‘Luwasa ang Inyo Kaugalingon kag ang mga Nagapamati sa Inyo’

“Hatagi sing dalayon nga igtalupangod ang imo kaugalingon kag ang imo panudlo. . . . Sa paghimo sini maluwas mo ang imo kaugalingon kag ang mga nagapamati sa imo.”​—⁠1 TIMOTEO 4:⁠16.

1, 2. Ano ang nagapahulag sa matuod nga mga Cristiano nga padayunon ang ila nagaluwas-kabuhi nga hilikuton?

SA NABAW-ING nga minuro sa naaminhan nga Thailand, gintilawan sang isa ka mag-asawa nga mga Saksi ni Jehova ang ila bag-o natun-an nga mga ikasarang sa lenguahe sa mga tagatribo sa pukatod. Agod mabantala ang maayong balita sang Ginharian sang Dios sa mga tagaminuro, ang mag-asawa bag-o lang nagtuon sing hambal nga Lahu.

² “Mabudlay ilaragway ang amon kalipay kag kaayawan, sa pagpangabudlay sa tunga sining makawiwili nga katawhan,” paathag sang bana. “Nabatyagan gid namon nga nagapakigbahin kami sa katumanan sang Bugna 14:​6, 7, ginabantala ang makalilipay nga balita ‘sa tanan nga pungsod kag tribo kag hambal.’ Diutay na lamang nga latagon ang wala pa mabantalaan sing maayong balita, kag ini isa gid sa sini. Halos mas madamo ang amon mga pagtuon sa Biblia sangsa masarangan namon.” Maathag gid nga ining mag-asawa nagalaum nga luwason indi lamang ang ila kaugalingon kundi ang mga nagapamati man sa ila. Subong mga Cristiano, wala bala kita tanan nagalaum nga maghimo sing amo man?

“Hatagi Sing Dalayon nga Igtalupangod ang Imo Kaugalingon”

3. Agod maluwas ang iban, ano anay ang dapat naton himuon?

³ Si apostol Pablo naglaygay kay Timoteo, “Hatagi sing dalayon nga igtalupangod ang imo kaugalingon kag ang imo panudlo,” kag naaplikar ini sa tanan nga Cristiano. (1 Timoteo 4:16) Sa pagkamatuod, agod buligan ang iban sa pagtigayon sing kaluwasan, dapat anay naton hatagan sing igtalupangod ang aton kaugalingon. Paano naton ini himuon? Una, dapat kita magpabilin nga alisto sa panahon nga ginapuy-an naton. Si Jesus naghatag sing isa ka grupo nga tanda agod mahibaluan sang iya mga sumulunod kon nag-abot na ang “katapusan sang sistema sang mga butang.” Apang, nagsiling man si Jesus nga indi naton mahibaluan sing eksakto kon san-o magaabot ang katapusan. (Mateo 24:​3, 36) Ano dapat ang reaksion naton sa sina nga kamatuoran?

4. (a) Ano nga panimuot ang dapat naton palambuon sa tion nga nabilin sa sining sistema? (b) Ano nga panimuot ang dapat naton likawan?

⁴ Ang kada isa sa aton mahimo mamangkot, ‘Ginagamit ko bala ang bisan ano man nga tion nga nabilin para sa sining sistema agod maluwas ang akon kaugalingon kag ang mga nagapamati sa akon? Ukon nagahunahuna bala ako, “Sanglit wala naton mahibaluan sing eksakto kon san-o magaabot ang katapusan, indi ako dapat magkabalaka sa sini”?’ Ang naulihi nga panimuot makatalagam. Supak gid ini sa laygay ni Jesus: “Pamatud-i man ninyo ang inyo kaugalingon nga handa, bangod sa oras nga wala ninyo paghunahunaa, magaabot ang Anak sang tawo.” (Mateo 24:44) Indi gid ini ang tion sa pagpabuyanbuyan sa pag-alagad kay Jehova ukon sa paglaum nga matigayon ang kalig-unan ukon kaayawan sa kalibutan.​—⁠Lucas 21:​34-36.

