Mag-alagad kay Jehova nga Wala sing Tublag

¹ “Malipayon ang katawhan nga ang Dios amo si Jehova!” (Sal. 144:15) Matuod bala gihapon ini nga mga pinamulong ni Hari David, bisan sa sining malauton nga mga adlaw? (Efe. 5:16) Huo! Ang mga Cristiano nagakasadya gihapon sa pag-alagad kay Jehova. Indi ini pirme mahapos para sa aton. Si Satanas nagahatag sa aton sing mga kabudlayan sa sining “makahalanguyos nga mga tion,” apang wala nagaluya ang aton buot. (2 Tim. 3:​1, 2) Ang nagalain nga mga kahimtangan dugang nga nagapamatuod nga malapit na ang tion nga hapayon sang Ginharian sang Dios ining nagakadunot nga daan nga kalibutan kag islan ini sang matinlo nga bag-ong kalibutan. (2 Ped. 3:13) Ang kadudulman sining kalibutan wala nagapalong sang kalayo sang aton makalilipay nga paglaum; sa baylo, ang aton paglaum sa Ginharian nagasanag sing labi pa. Wala ka bala nalipay nga nagaalagad ka kay Jehova subong ang manugsulo sa sining madulom nga kalibutan?​—Filip. 2:15.

² Subong mga indibiduwal, dapat kita pirme magbantay kon paano naton ginaalagad si Jehova. Ngaa? Bangod si Satanas isa ka daku nga Manugtublag. Ginahatagan sing kahulugan sang isa ka diksionaryo ang “tublag” subong “pagtalikod,” “pagpahilayo ukon pagpatuhoy (sang igtalupangod sang isa) sa tuhay nga butang ukon tuhay nga mga direksion sa amo man nga tion,” kag “pagpukaw ukon paggumon sang nagasumpakilay nga mga emosyon ukon mga motibo.” Bangod gintagbong sa sining duta, si Satanas nagmadinalag-on sa “pagpatalang” sa katawhan. Nagagamit sia sing madamong mga padugi agod ipahilayo ang igtalupangod sang tawo sa matuod nga mga hulusayon sa aton adlaw. (Bug. 12:9) Bisan nga ang mga Saksi ni Jehova nanikasog nga ibantala ang Ginharian sa nagligad nga isa ka gatos ka tuig, pila ka tawo ang nagaapresyar sa pinakaimportante nga hulusayon nga pakabalaanon ang ngalan sang Dios kag bindikahon ang iya soberanya paagi sa Ginharian sang Dios? Diutay lamang. (1 Juan 5:19) Kon mahimo matublag ni Satanas ang binilyon ka tawo sa sining duta, ang yara pirme nga katalagman amo nga sarang niya kita matublag ukon maganyat ang aton igtalupangod agod talikdan naton ang pag-alagad kay Jehova. Sing makapasubo, ang pila sa aton mga kauturan nagumon sa mga panublag ni Satanas. Gintugutan nila ang ila hunahuna nga mapahilayo sa tuhay nga direksion. May madamo nga sahi sang mga tublag karon. Binagbinaga ang pila lamang sini.

³ Mga Problema sa Pangabuhi kag Gugma sa Materyal nga mga Butang: Sa kalabanan nga mga kapungsuran sa duta, ang pagkawalay palamugnan kag mataas nga balaklon nagatuga sing mga kabalaka. Matuod, dapat naton amanan sing pagkaon, panapton, kag pasilungan ang aton kaugalingon kag ang aton pamilya. Apang kon tugutan naton ang aton kaugalingon nga mabalaka sing tuman sa mga kinahanglanon sang kabuhi, ini nga mga kabalaka magapangibabaw sa aton panghunahuna. Ang aton pisikal nga kaluwasan mahimo nga mangin ang pinakaimportante nga butang sa kabuhi sa baylo nga supurtahan naton ang hulusayon sa Ginharian. Si apostol Pablo naghatag sing laygay sa sining bahin sa Hebreo 13:​5, 6. Si Jesucristo nagapasalig sa aton nga yadtong nagapangita una sang Ginharian indi dapat mabalaka; si Jehova nagaaman kon ano gid ang aton kinahanglanon. (Mat. 6:​25-34) Ang mga payunir kag ang iban nga bug-os tion nga mga alagad sa bug-os nga kalibutan nagapamatuod nga ini matuod.

