Ang Biblia—Isa ka Pinasahi nga Libro

Ginatawag ini nga ang pinakamabakal sa kalibutan, kag nagakaigo gid ini. Ang Biblia ginabasa kag ginapakabahandi labaw sa bisan ano pa nga libro. Sa karon, ang sirkulasyon sini (sa kabug-usan ukon bahin lamang) ginabulubanta nga apat ka bilyon ka kopya sa kapin sa 2,000 ka hambal.

Apang, ang makawiwili pa sa sirkulasyon sang Biblia amo ang ginapangangkon sini subong ginsulat sang Dios. “Ang bug-os nga Kasulatan gin-inspirar sang Dios,” sulat sang Cristianong si apostol Pablo. (2 Timoteo 3:16) Ano ang kahulugan sini? Ang dinalan nga “gin-inspirar sang Dios” (sa Griego, the·oʹpneu·stos) literal nga nagakahulugan sing “ginhawa sang Dios.” Ang kaanggid man nga Griegong tinaga, pneuʹma, nagakahulugan sing “espiritu.” Gani, ang pangangkon amo nga ginpahulag sang balaan nga espiritu sang Dios ang tawhanon nga mga manunulat, nagginhawa sa ila, sa malaragwayon nga hambal, agod ang resulta matawag sing matinuuron nga Pulong sang Dios, indi sang tawo. Sa pagkamatuod, madamo sang nagtuon sa Biblia ang natingala sa kabilugan nga paghisantuanay sini, sa sientipiko nga pagkasibu sini, sa kabunayag kag katampad sang mga manunulat sini, kag sing labi pa ka importante, sa natuman nga mga tagna sini​—⁠ini tanan nagkumbinsi sa minilyon ka mahunahunaon nga bumalasa nga ini nga libro may mas mataas pa sa tawo nga ginhalinan.a

Apang daw ano gid bala kaayo gintuytuyan sang Dios ang pagsulat sa Biblia? Ang iban nagasiling nga gindikta niya ang Biblia sing letra-por-letra. Ang iban naman nagasiling nga gin-inspirar lamang niya ang mga panghunahuna nga masapwan sa Biblia, indi ang mga tinaga. Apang, sa katunayan, ang pag-inspirar indi mahimo latiran sa isa lamang ka paagi, kay ang Dios naghambal “sa madamong paagi sa aton mga katigulangan paagi sa mga manalagna.” (Hebreo 1:​1; ipaanggid ang 1 Corinto 12:⁠6.) Sa masunod nga artikulo, usisaon naton ang mga paagi nga nakighambal ang Dios sa mga 40 ka tawo nga nagsulat sang Biblia.

[Footnote]