5. Anong mga halimbawa ang ginpahamtang sang antes-Cristiano nga mga saksi ni Jehova?

⁵ Ang isa pa ka paagi nga mapakita naton nga ginahatagan naton sing igtalupangod ang aton kaugalingon amo ang pagbatas sing matutom subong mga Cristiano. Ang mga alagad anay sang Dios nagpabilin nga nagabatas, nagalaum man sila sing gilayon nga kaluwasan ukon wala. Sa tapos masambit ang mga halimbawa sang antes-Cristiano nga mga saksi subong nanday Abel, Enoc, Noe, Abraham, kag Sara, si Pablo nagsiling: “Wala nila matigayon ang katumanan sang mga saad, apang nakita nila ini gikan sa malayo kag gin-abiabi ini kag dayag nga nagpahayag nga sila mga dumuluong kag umalagi nga mga pumuluyo sa duta.” Wala sila magpadala sa bisan ano man nga handum nga magkabuhi sing masulhay, ni nagpadaug sila sa imoral nga mga pag-ipit sa palibot nila, kundi malangkagon nila nga ginhulat ang “katumanan sang mga saad.”​—⁠Hebreo 11:​13; 12:⁠1.

6. Paano ang pagtamod sa kaluwasan sang unang-siglo nga mga Cristiano nakaapektar sang ila pagkabuhi?

⁶ Nasapwan man sang unang-siglo nga mga Cristiano ang ila kaugalingon subong “mga dumuluong” sa sining kalibutan. (1 Pedro 2:11) Bisan pagkatapos nga naluwas sang ginlaglag ang Jerusalem sang 70 C.⁠E., ang matuod nga mga Cristiano wala magdulog sa pagbantala ukon nagbalik sa kalibutanon nga pagkabuhi. Nahibaluan nila nga nagahulat ang daku nga kaluwasan sa mga nagapabilin nga matutom. Sa katunayan, sang 98 C.⁠E., si apostol Juan nagsulat: “Ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.”​—⁠1 Juan 2:​17, 28.

7. Paano nagpakita sing pagbatas ang mga Saksi ni Jehova sa modernong tion?

⁷ Sa modernong tion ang mga Saksi ni Jehova nagpadayon man sa Cristianong hilikuton, bisan pa nga ginhingabot sila sing mapintas. Walay pulos bala ang ila pagbatas? Indi gid, kay si Jesus nagpasalig sa aton: “Sia nga nakabatas tubtob sa katapusan amo sia ang maluwas,” ini man amo ang katapusan sang daan nga sistema ukon ang katapusan sang karon nga kabuhi sang isa. Sa pagkabanhaw, dumdumon kag padyaan ni Jehova ang tanan niya nga matutom nga alagad nga napatay.​—⁠Mateo 24:​13; Hebreo 6:⁠10.

8. Paano naton mapakita nga ginaapresyar naton ang pagbatas sang mga Cristiano sang nagligad?

⁸ Dugang pa, malipayon kita nga ang matutom nga mga Cristiano sang nagligad indi lamang interesado sa ila kaugalingon nga kaluwasan. Pat-od gid nga kita nga nakatuon tuhoy sa Ginharian sang Dios paagi sa ila mga panikasog nagapasalamat nga nagbatas sila sa pagtuman sa sugo ni Jesus: “Busa lakat kamo kag maghimo sing mga disipulo sa mga tawo sa tanan nga kapungsuran, . . . nagatudlo sa ila nga tumanon ang tanan nga butang nga ginsugo ko sa inyo.” (Mateo 28:​19, 20) Tubtob nga ang kahigayunan bukas pa sa aton, mapakita naton ang aton pagpasalamat paagi sa pagbantala sa iban nga wala pa makabati sang maayong balita. Apang, ang pagbantala nahauna lamang nga tikang padulong sa paghimo sing mga disipulo.

