Pagatun-an Naton Liwat ang Revelation nga Libro

¹ Ang tig-ulo nga pahina sang Revelation nga libro nagakutlo sang Bugna 1:​3: “Malipayon ang nagabasa sing mabaskog kag yadtong nagapamati sa mga pinamulong sining tagna.” Ang kalipay sang katawhan ni Jehova karon pat-od nga ginpadaku sang modernong-adlaw nga mga katumanan sang mga tagna sa tulun-an sang Bugna. Ang aton presente nga paghangop sa mga hitabo sa “adlaw sang Ginuo” ginpaathag sa Revelation​—Its Grand Climax At Hand! (Bug. 1:10) Paagi sa pagtuon sa sini, nahangpan naton ang importante nga mga hitabo sa kalibutan, ilabi na yadtong nagadalahig sa bug-os kalibutan nga emperyo sang butig nga relihion kag ang nagaabante nga pagmartsa sang mga pungsod padulong sa Armagedon subong man ang pagpakig-angot ni Jehova sa iya katawhan.

² Sa sunod nga Enero sugdan naton tanan nga tun-an ini nga libro sa Cebuano, Hiligaynon, Iloko, kag Tagalog nga mga pagtuon sang kongregasyon sa libro sa ikatlo nga kahigayunan kag ang iskedyul igahatag sa Ang Aton Ministeryo sa Ginharian sa husto nga tion. Apang, ginahatag ining abanse nga pahibalo agod ang tanan nga bag-uhan nga wala sang kopya sini nga libro mapat-od nga makatigayon sang isa ka kopya nga magamit sa tion sang pagtinuon.

³ Para sa madamo sa aton, ang pagtuon sa sini nga publikasyon indi lamang makapalab-as sang aton hunahuna sa mga punto nga ginhinun-anunan na sang nagligad kundi magapatalom man sang aton espirituwal nga pagtamod sa bag-o nga mga hitabo nga nagadul-ong sa adlaw sang pagdaug ni Jehova batok sa iya mga kaaway. Ang linibo nga nagbuylog sa aton sang nagligad nga duha tubtob tatlo ka tuig pat-od nga makabenepisyo gikan sa sining ikatlo nga pagbinagbinag sang Revelation nga libro sa Pagtinuon sang Libro sang Kongregasyon.

⁴ Pat-ura nga maghanda sing maayo kag makigbahin kada semana, sugod sa Enero 30, 1995. Pakamaayuhon gid kamo sing daku sa tion nga mahangpan ninyo sing mas maathag ang kahulugan sang mga hitabo sa kalibutan sa kapawa sang mga tagna sa Bugna.