Bugna—Malapit Na ang Mahimayaon nga Talipuspusan Sini!
1 “Malipayon ang nagabasa sing mabaskog kag ang mga nagapamati sang mga pulong sini nga tagna, kag nagatuman sang mga butang nga nasulat sa sini; kay malapit na ang gintalana nga tion.” (Bug. 1:3) Ini nga mga pulong nagapadaku sang kapuslanan sang tulun-an sang Bugna, ilabi na kay nagapuyo kita sa gintalana nga tion nga ang kalabanan sini nga mga tagna matuman. Sing nagakaigo, sugdan naton ang pagtuon sa libro nga Bugna—Malapit Na ang Mahimayaon nga Talipuspusan Sini! sa Pagtinuon Sang Kongregasyon sa Libro sugod sa Enero 8, 2007.
2 Sang nagligad nga gintun-an naton Ang Talipuspusan Sang Bugna nga libro sa Pagtinuon Sang Kongregasyon sa Libro, nagbag-o na ang danyag sang kalibutan sa madamong paagi. (1 Cor. 7:31) Dugang pa, madamo sang nangin mga manugbantala sang maayong balita sang Ginharian ang wala pa nakapanginpulos sa teksto por teksto nga pagbinagbinag sang tulun-an sang Bugna. Ang pagtuon sa Ang Talipuspusan Sang Bugna nga libro makabulig sa aton tanan nga magpabilin nga nagamata sa palaabuton nga hitabo.—Bug. 16:15.
3 Mangin determinado sa pagtambong kada semana. Ini nga materyal indi lamang makabulig sa aton sa pagbantay kundi mabuligan man kita sang mga mensahe ni Jesus sa pito ka kongregasyon agod malikawan ang mga kahimtangan kag mga sirkunstansia nga mahimo magaapektar sa aton espirituwalidad kag pagministeryo.—Bug. 1:11, 19.
4 Maghanda Sing Maayo: Antes sang pagtuon sa libro, basaha ang mga teksto sa tulun-an sang Bugna nga pagabinagbinagon. Talupangda ang Makasulatanhon nga pagpangatarungan sa materyal nga pagabinagbinagon. Tinguhai nga mahangpan ang importante nga mga punto agod malab-ot ang tagipusuon. (Neh. 8:8, 12) Maghinguyang sing tion sa pagpamalandong kag pamangkuta ang imo kaugalingon sing: ‘Ano ang ginasugid sini sa akon tuhoy kay Jehova kag sa katumanan sang iya katuyuan? Paano ako makapahisuno sa iya katuyuan kag makabulig sa iban?’
5 Nobenta’y dos anyos na ang nagligad sang nagsugod ang “adlaw sang Ginuo” sang 1914. (Bug. 1:10) Ang talalupangdon nga mga hitabo sa duta nga gintagna sa Bugna malapit na lang matuman. Ang pagtuon sa Ang Talipuspusan Sang Bugna makapaumpaw sa aton tagipusuon kag hunahuna kag magapabakod sang aton pagtuo nga malapit na ang “inaway sang daku nga adlaw sang Dios nga Labing Gamhanan” kag ang bag-ong kalibutan.—Bug. 16:14; 21:4, 5.