalipikado na sia nga makigbahin sa dayag nga pagministeryo.a Kon ireport niya ang iya ministeryo paagi sa paghatag sing report sa pag-alagad sa latagon, isulat ini sa Congre­gation’s Pub­lisher Re­cord ­card nga ginhimo sa iya ngalan. Mareport na karon sang bag-uhan ang iya hilikuton sa pagpanaksi kaupod sang minilyon pa nga malipayon nga ‘nagabantala sang pulong sang Dios.’ (Binuhatan 13:⁠5) Ipahibalo sa kongregasyon nga sia isa na ka dibawtismado nga manugbantala.

7, 8. Sa anong mga paagi ang isa ka dibawtismado nga manugbantala mahimo mahatagan sing kinahanglanon nga bulig sa ministeryo?

⁷ Kinahanglan sang dibawtismado nga manugbantala ang bulig sang mga gulang kag sang iban pa hamtong nga mga Cristiano. Halimbawa, ang konduktor sang ginatambungan niya nga Pagtinuon sa Libro sang Kongregasyon interesado sa iya espirituwal nga pag-uswag. Ayhan nabudlayan ang bag-ong manugbantala sa pagpakighambal sing epektibo sa pamalaybalay nga hilikuton. (Binuhatan 20:20) Gani mahimo nga malipayon niya nga batunon ang bulig, ilabi na gikan sa isa nga nagadumala sing pagtuon sa Biblia sa iya sa Ihibalo nga libro. Inang praktikal nga bulig nagakaigo, kay ginhanda ni Jesucristo ang iya mga disipulo para sa ministeryo.​—⁠Marcos 6:​7-13; Lucas 10:​1-22.

⁸ Agod ang aton ministeryo mangin mabungahon, ang maayong abanse nga paghanda kinahanglanon. Busa, mahimo anay ensayuhon sang duha ka manugbantala ang mga presentasyon nga ginpanugda sa bulanan nga mga guwa sang Ang Aton Ministeryo sa Ginharian. Sa pagguwa nila sa latagon, ang mas eksperiensiado amo anay ang magahambal sa nahauna ukon ikaduha nga ganhaan. Pagkatapos sang mainabyanon nga pag­pakilala, ang duha ka manugbantala lunsay makapakigbahin sa paghatag sing panaksi. Ang pagpangabudlay nga magkaupod sa ministeryo sa pila ka semana mahimo magadul-ong sa maayong mga pagduaw liwat kag bisan sa isa ka pagtuon sa Biblia sa puluy-an sa libro nga Ang Ihibalo nga Nagadul-ong sa Kabuhi nga Walay Katapusan. Mahimo dumalahan sang mas eksperiensiado nga manugbantala ang pagtuon sa pila ka tion kag nian ihatag ini sa bag-ong manugbantala sang Ginharian. Malipay gid ang duha ka manugbantala kon ang estudyante sang Biblia magapadayag sing apresasyon sa ihibalo sang Dios!

9. Anong mga kahimusan ang ginahimo kon ang isa ka manugbantala luyag magpabawtismo?

⁹ Samtang ang dibawtismado nga manugbantala nagauswag sa espirituwal, ayhan magahimo sia sing dedikasyon sa Dios sa pangamuyo kag maluyag sa pagpabawtismo. (Ipaanggid ang Marcos 1:​9-11.) Dapat niya isugid ang iya handum nga magpabawtismo sa nagadumala nga manugtatap sang kongregasyon, nga magahimos para marepaso sang mga gulang sa manugbantala ang mga pamangkot sa pahina 175 tubtob 218 sang Organisado sa Pagtuman sang Aton Ministeryo. Ang mga pamangkot nga ginbahinbahin sa apat ka bahin mahimo tuptupan sa tatlo ka sesyon sang tatlo ka lainlain nga mga gulang kon mahimo. Kon magaugyon sila nga ang dibawtismado nga manugbantala may nagakaigo nga paghangop sa mga panudlo sang Biblia kag kalipikado sa iban nga mga paagi, pagasugiran nila sia nga mahimo na sia mabawtismuhan. Subong resulta sang iya dedikasyon kag bawtismo, ‘ginatandaan’ sia para sa kaluwasan.​—⁠Ezequiel 9:​4-6.

Pag-atubang sa Pinasahi nga mga Kinahanglanon

10. Kon natapos na niya ang pagtuon sa Ihibalo nga libro kag nabawtismuhan, paano madugangan sang isa ka tawo ang iya ihibalo sa Kasulatan?

