Nagapabilin Bala Kita nga Nagamata—Nagalikaw sa mga Tublag?

¹ Sa Lucas 21:​36, si Jesus nagpaandam: “Magpabilin nga nagamata, . . . agod magmadinalag-on kamo sa pagpalagyo” sa mga kalamidad nga pat-od gid nga magaabot. Nagahulat ang kapahamakan sa sadtong ginatuyo sa espirituwal. Ginsambit ni Jesus ang pagkaon, pag-inom, kag ang mga kabalaka sang adlaw-adlaw nga pagkabuhi. Ngaa? Bangod bisan ining mga butang mahimo mangin mga tublag, kag ginatunaan sang makatalagam nga espirituwal nga pagkatuyo.

² Kinaandan nga mga Tublag: Ang iban nangin masako sa sobra nga paglingawlingaw, nangin mga nagiyan pa gani sa TV. Sa pagkamatuod, ang pagpangita una sa Ginharian wala nagakahulugan nga dapat naton likawan ang tanan nga porma sang kalingawan. Kon ginagamit sing haganhagan, ang kalingawan mahimo mangin mapuslanon. (Ipaanggid ang 1 Timoteo 4:8.) Apang isa ini ka tublag kon mangin importante ini nga butang sa aton kabuhi, nagabuhin sang aton tion, manggad, ukon sang pagpakigbahin naton sa pagbantala sang Ginharian.

³ Ang isa pa ka kinaandan nga tublag amo ang paghandum para sa dikinahanglanon nga materyal nga mga butang. Nalipatan sang iban ang espirituwal nga mga tulumuron bangod sang sobra nga paghingamo nga matigayon ang materyal nga mga pagkabutang agod maagom ang mas masulhay nga pangabuhi. Bisan pa kinahanglan naton ang “pagkaon kag panapton,” dapat kita magbantay batok sa pagpalambo sing gugma sa kuwarta. (1 Tim. 6:​8-10) Paagi sa indi pirme pagsentro sang aton mga mata sa mga interes sang Ginharian, mahimo kita mangin mapinatumbayaon sa pag-atipan sa espirituwal nga mga kinahanglanon sang aton pamilya kag mapaslawan sa pagtuman sang aton ministeryo.​—1 Tim. 5:8; 2 Tim. 4:5.

⁴ Ginapahanugutan naman sang iban nga ang ila ‘mga tagipusuon mabug-atan sang mga kabalaka sa kabuhi.’ (Luc. 21:34) Kon kaisa, ang kabalaka maeksperiensiahan bangod sang mga problema sa ikaayong-lawas kag pamilya. Apang inang personal nga mga kabalaka indi dapat pagtugutan nga magabuhin sang aton pagkaalisto sa madasig nagahinampot nga katapusan sining sistema sang mga butang.​—Mar. 13:33.

⁵ Mahalipay gid ang Yawa kon magamadinalag-on sia nga mahulog kita sa katuyo. Nahibaluan naton nga ‘ang adlaw ni Jehova magaabot kaangay sang makawat,’ gani kinahanglan nga “magpabilin [kita] nga nagamata kag nagahupot sang aton kaligdong.” (1 Tes. 5:​2, 6) Kon mamutikan naton ang mga tanda sang pagkatuyo sa aton kaugalingon, dapat naton gilayon “isikway ang mga buhat sang kadudulman.”​—Roma 13:​11-13.

⁶ Mga Bulig Agod Magpabilin Kita nga Nagamata: Ang pangamuyo kinahanglanon. Dapat kita magpangamuyo sa walay langan. (1 Tes. 5:17) Ang pagkasuod sa Cristianong kongregasyon ‘magapukaw sa aton sa gugma kag maayong mga buhat.’ (Heb. 10:24) Ang maayong mga batasan sa pagtuon magahupot sa aton nga “ginsagud sa mga pulong sang pagtuo.” (1 Tim. 4:6) Kon kita makugi, makasalig kita nga sarang naton malikawan ang mga tublag, ‘magapabilin nga nagamata, kag nagatindog nga malig-on sa pagtuo.​—1 Cor. 16:13.