‘Maghanda Kamo’
1 Sa iya talalupangdon nga tagna tuhoy sa katapusan sining sistema sang mga butang, nagpaandam si Jesus batok sa pagkawili sa kalibutanon nga kabalaka sang kabuhi. (Mat. 24:36-39; Luc. 21:34, 35) Sanglit ang dakung kapipit-an sarang mahanabo sa bisan ano nga tion, kinahanglan gid nga pamatian naton ang laygay ni Jesus: “Maghanda man kamo; kay sa takna nga wala ninyo paghunahunaa magakari ang Anak sang tawo.” (Mat. 24:44) Ano ang makabulig sa aton tuhoy sa sini?
2 Paglandas sa mga Kabalaka kag mga Tublag: Ang isa sang mga tugalbong sa espirituwal nga dapat naton bantayan amo ang mga kabalaka sa palangabuhian. (Luc. 21:34) Sa pila ka kadutaan, ang kaimulon, pagkawala sing trabaho, kag ang mahal nga mga balaklon amo ang nagapabudlay sa pagtigayon sing mga kinahanglanon sa kabuhi. Sa iban nga mga duog, kinaandan na ang pagtipon sing mga pagkabutang. Kon materyal lang nga mga butang ang aton pirme kabalak-an, sarang naton madula ang pagtalupangod sa mga katunayan sang Ginharian. (Mat. 6:19-24, 31-33) Ang Cristianong mga miting nagabulig sa aton nga mapabilin ang aton igtalupangod sa sini. Tulumuron mo bala nga tambungan ang tagsa ka miting?—Heb. 10:24, 25.
3 Ang kalibutan karon puno sing mga tublag nga mahapos makakawat sang aton hamili nga tion. Ang paggamit sing kompyuter mangin isa ka siod kon ang isa maghinguyang sang indi makatarunganon nga tion sa paglagulad sa Internet, pagbasa kag pagpadala sing E-mail, ukon paghampang sa kompyuter. Madamo nga oras ang sarang mauyang sa telebisyon, mga sine, mga huyog, sekular nga balasahon, kag mga isport, amo nga wala na kita sing tion ukon kusog para sa espirituwal nga mga hilikuton. Bisan pa ang paglingawlingaw makapaumpaw sing temporaryo, ang pagtuon sa Biblia sing personal kag sang pamilya may dayon nga mga benepisyo. (1 Tim. 4:7, 8) Nagahinguyang ka bala sing tion sa pagpamalandong sa Pulong sang Dios kada adlaw?—Efe. 5:15-17.
4 Dapat magpasalamat gid kita nga nag-aman ang organisasyon ni Jehova sing programa sa pagtudlo sa espirituwal agod buligan kita “sa pagpalagyo sa sini tanan nga butang nga mahanabo, kag sa pagtindog sa atubangan sang Anak sang tawo”! (Luc. 21:36) Kabay nga himuslan naton sing bug-os ining mga aman kag “maghanda” agod ang aton pagtuo “masapwan nga sa kadayawan kag himaya kag kadungganan sa pagpahayag ni Jesucristo.”—1 Ped. 1:7.