¹⁰ Kon natapos na sang isa ka indibiduwal ang iya pagtuon sa Biblia sa Ihibalo nga libro kag nabawtismuhan na, ayhan indi na kinahanglan ang isa ka pormal nga pagtuon upod sa iya sa ikaduha nga libro, subong sang Nahiusa sa Pagsimba sa Lamang Matuod nga Dios.b Sa pagkamatuod, ang bag-o lang nabawtismuhan nga tawo makatuon sing daku samtang nagahanda sia para sa Cristianong mga miting kag nagatambong sa sini sing tayuyon. Matigayon man niya ang dugang pa nga ihibalo kay ang iya kauhaw sa kamatuoran magapahulag sa iya nga basahon kag tun-an sing kinaugalingon ang Cristianong mga publikasyon kag hinun-anunan ang Makasulatanhon nga mga butang upod sa mga masigkatumuluo. Apang ano kon magautwas ang pinasahi nga mga kinahanglanon?

11. (a) Paano nabuligan si Apollo nanday Priscilla kag Aquila? (b) Anong bulig ang mahimo mahatag sa kasan-o lang nabawtismuhan nga lamharon nga adulto nga nagahunahuna sa pagminyo?

¹¹ Bisan si Apollo, nga “batid sa Kasulatan” kag nagpanudlo sing sibu gid tuhoy kay Jesus, nakabenepisyo sang ang eksperiensiado nga mga Cristiano nga sanday Priscilla kag Aquila ‘nagdala sa iya kag gintalastas sa iya sing sibu pa gid ang dalan sang Dios.’ (Binuhatan 18:​24-26; ipaanggid ang Binuhatan 19:​1-7.) Gani, pananglitan ang kasan-o lang nabawtismuhan nga lamharon nga adulto nagabinagbinag nga magnobyo kag ­magminyo. Mahimo sia mabuligan sang mas ­eksperiensiado nga Cristiano nga makita ang impormasyon tuhoy sining mga butang sa mga publikasyon sang Watch Tower. Halimbawa, ang mabuligon nga materyal may kaangtanan sini makita sa libro nga Questions Young People Ask​—⁠Answers That Work, Seksion 7.c Ang manugbantala nga nagtuon sa iya sa Biblia mahimo magahinun-anon sining materyal upod sa bag-uhan, walay sapayan nga wala nadalahig ang regular nga pagtuon.

12. Anong bulig ang mahimo mahatag para sa bag-ong bawtismado nga mag-asawa nga may mga problema?

¹² Binagbinaga ang isa pa ka halimbawa. Ayhan ang bag-ong nabawtismuhan nga mag-asawa may mga problema sa pag-aplikar sang diosnon nga mga prinsipio. Mahimo nila masugilanon ang isa ka gulang, nga makahinguyang sing pila ka gab-i sa paghinun-anon sang Kasulatan sa ila kag sa pagpatuhoy sang ila igtalupangod sa impormasyon nga masalapuan sa mga publikasyon sang Watch Tower. Apang, ang gulang indi magatukod liwat sing isa ka regular nga pagtuon sa Biblia upod sa mag-asawa.

Kon ang Bag-uhan Makasala

13. Ngaa ang mga gulang sa kongregasyon dapat magpakita sing kaluoy sa bag-ong nabawtismuhan nga tawo nga nakasala apang nagahinulsol?

¹³ Ginailog sang mga gulang ang Dakung Manugbantay, si Jehova, nga nagasiling: “Pahalbon ko ang akon mga karnero, . . . bugkusan ko ang nabali kag pabakuron ang masakiton.” (Ezequiel 34:​15, 16; Efeso 5:⁠1) Nahisuno sa sinang espiritu, si disipulo Judas naglaygay nga ang hinaplas nga mga Cristiano nga may mga pangduhaduha ukon nahulog sa sala dapat kaluuyan. (Judas 22, 23) Sanglit makatarunganon kita nga nagapaabot sing labi pa sa eksperiensiado nga mga Cristiano, dapat gid ipakita ang kaluoy sa isa ka bag-ong nabawtismuhan nga tawo​—⁠sa isa lamang ka kordero​—⁠nga nakasala apang nagahinulsol. (Lucas 12:48; 15:​1-7) Busa ang mga gulang, nga ‘nagahukom para kay Jehova,’ mapinalanggaon nga nagaatipan sa sinang karnero kag nagapasag-uli sa ila sa espiritu sang kalum-ok.​—⁠2 Cronica 19:6; Binuhatan 20:​28, 29; Galacia 6:⁠1.d

14. Ano ang dapat himuon kon ang kasan-o lang nabawtismuhan nga manugbantala nakahimo sing mabug-at nga sala, kag paano sia mabuligan?

