Ginagamit Mo Bala ang Ginapatuman nga Brosyur sa Pagsugod sing mga Pagtuon?
1 Nakahibalo ka bala nga kon regular ka kag sistematiko nga nagahinun-anon sa Biblia, bisan malip-ot lang upod sa isa ka interesado nga tawo kag makobrehan ninyo ang materyal sa isa ka ginrekomendar nga publikasyon, nagadumala ka na sang isa ka pagtuon sa Biblia? Huo, makabig ini nga isa ka pagtuon sa Biblia bisan pa ang pagtuon ginahimo sa ganhaan ukon paagi sa telepono. Ngaa indi maghimo sing pinasahi nga panikasog sa Mayo kag Hunyo nga makasugod sing isa ka pagtuon nga nagagamit sing Ginapatuman nga brosyur?
2 Maghanda Agod Magmadinalag-on: Kon nagatanyag sang Ginapatuman nga brosyur, pat-ura nga daan sa hunahuna kon ano ang luyag mo pagahambalan. Kon nagaduaw ka liwat, panumduma ang ginhambalan ninyo sang una mo nga pagduaw. Pamangkuta ang imo kaugalingon: ‘Diin ayhan nga mga parapo sa brosyur ang akon padakuon agod mapalambo ko ang paghinun-anon nga magaresulta sa isa ka pagtuon sa Biblia?’ Kon nagapamalaybalay ka, binagbinaga kon ano nga mga tema ang makaganyat sa isa ka tin-edyer, sa isa ka tigulang, sa isa ka lalaki, ukon sa isa ka babayi. Repasuha ang mga topiko sa brosyur, kag magpili sing isa ka tema nga makapukaw sing interes. Pagkatapos mapat-od kon paano magpalapit, ensayuha ini sa madamo nga beses. Amo ini ang isa sa mga yabi agod magmadinalag-on.
3 Ang suplemento sining guwa sang Ang Aton Ministeryo sa Ginharian nagahatag sing walo ka “Mga Panugda sa Pagpresentar Sang Ginapatuman nga Brosyur.” Ang kahon nga “Ang Direkta nga Pagpalapit” nagapakita kon paano gamiton ang brosyur sa pagsugod sang mga pagtuon. Mahimo mo sundon ining una nga panugda:
◼ “Nakahibalo ka bala nga sa pila lamang ka minuto, sarang mo makita ang sabat sa isa ka importante nga pamangkot sa Biblia? Halimbawa, ngaa ayhan madamo sing relihion ang nagapangangkon nga Cristiano? Nagapalibog ka bala tuhoy sini?” Pagkatapos sia makasabat, buksi ang leksion 13 kag binagbinaga ang parapo uno kag dos. Kon ginatugot sang tion, basaha kag binagbinaga ang isa ukon duha ka kasulatan. Nian basaha ang ikatlo nga pamangkot sa ibabaw sang pahina, kag magsiling: “Ang nabilin nga bahin sang leksion nagapatalupangod sang lima ka tanda sang matuod nga relihion. Nalipay ako nga magbalik kag binagbinagon ini upod sa imo.”
4 Mangin Determinado: Panginpusli ang tagsa ka kahigayunan nga makasugod sing pagtuon sa Biblia paagi sa Ginapatuman nga brosyur. Pangabaya ang pagpakamaayo ni Jehova. (Mat. 21:22) Paagi sa imo determinasyon, mahimo mo maeksperiensiahan ang kalipay nga mabuligan ang isa nga magbaton sing maayong balita!