Buligi Ang Mga Indi Eksperiensiado Sa Paghangop
1 Sa aton hilikuton nga paghimo sing disipulo, ginatudlo naton sa iban ang ginapatuman sang Dios sa ila. (Mat. 28:19, 20) Ang kadalag-an sa sining hilikuton indi matakus paagi sa mga oras nga nahinguyang, sa literatura nga napahamtang, ukon sa mga pagtuon sa Biblia nga nasugdan. Matigayon naton ang katuyuan sini kon nahangpan kag ginaaplikar sang mga tawo ang ila natun-an.
2 Ang pagbulig sa iban sa espirituwal nagalakip sang ‘pagpahangop sa mga indi eksperiensiado.’ (Sal. 199:130) Ang mga tagipusuon nagakatandog kag ang mga tawo mapahulag lamang kon ila ‘ini mahangpan.’ (Mat. 15:10) Samtang nagasangkad ang aton hilikuton, maapresyar naton sing labi pa ang kinahanglanon nga maghambal kag magtudlo sing simple. Amo sina kon ngaa ginbalhag sang Sosiedad ang brosyur nga Ano ang Ginapatuman sang Dios sa Aton? Ang mga leksion malip-ot, ang mga tinaga simple, kag ang instruksion madali mahangpan.
3 Ining brosyur pagagamiton upod sa mga magasin sa mga bulan sang Abril kag Mayo. Ginapanugda nga maghimo kamo sing kahimusan nga matanyag ang mga magasin subong sang kinaandan sa mga Sabado apang gamiton ang brosyur sa iban pa nga mga adlaw sang semana. Dalha ang brosyur sa mga tawo nga nagbaton anay sing literatura. Dumduma nga mabuligon ini labi na sa pagtudlo sa mga bata kag sa mga limitado sing ikasarang sa pagbasa.
4 Gamita ang Simple nga Paagi: Kon nagatanyag sing Ginapatuman nga brosyur, patuhuyi ang pahina 2, diin ginapaathag sini nga “ining brosyur gindesinyo subong isa ka kurso sang pagtuon sa Biblia.” Ipakita sa parapo 3 sa pahina 3 kon ngaa dapat tun-an sang tawo ang Biblia. Pukawa ang iya interes paagi sa pila ka titulo sang leksion nga nagasugid sang simple nga mga kamatuoran sang Biblia. Ipasundayag kon paano ginahimo sini nga brosyur ang pagtuon nga makalilipay, kag sugiri sia nga buligan mo sia sing personal.
5 Magdumala sing Isa ka Progresibo nga Pagtuon: Indi lamang ang magdumala sing mga pagtuon ang tulumuron naton—luyag naton maghimo sing mga disipulo nga mangin malig-on nga mga sumalakdag sang matuod nga pagsimba. Ang brosyur sarang matuptupan sa sulod lamang sang pila ka semana kag dapat magdul-ong sa isa ka pagtuon sa Ihibalo nga libro. (Tan-awa ang footnote sa pahina 31.) Sugod sa umpisa, buligi ang estudyante nga makilala ang organisasyon ni Jehova. (Tan-awa ang Reasoning nga libro, pahina 283-4.) Ipadaku ang kabilihanan sang mga miting sa kongregasyon, kag ipaathag nga ang pagtambong sa sini nagahatag sing tul-id nga paghangop sa kon paano himuon ang matuod nga pagsimba.—Heb. 10:24, 25.
6 Ang pagpakigbahin sing bug-os sa sining pinasahi nga hilikuton sa Abril kag Mayo magapahalipay sa aton samtang ginabuligan naton ang mga sinsero nga ‘makatigayon sing paghangop’ nga nagadul-ong sa kabuhi.—Hulu. 4:5.