¹⁴ Pananglitan, nian, nga ang kasan-o lang nabawtismuhan nga manugbantala may problema anay sa pag-inom kag nagpatuyang sing tuman sa isa ukon duha ka okasyon. Ukon ayhan nalandas niya ang madugay na nga bisyo sa pagpanigarilyo apang nasulay nga manigarilyo sing tago sa isa ukon duha ka beses. Bisan pa nga ang aton bag-ong utod nangayo sing patawad sa Dios sa pangamuyo, dapat sia mangayo sing bulig sa gulang agod ang sala indi mangin kinabatasan. (Salmo 32:​1-5; Santiago 5:​14, 15) Kon masugid niya ang iya sala sa isa sang mga gulang, dapat tinguhaan sina nga gulang nga ipasag-uli ang bag-uhan sa maluluy-on nga paagi. (Salmo 130:⁠3) Ang Makasulatanhon nga laygay mahimo nga bastante na agod buligan sia nga matadlong ang banas nga iya ginalaktan pagkatapos sina. (Hebreo 12:​12, 13) Ipakighambal sini nga gulang ang mga kahimtangan sa nagadumala nga manugtatap agod mapat-od kon anong dugang nga bulig ang dapat ihatag.

15. Sa pila ka hitabo, ano ang mahimo nga kinahanglanon kon ang kasan-o lang nabawtismuhan nga tawo nakasala?

¹⁵ Apang, sa pila ka hitabo labi pa ang mahimo nga ginakinahanglan. Kon ang pagkanabalahuba, katalagman sa panong, ukon iban pa serioso nga mga problema nadalahig, ang hubon sang mga gulang magatangdo sing duha ka gulang sa pag-usisa sang problema. Kon masapwan sining mga gulang nga ang problema serioso gid amo nga ang isa ka hudisyal nga komite ginakinahanglan, dapat nila ini ireport sa hubon sang mga gulang. Nian ang hubon sang mga gulang magatangdo sing isa ka hudisyal nga komite sa pagbulig sa nakasala. Ang hudisyal nga komite dapat makig-angot sa iya sa mapinalanggaon nga paagi. Dapat nila panikasugan nga ipasag-uli sia paagi sa mga Kasulatan. Kon magahulag sia sa maluluy-on nga mga panikasog sang hudisyal nga komite, nian sarang nila mapat-od kon bala maayo nga indi sia pagahatagan sing mga bahin sa plata­porma sa mga miting sa Kingdom Hall ukon ­dapat sia pahanugutan nga magkomento sa mga miting.

16. Ano ang sarang mahimo sang mga gulang sa pagbulig sa nakasala?

¹⁶ Kon ang nakasala magahulag, ang isa ukon duha ka gulang sa hudisyal nga komite makahimos sa pagduaw sa iya agod pabakuron ang iya pagtuo kag palig-unon ang iya pagpabalor sa matarong nga mga talaksan sang Dios. Ang kada isa sa ila mahimo nga magpangabudlay upod sa iya sa pag-alagad sa latagon sa tion kag tion. Mahimo nga may yara sila pila ka Makasulatanhon nga pagpakigsugilanon sa iya, ayhan nagagamit sang nagakabagay nga mga artikulo sa Lalantawan kag Magmata! apang wala nagatukod sing isa ka regular nga pagtuon sa Biblia. Paagi sa sinang mapinalanggaon nga pag-atipan, ang nakasala mahimo mapabakod nga mabatuan ang mga kaluyahon sang unod sa ulihi nga mga adlaw.

17. Anong mga tikang ang ginahimo kon ang bawtismado nga nakasala wala nagahinulsol kag nagabiya sang iya makasasala nga dalanon?

¹⁷ Sa pagkamatuod, ang pagpabawtismo sining karon lang indi balibad para sa dimahinulsulon nga pagbuhat sing sala. (Hebreo 10:​26, 27; Judas 4) Kon ang bisan sin-ong bawtismado nga nakasala wala nagahinulsol kag nagabiya sang iya makasasala nga dalanon, pahalinon sia sa kongregasyon. (1 Corinto 5:​6, 11-13; 2 Tesalonica 2:​11, 12; 2 Juan 9-11) Kon ini nga buhat kinahanglanon, ang hubon sang mga gulang magapili sing isa ka hudisyal nga komite. Kon sikwayon sia, ining malip-ot nga pahibalo mahimo himuon: “Si . . . gin-disfellowship.”e

Buligi Sila sa “Pag-uswag Padulong sa Pagkahamtong”

18. Ngaa makapat-od kita nga ang bag-ong nabawtismuhan nga mga Cristiano kag ang iban pa may yara pirme dugang pa nga matun-an nahanungod kay Jehova kag sa iya kabubut-on?

