Magbalik Kon Diin Nakita Ninyo ang Interes
1 Importante nga balikan naton ang napahamtangan naton sing mga magasin kag mga brosyur kag tinguhaan nga pukawon ang dugang nga interes. Ang aton kadalag-an sa sini nagasandig sa kon paano kita nagahanda sing maayo antes magduaw liwat.
2 Dumduma nga ang kalabanan nga mga pamatan-on nabalaka sa mga butang nga ginakabalak-an man sang mga hamtong. Ang Mayo nga mga guwa sang Awake! nagausisa sang karon nga mga problema gikan sa pagtamod sang mga pamatan-on. Ang mga artikulo makabulig sa mga pamatan-on kag sa ila mga ginikanan sa pag-apresyar kon ano gid ang importante sa kabuhi.
3 Kon napahamtang mo ang Mayo 8 nga “Awake!,” ayhan ginaplano mo nga sundan ini paagi sa pagtanyag sang Mayo 22 nga guwa. Mahimo ka makasiling:
◼ “Ang katapusan nga guwa nga ginbilin ko naghinun-anon sa topiko tuhoy sa paglaum para sa kabataan. Ang mga pamatan-on sa karon nagabatyag nga diutay lamang ang paglaum para sa palaabuton. Madamo sa ila ang nagapakita sang kaakig paagi sa rebelyuso nga paggawi. Apang ginasakdag sang iban ang mataas nga mga tulumuron. Ginapaathag sini nga artikulo sa pinakaulihi nga Awake! kon paano ginsakdag sang mataas nga hukmanan ang tindog sang isa ka tin-edyer. Sa banta ko apresyahon mo ang ginasiling sini.”
4 Ayhan mamat-od ka sa pagtanyag sing brosyur nga nagagamit sini nga pagpalapit:
◼ “Nalipay gid ako sa aton nagligad nga paghambalanay nahanungod sa palaabuton sining duta. [Ipakita ang larawan sa pahina 31 sang brosyur nga Ano ang Katuyuan sang Kabuhi?—Paano Mo Masapwan Ini?] Talupangda ining mga bersikulo sang Biblia sa pahina 29 kag 30 nga nagalaragway sang mga pagpakamaayo sang Ginharian sang Dios. [Magpili sing isa ka kasulatan, kag basaha ini gikan sa brosyur.] Luyag ko ini ibilin sa imo.”
5 Sa imo pagbalik, ayhan mahibaluan mo nga ang tagbalay may kaugalingon gali nga relihiosong literatura kag nagabatyag nga ini bastante na. Mahimo ka makasiling:
◼ “Bisan ano man ang imo relihion, kita tanan naapektuhan sang krimen, malubha nga balatian, mga problema sa palibot, indi bala? [Pakumentuha sia.] Sa banta mo may matuod gid bala nga solusyon sa sining mga problema? [Basaha ang 2 Pedro 3:13.] Ang katuyuan sang amon literatura ginasambit sa pahina 2 sang Ang Lalantawan. [Basaha ang isa ukon duha ka pinili nga dinalan.] Madamo nga tawo nga indi mga Saksi ni Jehova ang naluyag sa pagbasa sang amon mga publikasyon bangod sang malaumon nga mensahe nga ginaunod sini, nga napasad sa Biblia.”
6 Ayhan gamiton mo ini nga pagpalapit:
◼ “Sang nagligad ko nga pagduaw, ginhambalan naton ang nahanungod sa palaabuton nga mga paglaum para sa aton kalibutan. Ano ang ginahunahuna mo sa sini nga report? [Sambita ang pila sang ginakabalak-an karon nga mga balita.] Kon makabati ang mga tawo sing mga butang nga subong sina, nagapalibog sila kon diin nagapadulong ining kalibutan, indi bala? Nagapati kami nga ina nga mga butang nagapakita nga nagakabuhi kita sa ‘katapusan nga mga adlaw’ nga gintagna sa Biblia sa 2 Timoteo 3:1-5.” Magpadayon paagi sa pagpaathag sang isa sang mga subtitulo sa pahina 234-8 sang Reasoning nga libro.
7 Kon maghanda kita sing maayo kag magpakita sing matuod nga interes sa pagbulig, makasalig kita nga ang mga bunayag sing tagipusuon magapamati.—Juan 10:27, 28.