‘Hatagi Sing Igtalupangod ang Imo Panudlo’

9. Paano makabulig sa aton ang positibo nga panimuot sa pagsugod sing mga pagtuon sa Biblia?

⁹ Ang aton hilikuton wala lamang nagalakip sang pagbantala kundi sang pagtudlo man. Si Jesus nagsugo sa aton nga tudluan ang katawhan nga tumanon ang tanan nga butang nga ginsugo niya. Matuod, sa iban nga mga teritoryo, daw diutay lamang ang luyag magtuon tuhoy kay Jehova. Apang ang negatibo nga pagtamod sa teritoryo mahimo magpugong sa aton mga panikasog nga makasugod sing mga pagtuon sa Biblia. Si Yvette, isa ka payunir sa teritoryo nga ginatawag sang iban nga di-mabungahon, nakatalupangod nga ang mga bisita sa lugar, nga wala sing subong sini nga negatibo nga panimuot, nakasugod sing mga pagtuon sa Biblia. Sa tapos mapalambo ang mas positibo nga panimuot, nakakita man si Yvette sang mga tawo nga luyag magtuon sa Biblia.

10. Ano ang aton sadsaran nga papel subong mga manunudlo sang Biblia?

¹⁰ Ang iban nga mga Cristiano mahimo magpangalag-ag sa pagtanyag sing pagtuon sa Biblia sa mga interesado bangod nagahunahuna sila nga indi nila masarangan ang magdumala sing isa ka pagtuon. Matuod, nagkalainlain ang aton ikasarang. Apang indi kinahanglan nga mangin sampaton gid kita agod magmadinalag-on subong mga manunudlo sang Pulong sang Dios. Ang putli nga mensahe sang Biblia gamhanan, kag si Jesus nagsiling nga kilala sang mga tulad-karnero ang tingog sang matuod nga Manugbantay kon mabatian nila ini. Kon amo, ang aton katungdanan amo lamang ang pagpaalinton sang mensahe sang Maayo nga Manugbantay, si Jesus, sing maathag tubtob sa masarangan naton.​—⁠Juan 10:​4, 14.

11. Paano kamo mangin mas epektibo sa pagbulig sa isa ka estudyante sang Biblia?

¹¹ Paano ninyo mapaalinton ang mensahe ni Jesus sing mas epektibo? Una, tun-i ang ginasiling sang Biblia tuhoy sa topiko nga ginabinagbinag. Dapat ninyo mismo mahangpan ang topiko antes ninyo ini matudlo sa iban. Subong man, panikasugi nga huptan ang dungganon apang mainabyanon nga kahimtangan sa tion sang pagtuon. Ang mga estudyante, lakip na ang mga bata, makatuon sing mas maayo kon relaks sila kag ang nagatudlo nagapakita sa ila sing pagtahod kag kaayo.​—⁠Hulubaton 16:⁠21.

12. Paano ninyo mapat-od nga nahangpan sang estudyante ang ginatudlo ninyo sa iya?

¹² Subong isa ka manunudlo, indi mo luyag nga ihatag lamang ang mga impormasyon agod makasabat ang estudyante nga daw wala lang sa iya bungog. Buligi sia nga mahangpan ang iya ginatun-an. Ang edukasyon, eksperiensia, kag ihibalo sang estudyante sa Biblia magaapektar sang iya paghangop kon ano ang imo ginasiling. Busa, mahimo nga pamangkuton mo ang imo kaugalingon, ‘Nahangpan bala niya ang kahulugan sang mga kasulatan nga ginsambit sa ginatun-an nga materyal?’ Mapahambal mo sia paagi sa mga pamangkot nga indi masabat sang huo ukon indi lamang kundi nagakinahanglan sing paathag. (Lucas 9:​18-20) Sa pihak nga bahin, ang pila ka estudyante nagapangalag-ag sa pagpamangkot sa manunudlo. Sa amo, mahimo sila magpadayon sa pagtuon nga wala mahangpan sing bug-os ang ila ginatun-an. Palig-una ang estudyante sa pagpamangkot kag sa pagsugid sa imo kon indi niya mahangpan sing maayo ang pila ka punto.​—⁠Marcos 4:​10; 9:​32, 33.

