Buligi ang mga Bag-uhan sa Pag-uswag
1 Sang Abril 17, 1992, halos 11.5 milyones ka tawo sa bug-os nga kalibutan ang nagtipon sa pagsaulog sang Memoryal sang kamatayon ni Cristo. Makalilipay gid makita ina nga kadam-an nga nagadugok sa “bukid ni Jehova”! (Miq. 4:2) Sa karon mga pito ka milyon ka tawo ang nagapakita sing interes sa matuod nga pagsimba kag indi pa dayag nga mga dumalayaw ni Jehova. Pat-od gid nga ang mga pinamulong ni Jesus nga “ang alanyon daku” wala pa gid mangin subong ka makahulugan!—Mat. 9:37, 38.
2 Sa bulan sang Mayo, pinasahi nga panikasugan naton nga buligan ang tanan nga nagtambong sa Memoryal nga magpadayon sa pag-uswag. Ang konduktor sang Pagtinuon sa Libro sang Kongregasyon may importante nga papel sa sini. Ang aton tatlo ka tulumuron amo (1) maghimos sing isa ka pagtuon sa Biblia sa puluy-an kaupod sang mga bag-uhan nga nagtambong sa Memoryal sini nga tuig; (2) magpalig-on sadtong nagatuon na nga makalipikar nga mangin dibawtismado nga mga manugbantala; kag (3) magpauswag sang aton personal nga pagpakigbahin sa ministeryo sa latagon.
3 Sa promedyo, 91,155 ka pagtuon sa Biblia ang ginhiwat sa Pilipinas kada bulan sang 1992 nga tuig sang pag-alagad. Mahimo agdahon sang mga manugbantala ang ila konduktor sa pagtinuon sa libro nga updan sila sa mga pagtuon sa Biblia agod makilala nila ang mga estudyante. (km 5/81 p. 4) Ang iban sining mga estudyante sa Biblia mahimo nga nagatambong na karon sa mga miting kag kalipikado makigbahin sa pamalaybalay nga hilikuton. Nagapanaksi bala sila sing dipormal? Nalab-ot bala nila ang mga kalipikasyon para mangin dibawtismado nga mga manugbantala subong sang ginabalay sa Aton Ministeryo, pahina 97-9? Kon amo, ipaathag sa ila kon paano sila makasugod sa pamalaybalay nga hilikuton pagkatapos mangin dibawtismado nga mga manugbantala.
4 Indi naton pagkalimtan nga palig-unon ang isa kag isa sa Cristianong paghiliupod. (Heb. 10:24, 25) Kon may naghinay sa ila ministeryo, ang mga konduktor sa pagtinuon sa libro dapat maghimo sing pat-od nga mga kahimusan agod makahatag sing bulig kag kalig-unan. Kon kaisa ang mainit nga imbitasyon nga updan kita sa pag-alagad sa latagon amo lamang ang ginakinahanglan.
5 Agod himuon ang Mayo nga isa ka talalupangdon nga bulan sang pag-alagad sa latagon nga hilikuton nagakinahanglan sang kooperasyon sang tanan. Ang mapagsik nga pagpanguna sang konduktor sa pagtinuon sa libro importante samtang ginabuligan niya ang tagsa ka katapo sang iya grupo sa pagpakigbahin sing bug-os sa ministeryo. Madamo ang magapakigbahin sa auxiliary payunir nga hilikuton. Ang dugang nga mga miting antes magguwa sa latagon mahimo mahimos. Ang mga tigulang sarang mahatagan sing pinasahi nga igtalupangod, kag ang mga pamatan-on sarang mabuligan sa praktikal nga mga paagi. Dapat tan-awon sang mga ginikanan nga ang bug-os nga panimalay nagapakigbahin sa ministeryo sa Mayo. Kon ginahatag naton tanan ang aton pinakamaayo kay Jehova sa sining panahon sang ani, ang iya bugana nga pagpakamaayo mangin sa aton.