⁴ Ang kalibutan ni Satanas nagapasanyog sang gugma sa materyal nga mga butang. Ang pagtigayon sing dugang nga mga pagkabutang ukon ang pag-amlig sini may daku nga epekto sa kabuhi sang minilyon. Ang kaanggid nga mga tublag nagluntad sang panahon ni Jesus. Ang lamharon nga manggaranon nga gumalahom namangkot kay Jesus kon ano ang dapat niya himuon agod maangkon niya ang kabuhi nga walay katapusan. Si Jesus nagsabat: “Kon buot ka maghimpit [ukon, mabug-os], lakat ka kag ibaligya ang imo pagkabutang kag ihatag sa mga imol kag may bahandi ka sa langit, kag kari ka sunod ka sa akon.” (Mat. 19:​16-23) Maathag nga ang iya madamong materyal nga mga pagkabutang ang nagtublag sa sining pamatan-on nga alagaron sing bug-os kalag ang Dios. Ang iya tagipusuon yara sa iya mga manggad. Nakahibalo si Jesus nga mangin maayo kuntani ang kahimtangan sang pamatan-on kon kuhaon niya ining mga tublag. Nagapugong ini sa iya nga mangin bug-os sa iya debosyon sa Dios. Kamusta ka? Nasapwan mo bala ang imo kaugalingon nga nagahinguyang sing mas madamo nga tion sa sekular nga palamugnan agod lamang mahuptan ang estilo sang pagkabuhi nga naandan mo? Naapektuhan bala sini ang imo pag-alagad kay Jehova? Ang imo materyal nga mga pagkabutang nagatabon bala sang mga interes sang Ginharian? (Mat. 6:24) Mapasimple mo bala ang imo kabuhi agod makahinguyang sing mas madamo nga tion sa espirituwal nga mga butang?

⁵ Kinaandan nga mga Butang sa Adlaw-adlaw nga Pagkabuhi: Kon indi kita maghalong, ayhan mangin masako gid kita sa kinaandan nga mga butang sa kabuhi nga magasugod kita sa pagpatumbaya sa espirituwal nga mga tulumuron. Dumduma ang mga tawo sang panahon ni Noe. Masako gid sila sa sosyal nga mga butang, nagakaon kag nagainom, nagapangasawa ukon nagapamana kag nagapaasawa ukon nagapapamana sang ila kabataan, nga wala nila pagsapaka ang nagapaandam nga mensahe ni Noe nahanungod sa nagahilapit nga Anaw. Antes nila ini mamulalungan, ang Anaw nag-abot kag naghapay sa ila nga tanan. Ang mga tublag nagkahulugan sing kalaglagan para sa ila. Si Jesus nagsiling: “Amo man ang presensia sang Anak sang tawo.” (Mat. 24:​37-39) Sa pagkamatuod, ang kalabanan nga mga tawo karon masako gid katama sa ila kaugalingon nga pagkabuhi sa pagtalupangod sa nagapaandam nga mensahe nga ginadala naton sa ila. Nagapakita sila sing makaluluoy nga dipagsapak sa espirituwal nga mga butang.