13. Paano ninyo mabuligan ang estudyante nga mangin isa ka manunudlo?

¹³ Ang isa ka importante nga katuyuan sang pagdumala sing pagtuon sa Biblia amo ang pagbulig sa estudyante nga mangin manunudlo. (Galacia 6:6) Bangod sina, subong repaso sa inyo pagtuon, mahimo nga pangabayon mo sia nga ipaathag sa imo ang isa ka punto sa simple nga mga tinaga, subong nga daw ginapaathag niya ini sa isa nga karon pa lang makabati sini. Sa ulihi, kon mangin kalipikado sia sa pagpakigbahin sa ministeryo, maagda mo sia sa pag-upod sa imo sa latagon. Mahimo nga komportable sia sa pagpangabudlay upod sa imo, kag ang eksperiensia magabulig sa iya nga makatigayon sing kompiansa tubtob nga handa na sia sa pagguwa sa ministeryo nga sia lamang.

Buligi ang Estudyante nga Mangin Abyan ni Jehova

14. Ano ang inyo pangunang tulumuron subong isa ka manunudlo, kag ano ang magaamot sa kadalag-an sa pagtigayon sini?

¹⁴ Ang panguna nga katuyuan sang tagsa ka Cristianong manunudlo amo ang pagbulig sa estudyante nga maagom ang pagpakig-abyan ni Jehova. Mahimo ninyo ini indi lamang paagi sa inyo mga pulong kundi paagi man sa inyo halimbawa. Ang pagtudlo paagi sa halimbawa may daku nga epekto sa tagipusuon sang mga estudyante. Mas epektibo ang mga ginahimo sangsa mga ginahambal, ilabi na kon tuhoy sa pagpatudok sing moral nga mga kinaiya kag sa pagpapagsik sing kakugi sa estudyante. Kon makita niya nga ang inyo ginahambal kag ginabuhat nagagikan sa maayo nga kaangtanan kay Jehova, mahimo nga mas mapahulag sia nga palambuon man ini nga kaangtanan.

15. (a) Ngaa importante nga mapalambo sang estudyante ang husto nga motibo sa pag-alagad kay Jehova? (b) Paano ninyo buligan ang estudyante nga magpadayon sa pag-uswag sa espirituwal?

¹⁵ Luyag ninyo nga alagaron sang estudyante si Jehova indi lamang bangod indi niya luyag nga malaglag sa Armagedon kundi bangod ginahigugma niya sia. Paagi sa pagbulig sa iya nga mapalambo ining putli nga motibo, magatukod kamo paagi sa nagabato-sa-kalayo nga mga materyales nga makalampuwas sa mga pagtilaw sang iya pagtuo. (1 Corinto 3:​10-15) Ang sayop nga motibo, subong sang sobra nga handum nga ilugon kamo ukon ang iban pa nga tawo, indi magahatag sa iya sing kusog nga batuan ang di-cristiano nga mga impluwensia ukon sing kaisog nga himuon kon ano ang husto. Dumduma, indi kamo mangin manunudlo niya sa walay katubtuban. Samtang may higayon kamo, mapalig-on ninyo sia nga magsuod sing labi pa kay Jehova paagi sa pagbasa sa Pulong sang Dios kada adlaw kag sa paghunahuna tuhoy sini. Sa sining paagi padayon niya nga matigayon ang “sulundan sang makapapagros nga mga pulong” gikan sa Biblia kag sa mga publikasyon pasad sa Biblia maski nga madugay na natapos ang inyo pagtuon sa iya.​—⁠2 Timoteo 1:⁠13.

16. Paano ninyo tudluan ang estudyante sa pagpangamuyo sing tinagipusuon?

¹⁶ Mabuligan man ninyo ang estudyante nga magsuod sing labi pa kay Jehova paagi sa pagtudlo sa iya sa pagpangamuyo sing tinagipusuon. Paano ninyo ini himuon? Ayhan matudlo ninyo sa iya ang huwaran nga pangamuyo ni Jesus, subong man ang madamong tinagipusuon nga pangamuyo nga narekord sa Biblia, subong sang yara sa mga salmo. (Salmo 17, 86, 143; Mateo 6:​9, 10) Dugang pa, kon ang inyo estudyante nagapamati sa inyo nga nagapangamuyo sa pagbukas kag sa pagtapos sang pagtuon, mabatyagan niya ang inyo mga balatyagon kay Jehova. Sa amo, ang inyo mga pangamuyo dapat pirme magpakita sing pagkasinsero kag pagkatampad, subong man sing espirituwal kag emosyonal nga pagkatimbang.

