Mga Brosyur—Mapuslanon nga mga Kasangkapan Para sa Ministeryo
1 Ang isa ka lantip nga artisano nagadala sing lainlain nga mga kasangkapan, ang tagsa gindesinyo para sa isa ka espesipiko nga buluhaton. Subong mga manugbantala sang Ginharian, may yara kita lainlain nga mga brosyur agod buligan kita nga mangin lantip sa aton hilikuton. (Hulu. 22:29) Sa isa ka ganhaan mahimo nga masugilanon mo ang isa nga ginapung-awan. Sa isa pa ka ganhaan ang tagbalay nagahandom sang bunayag nga panguluhan, samtang ang isa pa nagapalibog kon may katuyuan gid sa pagkabuhi. Paano naton gamiton ang aton mga brosyur sa pagbulig sa sining mga tawo?
2 Kon nagatanyag sing brosyur nga “Nagaulikid Gid Bala ang Dios sa Aton?,” mahimo ka makasiling sing kaangay sini:
◼ “Ginabasol sang iban nga tawo ang Dios tungod sa pag-antos kag inhustisya sa kalibutan. Nagapangatarungan sila nga sanglit ang Dios labing gamhanan, kuntani gintapos niya ang pag-antos kon nagaulikid gid sia sa aton. Ano ang panghunahuna mo tuhoy sina? [Pasabta sia.] Ginapakita sang Salmo 72:12-14 nga ang Dios nagaulikid sa aton. Indi sia ang balasulon sa pag-antos kag inhustisya. Nanaad sia nga laglagon niya sa dili madugay ang mga nagabuhat sing malain. Ginapakita sini nga brosyur, Nagaulikid Gid Bala ang Dios sa Aton?, kon ano ang pagahimuon niya kag kon paano kita makabenepisyo.” Mahimo nimo mapadayon ang paghambalanay paagi sa mga komento sa pahina 27, parapo 22.
3 Kon ginagamit mo ang “Katuyuan sang Kabuhi” nga brosyur, ayhan luyag mo magsugod sa sining paagi:
◼ “Ginapalibugan sang halos tanan nga tawo ang nahanungod sa katuyuan sang kabuhi. Ini bala amo ang magkabuhi lamang sa 70 ukon 80 ka tuig kag nian mapatay? Ukon may labi pa bala sa kabuhi? Ano sa banta mo? [Pasabta sia.] Diri sa Salmo 37:29, makita naton ang matahom nga katuyuan sang Dios para sa tawo kag sa duta.” Basaha ang teksto, nian buksi ang ilustrasyon sa pahina 31, kag padayuna ang inyo paghambalanay.
4 Ang “Toloka!” nga brosyur sarang masugdan paagi sa pagbuklad sang bug-os nga ilustrasyon sa panghapin kag mamangkot:
◼ “Ano sa banta mo ang ginakinahanglan agod mangin kaangay sini tan-awon ang duta? [Pasabta sia.] Imposible para sa tawhanon nga panguluhan ang magpaluntad sing amo sina nga kalibutan. Apang, ang Biblia nagapasalig sa aton nga ‘himuon [sang Dios] nga bag-o ang tanan nga butang.’ [Buksi ang pahina 30, kag basaha ang Bugna 21:3, 4.] Ini nga brosyur magabulig sa imo nga mahibaluan kon ano ang dapat mo himuon agod makapuyo sa sinang bag-ong kalibutan.” Buksi ang pahina 3, kag ipasundayag kon paano kita nagadumala sing isa ka pagtuon sa Biblia.
5 Mahimo nimo gamiton ini nga pagpalapit sa “Kabuhi sa Duta” nga brosyur:
◼ “Madamo nga tawo ang nagahunahuna nga magakadto sila sa langit agod maagom ang kabuhi nga walay katapusan, apang ano ang ginahunahuna mo nahanungod sa pagkabuhi sa duta sing dayon? [Pasabta sia.] Ginasugid sa aton sang Biblia kon paano naton maagom ang kabuhi nga dayon.” Basaha ang Juan 17:3. Nian ipakita sa tagbalay ang ilustrasyon #49, kag mamangkot: “Luyag mo bala magkabuhi sa isa ka kalibutan nga kaangay sini?” Itanyag ang brosyur, kag maghimos sing isa ka pagduaw-liwat.
6 Ang mga brosyur nagahinun-anon sang suno-sa-tion nga mga topiko, nagasabat sang mga pamangkot sang tawo, kag nagahatag sing lugpay. Nagagamit sing lantip sining mga kasangkapan, mabuligan naton ang mga sinsero nga “makadangat sa sibu nga ihibalo sang kamatuoran.”—1 Tim. 2:4.