⁶ Ang imo bala pagkabuhi napun-an sang sosyal nga mga aktibidad nga ang espirituwal nga mga butang kubos kag kubos nga ginatalupangod? Sang isa ka bes, si Jesus gin-agda nga mangin bisita sa puluy-an ni Marta kag ni Maria. Si Maria namati sing maayo sa iya ginasiling. Sa pihak nga bahin, si Marta “natublag sa pag-atipan sa madamong katungdanan.” Dinagakaigo nga nabakala si Marta nga mangin maayo nga tagbalay. Napaslawan sia sa pag-apresyar sa kinahanglanon nga maghinguyang sing tion sa pagpamati kay Jesus. Malulo nga ginpakita ni Jesus kay Marta nga ang madamo nga mga aman indi kinahanglanon; dapat hatagan sing dugang nga igtalupangod ang espirituwal nga mga butang. Kinahanglan mo bala iaplikar ina nga laygay? (Luc. 10:​38-42) Nagpaandam man si Jesus nga dapat naton talupangdon ang aton kaugalingon agod indi kita magkaon sing sobra kag mag-inom sing lakas, nga nagapahina sang aton mga igbalatyag. Sa sining makahalanguyos nga takna sa maragtas sang tawo, dapat kita mangin alisto sing bug-os.​—Luc. 21:​34-36.

⁷ Paghimud-os sa mga Kalipayan: Ang isa sang pinakadaku nga mga tublag nga ginagamit sang Yawa sa pagpahilayo sa hulusayon sa Ginharian amo ang paghimud-os sa kalipayan. Ginabutang sang minilyon sa Cristiandad ang kalipayan sa lugar sang Dios. Ginapakamaayo nila nga mahalipay sa pila ka dibersion sa baylo nga mawili sing hanuot sa Pulong sang Dios. (2 Tim. 3:4) Sa pagkamatuod, ang maayo nga kalingawan kag liwaliwa indi malain. Apang ang paghinguyang sing madamo nga tion kada semana sa amo sina nga mga butang subong sang telebisyon, sine, video, isport, sekular nga balasahon, ukon mga hobby mahimo magapahanugot sa paglambo sang madaya nga tagipusuon kag magapahilayo sa aton gikan kay Jehova. (Jer. 17:9; Heb. 3:12) Paano ina matabo? Sa Cristianong mga miting, ayhan masapwan mo nga ang imo hunahuna nagalagaw; ayhan luyag mo nga matapos na ang miting agod makabalik ka sa paghimud-os sa kalipayan. Sa ulihi, masapwan mo ang imo kaugalingon nga nagapangita sing mga rason nga magtener sa balay sa baylo nga magtambong sa mga miting ukon magguwa sa latagon. Karon na ang tion sa pagpat-od sing maathag kon bala ini nga mga paghimud-os nangin mga tublag sa inyo kabuhi. (Luc. 8:14) Indi bala ayhan nga ang pila sa hamili nga mga oras nga ginahinguyang sa kalingawan mas maayo nga magamit para sa espirituwal nga pagtubo?

⁸ Nagakonsumo sang Oras nga mga Butang: Ang iban nadalahig sa mga panikasog nga malubad ang kinaandan nga mga problema sa modernong katilingban. Ang mga Cristiano dapat maglikaw nga madalahig sa walay katapusan nga mga debate sa kalibutan nahanungod sa sosyal nga mga hulusayon ukon sa walay pulos nga panikasog sini nga matadlong ang mga inhustisya. (Juan 17:16) Ini tanan bahin sang padugi ni Satanas nga ilikaw ang igtalupangod gikan sa laygay sang Biblia kag sa pangunang katunayan nga may isa lamang ka nagadugay nga solusyon​—ang Ginharian sang Dios. Kon nag-antos kita sing personal nga kahalitan ukon inhustisya, dapat kita magbantay nga indi mabalaka sa emosyonal ukon mangin matimaluson nga malipat kita kon sin-o kita​—mga Saksi ni Jehova. Labaw sa tanan, si Jehova amo ang ginhimuan sing sala, kag ang ngalan niya amo ang dapat naton pakabalaanon.​—Isa. 43:​10-12; Mat. 6:9.