Pagpangabudlay Agod Maluwas ang Inyo mga Anak

17. Paano buligan sang mga ginikanan ang ila mga anak nga magpabilin sa banas sang kaluwasan?

¹⁷ Lakip sa luyag naton maluwas, siempre pa, amo ang mga katapo sang aton pamilya. Madamo nga kabataan sang Cristianong mga ginikanan ang sinsero kag “malig-on sa pagtuo.” Apang, ang kamatuoran mahimo nga wala makapanggamot sing madalom sa tagipusuon sang iban. (1 Pedro 5:​9; Efeso 3:​17; Colosas 2:7) Madamo sining mga pamatan-on ang nagbiya sa Cristianong dalanon sang nagahinampot ukon nagasulod sila sa pagkahamtong. Kon ikaw isa ka ginikanan, ano ang himuon mo agod indi ini matabo? Una, panikasugi nga mapaluntad ang isa ka malipayon nga kahimtangan sa pamilya. Ang malipayon nga pagkabuhi sang pamilya amo ang sadsaran sang maayo nga pagtamod sa awtoridad, pag-apresyar sa nagakaigo nga mga prinsipio, kag malipayon nga mga kaangtanan sa iban. (Hebreo 12:9) Busa, ang suod nga mga kaangtanan sa sulod sang pamilya mangin salaburan nga sa sini ang pagpakig-abyan sang bata kay Jehova mahimo magtubo. (Salmo 22:10) Ang mabakod nga mga pamilya nagapanghikot subong isa ka yunit​—⁠bisan pa nga dapat isakripisyo sang mga ginikanan ang tion nga mahimo magamit sa personal nga kaayuhan. Sa sining paagi matudluan ninyo ang inyo mga anak paagi sa halimbawa nga nagahimo kamo sing husto nga mga desisyon sa kabuhi. Mga ginikanan, ang labi nga ginakinahanglan sang inyo mga anak sa inyo, indi ang materyal nga mga kaayuhan, kundi kamo​—⁠ang inyo tion, kusog, kag gugma. Ginahatag bala ninyo sa inyo mga anak ini nga mga butang?

18. Ano nga sahi sang mga pamangkot ang dapat buligan sang mga ginikanan nga sabton sang ila mga anak?

¹⁸ Ang Cristianong mga ginikanan indi gid dapat maghaumhaum nga ang ila mga anak awtomatiko man nga mangin mga Cristiano. Si Daniel, isa ka gulang kag amay sang lima ka kabataan, nagsiling: “Ang mga ginikanan dapat maghinguyang sing tion sa pagbulig nga madula ang mga duhaduha nga di-malikawan nga napudyot sang ila mga anak sa eskwelahan kag sa iban nga mga lugar. Dapat nila buligan sing mapailubon ang ila mga anak nga makita ang mga sabat sa mga pamangkot subong sang: ‘Nagakabuhi gid bala kita sa tion sang katapusan? Isa gid lang bala ang matuod nga relihion? Ngaa ang isa ka daw mabuot nga kabutho indi maayo nga kaupod? Malain gid bala pirme ang makighulid antes sang kasal?’ ” Mga ginikanan, makasalig gid kamo nga pakamaayuhon ni Jehova ang inyo mga panikasog, kay interesado man sia sa kaayuhan sang inyo mga anak.

19. Ngaa labing maayo nga mga ginikanan mismo ang magtuon sa ila mga anak?

¹⁹ Ang iban nga mga ginikanan mahimo magbatyag nga indi takus sa pagtuon upod sa ila mismo mga anak. Apang, indi kamo dapat magbatyag sing subong sini, kay wala na sing iban pa nga makatudlo sing mas maayo sa inyo mga anak sangsa inyo. (Efeso 6:4) Ang pagtuon upod sa inyo mismo mga anak magatugot sa inyo nga mahibaluan dayon kon ano ang yara sa ila tagipusuon kag hunahuna. Ang ila bala mga ginahambal tinagipusuon ukon hapaw lamang? Nagapati gid bala sila sa ila ginatun-an? Matuod bala si Jehova sa ila? Mahibaluan lamang ninyo ang mga sabat sa sini kag sa iban pa importante nga mga pamangkot kon kamo mismo ang magtuon sa inyo mga anak.​—⁠2 Timoteo 1:⁠5.