¹⁸ Ang kalabanan nga mga alagad sang Dios magapabilin sa panong. Sing makalilipay, ang kada isa sa aton labi man nga magasuod sa aton langitnon nga Amay bangod makatuon kita pirme sing dugang pa nahanungod sa iya kag sa iya kabubut-on. (Manugwali 3:11; Santiago 4:⁠8) Ang linibo nga ginbawtismuhan sadtong Pentecostes sang 33 C.E. pat-od gid nga madamo pa sing dapat tun-an. (Binuhatan 2:​5, 37-41; 4:⁠4) Amo man ang mga Gentil, nga kulang sing ihibalo sa Kasulatan. Pananglitan, matuod ini sa mga ginbawtismuhan pagkatapos sang pamulongpulong ni Pablo sa Areo­pago sa Atenas. (Binuhatan 17:​33, 34) Karon, man, ang bag-ong mga nabawtismuhan madamo pa sing dapat tun-an kag nagakinahanglan sing tion kag bulig sa pagpabakod sang ila pamat-od sa paghimo sing padayon sang kon ano ang matarong sa itululok sang Dios.​—⁠Galacia 6:9; 2 Tesalonica 3:⁠13.

19. Paano yadtong nabawtismuhan mabuligan sa “pag-uswag padulong sa pagkahamtong”?

¹⁹ Kada tuig linibo ang nagapabawtismo kag nagakinahanglan sing bulig agod ‘mag-uswag [sila] padulong sa pagkahamtong.’ (Hebreo 6:​1-3) Paagi sa hambal, halimbawa, kag praktikal nga bulig sa ministeryo, mahimo ninyo mabuligan ang pila sa pagsul-ob sing bag-ong personalidad kag “sa pagpadayon sa paglakat sa kamatuoran.” (3 Juan 4; Colosas 3:​9, 10) Kon ikaw isa ka eksperiensiado nga manugbantala, ang mga gulang mahimo nga magaagda sa imo sa pagbulig sa isa ka bag-uhan nga masigkatumuluo sa pag-alagad sa latagon ukon sa pagpaathag sang pila ka Makasulatanhon nga mga punto sa iya sa pila ka semana agod pabakuron ang iya pagtuo sa Dios, ang iya apresasyon sa Cristianong mga miting, kag iban pa. Ang kaangtanan sang mga manugbantay sa panong kaangay sang isa ka amay nga nagalaygay kag sang isa ka iloy nga mapinalanggaon. (1 Tesalonica 2:​7, 8, 11) Apang, indi maatipan sang pila ka gulang kag ministeryal nga mga alagad ang tanan nga kinahanglanon sa kongregasyon. Kita tanan kaangay sang isa ka pamilya nga ang mga katapo nagabinuligay. Ang kada isa sa aton sarang makahimo sing pila ka butang sa pagbulig sa aton mga masigkasumilimba. Ikaw mismo mahimo makahatag sing pagpalig-on, makalugpay sa napung-awan, makasakdag sa maluya.​—⁠1 Tesalonica 5:​14, 15.

20. Ano ang sarang mo mahimo sa pagpalapnag sang ihibalo sang Dios kag sa pag-aman sing mapinalanggaon nga pag-atipan sa mga karnero sa halalban ni Jehova?

²⁰ Kinahanglan sang katawhan ang ihibalo gikan sa Dios, kag subong isa ka Saksi ni Jehova, may yara ikaw makalilipay nga bahin sa pagpalapnag sini. Ang mga karnero ni Jehova nagakinahanglan sing mapinalanggaon nga pag-atipan, kag makatungod ikaw sing mahigugmaon nga bahin sa pagbulig nga maaman ini. Kabay nga pakamaayuhon ni Jehova ang imo ministeryo, kag kabay nga padyaan niya ikaw tungod sang imo tinagipusuon nga mga panikasog nga buligan ang mga karnero sa iya halalban.

[Mga Footnote]

Paano Mo Sabton?

◻ Paano ginapakig-angutan ni Jehova ang iya mga karnero?

◻ Ano ang himuon kon luyag sang mga bag-uhan magbantala?

◻ Paano mabuligan sang mga masigkatumuluo ang mga bag-uhan nga may pinasahi nga mga kinahanglanon?

◻ Anong bulig ang mahatag sang mga gulang sa mga nakasala apang nagahinulsol?

◻ Paano mo mabuligan ang bag-ong nabawtismuhan nga tawo sa “pag-uswag padulong sa pagkahamtong”?

[Retrato sa pahina 16]

Si Charles T. Russell nakilal-an subong isa ka mahigugmaon nga manugbantay sang panong

[Retrato sa pahina 18]

Ginapakig-angutan sang mainawaon nga mga manugbantay ang panong sang Dios sing mapinalanggaon