⁹ Samtang luyag sang tanan nga huptan ang maayo nga panglawas, ang paghatag sing sobra nga igtalupangod sa daw walay katapusan nga mga teoriya kag mga remedyo nga ginahatag magahimo sa isa nga mangin sobra ka mahunahunaon sa mga butang tuhoy sa kapagros. Madamo nga mga tawo ang nagasakdag sa lainlain nga mga dieta, pagbulong, kag mga terapiya para sa pisikal kag emosyonal nga mga problema, madamo sini nagasumpakilay sa isa kag isa. Ang ginahimo sang isa tuhoy sa kapagros isa ka personal nga desisyon, apang indi pagtuguti nga maubos ang imo tion kag igtalupangod sa sina nga mga paghimud-os nga nagapabugnaw ini sa imo kakugi sa pagbantala sang Ginharian sang Dios subong ang matuod nga remedyo sa mga balatian sang katawhan.​—Isa. 33:24; Bug. 21:3, 4.

¹⁰ Mangin Malig-on, Dimationg: Samtang nagahilapit ang katapusan, dugangan ni Satanas ang iya mga panikasog nga matublag ikaw sa imo pag-alagad kay Jehova. “Magtindog kamo batok sa iya, magmalig-on sa pagtuo.” (1 Ped. 5:9) Paano? Dapat mo pakaunon ang imo kaugalingon sang mga panghunahuna sang Dios. (Mat. 4:4) Indi pagtuguti ang mga tublag sa kalibutan nga magakuha sa imo kag sa imo pamilya sang tion nga ginakinahanglan mo sa pagpamalandong kag sa paghunahuna sing malinong sa Pulong sang Dios. Sa tion sang pagkaon sang pamilya, hambali sing dungan ang makapalig-on nga mga eksperiensia kag ang iban pa nga espirituwal nga mga butang. Sunda ang mapinadayunon nga iskedyul sang personal nga pagtuon kag paghanda para sa mga miting.

¹¹ Kon ang mga paghimud-os mahimo nga magapalibog sang imo hunahuna, itugyan ang imo lulan kay Jehova sa pangamuyo. Magsalig nga nagaulikid sia sa imo. (1 Ped. 5:7) Tuguti ang paghidait sang Dios nga magbantay sang inyo tagipusuon kag mga ikasarang sa paghunahuna. (Filip. 4:​6, 7) Indi pagtuguti ang mga tublag nga magpaburon sang inyo espirituwal nga panan-aw. Hupti si Jehova sa atubangan ninyo sing dalayon, subong sang ginhimo ni Jesus. (Binu. 2:25) Hupti ang inyo panulok nga nasentro padulong sa inyo tulumuron, subong sang ginapalig-on sang Hulubaton 4:​25-27 sa aton: “Itulok ang imo mga mata sing matadlong sa unahan, kag itulok ang imo mga ilalakub sing matadlong sa una nimo. Tapana ang banas sang imo mga tiil, kag palig-una ang tanan mo nga dalanon. Dili ka magliso sa tuo nga kamot ukon sa wala.”

¹² Matutom nga tambungan ang tanan nga mga miting, kag disiplinaha ang imo kaugalingon agod mapamatian mo sing maayo ang panudlo gikan sa Pulong sang Dios. (Heb. 2:1; 10:​24, 25) Kag sa baylo nga himud-usan ang mga kalipayan nga ginatanyag sining malaut nga kalibutan, himua nga imo tulumuron nga huptan ang isa ka mapatubason nga ministeryo. Amo ini ang nagahatag sing mapinadayunon nga kalipay kag kaayawan. (1 Tes. 2:​19, 20) Sa katapusan, indi pagtuguti ang bisan ano ukon ang bisan sin-o nga magtublag sa imo gikan sa imo balaan nga pag-alagad. “Mangin malig-on kamo, dimationg, nga pirme madamo sing himuon sa hilikuton sang Ginuo, sa pagkahibalo nga ang inyo pagpangabudlay indi nga walay pulos sa Ginuo.”​—1 Cor. 15:58.