20. Paano himuon sang mga ginikanan ang pangpamilya nga pagtuon nga makalilipay kag mapuslanon?

²⁰ Paano ninyo padayunon ang inyo programa sa pagtuon sang pamilya sa tion nga masugdan ninyo ini? Si Joseph, isa ka gulang kag amay sang isa ka bata nga lalaki kag bata nga babayi, nagsiling: “Kaangay sang tanan nga pagtuon sa Biblia, ang pagtuon sang pamilya dapat nga makalilipay, isa ka butang nga ginapaabot-abot sang tanan. Agod matigayon ina sa amon pamilya, indi mahimo nga mangin tuman kami ka estrikto may kaangtanan sa oras. Ang amon pagtuon mahimo maglawig sing isa ka oras, apang bisan pa nga kon kaisa may yara lamang kami napulo ka minuto, nagatuon gihapon kami. Ang isa ka butang nga nagabulig agod ang amon pagtuon mangin pinasahi nga okasyon sa semana para sa kabataan amo nga ginaarte namon ang mga danyag gikan sa Ang Akon Libro sang mga Sugilanon sa Biblia.⁠a Ang kadakuon sang epekto kag paghangop nga nagaresulta mas importante sangsa kon pila ka parapo ang ginatuptupan namon.”

21. San-o mahimo tudluan sang mga ginikanan ang ila mga anak?

²¹ Sa pagkamatuod, ang pagtudlo sa inyo mga anak indi limitado sa mga tion sang pormal nga pagtuon. (Deuteronomio 6:​5-7) Ang Saksi sa Thailand nga ginsambit sa umpisa nagsiling: “Madumduman ko pa sing maathag kon paano ako anay ginaupod ni Daddy sa hilikuton nga pagbantala, nga sakay sa amon mga bisikleta, sa nabaw-ing nga mga lugar sa teritoryo sang amon kongregasyon. Pat-od gid nga ang maayo nga halimbawa sang amon mga ginikanan kag ang pagtudlo nila sa amon sa tanan nga kahimtangan ang nagbulig sa amon nga magpamat-od sa pagsulod sa bug-os tion nga ministeryo. Kag ang mga leksion epektibo gihapon. Nagapangabudlay ako gihapon sa nabaw-ing nga mga teritoryo!”

22. Ano ang magaresulta gikan sa ‘paghatag ninyo sing igtalupangod sa inyo kaugalingon kag sa inyo panudlo’?

²² Sa pila ka adlaw, sa husto gid nga tion, himuon ni Jesus ang paghukom sang Dios sa sining sistema. Pagkatapos sina inang daku nga hitabo mangin maragtas na lamang sa bug-os nga uniberso, apang ang matutom nga mga alagad ni Jehova padayon nga magaalagad sa iya nga nagapaabot sang walay katapusan nga kaluwasan. Nagalaum bala kamo nga mangin kaupod nila, upod sa inyo mga anak kag mga estudyante sa Biblia? Kon amo dumduma: “Hatagi sing dalayon nga igtalupangod ang imo kaugalingon kag ang imo panudlo. Magpadayon ka sa sining mga butang, kay sa paghimo sini maluwas mo ang imo kaugalingon kag ang mga nagapamati sa imo.”​—⁠1 Timoteo 4:⁠16.

[Nota]

Mapaathag Mo Bala?

• Ano ang dapat nga mangin panimuot naton, kay wala kita makahibalo sang eksakto nga tion sang paghukom sang Dios?

• Sa anong mga paagi ‘mahatagan naton sing igtalupangod ang aton panudlo’?

• Paano mo buligan ang isa ka estudyante nga mangin abyan ni Jehova?

• Ngaa importante nga maghinguyang sing tion ang mga ginikanan sa pagtudlo sa ila mga anak?

[Retrato sa pahina 15]

Ang pagtuon ginapauswag sang dungganon apang mainabyanon nga kahimtangan

[Retrato sa pahina 18]

Ang pag-arte sa mga sugilanon sa Biblia, subong sang paghukom ni Solomon sa duha ka salamwanan, nagahimo sang mga pagtuon sang Biblia nga makalilipay